《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第二十九章（更新版）
作者 庄司总一着 赖永祥指导 林俊育台译 2017.05.21
Hit工，安子为tio̍h beh看阿明ê情况，下晡就去农场；清文因为tio̍h出席事业上ê重要会议，所以只有清子一个人留tī厝里。老母有招她做伙去农场，m̄-koh，清子因为惊kah阿明见面ê痛苦，所以无做伙去。其实她一直有teh想beh去，m̄-koh，因为无欢喜老母ê指点，她有小khóa thiau故意beh对老母使gāi-gio̍h。老母tiāⁿ-tiāⁿ teh试探她ê心意，问她对阿明ê想法。她真肯定回答讲kah意ê时，老母to̍h随时露出无欢喜ê面，koh心内不安讲：
「阿明是你ê叔伯兄哥，血缘真接近。」
「Ai-ah，是án怎bē-sái kah意伊？我是独生女，无阿兄mā无小弟，我真无伴neh。」
清子thiau工kek「gín-á人m̄-bat tāi-chì」，假做m̄知半项，in老母to̍h安心笑出来。
清子对老母ê过头操烦kah弯弯曲曲ê讲法，mā有不满。安子虽然了解清子ê「早熟」，mā有读真chē文艺ê册，有相当ê理解力，m̄-koh，iáu未十七岁，tī人生来讲，她iáu是未成熟ê时期，根本都无去想到。Chit点笑笑leh to̍h准soah，m̄-koh，对清子ê无关心家己ê大事，做老母ê会无欢喜。清子家己绝对m̄是随便消费热情kah感情ê cha-bó͘ gín-á，是一个规规矩矩思考问题来行动ê人；她mā无真kah意家己ê理智性格，kan-taⁿ无满意寂寞ê情景。所以做老母ê安子会急kah bē放心。老父kā无应该藏起来ê phoe收藏起来，koh kek m̄知ê态度to̍h是对家己无信心ê极端ê例之一。清子有teh怀疑：是m̄是有可能是父母两人狼狈为奸án-ne teh设计？ 她坐tī厝里走廊ê藤椅，teh读陶渊明ê诗。她读ê女子学校无teh教汉文，m̄-koh，因为她tī台湾家庭teh生长，所以对陶渊明汉文诗ê正确意思虽然bē真明白，她iáu是感觉会读出它ê含意。
归去来兮。田园将芜胡不归。
阿明ài诵读chit首《归去来兮》。伊chit-má真正tńg来à，he m̄是马来西亚ê Jio-ho-l州橡树园，mā m̄是陈清公司ê农场，却是倒tńg来伊家己荒芜（hong-bû）ê心灵田园。
觉今是而昨非。
清子m̄-bat有过hiah-ni̍h怜惜阿明，她ǹg望伊ē-tàng明白以前ê m̄-tio̍h。她m̄知伊疼她hiah-ni̍h深；当她知影ê时，非常感动。清子想tio̍h若伊是少年维特，她家己to̍h是夏绿蒂。她感觉有一种无仝款ê心情，m̄-koh，清子想：疼无一定tio̍h要求回报，kám m̄是？疼无具体ê形式，kám有可能？阿明一再强调：我无想beh kah你结婚；m̄-koh，若无形式ê时，伊ê心kám koh会有súi koh崇高ê疼？He真明显是tio̍h kā人提升到神ê层次chiah有可能。伊应该会觉悟，了解chit种kā人性估计siuⁿ koân ê想法是错误ê。
清子m̄知影阿明chit-má ê心境如何？伊实在真可怜，kah-ná一只触角(chhio̍k-kak)断去koh翼lak去ê蝶á。Chit只蝶á迷路飞入来厝内，它想beh采花瓶ê花粉是m̄-tio̍h ê，它应该赶紧飞出去窗á外，飞到它应该去ê所在。M̄-koh，它kám chhōe会tio̍h phah开ê窗á？若chhōe无，头壳会去lòng tio̍h玻璃窗，可怜ê蝶á就会lak落来土脚，tú亲像维特用手枪自杀án-ne....。
若是阿明mā发生chit种tāi-chì....。如果阿明自杀，he会是gōa-ni̍h-á悲惨ê tāi-chì，m̄-koh，mā是无koh有比这koh khah súi ê tāi-chì。清子ê心情非常矛盾，她不安kah心肝头phi̍h-pho̍k-chháiⁿ。 清子忽然注意tio̍h阿婶玉帘tùi庭院ê后门出现。 玉帘有tāi-chì beh来拜托安子，知影她无tī-.leh，露出真失望ê款。她kah-ná有啥物重大ê困难，面色紧张，所以清子问她是发生啥物tāi-chì？玉帘看起来情绪失控ê款，她kā侄女掠tiâu，绵绵不断讲出她ê tāi-chì。
庆祝阿妈七十大寿了后ê隔tńg工，玉帘tùi教会tńg来，行入家己房间ê时，看tio̍h长男景仁tī房间khiā-teh等她tńg来；这比阿明憔悴（chiâu-chūi）koh穿插lām-sám tī寿宴上出现koh khah hō͘ 她tio̍h惊。景仁是tùi远远ê东京tńg来，而且无事先通知；伊到底是tùi tó位入来khiā tī房间ê leh？她惊一tiô，掠准是看tio̍h幽灵leh。景仁并m̄是想beh án-ne突然出现来hō͘ 老母tio̍h惊á是惊喜，伊chit-má为tio̍h cha-bó͘ gín-á ê tāi-chì当teh苦恼，需要一千圆chiah ē-tàng解决。 为tio̍h chit件tāi-chì，伊二个月前to̍h写phoe ǹg父母求助，m̄-koh，老父景文硬m̄答应in kiáⁿ ê要求；老母玉帘是一屑á办法都无。In kiáⁿ确实是m̄-tio̍h，m̄-koh，老父mā siuⁿ过冷淡、无情。Chit-má m̄是来讲tāi-chì ê善恶ê时chūn，现实ê问题是：老父若无beh替伊处理善后，tāi-chì无论如何都无法度解决。玉帘án-ne极力苦劝in翁，m̄-koh，景文认为一直答应gín-á ê要求，父母会失去尊严；而且景文根本都无kā in kiáⁿ会专工tùi东京tńg来ê tāi-chì khǹg tī心内，伊认为in kiáⁿ一向lóng会kā tāi-chì pòng大，用án-ne来ǹg父母榨取khah chē钱银来开，其实根本都无啥物了不起ê tāi-chì。M̄-koh，玉帘认为伊tùi hiah远tńg来，绝对m̄是虚假ê tāi-chì，一定是真正陷入无法度家己解救ê困境。老母一直感觉in kiáⁿ真可怜，希望马上hō͘ 伊所需要ê钱，m̄-koh，她虽然是好额人ê正夫人，橐(lak)袋á内却无几sián钱。In小弟成做医生了后，tī街áteh开业，m̄-koh，tī伊学生时代欠学费ê时，景文薄情无kā伊资助半sián钱，chit-má iáu teh怨恨，所以玉帘无面子thang ǹg伊开嘴；因为自尊心，她mā m̄愿ǹg阿妈阿娇开嘴。结局，她只好kah丈夫参详，恳求伊处理，结果soah引起父á-kiáⁿ ê冤家。
景文火大，伊从来m̄-bat出手phah人，chit pái竟然雄kài-kài kā景仁siàn嘴phóe。景仁受phah了后，就离家出走。昨hng玉帘收tio̍h伊ê phoe án-ne写：若无设法hō͘ 对方让步，一定会有诉讼；in ê律师会来台湾抗争，到时to̍h m̄是一千圆á是二千圆ē-tàng解决ê，而且对陈家ê名声mā无好。阿爸凡事lóng算盘tiak kah仁仁仁，对chit点无可能bē了解。若是阿爸iáu是坚持无beh处理，我mā有决心一世人无beh tńg去厝里。我知影chit种不孝ê罪真重，m̄-koh，穷鸟入怀，猎人kám会无beh掠？ 玉帘收tio̍h in kiáⁿ寄来chit种强迫哀求ê phoe，m̄知如何是好？结果她想tio̍h siōng有可能帮助她解决问题ê是安子，所以chiah来chhōe她。玉帘chit-má对并无任何帮助ê清子绵绵á讲，m̄-koh，安子无tī-.leh，mā是无啥办法；玉帘三声无奈，非常失望。
「实在hō͘ 人心不安neh。M̄-koh，阿婶，chiah-ê钱一定chhoân会到ê。」
「多谢！Lín老母是一个好人，一定会想办法帮忙，m̄-koh，她chit-má人tī农场。」
「Kám hiah-ni̍h急？」
「我tú-chiah有讲，景仁讲伊一世人无beh koh tńg来厝里。伊陷入困境，我感觉伊真正会án-ne做。Beh án怎chiah好leh？我非常不安....。」
「我了解。阿婶，你小等leh。」
清子án-ne讲了，就行入去内面。 内面沿走廊直角ê oat角，五年前有加起一间西洋式ê房间，当做美术品ê陈列室。室内ê天花板开一个透明窗，四周围ê壁lóng是玻璃门ê陈列架。In老父tī心情爽快ê时，若无to̍h是心情无爽快ê时，á是非常无闲ê时，á是siuⁿ过清闲ê时，siōng ài去hit间陈列室；hiah-ê古代ê瓷á成做伊ê心灵粮食。清子对古董之类ê无兴趣，mā m̄-bat，m̄-koh，若入去内面to̍h会心情bē bái。Hiah-ê花瓶、盘á kah碗，in ê大细、色彩kah光泽lóng无仝款，虽然chhìn-chhái排列，m̄-koh，会散发出全体自然融合ê气氛。
总是，chit工ê陈列室却呈现出一种无融合ê奇怪气氛；中央ê桌á顶有五六个盒á四散khǹg-.leh，kah-ná目录ê印刷品顶面有红笔做记号，另外一张纸顶面有计算价数ê字迹。果然照清子所猜测ê，前几工以来，老父kah老母恬恬á入去chit间房间，kah-ná teh处理啥物tāi-chì，大概是soah尾决心beh出卖chiah-ê美术品。既然陈清公司ê状态hiah-ni̍h紧急，ná会无beh hō͘ cha-bó͘-kiáⁿ知影neh？这是大人ê tāi-chì，gín-á m̄免知影；这可能是出tī天下父母心，in无愿意hō͘ kiáⁿ儿担心厝里ê tāi-chì。M̄-koh，清子想讲家己是独生女，无其他ê兄弟姊妹，厝里ê困难tio̍h大家来同甘共苦chiah tio̍h，m̄-koh，in父母却kek kah ná无tāi-chì，两人入来chit间房间teh秘密安排。清子想tio̍h阿明寄hō͘ 她ê phoe被藏起来，她感觉真无趣味；chit时反抗老父ê心koh khah强烈，她忽然想beh趁chit-ê机会来报复一下。清子并无经过啥物深思，只不过是出tī gín-á ê好sńg心理，就kā一个古董the̍h出来。
He是一个小khóa带黄色，看起来kah-ná是象牙制品ê白瓷花瓶，是宋朝ê瓷á，á是啥物稀有ê珍品等等，bat成做in厝里ê话题。
清子讲kā它卖掉来换做现金，m̄-koh，玉帘听了，心内踌躇。这是清文所珍惜ê古董，若大主大意kā它卖掉，她有所顾虑。Koh再讲，玉帘对古董lóng m̄ bat，chit-ê花瓶看起来一点á都无豪华，bē hō͘ 人有趣味，kám会值得gōa chē钱？总是，她chit-má已经火烧到目眉ā，koh因为hit-ê花瓶看起来无啥珍贵，颠倒hō͘ 她感觉khah轻松。清子koh讲，in老父疼cha-bó͘-kiáⁿ，不管她做啥物tāi-chì，老父lóng bē受气，就kā花瓶hō͘ 她。玉帘phah算beh去查看bāi，看ē-tàng卖gōa chē钱，所以就kā花瓶收落来。
