《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第二十八章（更新版）
作者 庄司总一着 赖永祥指导 林俊育台译 2017.05.14
陈家kā阿妈祝寿已经过了，秋天mā jú来jú深。Tùi chit时到明年三四月，天kah人kah-ná lóng bē记得雨ê款，空气真ta燥；台湾南部ê ta燥季节一直teh持续。Tùi春天到热天，因为充足ê雨水，树根吸收真饱ê水分，充满活命ê绿色显然koh khah旺盛。
总是，只有二十岁ê阿明，却kah-ná叶á落了ê树木，失去气力。伊m̄-nā无亲像大鹏鸟án-ne tī南方teh飞，颠倒tī陈清公司ê农场，由in老母照顾，tī hia teh静养。清文in知影阿明有强度ê神经衰弱，所以暂时hō͘ 伊休学，thang hō͘ 伊ē-tàng充分修养身心。
Tī农场修养了后，阿明ê心情加镇定真chē，消瘦ê身躯mā有看tio̍h小khóa生肉。本来jû-chháng-chháng ê头毛mā剪kah真整齐，lán-si剃ê嘴须chit-má已经剃kah清气清气，回复原来ê面貌，看起来有teh渐渐回复健康ê款。伊kah老母两人静静过日子，帮助伊kā沉默ê心情转变做平和。 春鸾有奴隶一般ê个性，in kiáⁿ本来无kā她掠做一回事，并且怜悯她，m̄-koh，kah她亲近了后，伊iáu是有感觉tio̍h老母ê温暖。
阿明暂时被禁止读册，只有kah老母讲话，所以两人谈起chē-chē tāi-chì。伊甚至连对清文都m̄-bat提起ê民族问题mā the̍h出来kah老母谈论，讲kah热phut-phut ê时，to̍h讲出He-ge-l（译注：Georg Wilhelm Friedrich Hegel，1770~1831，德国哲学家）哲学，mā讲tio̍h Heh-seh（译注：Hermaⁿ Hesse，1877-1962，德国作家）á是Tho-mà-suh Mán（Paul Thomas Maⁿ，1875~1955，德国小说家）ê作品，hō͘ m̄-bat chiah-ê tāi-chì ê老母听kah雾sà-sà。Chit时，阿明chiah发觉家己ê头脑真正有一点á ku怪，致使hō͘ 人看做是teh起siáu，这是理所当然ê；伊忽然感觉真pháiⁿ势。老母mā bē免会认为阿明ê脑筋有一点á失常，她无法度理解in kiáⁿ对叔伯小妹ê hit份热情。自古以来，近亲结婚to̍h被严格禁止，经过几千年ê习惯，差不多已经成做生理上ê排斥；准讲是对近亲有淡薄á ê情意，á是有爱恋ê感情，he是无法度实现ê，甚至会hông认为是hàm古ê tāi-chì。总是，in kiáⁿ是新时代ê人，m̄-nā知影三等亲以上ê婚姻tī法律上chiah是自由ê，而且有意识tio̍h「新皮囊tio̍h贮新酒」ê道理。另外一方面，对阿明来讲，老母怜悯疼惜丈夫ê细姨是hàm古ê tāi-chì。春鸾常常对伊讲起久长倒tī离chit-ê农场八公里ê山坪ê阿阵，她hit种心情to̍h kah-ná teh对待家己ê小妹。春鸾若讲tio̍h她kah瑞文tī天phú光ê时埋葬阿阵ê经验，她ê目kho͘ lóng是有目屎含leh。
「Án-ne，你并无爱阿爸。阿母家己可能认为家己有teh爱阿爸，其实并无爱伊。」
阿明总是án-ne讲。伊认为爱情既然已经脱线à，夫妻之爱kám iáu有法度画出完全ê圆形？He是无可能ê。In老母只不过是用无意识ê虚伪来lám-tiâu家己无知ê幸福niā-niā；á是讲，她明明知影，mā是用忍耐ê心teh过kah-ná附属品ê卑屈生活？总是，春鸾ê心却两项lóng m̄是。
「我bē了解你所讲ê话。为啥物你tio̍h kā tāi-chì想kah hiah-ni̍h复杂neh？我kah意lín阿爸，mā kah意阿阵，án-ne bē bái ā。阿阵mā是咱厝里ê人，你tio̍h去她ê墓致意chiah tio̍h ā；厝里ê人tio̍h互相和好chiah好ā。」
阿明tùi老母ê身上看tio̍h她对旧传统顺从ê款式。她绝对bē tī思想上伤脑筋，mā bē偏激；她ê价值观若beh讲是tùi人ê个性来ê，不如讲是tùi家庭，á是社会chit-ê复合体。若kah老母比较起来，伊ê价值观根本to̍h是西欧ê自我中心ê疼，伊对事物lóng是用个人单数来算。像老母chit种东洋泛神式ê疼，阿明并m̄是m̄知，m̄-koh，tī伊改变以前ê态度来接近老母以后，伊发见她hit种自然koh包容无限ê疼，hō͘ 伊感觉真困惑，而且感觉家己所相信ê至koân ê疼，未免有khah粗野，致使伊就怨叹家己kah老母bē比得，soah感觉幻灭。
Chit一工是春鸾陪阿明来农场静养以来，第一pái去阿阵ê墓。 春鸾苦劝阿明做伙去，m̄-koh，阿明无论如何都无想beh去。总是，伊家己一个人留落来，忽然感觉寂寞，所以伊就背hip相机出门。
伊经过温室边á，内面无人ê款。Kā阿妈祝寿hit暝，游德仁受tio̍h景文hit款ê khau洗，老实ê伊mā忍受bē-tiâu；虽然清文有kā伊慰留，iáu是无效，伊已经突然离职去à。根据阿伯所讲，伊离开陈清公司以后决心beh去南洋。游德仁留落来伊幻灭ê痕迹；温室内ê植物照常puh芽，一片绿色满满。阿明去探视温室内面，忽然感觉有一kóa嫉妒。平常时看起来老实ê人却相当有魄力kah决断力，颠倒是家己认为真有豪气ê家己，soah tī chia无tāi-chì闲闲。伊想beh休学，去马来西亚ê Jio-ho-l州ê橡树园工作，这并m̄是无根据ê想法，m̄-koh，chit-má soah hông看做是戆人teh讲siáu话。伊ê梦早to̍h褪色去à，这真是无可奈何ê tāi-chì。
以后会án怎leh？回复健康了后，我beh koh再tńg去学校，然后去读大学。毕业了后，我会成做一个手摸人体á是机械ê人。少年ê时虽然有相对应ê热情kah批判精神，无gōa久to̍h会建立平凡ê家庭，有小khóa ê钱财，然后过一个无梦想、无冒险koh无味无素ê生活。这是kah chit-ê岛上大多数ê少年人所行ê路仝款，我kám无法度行另外一条无仝款ê路？
阿明行出农场，沿河堤无目的teh行；伊kah-ná想讲只要teh行，to̍h ē-tàng发现清楚ê生活方法。平凡mā无要紧，m̄-koh，无法度忍受ê是我hit-ê pháiⁿ看ê青春姿态，众人会kā我当做话题来耻笑；老父瑞文to̍h是án-ne teh kā我耻笑，连清子都用阮老父来kah我比并。总是，koh khah无法度宽容ê是：我家己实际上是一个值得人耻笑ê人。若是亲像老父瑞文án-ne，只是一时ê to̍h起来，随时又koh hoa去，án-ne免讲mā是会hông耻笑，甚至连家己都不得不会笑家己neh。究竟kám是án-ne？Kám有chit种ê情形？
阿明失去自信，koh khah感觉失望，m̄-koh，伊随时koh夺回自信，koh再骄傲起来，不知不觉大步向前行，oat过无koân ê山坪，来到虎头埤。虎头埤是早前为tio̍h灌溉农田所做ê蓄水池，chit-má mā iáu是teh利用做灌溉ê美丽ê湖。湖ê周围无到八公里，有khah细ê遗憾，m̄-koh，以绵延ê虎头山做背景，湖水常常lóng是碧蓝，四kho͘ 围有茂盛ê相思树遮盖，黄昏ê时有白鴒鸶kui阵。Tùi台南经过新营到chia无gōa远，koh有bá-suh（巴士）teh走，m̄-koh，城市ê人真少来chia，因为chia无娱乐设备，kan-taⁿ有三台teh出租ê小船浮tī岸边而已。总是，佳哉chia iáu未被商业化，算是bē bái。阿明bat几pái来chia sńg，其中一pái是kah清子做伙来。今á日算是今年第一pái伊ê脚步往chit-ê方向行。
阿明看tio̍h虎头埤ê碧蓝水色，心内teh讲：Ah，真好！伊kah-ná得救ê款，suh一口气。Chit-ê小湖每pái lóng不可思议ē-tàng hō͘ 伊ê心镇静落来，所以伊早to̍h真kah意chit-ê所在。因为热天真热，真chē人ài就近去安平á是喜树ê海水浴场。阿明mā有几pái机会去过海边，m̄-koh，伊lóng感觉海无适合伊ê肌肤。这m̄是因为伊无啥会晓泅水，是因为海阔bóng-bóng，koh大kah oh得把握，soah会hō͘ 伊ê梦想á是思念分散开去。而且海无停teh摇动，掠准已经稳重深沉ā，又koh轻轻á跳动起来；掠准已经平静ā，又koh马上起狂。海是面色变化真紧ê感情家，hō͘ 人感觉无法度轻松融入。M̄-koh，湖ē-tàng深深kā人抱揽；准讲湖四kho͘ 围ê树木hō͘ 暴风雨扫kah东倒西歪，湖照常会kā它chhiō影，tī湖中显出in ê倒影。坐tī细只船顶面，天空无限，ē-tàng感受tio̍h家己集中注意力teh ǹg湖心前进，就thang掠tiâu家己ê救生圈，án-ne，准讲是强风扫来，只要kā细只船掠tiâu，就绝对bē被吞灭去。Chit-ê虽然细却有真大包容力ê碧蓝ê湖，ná亲像teh接纳山榕á是相思树án-ne，仝款teh接纳阿明，每pái lóng hō͘ 伊感觉心神安定。
M̄-koh，连hit工chit种虎头埤ê湖都hō͘ chit-ê少年人ê心肝小khóa phi̍h-pho̍k-chháiⁿ。
....Ē-sái恬恬mài出声ê chit-ê cha-po͘ gín-á却一直phah家己ê胸坎á，khiú-tiâu家己ê手，乌白讲hiah-ê讨厌ê话....。家己m̄-bat有过hiah-ni̍h kô-kô缠ê tāi-chì，白鴒鸶m̄-bat有过hiah-ni̍h 仓仓pōng-pōng teh飞，hō͘ 风吹ê树木kah水中ê茭白笋m̄-bat受过hiah大ê滚绞。真伤脑筋，你到底是tùi tó位带来chit-ê暴风？....一时chhèng-koân ê自我意识，kám无法度hō͘ 它降低落来？无法度来到亲像老母春鸾ê屈低所在。若是án-ne，ná会无beh hō͘ 我回复到早前ê所在？Kám m̄是tùi无限koân ê天顶来到我细细ê胸坎á？....我lak落去妓女ê胸坎á，无限堕落落去，残残想beh伤害家己，是为tio̍h啥物？到chia来，你kám有想beh kā自我意识降落来到地上？Kan-taⁿ做hiah-ê无聊ê tāi-chì，你想beh掠青鸟，只不过是kui面鸟á屎；你想beh挽青花，只不过是满手全伤！....若是有收tio̍h回phoe，to̍h bē陷落绝望。Mài讲白贼，准讲有回phoe，he一定是无好ê回phoe，你mā是仝款ê结局。你chit-má知影hit-ê cha-bó͘ gín-á已经对你有理解，mā有爱你，án-ne kám m̄是to̍h真好à？已经siuⁿ慢ā，家己chit-má kui身躯污秽；án-ne讲起来，自开始to̍h污秽à。你所追求ê只不过是开tī lah-sap池中间ê花，若是你用súi ê信心活落去，结局mā是死。人无死bē-sái得，因为你一直teh思考绝路。一只尾蝶有法度突破钢铁ê壁，你mā有可能。尾蝶突破钢铁ê壁，因为死chiah出来到外面。死m̄是súi ê tāi-chì，m̄-koh，为tio̍h达到súi ê境界，无死to̍h无法度达成，死to̍h是án-ne。早死早好，kám tio̍h kui面全屎，á是kui手掌肿疱来活落去？Ai-ah，你án怎？你kám茫茫渺渺teh思考？你kan-taⁿ会晓hō͘ 人惊惶。你theⁿ tī船顶，心内teh画娶bó͘ ê图。Tī生死ê关头，你iáu teh点to̍h chit种欲望，实在是有够不三不四ê人。所以照tú-chiah所讲ê，你自开始所思考ê若m̄是hiah súi，m̄是hiah高尚....。
总是，今á日ê湖却bē-tàng hō͘ 伊感觉心神安宁；它露出真严肃ê表情，包含真oh抵敌koh不可测度ê无底力量。伊几nā pái想tio̍h若无离开chia，就会有危险，m̄-koh，伊kah-ná颔颈被ân-ân掠tiâu，犹原tiàm hia无离开。Tú-chiah伊to̍h坐起lih浮tī岸边ê小船；伊有时倒leh，有时peh起来；有时划(kò)船，有时静静无tín动，á是用手teh sńg水。伊用相机hip两三个hit所在ê镜头，kah-ná是chia̍p-chia̍p teh扶tháⁿ严肃ê湖水之灵，来hō͘ 家己ê心沉静落来。Chit中间，湖面不知不觉有暗影罩落来。除了tùi湖边ê相思树散散飞起来ê白鴒鸶以外，四kho͘ 围无kah一个人影。湖水变成乌色，无koh有水波，恬chih-chih，深kah kah-ná无底leh；湖无koh有啥话语，阿明mā无beh回答。Ná亲像恬chih-chih ê湖水，阿明ê心mā已经真镇静ā。Chit时，伊ê脑海teh想种种ê tāi-chì，mā浮起一koá人ê面：父母、兄弟、阿伯、阿姆kah伊ê叔伯小妹。总是，chiah-ê lóng ná亲像tī梦幻中teh飞ê白鴒鸶，bē引起伊ê注意；伊ê心有真奇怪ê冷静。可能是伊感觉若án-ne继续冷静落去，会发生可怕ê危险，所以无意识中，伊就kah-ná teh tàn一粒石头án-ne，kā hip相机tàn落去水里。Hip相机tŏm一声就随时沉落去，造成一chūn波纹，散开，然后又koh回复原本平静ê水面。Hit台hip相机真贵，tī无意识中kā它tàn落去水里，伊感觉真可惜，m̄-koh，伊一点á都无后悔。因为伊bē晓泅水，如果伊khiā tī船尾，伊会kah hit台hip相机仝款命运，沉落去水底。虽然伊án-ne teh想，m̄-koh身躯并无sih-sih颤。昨日，伊因为siuⁿ过无聊，tī别庄ê二楼练写字，有写一句「宇宙何悠悠，人生难期百」；人可能会无怀疑，讲这to̍h是伊ê遗书字句。伊án-ne teh想，无感觉奇怪，mā无感觉悲哀。Ai-ah，chit种深沉koh空虚ê寂静到底是án怎leh？Tio̍h大声哭！大声笑！伊án-ne teh想，koh急beh逃避chit种被封tiâu ê可怕冷静。Chit时，伊发现一个所在有空隙，就往hit-ê方向chông去。
