《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第三十章（更新版）
作者 庄司总一着 赖永祥指导 林俊育台译 2017.05.28
安子来到农场ê时，阿明kah春鸾lóng出去，无tī别庄内；真久了后，只有春鸾一个人tńg来。
「Ah，阿明kám无kah你做伙？」
「我带鲜（chheⁿ）花去阿阵ê墓烧香，阿明留落来顾厝。伊一定是去外口散步。」 春鸾并无担心，m̄-koh，安子有一点á bē放心。
「伊ê精神án怎？」
「托你ê福，元气有回复，只是感觉有小khóa无聊ê款。」
「是ho͘ⁿh。我有问过医生，伊讲teh beh ē-sái阅读册à，所以我今á日有带杂志来。」
「真pháiⁿ势，你对待阮lóng hiah-ni̍h亲切。」
「免客气，无啥物lah。」
Chit两个老母因为家己ê gín-á，随人teh操心。
「阿明chit-ê gín-á ê头脑有一点á怪怪，完全sêng读册人。昨hng伊kā深奥ê汉诗读hō͘ 我听，m̄-koh，我啥物都m̄-bat。而且伊koh讲，ē-tàng像án-ne眺望天空á是山川，伊to̍h心满意足，无koh有啥物欲望ā。所以，伊早to̍h真kah意chit-ê农场；来到chia以后，伊ê面色变好，头脑清楚，精神mā回复à。伊讲伊beh koh再tńg去学校，伊会用功读册。真正ê，这一切lóng是你ê安排kah照顾所致荫ê。」
春鸾因为in kiáⁿ对清子有不纯ê感情感觉真见笑。虽然是án-ne，安子从来mā m̄-bat露出无欢喜ê面色；她án-ne kā in同情，hō͘ 春鸾感觉实在对不住。Á安子leh？因为春鸾lóng m̄知造成阿明hiah-ni̍h沉默ê原因是啥物，所以安子看tio̍h春鸾对大嫂真细腻koh感激，soah hō͘ 安子非常艰苦心；若是她无藏hiah-ê phoe，mā bē致使阿明到chiah-ni̍h绝望，koh tī众人面前见笑。安子想tio̍h án-ne，to̍h起艰苦心。
安子为啥物会án-ne做neh？安子无beh hō͘ cha-bó͘-kiáⁿ看tio̍h hiah-ê phoe，这m̄-nā是单纯出tī母爱ê心；chit-má她ê后悔kah懊恼有增加，无减少。想起来，阿明kah清子ê tāi-chì，tī chit-ê农场tú创立hit当时，to̍h已经tī安子ê心种落不安ê种籽。因为in平平姓陈，koh是叔伯兄妹，ná ē-sái结婚leh？Hit种严格ê禁忌，安子相信in是无可能结婚ê。总是，tī现今旧家族制度ê传统kah习惯当teh崩盘ê大过渡时期，本来完全预测bē到ê tāi-chì，mā是有可能会发生。近来ê新闻常常看tio̍h固有ê秩序kah新式恋爱相克所发生ê悲剧。而且，chit两人ê个性确实是绝配；阿明是一个ài梦想koh多愁善感ê青年，伊温和koh纯真ê心，ē-sái讲是in老父瑞文ê遗传，m̄-koh，伊对事物有koh khah深入koh认真ê思考；这并m̄是因为父kiáⁿ ê教育程度无仝，却是因为阿明ê性格bē亲像in老父hiah-ni̍h chhìn-chhái koh反覆无常。清文mā kah意阿明，而且阿明自细汉to̍h接近安子，伊无kah一pái hō͘ 她无欢喜过。清子to̍h kah伊是完全无仝型ê人；她冷静koh理智kah有mê-mê角角ê行为，tùi边á看起来有一点á无可爱；实际上mā hō͘ 人感觉她ê脾气真gāi-gio̍h，koh有一点á骄傲。Chit种两人性格完全倒páiⁿ ê婚姻，有人认为颠倒bē bái。M̄-nā án-ne，in两人自细汉to̍h kah-ná兄妹á，感情真好；bat tāi-chì以后，清子就开始逃避伊，koh thiau故意kā伊刁难，看起来kah-ná是teh讨厌伊koh beh kah伊疏远ê款，其实he是本能性tùi爱来引起ê倒反行为；其实，in一定ē-tàng和睦做伙。因为安子感觉in是siuⁿ过理想ê一对，cha-bó͘-kiáⁿ一定会真幸福，m̄-koh，安子惊in两人结婚；明明知影in是理想ê一对，m̄-koh，安子ê心胸无够宽阔kah ē-tàng来接受in两人结婚；这是出tī她身上所流无法度抗拒ê血统ê命令。若是ē-tàng，她情愿清子kah日本内地人结婚，m̄-koh，她知影这ná亲像清子kah阿明bē-tàng结婚仝款，是无可能ê。清子必然会án-ne想，因为她若kah台湾人结婚，她身上所流ê有日本人性质ê血to̍h会jú来jú薄，无gōa久to̍h会消失；安子想到chia to̍h突然感觉寂寞。这m̄-nā bē-tàng对丈夫清文来表明，连家己都无法度坦然对家己展开来看；这是她唯一ê秘密盒á。
安子藏阿明写hō͘ 清子ê phoe，to̍h是出tī chit点。当她看tio̍h阿明hit种绝望ê表现，安子心底ê一种寂寞凄凊ê情绪，就tùi怜悯阿明ê单纯意识，忽然成做bē-tàng原谅ê罪，hō͘ 她koh khah激烈责备家己。
她想tio̍h嫁来陈家已经二十年ā，回顾起来，虽然道路险峻，总是一路行落来à。Tī生活无仝，感情mā无仝ê陈家，她进入其中，尽家己一切ê努力，来求kah陈家ê人做伙生活。总讲一句，她感觉已经tī chia生活二十年后，当她知影iáu有koh khah重要ê tāi-chì chìn前，她必须继续向前行ê时，安子soah感觉gāng去。春鸾啥物tāi-chì都m̄知，kan-taⁿ一直感谢安子；她感觉家己tio̍h tī春鸾ê面前，tī陈家厝里ê人面前谢罪。为啥物bē-tàng koh khah坦白表明家己ê意志，koh khah清楚来显示家己ê决断neh？为啥物beh企图tī暗中恬恬á kā tāi-chì埋葬neh？她家己mā感觉真gāi-gio̍h；这是何等ê伪善kah阴险！ 安子看tio̍h挂tī别庄壁顶ê Ta-bin-chhih（达文西）「最后ê晚餐」仿作油画，她感觉胸坎á teh痛。耶稣讲：「Lín chiah-ê kah我做伙食ê人中间，有一个会出卖我。」学生一个一个问耶稣：「总m̄是我ho͘ⁿh？」（译注：马可福音14：18~19）
安子teh想：我家己to̍h ná亲像是出卖耶稣ê犹大。
过一时á，玉帘忽然行入来。
玉帘有话beh kah安子讲，所以来chia。她看tio̍h春鸾在场，无方便讲，所以心神不定ê款。M̄-koh，春鸾随时离开；春鸾m̄是会晓看人ê面色，是因为她担心阿明iáu未tńg来，beh出去chhōe伊。
玉帘向安子说明tāi-chì ê经过；如果清子知影开金库ê方法，the̍h现金hō͘ 她，玉帘当然bē接受，á是她若知影hit-ê瓷á hiah-ni̍h值钱，她mā会拒绝。M̄-koh，她the̍h去到古董店，想bē到随时to̍h卖八百圆。玉帘chit时感觉她做m̄-tio̍h tāi-chì à，心内紧张，而且个性有洁癖ê玉帘mā无法度恬恬，所以紧赶来农场。
「我m̄知tio̍h án怎kā你会失礼chiah好，景仁ê tāi-chì hō͘ 我ê头脑起糊涂ā。」
「无lah，无要紧。M̄-koh，若beh the̍h去卖，其它iáu有真chē瓷á neh。」
「它ê价值kám是比卖出去ê钱khah koân？」
「Eh，无lah。你讲ê hiah-ê钱，你thang随时the̍h去用。」
安子因为想beh极力掩盖她ê tio̍h惊，soah颠倒露出她惊kah gāng去ê款。Tī hiah chē瓷á中，清子偏偏the̍h hit-ê清文siōng珍惜ê精品hō͘ 她；运气实在有够bái neh，清文一定会真受气，真失望。清子平常时lóng真伶俐，却做出chit种戆tāi-chì；安子气kah真懊恼。
俗语讲：祸不单行；尤其是tī陈家，tī仝一个时期有好pháiⁿ事起起落落ê命运。春鸾chhōe无阿明，tńg来别庄；农场ê人讲，几点钟前有看tio̍h阿明tī温室前行来行去，了后to̍h m̄知伊ê去向。安子心内ê不安，soah hō͘ 她产生不吉ê预感。总讲一句，tio̍h随时通知瑞文，所以安子就khà电话hō͘ teh顾厝ê清子，交带她转达hō͘ in阿叔瑞文知。
过无góa久，出现ê m̄是瑞文，却是清文kah景文；in两人因为随人有tāi-chì beh来农场，tú好坐仝班车来。
大家坐tī别庄ê大厅，阿明ê tāi-chì kah伊chit-má tī tó位，成做话题ê中心。清文讲阿明kah意虎头埤，大概是去hia chhit-thô；伊却无啥物担心，颠倒有一点á kún笑ê口气。
「Hiah òaⁿ iáu未tńg来，咱tio̍h来去叫伊。M̄-koh，阿明是一个相当诗情画意ê人，前几工，伊有kā歌颂虎头埤ê汉诗hō͘ 我看，虽然hit首诗无合平仄（piâⁿ-cheh），m̄-koh，我会记得he是一首理念杰出ê诗；伊teh咏吟hit带山岳ê树木投水tī深湖....。」
清文因为看tio̍h安子真担心ê款，thiau故意án-ne讲，来kā她heⁿh惊。M̄知是啥物缘故，chit几工清文kah平常时无仝；伊无kah以往仝款真正经讲出伊ê看法，却时常带kún笑ê口气；这是因为伊chit-má比啥人都khah郁卒。伊当teh考虑是m̄是tio̍h继续经营农场kah工厂？Á是tio̍h放弃？Taⁿ伊已经khiā tī chit-ê重大决定ê十字路口。伊想beh下决心，却踌躇bē决定，所以伊beh来kah安子参详。总是，chit-má koh去tú-tio̍h小弟景文，soah hō͘ 伊ê郁卒加倍；伊极力beh掩盖，却成做chit种有一点á冷笑ê口气。
另外一方面ê景文neh？伊流露出比in阿兄koh khah kún笑ê口气。伊ê个性一向都无beh正面讲话，chit工伊koh khah thiau故意án-ne。
「放心lah，阿明无论去南洋á是啥物所在，lóng是一个ē-tàng独立生存ê青年，kah阮ê景仁完全倒páiⁿ。阿明准讲beh投入去虎头埤，mā会留伊ê诗落来。」 景文án-ne讲，hō͘ 春鸾忽然koh khah挂虑in kiáⁿ，就koh出去外面chhōe。
「景文，你mài讲hiah-ê不吉ê话lah。」
安子禁bē-tiâu án-ne责备景文。她对家己ê神经质感觉tio̍h惊。虽然是án-ne，景文iáu是koh无正经笑笑á讲：
「我只是kā阿明kah阮kiáⁿ做比较来讲ê lah。阮hit-ê猴死gín-á若是死，mā只有留落来债务；伊准讲落地狱，mā会敲电报来要求汇钱hō͘ 伊。」
「景仁kám hiah-ni̍h gâu开钱？」
清文án-ne问，又koh khau洗讲：
「这mā是因果ā，因为老父『有钱使鬼』，kám m̄是？」
景文听tio̍h阿兄轻视koh khau洗ê话，kan-taⁿ感觉小khóa gāi-gio̍h而已，随时to̍h koh回复kah-ná无tāi-chì ê款，继续讲：
「Mā无一定是有hit种老父to̍h有hit种kiáⁿ。你看瑞文kah阿明，he是pháiⁿ竹出好笋ā。我因为有chit种看法，对长男难免会有一点á kā伊sēng过头。」
「可能是老父siuⁿ过kā伊灌输金钱ê观念，所以无妥当。」
「Án-ne，to̍h应该成做一个bē乱开钱ê人chiah tio̍h ā。」
「世间事tú好倒páiⁿ；án-ne会hō͘ 伊掠准钱to̍h是beh用来开ê。」
景文对阿兄ê khau洗态度，心内感觉bē爽快。伊chit-má当teh为tio̍h长男景仁ê tāi-chì烦恼，清文m̄-nā无kā伊小khóa同情，á是诚意对待，连平常时诚恳ê阿嫂都对伊kún笑讲：
「因为你对钱siuⁿ过冻霜m̄甘放，chiah会引起kiáⁿ儿beh偷偷á开钱ê心！」 景文禁bē-tiâu，牙齿根咬teh讲：
「连阿嫂mā án-ne讲oh？总是，别人ê kiáⁿ án怎，无我ê tāi-chì lah。」
「Mā m̄是án-ne讲lah。金钱比孔子ê教示khah优先，这是玉帘讲tio̍h你ê时ê讲法。总讲一句，无论啥物重要ê tāi-chì，因为你lóng是掠钱做优先，所以....。」
「可能是án-ne；m̄-koh，若是关系tio̍h kiáⁿ儿ê tāi-chì，to̍h bē hiah-ni̍h简单处理；天下父母心，我mā无例外。大家lóng掠准我冻霜kah刀割身躯mā bē流血，án-ne，我chit-má to̍h来像童乩，割hō͘ lín看！」
景文án-ne teh讲khau洗家己ê话ê时，hō͘ 玉帘tī边á teh骂人ê话掩盖tiâu-.leh。
「免讲mā知！准讲会流出血，你所流ê mā是猪血lah！」
真伤人ê话！猪血，he是tī屠宰场，kā刀凿入去猪ê心脏，koh kā喷出来ê血贮tī桶á撒盐，hō͘ 黏糊糊ê血变成kui块，thang做料理用。Hiah-ni̍h恶毒ê话！景文用怀恨ê眼光睨in bó͘，m̄-koh，伊家己控制tiâu-.leh，kan-taⁿ haiⁿ一下冷笑一声。
大家lóng kah伊对敌，无一个人理解伊，了解伊。In平常时to̍h是án-ne teh kā伊对待，今á日是伊家己进入来chit种难堪ê场面；ná亲像niáu鼠chông入去当niáu鼠ê笼á内，hō͘ gín-á teh凿，teh chhòng-tī ê情形。M̄-koh，今á日大家偶然聚集做伙，精神lóng真激动，自然而然就想beh kā hit-ê尖尖ê触（chhiok）角，向hit-ê siōng无受感动ê人凿去；án-ne，siōng安全ê目标to̍h是景文。M̄-koh，chit工ê景文是比大家所想像ê koh khah有第六感ê人，伊渐渐点to̍h报复ê心，想beh kā hiah-ê轻视金钱ê假面具剥落来；一种tī平常时所无ê感情，tùi伊ê心底teh bo̍k一下bo̍k一下发酵起来。
「M̄-koh，阿嫂，若是tú-tio̍h chit种情形，你beh án怎处理？家己ê kiáⁿ tī学校成绩无好，放荡koh无守规矩，完全无顾父母ê面子，而且因为痴情soah hō͘ 对方索取一千圆ê大笔钱....。」
景文ê面露出微微á ê笑容，目chiu chîn安子。「准讲你是真坚强koh真温柔，tī chit款ê境遇之下，你mā是会tio̍h急，kám m̄是？」伊想beh án-ne问安子。
安子tú-chiah有tùi玉帘ê嘴知影chit项tāi-chì，m̄-koh，清文chit-má chiah第一pái听tio̍h。
「Ngh，有chit款tāi-chì oh？」
「我已经对伊无办法à，真伤脑筋，请阿兄hō͘ 我一koá意见。」
「意见无啥路用lah。面对tāi-chì，tio̍h ài家己先有觉悟lah。」
景文知影chit pái瑞文ê kiáⁿ阿明ê tāi-chì，兄嫂有亲身teh kā伊照顾，m̄-koh，伊ê kiáⁿ景仁ê tāi-chì，伊ê兄嫂m̄-nā无teh关心，mā无真诚ê关怀，景文看tio̍h，心内真bē爽快。
「像lín清子án-ne ê杰出cha-bó͘-kiáⁿ当然无话讲，m̄-koh，像阮hiah-ê不成材ê小kiáⁿ，一生to̍h hō͘ 父母操心。我若无hō͘ 伊钱，伊就无beh tńg来，kah-ná teh kā我威胁leh。我受气，无kā伊回phoe，伊竟然tùi东京tńg来....。」
景文期待阿兄听了会tio̍h惊，koh kā伊同情，mā会hō͘ 伊啥物意见。总是，清文虽然对景仁tùi东京tńg来，有一点á感觉意外，m̄-koh，伊chit-má ê心不便对景仁ê tāi-chì有啥物批评，á是同情kah关怀。
「伊m̄是teh威胁，是受逼kah无路。若m̄是逼kah不得已，伊bē hiah远tùi东京tńg来。你to̍h kā钱the̍h出来，赶紧解决。」
「真正是不成材，kan-taⁿ hō͘ 父母操心。」
「M̄-koh，你送一千圆kā阿母祝寿，你to̍h仝款送lín kiáⁿ án-ne ê一笔钱。」
「两者并论，我挡bē-tiâu。」
「M̄-koh，你真有钱ā。」
「大贩（hoàn）á无必要有钱。」
景文一半自负一半自嘲（sau）án-ne讲。In bó͘ 玉帘忍bē-tiâu讲：
「你免操心，ài你chit款守财奴the̍h出chit笔钱，真可怜！我来处理to̍h好。」
「你tang时hiah有钱？」
「我是大seng-lí人ê夫人ā，当然有钱。」
「啥物？你最后mā是对我哀求，其它无啥撇步lah。」
「真讨厌！你chit-ê人对待家己ê bó͘ á是kiáⁿ儿，to̍h亲像teh饲鸡á，kan-taⁿ hō͘ 它饲料niā-niā。」
「M̄-koh，咱tau ê鸡母生ê卵无好。」
「He是因为鸡公无好。」
「你去教会了后，iáu koh是hiah gâu骂人。教会kám无教你tio̍h疼你ê丈夫？」
「你mā有需要疼oh？无kah大bó͘ 参详to̍h娶细姨，讲好beh hō͘ lín bó͘ 有够额ê lân-san费用，却讲话无算话ê cha-po͘人，kám有权利要求真正ê疼？Oeh，你kám有chit种权利？」
玉帘想beh得tio̍h清文kah安子ê认同，她teh chîn in两人ê表情。总是，清文kah安子知影玉帘本身显然有缺点，所以in两人m̄知beh án怎回答，就恬恬无出声。玉帘真火大；宗教á是信仰并无改变她ê个性á是性地。她想讲她是一个hiah-ni̍h无办法ê cha-bó͘人；家己所欠缺ê物件一屑á to̍h lóng无加添，她是chiah-ni̍h-á不幸。Chit种ê痛点去hō͘ 丈夫讲tio̍h，而且连兄嫂都kah-ná认同ê款，致使玉帘忽然感觉挡bē-tiâu。她突然使khioh-ka̍k（自暴自弃）起来，无顾体面á是自尊，就嚷起来：
「Ai-ah，我挡bē-tiâu，挡bē-tiâu！Tú嫁来ê时，我讨厌你ê面，然后讨厌你ê心。总是，我kah你无仝；我有权利追求疼，kah-ná嘴ta teh ǹg望水。我kah你无仝neh，我有像孵鸡卵ê鸡母ê腹肚有温暖；无像你冷淡，ná狗á ê鼻hiah-ni̍h冰冷。你不管我gōa-ni̍h无幸福，gōa-ni̍h心酸，你lóng无teh关心，无teh看，一点á都无感觉tio̍h我ê可怜。家己亲生骨肉ê长男，陷入tī hiah-ni̍h深ê困境，你却m̄甘the̍h钱出来。虽然是án-ne，我iáu想beh tùi你ê身上chhōe看有啥物优点无。M̄-koh，我chit-má已经看破à，无论如何，我lóng无所谓ā。总是，chit pái我无法度忍受，我beh kah你拚，kah你拚到底....。」
玉帘kā面仆tī桌á顶，心内悲伤kah激动哮出来，koh哭teh kā清文讲： 「阿兄，请你原谅！我无经过你ê同意，家己kā你ê重要收藏品the̍h去卖掉。这lóng是因为我kah景文之间ê情形是án-ne，出tī无奈chiah án-ne做。」 她哭teh说明她kā古董the̍h去卖ê tāi-chì ê时，安子心内非常不安，她掠准清文听了会tùi椅á跳起来。M̄-koh，hō͘ 她tio̍h惊ê是，清文并无她所意料ê激动，颠倒是景文ê面色变青。
「玉帘，你ná会做出chit种糊涂tāi-chì？你ná会kā别人ê物件....？」
「Lóng mā是你m̄好ā！是你siuⁿ过冻霜，所以我逼kah不得已chiah án-ne做ā。」
「阿兄，hit-ê物件价值gōa chē？」
「我讲卖八百圆ā。」
就án-ne，景文随时tùi lak袋á jîm出一把钱teh算。Ah，ná会hiah浪费？景文ê心内显然是án-ne teh想，伊ê chéng头á尾小khóa teh phi̍h-phi̍h-chhoah。
M̄-koh，m̄-nā是hō͘ 伊ê chéng头á phi̍h-phi̍h-chhoah，mā hō͘ 伊ê心情激动，koh hō͘ 伊感觉绝望，因为伊并m̄是大家所想ê，m̄甘开chit条钱。伊沿路算钱，沿路讲，声音是奇怪ê低沉：
「我tùi早起开始to̍h tī街á路走chông。我带chit笔钱，m̄-koh，m̄知景仁人tī tó位，无法度kā钱hō͘ 伊，所以就来农场看bāi。我kah世间一般ê老父无啥无仝，m̄-koh，无人理解我ê心，连一点á都无人beh kā我理解；我kan-taⁿ hō͘ 人认为是冻霜，看钱ná性命leh。我可能确实是án-ne，m̄-koh，我谨慎小心。是ah，我已经决心beh kā钱hō͘ 景仁，m̄-koh，玉帘iáu讲我是冻霜鬼。她lóng是án-ne kā tāi-chì舞kah乱七八糟，她根本都无理解我；经过hiah 长ê岁月，她iáu是bē理解我....。」
总是，清文ê面结结。Tùi伊ê教养看起来，tī人ê面前m̄知见笑teh展示钱ê做法，伊看bē惯势。小弟chit种tī人ê面前算钱ê态度，比古董hông卖掉，koh khah hō͘ 伊bē爽快。
「你teh chhòng啥？紧kā hiah-ê钱收起来！」
「Kám讲hit ê古董ê价值koh khah koân？」
「He无所谓lah！你掠准金钱ē-tàng解决一切oh？」
景文看出这惹起清文非常受气，伊想讲以后chiah来还钱，就kā钱收入去lak袋á内。伊静静khiā tī四面楚歌之中，感觉kah-ná hông击倒。若是以前，伊会感觉án-ne被打倒无啥物了不起；伊会kah-ná无啥tāi-chì koh peh起来，无要无紧to̍h行开，m̄-koh，chit-má伊却无法度随时peh起来。Beh peh起来需要一股气力chiah ē-tàng，这是真严肃ê课题。伊有生以来第一pái感觉tio̍h人类ê严肃课题：若beh有权利得tio̍h疼á是理解，mā需要hiah-ni̍h困难ê过程chiah ē-tàng得tio̍h。
「阿兄一下提起钱to̍h kā它轻视，m̄-koh，阿兄ê事业mā bē-tàng忽视钱ā。」
景文ê面已经一屑á笑容都无。
「如果阿兄ê事业失败，破产....。」
「我tang时破产leh？」
「我是讲如果。无lah，你何必硬讲你经营上无问题neh？我知影，知影你公司ê状况án怎。」
「你免家婆lah！这kah你有啥物关系leh？」
「阿兄你koh án-ne讲à；你总是对我有chit种看法。当初你设立凤梨罐头工厂ê时，我hiah-ni̍h反对，你却bē了解我ê心情；我并m̄是担心你会成功á是bē成功而已。」
「Án-ne，你是teh担心啥物？你kám是担心家己会hō͘ chit-ê灾难拖累？」
「M̄是lah，我ê心情....。Tio̍h án怎讲chiah好leh？我无像阿兄你chit种学者型，bē晓高深ê讲法。譬喻讲，阿兄若是身躯无半项ê情形....。」
「你iáu是teh担心这oh？」
「无lah，你注意听，我是讲如果。阿兄如果陷入chit种地步，我一定会帮忙；我ê立场是bē-sái无救阿兄，你kám bē明白？」
「你kám是chiah-ni̍h有同情心ê人？」
「我又koh hō͘ 人án-ne讲à。我的确是亲像阮bó͘ 所恶毒指责ê冻霜lah，薄情lah。M̄-koh，我m̄是kan-taⁿ án-ne，真正m̄是kan-taⁿ án-ne。大家ná会lóng bē了解我ê心情leh？」
景文因为家己想beh讲ê话无法度适当表达出来，心内真tio̍h急，瘦koh薄板ê身躯hián来hián去，手ia̍t来ia̍t去。伊ê根本观念确实无真明确，连家己都无真了解，m̄-koh，伊想beh hō͘ 人理解是事实。
「陈家m̄是阿兄一个人起造ê；我mā是有teh起造，瑞文mā是其中一份子。我虽然冻霜、固执，m̄-koh，我所做ê tāi-chì m̄是为我一个人teh做。Chit-má我对chit点有清楚了解à；我一向连家己都无真明白我有án-ne teh做。M̄-koh，确实是án-ne，若无，我bē有chit种心情。我感觉非常委屈，真想beh哭。」
景文ê想法、行为，确实tī无意识中有teh为家己ê家族kah家己ê祖先。Koh再讲，tī伊ê心内若是有疼，he并m̄是集中tī个人ê疼，却是一种无明确ê大家族ê疼。因为清文是台湾人，伊应该会明白chit点，m̄-koh，因为新思想kah教养hō͘ 伊脱离旧传统，所以tī伊看起来，景文chit种精神kah行为，只不过是无意识ê表现，因此伊所显示出来ê to̍h无啥物特别ê努力kah痛苦，所以一屑á都无法度打动清文ê心。
M̄-koh，景文chit时hō͘ 激烈ê自我意识震撼，虽然伊m̄知tio̍h án怎打动人ê心，m̄-koh，至少伊家己对家己已经有感动。
「我是无聊ê人，无像阿兄做tāi-chì出色koh súi气。凤梨罐头事业tī社会ê评价bē bái，厝里ê人mā因为有农场感觉真欢喜。Án-ne比起来，我koh khah明显无价值，连老母都无kā我肯定。Chit种情形kám好？当然阿兄是了不起，m̄-koh，阿兄若加减kā我了解一下，小khóa kā我拥护一下，mā bē致使我成做一个hō͘ 人看bē起ê cha-po͘人。」
景文吐露伊激烈ê愤怒kah谴责了后，伊就大pān挺胸讲：
「M̄-koh，我无beh koh讲啥物不平ê话ā。到最后，无一定厝里ê人lóng tio̍h óa靠我；我有chit种力量。应该the̍h钱出来ê时，我to̍h会the̍h出来，无惜kā所有ê财产the̍h出来。Ai-ah，阿兄，请你清楚讲一下，hit-ê古董到底价值gōa chē？」
清文beh回答，却koh踌躇。
He是大概一年前，有人tī支那发见hit-ê古董，带tńg来台湾，清文就用便宜ê钱买落来。得tio̍h hit-ê有宣纸模样ê白瓷细花瓶了后，清文ê兴奋是无法度形容ê；无论是釉彩、光泽，á是纹路，hit-ê奇巧ê美丽，jú看jú hō͘ 伊ê心弦受tio̍h震撼。听讲he是宋代定窑ê出品，当然是真稀罕ê瓷á。Hit站á，伊看kui百遍mā bē倦teh欣赏，而且koh详细调查hit-ê瓷á。总是，tú亲像男人ê迎新弃旧，清文对它ê热度真紧to̍h消退，连伊家己都感觉不可思议。这并m̄是因为后来清朝ê御用窑兴起，仿造早前瓷á ê历史事实hō͘ 伊起疑心，mā m̄是实际上伊对瓷á有鉴定ê能力，却是伊teh欣赏ê中间，m̄知án怎soah失去兴趣，chiah开始厌烦起来。因为清文对真品kah仿品有久长ê鉴定经验了后，结果发现伊只不过是看tio̍h稀罕名品ê幻影niā-niā；清文最近chiah了解tio̍h chit点。 清文想beh kā事实讲出来，m̄-koh，伊看tio̍h小弟罕得有ê激动，认真teh kah伊应嘴应舌，所以soah讲出小khóa khah「夸张」ê话：
「He是一世人oh得两pái入手ê精品。He是我ê大财产，准讲我身躯无半sián钱，hit-ê古董mā够我食五六年。」
「阿兄，kám有影？」
「Lín是外行，hit-ê古董ê价值是用万做单位ê。」
这是gōa-ni̍h-á恐怖ê失败kah灾难！景文kah-ná踏无tio̍h一坎阶梯，一时失去气力。「玉帘，你....。」伊只有讲出án-ne，就已经无气力发脾气，kan-taⁿ用怨恨ê眼光睨玉帘。伊tú-chiah有讲出大话：无惜kā所有ê财产the̍h出来；伊m̄是随便讲讲leh，事实上，若是真正发生chit种大tāi-chì，伊一定会án-ne做。M̄-koh，为tio̍h放荡kiáⁿ ê无检点来处理善后，á是为tio̍h愚戆ê bó͘ ê无知做法来收拾善后，却....。
伊竟然会陷入hiah-ni̍h凄惨ê地步！
清文看tio̍h景文hiah-ni̍h绝望ê神情，伊感觉chiok内疚（kiù）。
「景文，你m̄免hiah悲观，是骗你ê lah，m̄是真ê lah。因为你siuⁿ过认真应嘴应舌，我soah想beh kā你heⁿh一下。我已经了解你ê心情，咱mài koh冤家ā。Hit-ê物件无啥物要紧，其实玉帘颠倒卖了好价钱。」
景文kah-ná免hông判死刑，就án-ne安心落来。玉帘却kah-ná触tio̍h啥物，一腹火giâ起来。她对清文比手画脚，讲：
「Siuⁿ过份lah！阿兄siuⁿ过份lah！Beh滚sńg笑mā tio̍h看时间kah场面ā。听tio̍h价钱koân到上万ê时，你想我ê感觉án怎？我tio̍h惊kah目chiu前乌暗，我想我活bē落去à；景文mā是仝款。我kā kan-taⁿ价值八百圆ê别人ê物件擅（siān）自the̍h去卖掉，想起来to̍h痛苦，chiah走来chia；我是真诚ê。景文今á日mā是真诚ê，伊tú-chiah mā是kiōng-beh流目屎。」
清文一直叫她mài koh讲lah，mài koh讲lah。玉帘iáu是m̄听，继续讲： 「你却teh滚sńg笑，án-ne kám ē-sái？你kám一点á都无感觉阮可怜，无kā阮同情？景文mā是人，无论如何，你án-ne讲话tùi鼻孔出来，teh heⁿh惊人，看人无起，hiah-ni̍h欺负人，啥人挡会tiâu？好！我chit-má to̍h去kā hit-ê物件the̍h tńg来；准讲ài一万á是两万，我mā一定买tńg来hō͘ 你看....。」
玉帘kah-ná siáu-.ê teh嚷，仓仓pōng-pōng走出去。
景文三声无奈讲：「她ê脾气to̍h是án-ne，请mài见怪！」
伊对兄嫂露出pháiⁿ势ê神情，m̄-koh，却真奇怪，伊竟然欢欢喜喜tòe in bó͘ ê后壁jiok去。
清文kah安子一时gāng去。肝火旺盛过了后，苍白ê面互相看一下；in一切lóng了解à，就忍bē-tiâu微微á笑出来。
