《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 第九章（更新版）
作者 庄司总一 着 杨东杰 指导 林俊育 台译 2017.05.14
妻ê日记
四月X日
伊去海外，到taⁿ约有七十日。Tī途中，伊tùi新加坡kah马赛港(译注：法国 Marseille) 寄phoe来，昨昏，伊koh有用壮丽ê白金汉宫ê风景明信片通知我，伊已经到伦敦à。
真久无体验tio̍h家己一人生活ê轻松自在ê滋味，m̄-koh，这是对日常生活ê表面感觉，其实心底mā是有一种无聊ê失落感。Tī无意中，我却发见写日记bē bái，心肝也真自然安定落来。去阮翁ê册房，tī排满册ê架á顶beh chhōe家己ē-tàng读ê册ê时，发见一本小khóa bat听过ê《A-mi-el ê日记》(译注：作者 Henri Frederic Amiel，1821~1881，瑞士作家)。一读chiah知，原来是一本hiah好ê册。用「hiah好」来形容是无够额ê，册内底ê文章实在值得敬佩，我感觉ná亲像tī沙漠中发见珍珠hiah-ni̍h-á欢喜。这是「我mā来写一本日记」ê动机。Tī渐渐写落去ê中间，当然无法度亲像A-mi-el先生写出hiah有深度ê真理kah 优美ê词句，m̄-koh，对我来讲，he是心灵ê米粮kah安慰。
四月X日
今á日下决心去看医生chiah知，原来是我第二pái ê有娠ā。总是，我kah阮翁 lóng m̄知。两人离开 hiah-ni̍h远，kah-ná tī地球ê后面kah前面，感觉小khóa奇怪。假使阮两人ē-tàng tàu阵出门，大腹肚ê我去旅游世界各国，若是tī外国某一个所在来生产，he to̍h真费气，kám m̄是？
若赶紧kā chit件tāi-chì报hō͘ tòa tī伦敦ê清文知，伊mā会惊一tiô chiah tio̍h。不管是男是女lóng好；顶pái生cha-po͘ 婴á死亡，chit pái若koh生cha-po͘ ê是siōng好。总是，无论如何，婴á ê名tio̍h像伊ê名，ài有一字「清」。Phoe内，我一定beh án-ne写。
五月X日
我chit-má是tī第二pái ê有娠中间。真正感谢，我一再重复án-ne感谢；真正感谢ê tāi-chì是chit pái完全无前一pái hiah-ni̍h艰苦。Kah-ná眩船ê呕吐、目眩、胸坎cha̍t；á是手指头á瘦抽kah真可怜，面无血色kah嘴phóe凹（naih）落去等等，hiah-ê痛苦chit pái lóng无发生，真是不可思议。M̄-koh，我iáu是向神祈祷，m̄-thang koh有产后ê热病kah婴á ê死亡；无论如何绝对mài koh有hit款不幸ê tāi-chì发生。顶pái，虽然讲是发烧ê结果，我家己mā m̄知ná会有hit种kah-ná起siáu ê行为。我想，这是信仰kah修养无够ê证据。Chit pái无论gōa困难，gōa痛苦，gōa不幸，绝对bē-sái koh有hit款起siáu ê tāi-chì发生。妇人人生产ê痛苦，若kah约伯(译注：请看旧约圣经「约伯记」) 比起来，是无算啥物。早起，我kā「约伯记」读一遍。Ta̍k时读起来，「约伯记」lóng是压倒性ê好文章，ē-sái讲是文学中ê大文学。
「上主赏赐，上主the̍h去。」(译注：约伯记1:21) 咱tùi神领受福份，kám讲免亦领受灾祸？
我ài chiah-ê话深深进入我ê心灵kah肉体；我ài幸福mā tio̍h ài无幸福。若讲siuⁿ过简单掠tio̍h世间ê幸福kah满足chit款心情，我想是siōng骄傲ê。 总是，我ê翁婿清文无ài我一刻久离开幸福ê宝座，伊本身惊幸福被夺，惊受灾祸，惊kah phi̍h-phi̍h-chhoah；伊过头强烈拒绝不幸。所以伊ê幸福ná久ná被夺去，án-ne ，kám m̄是受tio̍h创伤？伊去海外旅行，就是kah-ná受伤ê鹿á走落山谷去chhōe水lim ê情形仝款。
所以伊单独出门ê时，我若硬beh tòe伊去，当然chit-má一定mā tī伦敦ê街路teh行。伊本来无想beh留我单独tiàm厝；起初伊叫我tio̍h夫妇tàu阵出门，当然我欢喜kah心肝phok-phok跳。M̄-koh，后来我改变主意，因为我看出伊ài单独旅行ê心，所以我忽然无想beh去，mā感觉无应该去。Hit时，伊讲：「产后已经一年gōa，m̄-koh，你ê身体kah-ná iáu未完全回复，你kám有自信？若tī遥远生疏ê所在破病，he to̍h伤脑筋loh。」Chit时，我忽然看出伊ê心意。何况，hō͘ 伊án-ne讲起来，本来体质虚弱ê我，kám有法度忍受长途ê旅行？实际上，我mā m̄是无感觉不安。所以我at-sa-lih (译注：日语ê「あっさり」，华语ê「干脆」) kā伊推辞。我kā伊讲：「其实我心内mā teh担心，hō͘ 你án-ne讲，我soah无信心起来。Koh再讲，我本来to̍h无适合做朴素ê家庭妇女，kiám-chhái去国外旅行tńg来，soah变koh khah西洋化，án-ne有khah无妥当，所以....。」
「Mài讲hiah-ê戆话！出去大大吸收新空气，广阔见闻，提高思想，kám m̄是好tāi -chì leh？我所担心ê kan-taⁿ是你ê健康问题lah！」 Kám是án-ne？M̄是lah！Ná会无ài坦白直接kā我讲是你想beh 单独一人去旅行？想tio̍h hit时伊hit种无老实ê态度，soah hō͘ 我感觉孤单起来。M̄-koh，详细想起来，tī一般情形下，我若讲无beh去，伊就bē勉强我去。总是，chit-má却奇怪讲伊有伊ê理由，思考伊出国ê动机，就会清楚。伊忽然想beh出游，是因为旧年ê圣诞节暗暝发生一件无欢喜ê tāi-chì。其实tī hit-ê无欢喜ê tāi-chì chìn前，伊不得不辞掉官职ê chit-ê遭遇，真久以前to̍h已经种落远因。Tùi辞掉官职hit时起，伊就渐渐减少kah日本人ê交际，讲tio̍h日本人ê tāi-chì，就忧头结面，mā khah无讲日本人ê好话。Hiah-ni̍h流利ê日本话，经过一年无讲soah变kah bē liàn-tńg，可见是心理上ê隔离。Ai-ah，加上我是日本人，chit点hō͘ 伊对我特别客气。Tú-tio̍h不平不满、bē爽快、受气kah其他真chē苦恼ê 时，讲伊是用节制，其实是不得不透过偏见kah弃sak ê面纱来对我表示而已。对做伊ê bó͘ ê我来讲，mā是真pháiⁿ做人。做bó͘ ê是无比ê无奈kah ngāi-gio̍h，对伊来讲koh khah是双重ê苦恼。连tī 「各各他ê山仑á」安静祈祷、思考kah交谈ê hiah-ê清纯快乐ê日子，伊mā是一只迷路ê羊羔；到 chit-má想起来，我chiah ē-tàng了解。伊tī人生ê路途 tú-tio̍h走投无路ê困境，伊想beh开拓一条新ê光明之路teh苦鬪。所以伊需要暂时脱离社会ê各种缠绊，过一个完全孤独ê生活，回复到朴素ê心灵状态，甚至伊ê bó͘，尤其是一个日本人，tī chit-ê时chūn mā需要恬恬离开伊乱操操ê心房。所以，伊惊chhōa bó͘ 去海外旅行变做kan-taⁿ平凡ê游山玩水hit种无意义ê tāi-chì，he是伊所惊ê。我kám bē了解伊hit种ê心情？我无hiah愚戆lah！
六月X日
连续不断ê落雨，落雨....。进入雨水期以来，每工郁卒心闷。落雨会hō͘ 热气有khah退，有khah好过日，m̄-koh，房间ê湿气真重，壁顶生菇，亲像世界地图。因为身体kah平时无仝，所以对chit种ê气候koh khah感觉bē爽快。M̄-koh，这kah日本内地阴湿ê梅雨期有小khóa无仝，雨势亲像男性ê雄势，tùi窗á看出去，心情就爽快起来。三年来，茂盛起来ê庭园内，靑翠ê树木爽快沐浴tī雨水中，只有花kah-ná纸tâm湿，谢去，看起来有小khóa可怜。
今á日仝款坐tī室内走廊ê藤椅teh看庭园，心内并无特别teh想啥物 ，kan-taⁿ亲像女王，神神坐tī hia，恬恬无tín动，消磨二点钟。最近lóng是án-ne无精神，家己mā感觉厌倦。我注目看hō͘ 雨ak-tâm ê扶桑花，想讲巴黎街路ê栗子树路树是啥物款树？开啥物花？家己一个人浸tī浪漫（译注：英语romantic）ê气氛中。Ai-ah！我ná会无kah伊tàu阵去neh？我iáu少年。「来时kah-ná花落，去时如影bē停。」阮 cha-bó͘人ê青春就是án-ne。总是，我ná亲像世事bat透透ê老婆á，放弃hit-ê bē koh再来ê机会，而且chit pái ê大腹肚，我ê 身体真好势，连衣索比亚á是亚马逊lóng mā ē-sái去。Bē-sái得，我bē-sái讲hiah-ê不满ê话。因为若后悔á是讲hiah-ê不满ê话，我对伊ê hit份善意，就失去价值loh 。
何况日头下脚无新鲜事，而且去外国mā无lóng总是快乐，mā m̄是免tam输嬴。外国ê风物确实是稀奇koh súi，m̄-koh，in所过ê社会生活kah人民ê精神，无tú-tú lóng是值得咱欣羡ê hiah-ni̍h完美，这tùi伊写tńg来ê phoe to̍h ē-tàng看出因端。
六月X日
Ai-ah！无比今á日ê tāi-chì koh khah惊人。Chit-má想起来，心肝头to̍h phi̍h-pho̍k-chháiⁿⁿ，头壳乱操操。Kā hiah-ni̍h无路用koh见笑ê tāi-chì写入去日记kám好？M̄-koh，阮翁无tī-.leh，无其他thang讲话ê对象。无要紧lah！啥物lóng thang随便乌白写写leh，可能心肝会轻松起来。 到taⁿ我 lóng m̄知Z对我是真情ê爱慕。(用啥物暗号来称呼chit-ê人？读者读tio̍h chit-ê日记自然会知是伊。我m̄是对别人客气kah顾虑，实在是我家己想beh kā伊小khóa含糊一下，所以就暂且用字母Z来称呼伊。)
今á日下晡，坐tī走廊边á ê藤椅，读完阮翁tùi巴黎寄来ê phoe了后，kah平常时仝款无注神放心teh看落雨ê庭园。Z tùi走廊hit pêng沿路用hō͘ 人会起鸡母皮ê声喝：「阿嫂，你好」，ûn-ûn-á行óa来。又koh来ā！我hit时有小khóa受气。对chit位Z，我比对其他家族ê人有khah亲近感koh好意，所以我家己一人ê时chūn，伊来做我讲话ê对象，mā chē少ē-tàng解我ê心闷，m̄-koh因为siuⁿ chia̍p来，最近soah hō͘ 我感觉真烦。所以，虽然有听tio̍h伊teh叫我，我mā假teh困，装做无听tio̍h。「你戆神teh想啥物？」Z án-ne问，teh探视我ê面ê款式。M̄-koh，伊看tio̍h我ê目chiu kheh-kheh，用真意外ê声问讲：「Haⁿh，你teh困o͘h！」M̄-koh，因为雨声ê关系，伊ê声听起来koh khah恬静。Z koh一pái叫我「阿嫂！」，来确定我有teh困á无。鼻tio̍h一chūn kah平时仝款ê头毛油味，我就想beh假困到底。伊若看我teh困，应该就会án-ne离开tńg去chiah tio̍h，这是礼貌；到taⁿ，伊iáu m̄-bat做过失礼ê tāi-chì，惊见笑koh小心ê Z，我感觉伊会信用得。M̄-koh，伊掠准我真正困重眠，soah大胆起来，起狡怪koh邪恶ê企图ê款。Z发出kah-ná贼á beh偷the̍h物件ê声念「困困去」ê时，我感觉不妙；kah-ná盲人ê第六感，我忽然发觉有危险，目chiu peh开。M̄-koh，ná会án-ne lah？Hit时，Z kui身躯ê重量teh tī我ê手腕顶面。我kah-ná草蜢á tùi椅á顶跳起来，pak开hō͘ 伊掠tiâu ê手，koh顺续用hit支手对伊ê面pa落去。我kám有需要对伊hiah狠(hiông)？可见这是我大受气ê行为。M̄-koh，若无án-ne kā伊sai嘴phóe，Z ê糊涂头脑可能bē醒起来。Hō͘ 我用kah平常无仝ê凶势压倒ê Z hián-leh hián-leh退后，惊kah面青sún-sún teh chhoah。
Cheng-seⁿ！起siáu！Hō͘ 我严严骂一两句，Z就双脚软落去，跪tòa土脚，头贴tiàm走廊谢罪。「失礼lah！请原谅！请m̄-thang大声，若hō͘ 人听tio̍h，就惨loh！我绝对绝对无想beh做pháiⁿ tāi-chì，只是阿嫂你困ê面容真kó͘-chui，所以禁bē-tiâu，就án-ne….。我kan-taⁿ想beh kā súi花摸一下看māi niā-niā。」我无好好á听Z惊惶想beh辩解ê话，kā伊sak开，koh严令伊随时tńg去。除了án-ne做以外，我mā m̄知beh án怎chiah好；我家己ê心mā乱操操。Z起身，头lê-lê teh beh离开，m̄-koh又koh m̄甘离开，坐落去边á ê椅á，仆tī圆桌顶，kah-ná gín-á哭出来。Taⁿ beh án怎chiah好leh？我ê心头真困扰；若mài kā伊phah hiah利害mā ē-sái得。伊一定感觉真见笑kah受侮辱，我khiā tī伊ê立场来想，感觉伊真可怜。总是，我心掠横，无讲半句话。伊头壳gia̍h起来，ngh-ngh teh哭，吐出伊lò-lò长ê心情。
「阿嫂，我坦白kā你讲，自你踏入陈家，我就开始爱你。你ê面kah心kah-ná蝴蝶兰hiah-ni̍h清幽美丽，而且清文阿兄并无hiah-ni̍h爱你，若无，伊ná会无chhōa bó͘出国？Ná会留你孤单一人tiàm厝？我bē-tàng忍受chit点气。伊无爱你lah！我眞知影。Tùi你ê cha-bó͘-kán-á，我有听讲lín m̄是真相好ê夫妻，阿兄tiāⁿ-tiāⁿ对你发脾气，你经常真寂寞....。阿嫂，人真正ê幸福无法度用钱买，用地位kah名誉来瞒骗mā是无可能。对我来讲，分财产ê致荫hō͘ 我比以前khah有钱，m̄-koh，kah以前ê我无啥物无仝。无幸福，无价值，我对每日án-ne茫茫渺渺，醉生梦死ê生活已经忍受bē-tiâu ā！我想ài beh做一koá啥物tāi-chì，心真着急，kan-taⁿ空思梦想，啥物办法都无；我无法度做啥物，chiah-ni̍h无意志，无气力。讲起来是因为我无喜乐ê目标，因为m̄知是beh为啥人来做啥物tāi-chì。讲tio̍h阮bó͘，我讨厌她。我án怎努力lóng无效；爱情bē-tàng用钱买，用努力mā得bē-tio̍h。M̄-koh，请你知影，我m̄是tùi你beh来求补我ê无幸福。我对你ê感情是另外一个问题，he是自然koh纯粹ê，是hiah-ni̍h激烈ê恋慕。久长以来，我只有想tio̍h你，家已一个teh艰苦。你骂我cheng-seⁿ、愚戆，我mā无要紧。Ho͘ⁿh，安子小姐，我án-ne讲，你可能会kā我当做siáu ê，m̄-koh，请你kah我tàu阵逃走kám好？咱来去新加坡，tī hia我有亲友。来去hia….。」
Ai-ah！无ài lah，无ài lah！写到chia to̍h好停笔，这kah-ná tùi通俗小说抄来ê浅薄观念kah废话连篇。讲是án-ne，我是án怎会chiah认真teh kā它详细写落来neh？为啥物tio̍h来污染我美丽ê日记纸面neh？为啥物无beh at断笔，kā纸裂破tàn掉neh？Z án-ne哭teh讲chiah-ê话ê时，若有人看tio̍h hit-ê场面，我想有可能会致使啥物款ê误解。我对hiah-ê话假无听tio̍h，kan-taⁿ不安四界看看。我虚惊一场，感觉家己真戆，对家己受气。M̄-koh，chit-má无受气kah hiah-ni̍h利害。讲实在，我ê心情bē bái，这是怎样neh？这亲像走入去洞穴ê狐狸hiah狡怪，无意中kā Z hō͘ 人起鷄母皮ê话写写出来。我chit种ê心情，宛然亲像小说家ê气派，写kah热狂，有时目屎滴，有时微笑，自我陶醉。Tī beh赦免Z ê慈悲宽容下面，有隐藏无诚实、无纯洁，甚至是有淫乱ê感情....。
神ah，求你赦免我ê罪恶，亲像我ê丈夫bat沉重kā我指点，我mā是一个软弱koh 见笑ê女人。 心灵仰望至善，肉体却是软弱。
七月X日
雨停ā。Hip热ê热天，连喘气都kah-ná金鱼。约略十gōa工无做每日ê 功课à，m̄是热kah pîn-tōaⁿ gia̍h笔，是hit件tāi-chì发生了后，soah无心chiâⁿ面对日记簿。Z mā可能感觉无面子，一直lóng无koh看tio̍h伊ê面，今á日忽然来访，会失礼了后顺续kah我参详今后ê方针。
伊显然无啥元气，明显有悔改ê心情。十工中间，伊谨慎冷静反省，总是，闲闲无tāi-chì做是m̄好，chiah会想kóa hiah-ê无聊ê事。Chit-má伊mā已经得tio̍h所分ê财产，所以phah算beh去日本内地读大学。伊讲为tio̍h准备入学考试，the̍h出中学时代尘埃满满是ê教科书kah参考书。真好ê想法，m̄-koh，伊讲明年to̍h 25岁à，kám iáu ē-tàng去学校读册？Hiah-ni̍h消极ê态度。无lah！你ê情形kah一般ê子弟求学意义无仝，你m̄免靠学历来求生活ê路，你读册是为tio̍h家己ê教养，所以无需要考虑年岁。我án-ne kā伊苦劝，鼓励伊the̍h出勇气。Z真温顺，tòm头同意我ê话。伊感觉自卑ê时chūn，hiah-ni̍h温柔顺服ê态度，ē-sái讲hō͘ 人感觉真kó͘-chui。想起来，我mā是有m̄-tio̍h ê所在。当时伊过份ê行为致到我tio̍h惊，soah严格对待伊。凭良心回顾我家己ê做法，实在mā bē-sái kan-taⁿ责备伊，我家己mā是有失觉察ê所在。我认为伊iáu是gín-á，koh想讲伊有家后ê安全性，chiah hō͘ 伊容易接近我，致使造成错误。其实，早前我to̍h有感觉伊对我有无正常ê好感，kám m̄是？M̄-koh，我lóng无警戒，我应该责备我家己ê怠慢，以后 tio̍h凡事更加注意，ài khah聪明leh。
虽然Z已经有改变，m̄-koh，伊对我hit种程度ê恋慕，无可能一工to̍h消失，我一定tio̍h小心，再小心。Tùi伊今á日ê表现ē-tàng看出伊有善意beh努力，ná亲像鹿á舐(chī)家己ê创伤来求医治一样。Hō͘ 我特别欢喜ê是，我tú想beh劝伊，结果是伊家己先表示对信仰ê关心。 照伊ê 拜托，我kah伊约束，下礼拜beh chhōa伊去教会。
七月X日
已经有几nā工无见tio̍h ta-koaⁿ阿山ê面；今年只有两pái见tio̍h伊，就是新年kah丈夫beh出国ê时。Hō͘ ta-ke阿娇指责以后，ta-koaⁿ就无koh来阮êhú-loh间洗身躯。最近伊因为久长ê气喘病，lóng无出门，我家己mā因为有娠，真久无去kā伊请安。总是，我想有时mā tio̍h去请安，所以三日前我有去，m̄-koh可惜无见tio̍h伊。
我行到ta-koaⁿ ê房间门口，ta-koaⁿ ê老cha-bó͘-kán-á素娥tú出来，她摇手koh用目神表示mài入去。我想讲kám会病kah hiah严重，就问她：「大人kám有真chē病？」素娥忧头结面tòm头，我惊一tiô，想beh kā她问khah详细，m̄-koh话语bē通，只好oa̍t 头tńg来。
我m̄知ta-koaⁿ阿山病kah hiah严重 ，到taⁿ lóng无去kā伊探访，这是我ê失察kah怠慢。家长ê身体欠安，应该有人kā我通知chiah tio̍h ā，m̄-koh到taⁿ lóng无消息传来我ê耳孔。若问Z应该siōng清楚，m̄-koh，hit件事了后，我对in bó͘春鸾有小khóa pháiⁿ势，就无意去in hia。我有问过我ê cha-bó͘-kán-á，m̄-koh，她讲m̄知。Chit件tāi-chì挂tī我ê心头，hō͘ 我不安。经过三工，昨暗忽然tùi小khóa tāi-chì真相大白。
昨暗黄昏khah凉爽ê时，我想beh tī七月半(中元节)送我ê cha-bó͘-kán-á皮鞋，就chhōa她去街á买。以前ê hit-ê cha-bó͘-kán-á pin-tōaⁿ koh厚话，无kā外口ê情报带tńg来无打紧，koh kā阮夫妇ê tāi-chì有ê无ê lóng四界讲hō͘ 人听，实在真头痛。我想讲若有khah好ê，tio̍h beh来换人。Tú好教会有一位律师ê夫人讲beh搬tńg去日本内地，她就kā她ê cha-bó͘-kán-á绍介hō͘ 我；她就是chit-má chit位，叫做阿英。虽然她已经十七岁，m̄-koh看起来iáu gín-á款，是一个天真无邪，气质好koh乖 ê cha-bó͘ gín-á，对我有真大ê帮助。M̄-nā是陈家有使用真chē ê cha-bó͘-kán-á；台湾chit种cha-bó͘-kán-á lóng是用钱买来ê。总讲一句，in to̍h是有奴隶ê命运。总是，chit pái我无仝，是用正当ê道德方式kā她chhiàⁿ ê。就是讲，她虽然只是小小一个职业妇人，却hō͘ 我心情好起来。我用日本式ê名「英子」叫她，看起来她真kah意chit种亲切ê叫法，所以有时若叫她「阿英」，她颠倒无beh kā我应。 我kā她买鞋了后，beh tńg去厝ê路中，阮入去一间siōng閙热ê大路ê大间冰店，chhōe-tio̍h壁角一个空位坐落来。阿英点草莓冰，我点牛奶鸡卵chhoah冰。Hit时，阿英giú我ê手ńg，然后靠óa我ê耳孔细声讲：「景文先生....。」我mā细声问她讲tī tó位。我四周围看一下，tùi阿英指点ê方向看去，我知伊是tī我ê正后面。我想beh oa̍t头去看，m̄-koh，阮ê座位kah后座中间有一个浅紫色ê薄绵布ê布帘cha̍h-.leh，kan-taⁿ ē-tàng看出后壁桌人ê乌色雾雾无明ê kha-chiah影。阿英mā m̄是tùi景文ê身影来发见伊，是tùi伊讲话声ê特色认出来。无论如何，景文kah我是kha脊phiaⁿ对kha脊phiaⁿ坐leh，我想讲bē-sái kek m̄知，to̍h想beh khiā起来，m̄-koh，阿英无出声，kan-taⁿ目头phah结，kā我阻挡。我m̄知究竟是为啥物，只好继续坐leh。阿英用非常好奇ê目神注目布帘á hit pêng，一直耳á iah利利teh注意听。后壁是景文kah一个cha-bó͘ gín-á细声teh讲话；准讲in大声讲话，台湾话听无ê我mā m̄知in讲话ê内容。阿英kā冰食了à，m̄-koh iáu无beh起身离开，所以可能是真趣味ê话题，á是有重大ê秘密。M̄-koh，可能是我lóng听无，而且偷听mā m̄是啥物好tāi-chì，我就硬kā ài beh koh留tī hia ê阿英拖出来外口。Tńg到厝，我就叫阿英kā in讲话ê内容翻译hō͘ 我听。He是我完全m̄知ê新鲜事，莫怪会引起她ê趣味。
第一，Ta-koaⁿ阿山teh食阿片。
第二，最近景文小弟beh娶细姨。
Ta-koaⁿ阿山破病无beh出门是表面话，其实是伊沉迷tī食阿片。为啥物chit-ê消息会泄漏出来？Koh无gōa久beh做景文ê细姨ê后头厝teh开药房，听讲是景文为tio̍h老父偷偷á去hia买阿片。 阿英ê话有koh khah详细ê内容，m̄-koh tī chia我kā它省略起来。
八月X日
大家teh等景文ê细姨娶入门，m̄-koh，到taⁿ iáu未看tio̍h她ê身影。Kám讲tio̍h等到秋天？Á是为tio̍h啥物都合来取消ā？Ta-koaⁿ阿山陷落tī魔药ê俘虏是真意外ê tāi-chì，景文beh娶细姨mā是hō͘ 人感觉tùi外貌是看bē出ê。可能是伊火热ê金钱欲望，soah hō͘ 伊其他ê欲望失去光彩ê款，m̄-koh，tùi反面ê好处来讲，伊是一个意志坚定ê人。实际上，自我来到陈家，iáu m̄-bat听过伊ê风流事，而且伊ê男子气慨kah色情无仝；oh，我án-ne讲有khah失礼lah。伊m̄知tang时去啥物所在交tio̍h chit-ê cha-bó͘ gín-á，koh讲无gōa久to̍h beh娶入门，我想感觉意外ê人一定m̄-nā我一个。
若án-ne，伊ê大bó͘ 会án怎leh？她气质好，容易受气，koh嫉妒心重，若第二夫人娶入来，难免会起风波，将来家庭mā会不得安宁。玉帘一向kā我当做敌人，hō͘ 我真痛苦，taⁿ轮到她家己来承受痛苦ā。虽然我无应该án-ne讲，m̄-koh，心情总是有khah甘愿。
总是，到beh考虑别人ê tāi-chì chìn前，iáu是先烦恼家己ê事khah好。Kah Z ê问题一直挂tī心头。伊tùi hit时起有去教会，我为tio̍h惊厝里ê人批评，避免kah伊tàu阵出入教会。M̄-koh，假使Z有真心忏悔来phah神ê门，我为tio̍h避人话屎来án-ne做，ē-sái 讲是我ê卑鄙。尤其是我看伊iáu需要久长ê时间kah努力，chiah有法度消灭情火，洗清心肝。
今á日礼拜soah，我第一pái kah Z tàu阵行tńg来。途中Z招我看beh去lim凉水无，我无客气kā伊拒绝。Koh行无gōa远，伊买路边teh卖ê花讲beh送我；是玉兰花，白色真芳ê花，m̄-koh，我mā是kā伊拒绝。然后我严严，带有一半戏弄kah刁难ê口气，问伊：「你kám bē记得你讲无ài做无聊ê tāi-chì ê话ā？到底是án怎lah？」。Z恬恬无回答，表情看起来有一点á寂寞kah无奈。M̄-koh，过一时á，伊反驳讲：「Án-ne圣经中ê《雅歌书》是啥物？He实在真精彩。阿嫂，你对《雅歌书》ê教示看法如何？」我感觉无需要回答，无beh chhap伊；m̄是，我是一言不发，显出受气ê面chhiuⁿ tńg来到厝。
Hit时，我眞正想beh phah pháiⁿ感情，对伊受气，m̄-koh，事后想起来，he只不过是我teh摆姿势niā-niā，我发觉he并m̄是tùi心底发出ê受气。眞无气魄。为啥物我对Z chiah-ni̍h宽容，并无tùi心底受气á是怨恨neh？我对丈夫清文to̍h无chit种宽容ê感觉；是一种端庄死板，bē放松e心态。比较起来，Z to̍h ná亲像gín-á容易hō͘ 人亲近。伊纯洁正直，bē kek派头变面，心肠好，所以对待khah轻松。话虽然是án-ne讲，Z kah我之间只不过是如此niā-niā。我用超过友爱ê感情来起风m̄是无路用。Bē-sái得！Hit款可怕ê事无应该发生。丈夫一旦回国tńg来，就bē koh有搅扰ê声；看起来tāi-chì已经结束à。
九月X日
该来ê事总是会来。Cha-bó͘-kán-á阿英哭teh走来kā我tâu，她讲Z kah我ê关系已经tī其他厚话ê cha-bó͘-kán-á中间传开。虽然阿英拚命辩解讲她ê主人m̄是hit款pháiⁿ cha-bó͘，m̄-koh，hiah-ê cha-bó͘-kán-á teh笑，无beh听她ê解说。若是kan-taⁿ怪阮两人iáu无要紧，连我腹肚内ê gín-á mā讲m̄知是siáng ê，tī hia惹起chit款侮辱人ê hàm古批评。M̄-nā是众cha-bó͘-kán-á之间teh谣传，事实上，连in ê主人，陈家全家族mā lóng teh谈论。Ai-ah，beh án怎chiah好leh？我对难免会被怀疑已经有觉悟，m̄-koh，这是无法度忍受ê侮辱，致使我有讲bē出ê暗淡心情。我ê应付方法可能加减欠缺智慧，m̄-koh，我做人彻底正直，无做啥物见笑ê事，并无需要提心吊胆。虽然我是án-ne teh想，m̄-koh，若是丈夫tńg来无beh相信我ê话，beh án怎leh？应该bē有chit款tāi-chì lah！M̄-koh，万一若无相信，到底beh án怎chiah好leh？又koh准讲伊无beh相信hiah-ê谣传，只是付之一笑，án-ne mā是加减会破坏伊长途旅行所带tńg来ê清新感。我无希望会án-ne，这实在hō͘ 我非常困扰。
九月X日
大昨日，景文ê第二夫人入门，坐红色ê轿；he是真正ê新娘坐轿。喜事ê红龟粿kah美食料理mā有送来我chia；放炮á声 kah音乐真闹热。 今á日，想讲闹热已经过去，却听见中庭传来嚷声，我就行出去看。景文ê大bó͘ 玉帘tī hia非常激动teh tâu东tâu西，吐她心中ê苦水。二十几个cha-bó͘人kā她围leh，有ê劝解，有ê呼应，ná亲像鷄鸭á kui阵tī hia ki-ki ka̍h-ka̍h；当事人景文kah伊ê细姨lóng无tī hia。Chit种ê冤家iáu是支那式ê；无beh正面kah对手挑战，kan-taⁿ是一种tī众人面前雄辩kah诉求ê宣传法。我行óa去，玉帘随时kā我掠tiâu，讲in翁ê pháiⁿ话，求我同意她ê讲法kā她解救。她kah-ná对我ê敌视kah恶宣传，lóng bē记得了了à，hō͘ 我感觉真奇怪。Tùi chia可见，玉帘有相当ê心事，实在hō͘ 我真同情。Tī chia娶细姨是真平常ê tāi-chì，m̄-nā m̄惊人知，koh颠倒是富裕kah权势ê表徵。M̄-koh，kah日本内地相像，这bē-tàng讲是纯良ê风俗。总讲一句，chit种风俗m̄是有koân ê道德价值lah。Koh再讲，bó͘对翁beh娶细姨无拒绝ê权利，这对bó͘来讲，当然是真bē爽快ê tāi-chì。人ê心，世间ê人情，去到tó位lóng仝款。玉帘ê愤怒m̄是无理ê。她气kah忍受bē-tiâu，án-ne讲：「Tī chit款翁ê所在tòa bē落去lah，今á日to̍h来离婚，tńg来去外家厝。」她气kah忍受bē-tiâu án-ne讲。虽然是án-ne，会kā hit款tāi-chì随便讲出嘴ê人，通常是实际上无hit款意思。玉帘mā是bat一pái逃走后，无gōa久to̍h koh倒tńg来；她mā是bē-tàng脱离世间ê常例chiah tio̍h。
总讲一句，二房ê新鲜事引起陈家每一人ê注目，像今á日ê争执会koh不断发生，各种谣言一定mā会继续落去。
好佳哉是án-ne，大家ê关心chiah移向hia去，我kah Z ê谣言可能就会án-ne消失去，我家己安慰家己，án-ne teh想。
十月X日
生产ê日期渐渐逼近，万一有状况，就ē-tàng随时去K病院入院ê手续已经有办好势，所以ē-sái安心。想起来，chit pái身体算是非常轻松，kah顶pái ê痛苦比较起来，实在是感谢不尽。我ê身体状况真好，koh是家己一个留tī厝里，闲闲无tāi-chì，kā身边杂事写落来，不知不觉，kui百页ê笔记簿已经无空白thang好写à。M̄-koh，chit-má读起来，lóng是写kóa无啥意义ê杂事，家己感觉真无满意。Mài讲这是闲闲无tāi-chì chiah写来安慰家己ê，横直若beh写tio̍h写khah美好ê tāi-chì。尤其是kah Z ê关系hit部分，hō͘ 我ê心lóng bē平安，恐惊会引起误解。有时想beh kā它擦消，擦除两三chōa了后，忽然感觉án-ne koh khah会引起人ê注意，就án-ne kā它留leh。有一工有人á是阮翁看to̍h ，kan-taⁿ hit部分擦除，颠倒会成做怀疑ê因端，所以我改变我ê想法。 Koh续落去，我想chit本日记iáu是mài hō͘ 人看tio̍h khah好。本来想讲丈夫tńg来ê时，beh kā日记当做是我单独tī厝里日常生活kah心境ê记录，是对丈夫ê忠实报告，m̄-koh chit-má soah惊对伊公开chit本日记。原因m̄-nā是kah Z ê tāi-chì会有困扰，我mā感觉家己厚话会hō͘ 人讨厌，而且koh m̄知见笑，kā别人á是丈夫ê tāi-chì the̍h来评论，koh假gâu ，有一部分kā in做心理分析。何况，chiah-ê mā m̄是堂堂正正teh讲，是私底下随便讲讲leh，hit种奸诡kah内心骄仿ê态度眞明，家己mā感觉讨厌。
我想iáu是kā chit本日记秘密khǹg tiám箱á底khah妥当；年久月深以后，时间会hō͘ 有缺角ê现实变成圆滑，koh阮ê心对hit件事会有理解kah宽容；到hit一工，若想起有chit件事，就ē-tàng笑笑á来读chit本日记。
今á日，我chit本卑微ê日记就到chia停笔，想起来mā是有小khóa m̄甘。因为有kah-ná女学生ê感情，今á日黄昏ê时，不管别人án怎看我，我行向旷阔ê墓地山仑á，peh起lih仑á顶，坐tī kah-ná绒毯ê草埔顶面，沐浴tī beh暗á ê金色日光中。我ná亲像牛反刍青草，回想顶年仝chit-ê季节来chiaê时，hit段充满幸福ê时间，koh想起伊念Ui-liam-suh O-su-oh-suh （Williams Wordsworth）ê诗句：
美丽ê黄昏，心静自由自在；
神常常kah你同在，咱虽然m̄知。
伊去海外旅行m̄知有得tio̍h啥物？Chit-má变kah像(sêng)啥物款leh？这是我留tī厝里期间，头壳内一直离bē开ê期待kah挂念。我非常希望新经验ē-tàng带hō͘ 伊精神上ê和平；我所指ê和平m̄是伊所想ê安逸kah软弱，颠倒是tī苦难kah烦恼中间，有根本bē摇动，kah-ná船碇ê hit种安定。伊讲回程beh tiàm印度停留几工，伊是beh tiàm印度观察啥物？思考啥物？我m̄知，m̄-koh，我知一切应该是tùi疼出发，终局mā是用疼来结束。若无对困tī重重叠叠无尽ê墓内hiah-ê家己ê民族灵魂抱tio̍h敬爱之心，án-ne，伊对殖民地kah民族ê问题不管有gōa好ê意见kah思想，结局，kám m̄是kah无根ê树仝款？
确实是血比水khah厚，我腹肚内ê gín-á beh有阮两人各一半ê血混合来出世，ǹg望这hō͘ 伊ê心变成koh khah美好。
