《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 第十章（更新版）
作者 庄司总一 着 杨东杰 指导 林俊育 台译 2017.05.21
安子生落来ê婴á是cha-bó͘ gín-á。清文旅行中有写phoe tńg来讲，若是cha-po͘ ê，就kā伊号名「清长」。因为婴á是cha-bó͘ ê，安子就kā她号名「清子」。婴á遗传tio̍h老父ê体格，是一个将近3.6公斤ê大汉婴á。
过了年ê早春，去海外旅行足足一年ê陈清文tńg来ê时，婴á已经出世一百工以上，大到会tín动肥chut-chut ê脚手，显出幼气ê笑容kah-ná teh欢迎老父。清文并无因为生cha-bó͘-kiáⁿ来失望，阮虽然无啥想beh生chē kiáⁿ，m̄-koh，今后若koh生几个á ê中间，mā有可能会生tio̍h cha-po͘ ê，而且清文已经无像以前hiah-ni̍h热切teh ǹg望生cha-po͘-kiáⁿ。虽然cha-po͘- kiáⁿ ê光荣kah价值应该khǹg tī siōng高位，m̄-koh，chit-má身为cha-po͘人ê清文已经无koh kā家己理想化。伊出国旅游第一个收获(或者应该讲是损失)，就是无koh kā所有ê tāi-chì理想化。伊改用实际kah严峻ê看法来思考，这是伊成熟ê结果，m̄-koh另外一方面来讲，这是标示伊已经丧失梦想ê温柔美丽ê青春。M̄-koh，安子并无注意tio̍h清文chit种内心ê变化。久长望伊早归ê丈夫chit-má已经tńg来à，面肉kah-ná有小khóa消瘦，看会出是因为旅途ê厌倦，m̄-koh，心情活泼，精神开朗。稀奇ê国外见闻，外国式ê爱抚，甜蜜ê殷勤，á是伊ê发型，西洋式ê穿插，领带ê配色等等，hō͘ 人感觉伊真phāⁿ，安子mā真自然to̍h沉迷tī新奇ê爱情中。安子看会出丈夫ê改变ê只有一项，就是清文会食薰ê tāi-chì。「出外真chē时间无聊，就án-ne 开始食薰，soah变成习惯，chit-má tio̍h赶紧来改薰。」清文án-ne辩解。因为基督教无规定教徒to̍h绝对bē-sái lim酒、食薰，koh安子mā无拘束tī chit种古板ê想法，所以她无想beh特别kā伊问罪。M̄-koh，过去伊lóng无食过薰草，而且伊家己对hit种事是坚定ê禁欲主义者(译注：Stoicism，希腊哲学家Zeno tī纪元前308年倡导ê学说)，chit-má看tio̍h伊用薰kā肺脏污染，koh tùi鼻孔吐出来，安子感觉真意外。M̄-nā án-ne，天气渐渐炎热起来，清文常常ài lim冰麦á酒；暗顿tio̍h chhoân一罐，hip热ê暗时，伊mā会peh起lih楼台顶，家己一人tī hia lim。Chit种新ê趣味，若hō͘ 伊海外旅行tńg来，ē-tàng脱离本来偏激固执ê倾向，成做一个开通明朗ê人，án-ne mā是bē bái；m̄-koh，伊hō͘ 人感觉伊精神上严格认真kah激烈ê气魄soah变khah薄弱。安子感觉清文确实有改变，m̄-koh，到底本质上有啥物改变，她暂时iáu无法度了解。
Hit中间，tú tńg来所造成ê新感情，无gōa久就退潮，又koh回复平常ê夫妇生活。为tio̍h无ài破坏丈夫欢喜ê心情，安子一直无讲起丈夫出国中间所发生ê tāi-chì。总是，她想讲chit-má ē-sái对伊讲à。M̄-koh，丈夫对她jú温柔体贴，瑞文对她所讲ê tāi-chì 她jú讲bē出嘴。本来想讲今á日beh kā伊讲明，结局mā是koh kiu去。俗语讲「人ê谣言只有七十五工」；七十五工后，厝里众人对hit件事ê风评，就会消失去。若无，可能已经传入清文ê耳孔ā。其它ê tāi-chì，亲像景文娶细姨kah老父阿山ê食阿片等等，清文tńg来以后，早to̍h知ā。清文并无像安子所想ê hiah-ni̍h惊kah gāng去，á是受气。对景文ê tāi-chì，伊kan-taⁿ冷笑，讲伊是戆大呆以外，并无特别表示激烈ê道义感。伊有重视老父阿山ê tāi-chì，bat一两pái发表意见，m̄-koh，hō͘ 人感觉伊无像以前有hiah-ni̍h真情直接ê表现。这证明伊ê处世已经有khah平和，心胸有khah宽阔。若是án-ne，安子想，kám是ta̍k项tāi-chì lóng ē-sái直讲，无需要掩盖啥物秘密？
安子下决心想beh讲出hiah-ê tāi-chì ê时chūn，夫妇两人tī暗顿ê桌顶有小khóa意见bē合(ha̍h)。
「安子，ná会无the̍h麦á酒来？」
食饭chìn前，清文án-ne teh问。这虽然是第一pái发生ê tāi-chì，m̄-koh清文ê口气kah-ná讲暗时lim酒是当然ê，hit时安子对án-ne ê讲法感觉真意外，所以显露出讨厌ê面chhiuⁿ。
「无ā lah！M̄-koh若beh，差人去the̍h好无？」
「若无，免lah！」清文at-sa-lih án-ne讲，m̄-koh，口气无讲真好，因为伊看出in bó͘有无奈ê面色。
「你kah-ná真ài lim，是koh想起tī外国tó位ê酒味？」
「Tī外国这叫做 “a-pé-li-ti-huh” (译注：法文ê “apéritif”，餐前酒)。In习惯tī食饭前lim一杯酒来促进食欲，不管是tī大饭店、餐厅，á是家庭，lóng会chhoân酒。我tī英国有lim过khǹg kui百年ê ui-su-kí (译注：Whisky，华语译做「威士忌」)，tī德国lim麦á酒，koh有tī法国lim白葡萄酒，hiah-ê滋味hō͘ 人bē bē记得lah。」清文绝对m̄是对酒有深入ê研究，伊是thiau故意膨风来惹in bó͘厌烦。「Lim酒无一定是罪恶，只要对神ê殿堂，就是身体无伤害ê程度，kám m̄是无要紧leh？日本内地一般ê基督教徒受tio̍h形式ê拘束，欠缺精神性ê内容，hiah-ê嘴讲m̄-thang做啥物ê人，究竟有做出啥物积极性 ê堂堂正事leh？」
「看起来你有真大ê改变；以前你mā是像你讲ê严格顾守原则ê人，kám m̄是？」
「我ê改变，你内心teh烦恼是无？」
「无lah！你若对新ê想法kah行为有信念，我lóng无话讲。M̄-koh，讲『以后无koh做』，he to̍h有责备ê口气，kám m̄是？颠倒堂堂去做，我就khah安心。」
「堂堂oh？Βē-sái koh kah以前仝款ta̍k项lóng tio̍h堂堂lah。Chit点我有变kah谦逊。Tī成做基督徒chìn前，我有想beh做一个堂堂有路用ê人，kā家己ê罪kah弱点随时排列tī神ê面前。He到底是谦卑ê精神，ā是卑鄙傲慢ê心肝？我想人tio̍h先有全心忍受苦痛ê意志。Beh kā家己ê罪恶kah过失chhōe出解决方法。我心内是m̄是有比lim酒食薰koh khah大ê恶毒？人类lóng teh phāiⁿ原罪，beh án怎做一个堂堂正正ê人neh？He chiah是会hō͘ 石头tìm死。总是，安子，你充满信念，看起来是一个正正当当ê人。」
清文ná亲像无ài kā心内所想ê讲出来，甚至用微笑来假做无事，án-ne反tńg ná蛇无声无说渐渐缚tiâu安子ê胸坎。翁婿teh想啥物，teh kā她暗示啥物，她已经明白à。
「你teh受气是无？」
「我并无受气。」
「阿英，你去酒店吩咐送麦á酒来。」
「免lah，免lah！讲hiah chē酒ê tāi-chì，我腹肚已经饱à，免去买à lah！」
清文拒绝in bó͘叫cha-bó͘-kán-á去买麦á酒，mā无显出特别无欢喜ê表情，就开始食无“a-pé-li-ti-huh” ê暗顿。食饭中无适合讲瑞文ê tāi-chì，安子想讲食饱后chiah ûn-ûn-á来讲。
总是，tú食beh饱ê时有人客来。自从清文回国以后，人客出入有真明显ê增加。伊真无闲；担任教职以外，koh加入hit当时真chhiaⁿ-iāⁿ ê文化协会ê一个文化团体，kah hiah-ê有关ê人来往频繁，koh tio̍h为机关杂志写稿，mā tio̍h出去演讲。另外，iáu koh有真chē学生对伊慕名而来，最近甚至成立一个用伊做指导者ê研究会。
安子对chit种情形并无欢喜；清文以前对社会问题to̍h有teh关心，m̄-koh，chit-má是实际全心teh参与。
无论这是啥物性质，chit种台湾人ê心情动态kah实际运动并无受日本当局欢迎；tī社会议论kah新闻报导，lóng是真明显。安子有感觉不安ê心情，问清文讲：「你kám变成社会主义者？」 这是kah-ná gín-á ê单纯质问，清文面露笑容，简单回答讲：「我m̄知是m̄是社会主义，m̄-koh一屑á危险都无。这kan-taⁿ是我ê精神tùi屈tī个人狭狭ê框á内，踏出去社会niā-niā，bē造成你ê困扰，做你放心。」
这是伊内心ê转向；当初tú回国ê时，安子无注意tio̍h伊本质ê改变，chit-má chiah知影清楚。安子无法度对chit种tāi-chì判断是非，因为她kan-taⁿ生活tī神kah正义ê小kho͘-á内，而且清文无想beh kā她tùi hit-ê kho͘-á内强giú出来；安子若问伊，伊mā bē讲真chē。安子感觉in kah普通夫妇ê感情有无仝款，ná像去hō͘ 伊放拺，心内感觉失落，to̍h寂寞起来。这kah以前讲tio̍h人生、灵魂kah神ê时，lóng讲kah详细koh热phut-phut，kah-ná beh kā她giú koân起来hit款热情，比较起来，实在是天差地。
Hit暗，清文所教ê神学校kah师范学校ê学生几人，tī二楼ê册房聚集。不管啥物国家，啥物世代，少年人to̍h是少年人，in谈论热烈，大声传到外面来。安子beh phâng茶入去ê时，tiāⁿ-tiāⁿ有感觉beh踏入无适合ê场所ê踌躇。热心激动ê学生ê面kah-ná热气充满房间，hō͘ 安子有小khóa惊惶。尤其是她一入门，in就停止谈论，á是放低声音，hit种被压缩ê片刻安静，soah hō͘ 安子感觉她tio̍h禁气起来。其实in肃静落来，并无其它啥物意思，kan-taⁿ是对陈老师ê夫人表示礼仪kah客气；á是因为恬静美丽ê夫人入来乱七八糟ê室内，ná亲像一蕊花飘入来，hō͘ hiah-ê学生小khóa惊kah gāng去而已。
M̄-koh，究竟是啥物话题hō͘ hiah-ê少年人hiah-nih热心teh讨论？清文教导in啥物？啥物热风吹入去in ê胸坎？In本底是用台湾话讲，m̄-koh，安子一入去，in就改用日本话。这可能是对日本人ê陈夫人ê礼仪，m̄-koh，tùi另外一方面来讲，改用日语，话题kám bē脱离议论ê中心？Kám bē hō͘ 重要ê议题冲淡去？安子sa无研究会真实ê性质。M̄-koh，几日前tú-tio̍h神学校MacNell校长ê时，她趁机会kā伊问chit-ê问题。校长温柔kā她讲：「陈先生kā John Ruskin(译注：1819~1900，英国美术批评家、思想家)ê “Unto this Last” (《到最后一个》)做教材teh教学生。Ruskin是一个基督徒，伊ê学术堂堂正正，绝对bē有危险。Lín陈先生mā仝款，绝对bē有危险，请你安心。」
经过MacNell先生ê盖印保证，安子有安心落来。M̄-koh，昨暗ê聚会，她看tio̍h in翁清文本身比少年学生khah兴奋，这m̄是常有ê tāi-chì，安子soah起tio̍h惊。聚会中途phâng水果入去，清文连kā她看一下都无，一手the̍h册(有可能是Ruskin ê册)，phah另外一手，用热火一样ê声调对学生teh讲话，而且伊kah平时教册á是论述ê时无仝款，目神带有忿怒，面色青sún-sún。学生mā m̄是真感心teh听，ē-sái讲是受tio̍h激烈谴责，面相变tēng，lóng恬恬无声。
无gōa久学生tńg去，安子行入去册房。
「Tú-chiah lín是teh讲啥物话题？Kah-ná非常兴奋ê款式。」
「Ngh….。」
清文ê面色沉重，双手交叉tī胸前。安子虽然想讲chit时恬恬khah好，m̄-koh mā是感觉无讲bē-sái得。
「我有话想beh对你讲。」
「M̄免讲lah，你免烦恼，我已经想beh kā研究会停止；hiah-ê学生ê意识形态kah我ê有无相容ê所在。我想讲in siōng信赖我，siōng尊敬我，我án-ne teh自我骄傲，m̄-koh，其实in内心对我有小khóa不满。甚至有人敢批判我讲：『老师，你无勇气lah。』因为这，eng暗chiah会惹我受气；尤其我受气ê是in刺激tio̍h我痛苦ê所在。我对in讲：『原来lín ê思想可能正确，m̄-koh tī人生，正义m̄是全部。Lín若到我ê年龄，有bó͘-kiáⁿ，过社会人ê生活，iáu-koh ē-tàng堂堂讲出chit-má ê理想，我就可能会承认lín。』我án-ne kā in训示，感觉我已经输in。我án-ne受气，无办法lah！总讲一句，我无勇气lah！」
清文án-ne艰苦心teh自我谴责，完全kah安子想beh对伊讲ê tāi-chì无对头，安子m̄知beh án怎讲chiah好。 「Ai-ah！M̄是án-ne lah！我想beh讲ê是我kah瑞文ê tāi-chì。」 安子án-ne决心beh kā它讲出来。清文kah-ná tú梦醒，看in bó͘一目，就随时看对别位去。
「你kám讲到taⁿ lóng m̄-bat听讲hit-ê谣言？」
「听过à。」
「若án-ne，ná会到taⁿ你lóng恬恬无对我讲半句？」
「我希望你家己讲出来。」清文回答讲。伊话中带毒气ê责备，koh oa̍t头无beh看她，hit种kah-ná安子是gōa-ni̍h-á乱来koh不贞ê态度，hō͘ 安子一时soah无话讲。清文koh用仝款ê口气讲：「为啥物你踌躇到taⁿ chiah beh讲明？」
「因为我想讲你tú tńg来，无想beh hō͘ 你为tio̍h chit项无聊ê tāi-chì来无欢喜。」
「无比隐瞒会hō͘ 对方koh khah无欢喜，你kám无考虑过？」
「失礼lah！」
安子承受重大ê压力，头beh àⁿ落，m̄-koh，想讲chit时若表现自卑，会增加对方ê憢疑，就决心坚强来求对方ê信任。
「M̄-koh，你kám bē相信我？」
「当然相信。你若会生出一个m̄知啥人ê gín-á，chit-ê世界就无啥物thang hō͘ 我相信。总是，会hō͘ 人有机会制造chit款不当ê谣言，这m̄是会hō͘ 人佩服tit。」
「Ai-ah！我听tio̍h hit款ak-chakê话to̍h会起鸡母皮ā，何况是你，你听tio̍h mā会真讨厌，kám m̄是？所以我一直讲bē出嘴，你kám bē了解我ê chit种心情？」
不管in bó͘ án-ne一直想beh解说，清文却kah-ná teh戏弄她，嘴角露出无心ê微笑，恬恬m̄讲话。
「你tú-chiah因为麦á酒ê tāi-chì；这可能是我ê感觉；讲一kóa hō͘ 人bē爽快ê话。M̄-koh，我会记得我无做过啥物会hō͘ 你责备ê tāi-chì。你无tī厝ê中间，我用啥物心情，啥物态度teh过日子，你kám知？」 安子想beh讲日记ê tāi-chì，m̄-koh，忽然想讲án-ne会危险，就无讲。虽然丈夫有讲过「我相信」，m̄-koh，若准讲he是伊kan-taⁿ嘴讲讲leh niā-niā，其实心头iáu有一片疑云，结局会án怎？若是án-ne，以前想讲beh hō͘ 伊看日记kah-ná khah会有好结果。 事实上，清文并无完全tháu放心情。后来，根据伊有大大责备瑞文小弟，koh kā伊phah倒ê事实，安子chiah知影丈夫对chit件事有料想bē到ê致意。
Tāi-chì虽然是án-ne，chit种瓜葛ê柴屑á也tòe时间流失去。Tòe-tio̍h日子teh过，对gín-á ê疼hō͘ 夫妇之间koh完满起来。
秋天来到，婴á清子kah-ná木瓜teh成长，健康koh丰满teh发育。清文ài婴á身躯ê芳（phang）味；比木瓜，mā比檨á koh khah好ê芳味。她ê嘴phóe kah颔颈kah-ná软滑ê麻糬，清文ná亲像狗á teh鼻hit-ê气味。后来婴á ê奶hiàn渐渐消失，染tio̍h老母皮肤kah衫裤ê气味mā无去，koh再无gōa久to̍h是度chè à。Chit时，清子kah-ná熊á-kiáⁿ开始学行路，mā讲起人听m̄知ê话。她ê体格像老父koân大，智慧ê发展mā khah早。M̄-koh，她ê鼻孔khah大，嘴唇khah厚，有一点á cha-po͘ 面；若beh成做美人，to̍h ài像老母khah好。不过，ná亲像粉鸟á hiah-ni̍h圆liàn-liàn ê目chiu仁，ē-tàng料想是有聪明伶俐ê素质。清文tiāⁿ-tiāⁿ夸口讲：「Chit-ê gín-á一定会真聪明。」
清子第一pái ê生日有招待亲chiâⁿ朋友，举行盛大ê庆祝宴会。众人送婴á笔、墨、算盘、秤(chìn)á等等十二种ê礼物。安子hō͘ 婴á穿桃色ê台湾衫，挂银手环、玉á ê耳钩，装饰kah真súi，然后照惯例chhōa到厅堂去拜公妈。礼仪一结束就kā众人赠送ê十二项礼物khǹg入去筛(thai) á内，hō͘ 婴á去sa一项物件。
「清子ah，好好á想一下，tio̍h选siōng好ê物件oh。」Kah-ná beh kā已经听bat ê gín-á叫她 tio̍h注意ê讲法，安子家己都感觉好笑。婴á若选算盘á是秤á，大汉会做seng-lí人；若选肉，就会食真chē肉hō͘ 身体健康，用án-ne来祝福婴á ê将来。安子并无相信chiah-ê吉兆，若beh成做seng-lí人á是大食汉，不如预选一个高尚ê未来。 老母kā清子抱óa去桌顶ê筛á边，m̄知半项ê婴á伸手beh去sa物件。她想beh sa小型ê算盘kah布包，koh想beh sa鸡腿，无liú-lia̍h ê细支手开一下合一下。每pái老母lóng kā婴á抱khah后壁，hō͘ 她ê手sa bē-tio̍h物件。无一时á，婴á ê手伸到一支小纸卷，tú sa-tio̍h ê时，安子随时退身离开桌á。
「Sa-tio̍h啥物物件？」
罕得出房间ê阿公阿山tú好tī hia，就问。安子tùi婴á ê手中kā纸卷the̍h来hō͘ 阿山。阿山phah开来看，kah-ná真感心hmh-hmh细声讲。纸顶写「无名天地之始，有名万物之母」。
「看ah，这是老子讲ê话。Chiâⁿ有意思，chit-ê gín-á大汉会成做文学家oh！」
阿山kā安子讲，在场ê众亲chiâⁿ mā用台湾话传讲仝款ê话。安子想讲清文若tī-.leh一定会真欢喜，可惜伊tio̍h去学校出勤，无tī-.leh。阿山tùi新妇ê手kā婴á抱起来。「Ngh，真kó͘-chui。」伊细声讲，koh详细掠婴á金金看。M̄-koh，伊bē堪得婴á ê重量，一时á就kā婴á抱还安子。无看tio̍h阿山chiah无gōa久，伊ê面、手骨lóng老去loh。以前肥chut-chut ê肢体已经消瘦落肉，原来阔lòng-lòng ê支那式礼服chit-má koh khah是明显siuⁿ阔。伊ê面色kah-ná病人，白色ê山羊须mā薄koh无金滑，目chiu浊浊，嘴齿mā lî-lî-lak-lak。阿片chit种魔药hō͘ 伊变成án-ne，甚至连七、八公斤ê婴á重都抱无法。安子看tio̍h chit种衰弱老人ê姿态，心内同情也感伤；无chhái本来是欢喜荣耀ê度chè，soah忽然hō͘ 乌云罩暗来。
「你真gâu假孔neh！」
安子hō͘ 人tùi后壁轻轻phah肩胛头koh细声对她讲话，她oa̍t头看，原来是景文ê大bó͘ 玉帘。她是指安子无hō͘ 红婴á随便选择ê做法，安子ê方法确实有khah狡怪，m̄-koh，对她来讲，he只不过是无啥意义ê迷信，她只是beh hō͘ 家己满意niā-niā。玉帘责备安子ê无妥当做法，是m̄是想beh tùi做度chè祝贺chit件事挑毛病leh？M̄-koh不可思议ê是，她ê目chiu lóng无pháiⁿ心肝ê眼色，她kan-taⁿ想beh制造kah安子讲话ê机会。
「Chit款tāi-chì假孔mā无要紧lah。」
玉帘笑笑á改口讲，而且为tio̍h beh hō͘ 阿嫂了解她并无意思beh破害阿嫂ê心情，所以koh khah用笑面kah滚笑ê口气讲话。
「我生第二个gín-á度chè ê时，伊无sa文字hit款好吉兆ê物，一伸手to̍h sa-tio̍h鸡腿，khǹg入去嘴里食。想讲án-ne伊m̄知会gōa-ni̍h健康来生长，结果过一个月to̍h死去，koh是因为pháiⁿ腹肚ê关系。」无人笑，因为tī祖先牌á kah佛像头前讲chit款笑话，是不敬ê tāi-chì。M̄-koh，玉帘继续讲出koh khah亵渎(siat-to̍k) ê话。「所有lóng是假ê，佛祖、神明mā lóng是假ê。虽然讲是『惨ah，无佛thang拜』，自开始to̍h无有佛à！」
「玉帘，你讲啥物痟话？！你chit-ê人ā无考虑场合。」连家长阿山都目头结结kā她责备。
「M̄-koh是事实ā，无办法lah！」
玉帘用无正经 ê口气对ta-koaⁿ讲：
「我想我比hit-ê ná牛ê戆面cha-bó͘ khah súi，m̄-koh，景文却kan-taⁿ照顾她，无beh chhap我。这到底是啥物意思？我m̄知。」
「我mā m̄知，无人知lah！」
「我真m̄甘愿，连阿爹都án-ne讲，食阿片了后soah变糊涂。前几pái去chhōe伊参详，伊kā我赶出来。讲kah阿母，她绵绵疼景文，lóng为伊。」
「你chit-ê戆大呆，丈夫娶细姨to̍h嚷bē-soah，我m̄-bat看过chit款ê cha-bó͘人。总讲一句，是景文冻霜m̄好。Ná准伊娶三四个细姨，你chiah看会开，bē koh加讲话lah！」
阿山讲了，就慢慢á tńg身，拖tio̍h双脚无力ê脚步行出去室外。佳哉ta-ke阿娇因为感冒无来tàu一脚，若在场，就有可能会开始相骂。玉帘m̄甘愿，teh看ài相诤（chèⁿ）ê老父ê背后，感觉真无奈。M̄-koh，她随koh oa̍t tńg身对安子讲：
「安子姊，你真giám硬，为啥物你有法度头到尾安心自在neh？」
「无no͘h，我mā有一般人ê辛苦kah烦恼。」
「M̄-koh，你一点á都无表现出来；我m̄-bat看过你受气、啼哭，á是像我án-ne kah人冤家、chho̍p-chho̍p念。这是啥物原因？Kám是信上帝ê关系？」
「O͘h，是lah！」
「基督教ê神kám有影hiah-ni̍h好？Án-ne我mā beh来信看māi leh。最近m̄知啥物原因，我感觉世间真无意义，ta̍k项lóng无趣味，甚至连受气、啼哭mā懒懒。Ah！安子姊，看tang时chhōa我去教会kám好？」
「好，无问题。我真了解你ê心情，另工来我hia chhit-thô，互相来谈谈leh。」
安子án-ne回答。因为玉帘ê改变真大，是安子内心m̄敢相信ê意外，所以hō͘ 她相当tio̍h惊。安子m̄-bat看过玉帘hit款消沉可怜ê面色。以前有ná孔雀hiah-ni̍h傲慢作风ê玉帘，而且kā安子当做眼中钉teh欺负她ê人，chit-má颠倒ná亲像孤鸟飞来她ê怀中，chit种情形实在是真奇妙。
Chit-ê hō͘ 玉帘败北、看破，叫做「阿龙」ê细姨，到底是gōa khiàng脚ê cha-bó͘人？玉帘m̄是容易屈服ê女子，安子想讲她若ē-tàng屈落来求神拯救，是真好ê tāi-chì。安子感觉玉帘真可怜。
安子想讲看beh用啥物话来kā玉帘安慰，m̄-koh，因为tī gín-á度chè ê时刻，她惊气氛会hō͘ 人phah-pháiⁿ去，安子无加讲话，就离开厅堂，行tńg去家己tòa ê所在；后面有听tio̍h玉帘缚脚轻轻á行tī砖á路ê顶面，发出小小寂寞ê声。
Gín-á度chè庆祝生日了后无gōa久，安子得tio̍h寒热病，一chūn一chūn ê交阴寒(ka-iam-kôaⁿ) hō͘ 她寒kah嘴齿ka̍p-ka̍p叫，身躯mā kah-ná地动tiô起来，续落来koh有ná火teh烧ê高热。安子亲像tī寒带kah热带之间来回。Ná像是恶性ê寒热病，真无容易回复，安子足足一个月久倒tī眠床顶。
安子有当beh回复ê有一工，瑞文带一盒chhio-kho-liat-toh糖á来探访。阿兄回国了后，伊感觉户tēng koh khah koân，真无自在，坐无十分钟to̍h beh告辞。
「Ai-ah！koh加讲kóa话lah！你准备考大学ê情形如何？准备了bē bái ho͘ⁿh？」
安子kā伊挽留。伊有想beh问，mā有想beh讲ê话，mā ē-tàng安慰眠床顶ê无聊，所以她叫伊koh小留一下。
「M̄-koh，若hō͘ 阿兄看tio̍h，会hō͘ 伊骂。Koh….。」
「Koh有啥？为tio̍h hit件tāi-chì，阮翁真严重kā你责备ho͘ⁿh？」
「Hō͘ 伊大修理，koh siàn嘴phóe。虽然kan-taⁿ siàn一下，m̄-koh非常痛。」
「Án-ne，he是tang时？」
眠床顶ê安子看tio̍h瑞文平滑苍白ê面，想起瑞文对她做出失礼行为hit当时，家己mā是siàn伊ê嘴phóe。总是，he安子khah无teh在意；她感觉丈夫清文phah瑞文是siuⁿ过头暴力。
「Ai-ah！你hō͘ 阮夫妇两人phah，he是因果。」
「自作孽lah，m̄-koh，阿兄mā是嫉妒心真强ê人。顶pái我挽柚á hō͘ tī树á边ê你ê tāi-chì，我无掩盖对伊讲，结果阿兄无接纳我ê解说，想讲我kah你有khah深ê关系，所以大大kā我责备。看伊hiah拗蛮受气，我mā soah起反抗讲：『你若hiah-ni̍h无信任阿嫂，ná会无chhōa她出国？』讲soah，伊ê拳头母随cheng来。阿兄对chit-ê无聊ê谣言掠做是真实ê款。」
「Mā m̄是án-ne，可能只是khi-mo͘-chih (心情) bē爽lah！」
「听tio̍h讲我hō͘ 你生kiáⁿ ê无聊闲á话，我真正是惊kah gāng去，koh m̄知beh án怎。He是玉帘传出Chit件tāi-chì ê。」
「Kám是玉帘？」
「因为细姨入门，她家己变kah完全无趣味，使khioh-ka̍k（华语ê「自暴自弃」），soah造谣恶意宣传。我有现场听tio̍h玉帘对人讲hit-ê tāi-chì。」
玉帘真有可能做hit种tāi-chì。M̄-koh，清子ê生日hit工，她tī厅堂对家己所表示ê安慰kah求帮助ê低姿势态度，若kā in合óa想起来，安子无相信玉帘有hiah-ni̍h邪恶。当然人无可能改变hiah紧，mā有可能这是她一时chhìn-chhái讲讲leh mā无一定，m̄-koh，安子宁可希望he是她ê烦恼痛苦所生出ê真实。
安子teh想hit件事，恬恬ê时，瑞文就继续讲落去。
「M̄-koh mā真奇怪，玉帘最近来我ê所在借圣经kah赞美歌。我感觉非常好笑，hit-ê cha-bó͘人mā会入信仰？她比我khah无ǹg望，而且她ê无定性mā siuⁿ过头。」
安子想beh kā伊khau洗，m̄-koh，她khah趣味有关玉帘ê tāi-chì。瑞文继续讲：
「玉帘非常恨景文ê细姨，对hit-ê叫做阿龙ê真残酷刻薄。Chit几工；阿嫂这请你保守秘密；她计画想beh thâi阿龙。玉帘实在是恐怖ê cha-bó͘人；她tī馒头下毒药beh hō͘ 阿龙食，m̄-koh又koh起惊惶，tī阿龙伸手去the̍h ê瞬间，听讲玉帘koh kā馒头抢来，tàn出去窗á外。为啥物会知影馒头有毒leh？因为食tio̍h hit粒馒头ê狗á；男仆人饲ê hit只lah-sap老狗；soah死去。」
「这kah咱两人ê谣言仝款，kám m̄是siuⁿ过膨风ê假风声leh？」
「Ai-ah！有可能。狗á mā有可能是食tio̍h人街里teh thāu狗ê毒药，á是自然老死mā有可能ā。M̄-koh，一般来讲，人bē制造chiah-ni̍h恐怖ê谣言chiah tio̍h。另外一方面，阿龙kah-ná是一个怪人，无论hō͘ 人án怎pháiⁿ嘴骂，án怎残酷对待，她lóng无反应，ná亲像哑口ê恬恬，bē哭mā bē受气。若kā玉帘譬喻做狗á，无论她án怎kā她阿龙吠，阿龙lóng假做m̄知，kah-ná是一只迟钝ê牛。另外一方面，丈夫景文对玉帘ê恶毒作为lóng无责备、无受气，kan-taⁿ恬恬teh看。玉帘对in chit种无抵抗主义完全无对应ê办法。」
「M̄-koh，景文到底saⁿh-tio̍h阿龙ê tó一点neh？」
「大家lóng感觉真不可思议。大概阿龙是kah奢华爱化妆ê大bó͘ 倒反ê cha-bó͘，恬恬á做khang-khòe koh冻霜，hō͘ 景文感觉bē bái，koh她ê面mā无súi。」
「Kám是án-ne？」
「如果对方有玉帘ê容貌，koh kah她仝款奢华，玉帘mā bē输。总讲一句，人ê条件无仝hō͘ 玉帘无法度接受chit件事实，无办法lah！」 「玉帘是一个美人，对家己真有自信，忽然tú-tio̍h打击，koh khah m̄甘愿。总是，她ê心情也会渐渐改变chiah tio̍h；她叫我tio̍h chhōa她去教会。」
「若讲她会成做基督徒，不如讲她会起siáu，这我敢kah你相输。」
「无lah！她hit种倔强ê人，mā会hō͘ 人意外忽然看tio̍h她完全改变。Chit点比你瑞文khah….。你chit-má ，kám m̄是lóng无去教会？」
Hō͘ 安子án-ne一讲，瑞文感觉真pháiⁿ势。伊无资格án-ne评论人，她去教会讲是好奇，不如讲是表面假好；伊去敬拜上主，不如讲是为tio̍h beh看伊所恋慕ê安子ê面。虽然伊知影chit种虚伪做法已经hō͘ 安子看破，m̄-koh，瑞文iáu是beh小khóa辩解来留一kóa体面。
「宗教ê教义真困难了解，我koh teh无闲考试ê准备。」
「明年三月beh去东京，有beh chhōa春鸾kah gín-á去无？」安子明知瑞文无beh chhōa bó͘-kiáⁿ去，thiau故意án-ne问。果然瑞文用无欢喜ê面色回答讲：
「Ai-ah！Βeh án怎chiah好？若chhōa bó͘-kiáⁿ去留学，生活费是不得了。」
「无hit-ê tāi-chì。横直bó͘-kiáⁿ留tī厝里mā是仝款ài开销，kám m̄是？春鸾mā真ài去东京，有一工见面ê时，她叫我tio̍h劝你ài án-ne。她对你ê改变心意，想beh过新生活ê想法感觉真欢喜，mā hō͘ 我真感动。Hiah-ni̍h温柔贞淑ê bó͘，你若无beh kā她爱惜，是罪过neh。」 安子chit种说教比教会ê讲道khah无聊，而且koh khah困难了解。
「叫讨厌nîn-jín (红菜头) ê gín-á食nîn-jín是真困难ê tāi-chì。」
「Mài有chit种观念。讲真ê，你一定tio̍h chhōa春鸾去东京。生活kah环境若改变，你ê心情mā一定会改变。」
若是别人án-ne劝伊，伊ē-sái免chhap伊；taⁿ劝伊ê人是安子，伊to̍h bē-tàng án-ne做。瑞文显出难堪koh郁卒ê面色，就án-ne恬恬无讲话。安子mā有发觉瑞文ê心情，就无想beh koh kā伊说教。
「大学beh读啥物科？」
「想beh读农科。」
安子小khóa微笑，若m̄是破病，可能会笑出声。Chit-ê面色苍白，身体软弱koh纯洁ê少爷，hō͘ 人无法度kā伊kah土味ê农业联想做伙。
「为啥物beh选农科？」
「Ai-ah！无啥物特别理由。我若有清文兄ê好头脑，就ē-tàng选法科； 若像景文hiah ài thàn钱，mā ē-sái读商科。M̄-koh，我实在。」
瑞文jiàu头壳to̍h是teh讲伊家己头脑无好。然后，伊忽然想tio̍h啥物tāi-chì，讲：
「Tio̍h lah，tio̍h lah！我明á载想beh去庄脚，来去看分hō͘ 我ê土地。」
「Kám真远？」
「无远，坐火车tùi台南出发ê第二站落车，m̄-koh túi hia káⁿ tio̍h koh行一段路。我lóng m̄-bat去过庄脚。家己ê土地tī tó位？生做啥物款？完全m̄知mā是bē-sái-tit。」
「Tú-tio̍h à，去就好lah！对健康mā好。你tòa tī chiah-ni̍h深落ê厝宅，闲闲无tāi-chì，自然会想无聊ê事，心情mā bē开朗。阮tī寒带地方大汉ê人，真ài厝外ê大自然kah日头。我出世ê所在是日本海沿岸ê特种气候，kui个冬季lóng看bē-tio̍h日头，每工所看tio̍h ê lóng是灰色郁卒ê天空，koh有非常大ê风雪。所以到春天ê时，hit-ê欢喜是真特别；温和ê日头teh微笑，人、动物、草木mā tòe-teh欢喜tiô跳。日头kā全地一切生物ê暗淡kah湿气lóng吸收去。Tòa tī chia ê人因为习惯日头ê恩惠，soah讨厌日头，koh想beh逃避它。Tī chia，热m̄-nā是真热，而且四季变化koh无分明，莫怪人会讨厌日头。M̄-koh，去阔bóng-bóng ê原野，充分曝日看māi leh，心情一定会好起来。你ê面若hō͘ 日头曝乌，你ê心mā会烧kah变玫瑰红。」
安子细声ûn-ûn-á讲，她ê话句句充满热情kah真实，这hō͘ 她ê语调带有诗ê韵味。这是因为安子家己tú当teh回复，她伸开欣慕ê手，tùi病床beh行向健康ê情景。瑞文深深感动，静静teh听，忽然khiā起来，讲：
「我有了解，án-ne to̍h请保重」
总是，伊khiā tiàm hia iáu无beh离开，四界巡视一下，踌躇讲：
「阿嫂，我kám ē-sái kah你握手？Tī咱beh离别ê chit时」
「Ai-ah！讲kah ná beh永远离别hiah严重。」
「若ē-tàng，我想beh握手。」
「咱是仝家族，友谊mā真好。过去to̍h过去à，无必要永远记tiâu-.leh。阮翁mā bē koh án怎想ā，所以....。」
瑞文恬恬无回答，kā手ǹg眠床ê方向伸去。安子gāng一下，m̄知beh án怎chiah好？手tùi被ê下脚伸出来。她ê手腕瘦kah ná蜡烛条hiah细支，bái指(cháiⁿ) 挂一kha手指。He是丈夫tùi国外买tńg来ê值得骄傲ê礼物，是kah-ná川蝉ê羽毛深绿色闪闪发光ê翡翠玉。大概是想beh试看挂起来会合她ê手cháiⁿ á无，结果无名指(cháiⁿ)挂起来有khah lēng，所以挂tī中指；chit kha手指hō͘ 她感觉真安心。安子手一伸出，对方就过来握手。瑞文ê手掌kah-ná馒头hiah-ni̍h柔软koh温暖。安子偷偷á看伊ê面，伊kah-ná去看tio̍h大光，目chiu随kheh起来；像beh永久离别，有哀伤koh欢喜ê气氛。
