《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 夫妇 第十一章（更新版）
作者 庄司总一 着 杨东杰 指导 林俊育 台译 2017.05.28
Tī庄脚ê车头落车了后，景文kah瑞文koh坐铁枝á路轻便车向东去。
车顶iáu有其他两个乘客，两个lóng戴竹笠á、thǹg赤脚。两组人客tī轻便车顶面ê长车厢，kha脊phiaⁿ tú kha脊phiaⁿ坐teh；坐tī风尾ê chit对高尚人客，不得不tio̍h鼻另外hit两人身上ê臭汗酸味。Koh加上in中间ê一个用薰管teh pok俗薰，臭薰味不断吹来后面；另外一个teh食槟榔，不时kā kah-ná血ê红汁phùi kah满四界；无chhái清气ê田园芳味soah hō͘ in舞lâ-sâm去。陈家兄弟有想beh请in换位；若kā in拜托，可能ē-tàng kah in换位，m̄-koh in一直讲bē出嘴，因为tùi in相tú ê勇壮ê kha脊phiaⁿ有传来奇妙ê压迫感，这比臭味koh khah恐怖。尤其是两人teh讲土地ê tāi-chì，其中一个有小khóa激动ê款式。
「实在岂有此理，若讲是柴片á是死人，to̍h有可能会hō͘ 水冲走，土地会去hō͘ 它流走，我从来mā m̄-bat听过。」食薰ê讲。
「确实二十年前bat做过大水，hit-ê大水mā kā阮tau ê厝流掉。」食槟榔ê讲。
「Hit-ê大水hō͘ 曾文溪边一带淹水，当时阮老父mā淹死，田园成做鱼ê厝，我无法度chiah去北部食头路。十年了后tńg来，看ah！土地koh浮起来à，当然无koh像以前ê地形，已经变kah高低无平ê抛荒地。M̄-koh，我知影土地ê位置，所以koh开始殷勤耕作。Βeh耕作抛荒地实在m̄是hiah简单，经过三年chiah有收成，阮翁bó͘ lóng真欢喜。想bē到忽然有人来讲：『这m̄是你ê土地，是官厅ê。』因为án-ne，我bē-tàng koh种作，我听tio̍h ná hō͘ 雷kòng-.tio̍h。」
「你kám无去法院告？」
「戆大呆！对方是官厅，无法度lah！我去派出所，mā请保正去交涉，m̄-koh，无人beh chhap我。无可奈何lah！是已经过去ê tāi-chì loh！Chit-má koh讲mā是无伊法，虽然明知án-ne，tú-tio̍h人总是想beh讲hō͘ 人听。岂有此理！想tio̍h to̍h受气。」
「若án-ne，chit-má chit块土地到底是属siáng ê？」
「A̍h知。Kám是大官á是好额人ê？」
Kah in kha脊phiaⁿ相tú ê景文kah瑞文两位地主，清清楚楚teh听chit两个作穑人ê对话。尤其是陈景文有小khóa紧张，因为这m̄是kah伊无关系；农民若知影伊失去ê hit块土地是属kha脊phiaⁿ后hit-ê cha-po͘人ê，有可能会kā伊phah kah半死，所以in ná会敢因为臭薰烟kah槟榔汁来请in换位。可能是心理作用，景文感觉chit两个作穑人ê话是眞知in ê身分chiah thiâu故意针对in讲ê。M̄-koh，景文已经免惊伊会惹祸上身，因为土地chit-má已经属in小弟瑞文所有ā。
轻便车行约一里半路，就到相当大ê庄头。
陈家两兄弟去拜访黄丙ê厝，伊是陈家tī chit地方ê所有地ê管理人；伊本身mā是一个小地主，又koh担任保正，是村里有头面ê人。
「欢迎hiah远来到chia。」 黄丙对chit两位无通知to̍h来ê人客有小khóa gōng-ngia̍h，m̄-koh非常殷勤招待两人入去客厅。
「黄先生，chit位是我ê小弟瑞文，以后tio̍h请你多多照顾。拜托！」 景文kā小弟绍介hō͘ 管理人。
「我chiah tio̍h请伊关照。伊生做一表人才ê美男子，地主ê子弟毕竟无仝。」
这并m̄是扶tháⁿ ê话。瑞文穿一领全新ê深蓝色西装kah无领带ê纯白oâi-siá-chuh，抹油ê头毛乌sìm-sìm会发光，koh有小khóa茉莉花ê芳味。Chit种流行ê都市打扮引起田庄老人ê注目，伊感觉án-ne ê称赞iáu无够额，m̄-koh，顾虑tio̍h景文ê打扮，就无koh讲啥。景文原本to̍h无啥物风采，koh穿台湾服，当然无人会知影伊是百万富翁，tī村里行路mā bē引起人ê注目；chit对兄弟实在是真无相siâng。
景文当然清楚黄丙对in两兄弟ê观察比较以后，感觉奇怪ê心情，m̄-koh，伊lóng无挂意，工作chiah是siōng重要ê。
「黄先生，冬尾ê收成àn怎？」
「是平平lah！甘蔗ê收成有khah好，尤其是顶年风灾真严重。」
「看起来旧年到今年上半期ê收成大减，今年秋天若无khah好，阮mā无法度。」
「无m̄-tio̍h。其中一个原因是佃农最近lóng无认真，而且提出种种ê要求来表示不平。」
「第一期作五成，第二期作三成，án-ne ê收入iáu讲无公平？ Án-ne ê比例，农民应该感激chiah tio̍h ā。」
「无m̄-tio̍h，án-ne iáu-koh不服，实在是有khah过份。M̄-koh，你所知，最近有无路用ê啥物组织lah，啥物协会lah，in出来教农民kah劳动者一kóa pháiⁿ知识。咱对chiah-ê人无啥办法；in嘴讲是beh协调佃农kah地主来促进和睦，其实是beh kah地主敌对。Chiah-ê对lín khah大ê地主无啥物作用，m̄-koh，对阮chit款ê小地主，若照in ê讲法来进行，阮会hō͘ in剥皮剥kah chhun无半项。以前ê农民真单纯朴素koh万事完满，chit-má ê变kah真恐怖。世间ê进步到底是好是bái neh？」
黄丙一直摇伊hit粒大koh重ê头壳。伊kui面全是天然痘(chu)ê痕迹，抛荒ê面皮半支嘴须都无；红浊ê目chiu kah-ná teh困，目chiu皮koh peh bē开；目chiu是灵魂之窗ê讲法并无适合伊。景文知影黄丙并m̄是一个好ê管理人，伊khiā tī地主kah佃农中间，双pêng吸收甜头。像景文hiah精明ê人，ná会到taⁿ一直teh宽大处理？是为tio̍h万全。地主kah佃农之间无一个直接ê契约，中间ê管理人mā m̄是绝对ê责任者；因为是chit款无确实ê关系，致使农民ê要求kah诉愿，无所在thang投诉，tāi-chì tiāⁿ-tiāⁿ to̍h不了了之。若勉强讲有契约，mā是只有口头契约，并无交换书面ê证件，所以农民时常锄头放leh，就去chhōe别项头路；地主chit pêng mā是ē-sái随时tùi in收回土地，kā in解雇。所以kah tú-chiah黄丙所讲ê仝款，社会ê进步带来农民自觉，像以前án-ne地主随意ê做法已经是行bē通ā。Chit种趋势是事实，黄丙用这做藉口，最近tiāⁿ-tiāⁿ增加景文ê负担，致使景文无法度koh出声。
「照黄先生你ê讲法，佃租m̄-to̍h会koh减少loh？ M̄-koh，我无beh koh再让步ā，绝对无，因为我已经是一个情义相当深ê地主。」 景文面带微微á ê半冷笑án-ne讲。Hō͘ 伊先出手，黄丙小khóa目头结结，用一种真为难ê口气讲：
「佃租就照án-ne，m̄-koh，chhiàⁿ人ê工资是问题；请你一定tio̍h提高，若无，bē用得，因为物价一直teh起。」
「Chit-má每工ê工资gōa chē？」
「Cha-po͘工五十一钱，女工三十一钱。」(译注：一百钱=一kho͘=一圆)瑞文tùi边á随插话。
「真俗ah？」
一直tī边á恬恬无讲话ê瑞文忽然发出小khóa怪声讲，其他两人掠伊金金看。
「真正俗，若是你去做工。」景文ná teh kā伊khau洗讲。
「M̄-koh，街á ê人力车车夫走七、八百公尺就ē-tàng得tio̍h二十钱ê车资。一工若载十个人客就ē-tàng thàn二圆。
「Sàn-chhiah人mā有差别，kah好额人仝款。你若知影农民kah工人tòa啥物款厝，食啥物物teh过日子，你就bē惊一tiô讲『真俗ah？』。」
「总是，一个人做一工ê khang-khòe kan-taⁿ ē-tàng thàn五角银，算bē hô lah，我感觉in真可怜，无论in是过啥物款生活。」
「肥一桶五十钱，你kám会讲它俗？对钱ê tāi-chì你kah-ná戆大呆leh。五十钱to̍h讲它俗，á若一百圆to̍h讲它贵，kan-taⁿ会晓án-ne想，kah-ná gín-á ê头壳。你家己mā有土地，以后你会tú-tio̍h真chē伤脑筋ê tāi-chì。你tio̍h会记得，chit-má恬恬mái加讲话，mài hō͘ 人看破脚手khah好。黄先生，你看我chit-ê小弟lóng m̄-bat世事。」
「若是án-ne，不管是五十一钱á是三十一钱，加hit-ê一钱lân-san头á有啥物意义？」
瑞文án-ne疑问讲，黄丙随解说讲：「He是一种感情ê问题；kan-taⁿ加一钱to̍h会hō͘ 人感觉额外加一钱ê满足。这就是农民单纯ê所在，制糖会社mā常常使用chit-ê方法。」黄丙感觉瑞文ê插嘴hō͘ 伊所提出ê主张增加气势，所以皱面ê黄丙向景文讲；
「无的确lín小弟比你khah bat人情世事。无论如何，到taⁿ ê工资对劳动者来讲mā是艰苦过日，而且农民组织mā要求tio̍h增加工资到一圆二十钱，这kah-ná teh讲hàm古leh。」
「组织ê要求kah-ná teh眠梦leh；眠梦ê tāi-chì ná有法度ta̍k项lóng会达到？咱kám tio̍h用金ê锄头hō͘ in做工？Mài koh滚sńg笑lah！黄先生，到底tio̍h增加gōa chē工资leh？」
「是lah，kám tio̍h koh十钱？」
「十钱haⁿh。」
景文teh考虑一下；伊hō͘ 黄丙继续讲落去，伊ê头壳底teh tia̍k算盘。
「若无án-ne，会chhiàⁿ无工人。最近大家若有khah好ê khang-khòe，就会走去制糖会社á是矿场。所以顶年lín-tau收成减少，人手不足是原因lah。Koh再讲，chit几年制糖会社ê做法hō͘ 人真伤脑筋，in不断kā农民ê土地收回，来做会社ê甘蔗园。Án-ne落去，本底ê佃农就自然会变做苦力(khu-lí)，制糖会社mā大量吸收chiah-ê工人，所以咱会脚手无够，而且因为农民讲in ê土地hō͘ 人占去，á是in要求工作权无hō͘ 人承认，所以常常发生麻烦ê tāi-chì；农民心情激动，无像以前hiah-ni̍h听话。」
景文忽然想起tú-chiah坐轻便车来ê途中有听tio̍h两个劳动者ê对话。In显然有郁卒想beh反抗ê心，这bē-sái大意得。Kah小khóa增加农作ê经费比起来，农民闹动ê损失koh khah大。
「若án-ne，工资增加五钱好无？」
「五钱bē-sái lah，五钱」
黄丙一直摇头，两人互相无beh相让。过一时á，景文屈服ê时，黄丙已经头额（hia̍h）全汗，嘴角全泡。Kan-taⁿ为tio̍h增加五钱á是十钱，两人拚死议论，瑞文tī边á看，感觉真奇怪koh好笑。Chit部分ê交涉结束了后，in koh互相谈论肥料、税租kah其他有关收成ê tāi-chì。对chit方面完全无知识ê瑞文，听了感觉真无聊。庄脚原来是hiah-ni̍h罗嗦麻烦，kan-taⁿ是一kóa无聊ê tāi-chì，瑞文tú-chiah来到庄脚兴趣早就lóng消失去。伊掠准beh去东京读农科是快乐ê tāi-chì，chit-má伊想讲tio̍h koh修正chiah好。
Hō͘ 黄丙tī in tau请食中昼了后，景文讲伊无闲tio̍h家己单独先tńg去台南。其实伊本来有想beh tàu阵去看瑞文ê土地，m̄-koh，听tio̍h轻便车顶面hit两个劳动者ê话了后，就想无beh去。就án-ne，伊hō͘ 管理人黄丙案内in小弟去。
道路双pêng ê麻黄tú种无gōa久，tùi村尾一直延续落去。瑞文kah黄丙两人并肩而行，日头kā in ê影照tī头前；一个是瘦抽ê身材，行动轻快，另外一个是肥kah ná猪，戴一顶hō͘ 日头曝kah臭ta ê台湾pa-na-ma草帽，gia̍h一支藤拐á，脚步kah-ná鸭á phiat一下phiat一下，显然是习惯án-ne行路，虽然脚步细，速度koh算紧。道路ta-khok-khok，两人ê鞋á无gōa久就变kah白siak-siak；连慢慢á teh行ê载货马车经过ê时，tùi路树缝射入ê光线mā会照tio̍h飞起来ê尘埃。路边双pêng ê田地充满澄清ê空气，稻穗kah甘蔗叶 mā teh吸收秋天ê空气。田园kah-ná大海hiah旷阔，只有远远ê所在浮出来茂盛ê树林、竹林kah红砖á厝ê小部落。Chit时已经是秋割ê时节，有人开始teh割稻á。瑞文沿路看tio̍h khiā teh做穑ê作穑人，有ê teh动镰le̍k-á，有ê kā割起来ê稻á下tiàm机器桶phah粟（chhek）á。为tio̍h无ài hō͘ 粟á散去，机器桶有挂chiâⁿ丈koân ê网á；若kā它装竹排á，mā是会浮tī水顶流。经过chit款奇妙ê机器桶phah了ê粟á，tī阳光之下kah-ná黄金波浪teh飞。
瑞文看tio̍h chiah-ê庄脚景色，结果ta̍k项lóng真珍贵，一直问黄丙种种ê tāi-chì，m̄-koh，黄丙无想be̍h kā伊说明，因为伊khah想beh问有关陈家ê情形。伊虽然有去过陈家几nā pái，m̄-koh，感觉iáu无法度把握陈家ê一切，像讲伊做陈家ê土地管理人已经二十年，连屘á-kiáⁿ瑞文mā今á日chiah头一pái见面。陈家实在是大koh复杂，kah-ná用水目镜teh看海底，tī hia藏真chē珍贵ê不可思议ê物件；chit-ê田庄阿伯á只好án-ne想。伊tiāⁿ-tiāⁿ停落来喘气，kah-ná马teh phe̍ⁿh-phe̍ⁿh喘，m̄-koh，he m̄是行路ê thiám，是因为连续讲siuⁿ-chē话所引起ê。瑞文若bē赴回答，伊就koh再续teh讲落去，无gōa久就提起陈安子ê tāi-chì。
「我kan-taⁿ看过hit-ê日本人ê陈夫人一pái，实在真súi，ē-sái kah她ê同姒(sāi)á玉帘相比并。若hō͘ 她穿台湾衫m̄知怎样？」
安子受褒奖，瑞文kah-ná家己ê tāi-chì，就欢喜膨风讲：
「她tiāⁿ-tiāⁿ穿台湾衫，比和服koh khah合躯，玉帘kah她无tè比；第一品是无仝lah。」
「Kám会是你爱她，所以teh kā她褒奖？」
黄丙滚笑án-ne问伊。Chit-ê阿伯á kám会知影家己kah安子ê关系？瑞文惊一tiô，话soah无法度继续落去。
「M̄-koh，到底是án怎？日本人嫁来kám会幸福leh？ 讲khah失礼leh，mā是因为hit-ê日本妇人入来了后，lín陈家就閙起问题来。因为鸡to̍h是鸡，鸭to̍h是鸭，tàu阵lok tiàm仝一个所在，啄来啄去一定真闹热。」
「乌白讲，绝对无hit款tāi-chì。阮hit-ê阿嫂实在是真有气质ê好日本妇人，真亲切，m̄是会hō͘ 人讨厌ê人。人讲hiah-ê有ê无ê，是周围ê人无了解，真pháiⁿ心，乌白乱讲来中伤。」
瑞文忽然激动起来，对方却冷笑讲：
「免án-ne辩解lah！」
「啥物辩解？」
「免掩盖lah！其他ê人免讲，若是我ho͘ⁿh，是酸、辛(hiam)食过头ê cha-po͘人lah。」
黄丙目chiu nih-kah koh khah细蕊笑笑á án-ne讲，是teh叫人tio̍h信任伊ê款式。 Chit-ê cha-po͘人确实是一个好色ê人，听伊讲伊有三个细姨，二十个kiáⁿ无欠kah一个。伊真自高，讲伊án怎协调大bó͘ kah细姨之间ê问题，koh án怎hō͘ 家庭bē起风波；伊m̄知pháiⁿ势一直teh讲m̄知见笑ê话，瑞文完全hō͘ 伊压倒。
「你iáu少年，mā真有手腕。M̄-koh，lín阿兄án怎？有受气ho͘ⁿh。」
「Hiah-ê无影无迹ê谣言，你是tùi siáng听来ê？」
「Tùi啥人？因为chit-má ê时代kài发达，电话、电报lóng有。Hit-ê gín-á kám确实是你ê？」
「请你mài讲hiah-ê。若koh讲，我beh咬你oh。」
「惹你受气à？我kan-taⁿ听tio̍h hiah-ê风声niā-niā」
「Lóng是白贼，人造话ê lah。」
「Heh，kám是白贼？」
黄丙显出kah-ná失望ê表情，伊原本期待瑞文会讲出koh khah刺激性ê好事。
瑞文对chit-ê庄脚人ê乱讲起受气，伊若koh继续追问，瑞文有可能会动手phah伊á是咬伊。照tú-chiah伊讲ê口气听起来，伊对陈家ê好奇心，m̄是日常生活á是财产ê tāi-chì，却是其中男女ê爱欲ê瓜葛kah闺房ê秘密；瑞文chit-chūn chiah了解。食老m̄认老koh对色情有异常ê关心，瑞文感觉chit-ê老人实在有够pháiⁿ心肠。讲起安子ê tāi-chì ê时，瑞文看tio̍h伊ê面to̍h感觉真污秽。
行了约四公里路，来到一个无够三十户ê小部落，in只不过是简单ê细间厝合做伙ê khiā家。
过hit-ê部落koh小行一下，路就慢慢á peh崎，而且来到chia就有偏远ê气氛。路ê一pêng真崎，四季长青ê灌木非常茂盛，koh有真chē羊齿类ê植物，mā有看tio̍h奇形怪状ê蛇木kah kui片（phiàn）ê台湾芭蕉，有进入山地ê感觉。四界有野生ê檨á树kah龙眼树，koh有柚á树结kah ná黄球ê果子。路ê另外一pêng是曾文溪，ta-khok-khok ê河床，tī秋日照射之下，目chiu看去是一片（phiàn）白siak-siak。
过无gōa久，黄丙kah瑞文行到旷阔ê低地，行过无水ê ta溪了后，河ê对岸就是阔bóng-bóng ê一片甘蔗园，hia有瑞文ê土地。
「非常远，真无方便ê所在。」
一到田地，瑞文惊kah gāng去，m̄-nā真失望án-ne讲，mā真厌倦。
「来歇一下。」
黄丙tī金龟树脚坐落来拭汗，瑞文mā tī hia坐落来点薰。
「黄先生，这kám自古早to̍h是阮tau ê土地？」
「旧年chiah变更做景文ê名，hit时以后，lín ，kám m̄是有分财产？ An-ne，chit-má是你ê。」
黄丙kā瑞文lió一下，心内想讲家己ê土地也m̄知影，地主ê少爷to̍h是hiah-ni̍h潦草koh糊涂。
「Kám讲是有啥物因端ê土地？」
「是ah，原来chia是官地放领，起初是某官员买去，后来chiah koh转手hō͘ lín阿兄，其中ê详细情形我mā无真清楚。 」
瑞文ê面小khóa变tēng，嘴唇咬leh，无讲话，心内无爽快。财产分配确实无公平，景文到底是bē吃亏ê人，伊比大兄分khah chē，koh是siōng好ê份。瑞文想讲是家己抽tio̍h siōng-bái ê签，因为家己pīn-tōaⁿ所以bē-tàng有啥物欲望，当然分khah少。M̄-koh mā bē-sái分hiah远koh收成少无路用ê土地hō͘ 我，kám m̄是？
「Taⁿ，」土地管理人ná亲像牛hiah笨chhiâng peh起身来讲： 「咱来去巡一下á田园leh。」
瑞文hō͘ 黄丙催，m̄-koh，伊已经对hiah-ê田园无趣味ā。伊心内忽然koh想起tú-chiah轻便车顶面hiah-ê对话。「若án-ne，chit-má chit块土地到底是属siáng ê？」
「A̍h知，kám是大官á是好额人ê？」
Kám讲in讲ê hit块土地是我ê chit块？瑞文感觉khi-mo͘-chih无好，所以伊无想beh随起身。
「是án怎？Kám是真thiám？」
「Bē lah！你虽然hiah肥，m̄-koh，你ê脚有力。原住民mā脚真勇，kám m̄是？」
「Mài lah！Mài kā我kah原住民teh比。」
「Chit tah kám有原住民？」
「已经无teh割人头ê生番ā，lóng变成温和ê熟番。In真chē tòa tī部落，穿台湾衫，讲台湾话，看起来kah-ná是台湾人，m̄-koh，一看in ê面就随知影。」
「原住民ê面kám是bē bái？」「Mài讲sńg笑，in ê面容真惊 人，cha-bó͘ ê皮肤乌koh粗，iáu是咱缚脚ê三寸金莲、杨柳腰khah好lah。」
「我学生时代bat去过雾社，hia有美人。若有美人tī chia，我想beh用相机kā她hip一张。」
「你颔颈phāiⁿ ê ，kám m̄是望远镜？」
「是相机lah。」
「你若beh hip番á cha-bó͘，不如kā我hip一张khah有功德。」
黄丙kā衫ê钮á钮好，真正经摆出姿势，kah-ná肥猪ê身躯向后，正手thuh藤拐á。瑞文微微á笑kā快门chhi̍h落去。
「若是hip了bē bái to̍h真好。」
「无问题，因为hip相机bē讲白贼。」
黄丙无感觉tio̍h少年人ê khau洗意思，心内大欢喜。伊一生hip相无几pái。
「Pháiⁿ势，请相片若洗出来，寄一张hō͘ 我kám好？」
「一定会寄hō͘ 你。」
「Hō͘ 你hip相去，我ê精气kah运气mā lóng hō͘ 你吸去neh。」
「我bē做hit款罪恶ê tāi-chì，做你放心。」
「总是，人一下老就感觉世间真无聊。看你ê款式，我真欣羡；人少年koh有钱，自由自在，实在有够幸福。」
「Mā m̄是án-ne讲，人无像外表所看ê hiah-ni̍h好。」
「你to̍h免客气ā。」
「我若失去chit-ê甘蔗园，to̍h啥物lóng无。」
「有十甲ê土地iáu-koh teh埋怨，你来世会变做牛á是猪oh。」
两人行tī甘蔗园中间ê路里，甘蔗欉已经七、八尺高，ē-sái收割à。有ê甘蔗弯曲，有ê倒tī土脚。有时微风吹来，kā长长ê甘蔗叶吹kah相kheh，发出chha-chha叫ê声。百舌鸟(译注：就是红头伯劳) 传来一chūn koân调ê啼声，了后就恬chih-chih lóng无声。黄丙chhōa瑞文kā伊所有地ê界线se̍h一liàn。虽然是ûn-ûn-á行，mā行将近一点钟，所以是相当阔ê土地。Án-ne实际行一遍了后，瑞文chiah知影家己ê土地是有料想bē到ê阔，tùi án-ne伊chiah感觉家己是相当有财产ê人，ē-sái安心kah夸耀。
巡视田园了后，黄丙讲伊暗时庄里有聚会，需要量早tńg去。M̄-koh，瑞文m̄甘离开hiah宁静ê田园，感觉随时to̍h tńg去实在可惜，就kah有一点á讨厌ê庄脚老人分开，伊ài家己一个留tiàm hia，而且tńg去mā无啥物趣味ê tāi-chì。
黄丙就照瑞文ê意思，家己单独tńg去。
瑞文行出hit-ê田地，随便行行leh了后，就chhōe一个所在坐落来。伊面向东坐tī小khóa高ê草埔，看过去是绿色ê山坡，续落去是蓝色ê山，koh后壁是浅蓝色ê阿里山山脉；伊ē-tàng清清楚楚看出三种色彩ê层次。Koh khah远ê应该是新高山(译注：玉山)，m̄-koh看bē-tio̍h。草埔ê下面是一条大河，就是tùi阿里山发源流向西南ê曾文溪，m̄-koh tī chit-ê所在，溪水忽然弯向西pêng，流入去平原；chia是hit-ê水流弯曲ê地点。热天雨水期ê时，浊浊ê大水冲pháiⁿ桥梁，淹没田园。Chit-ê hō͘ 农民心痛ê溪水，tī秋天到冬天是ta燥期，变成一点á水都无ê沙地；溪底露出大粒、细粒ê石头，koh有树kho͘ 堆积，有ê所在也发出芦苇kah菅芒，á是杂草茂盛ê草埔。
瑞文神神teh看山，心内teh想安子ê tāi-chì，想讲伊hō͘ 阿嫂迷去真是戆大呆。M̄-koh m̄知怎样，chit-má想起来已经bē koh心痛。飞出去大地会hō͘ 身心得tio̍h健康，阿嫂bat án-ne kā我讲，这是确实ê tāi-chì。日落西山，照tio̍h瑞文ê侧面。今á日hō͘ 日头曝kah有够额à，鼻头一定曝kah红红，瑞文想tio̍h心就爽快。伊pok了三、四支红茉莉牌ê薰，chit中间伊有反省家己软弱、无所作为、无健康ê生活，也有思考明年去东京读大学ê计划，koh梦想未来新生活ê发展等等，心头就欢喜起来。
过一时á日头落山，瑞文想讲应该tńg去à，就peh起来落山，沿灌木kah草phō掩盖ê溪边无够一公尺阔ê小路行落去。行无gōa久，伊听tio̍h phah水ê声。奇怪，溪底应该是无水à，伊感觉小khóa意外。对水声ê方向看去，tī溪岸生kah一大片ê龙舌兰kah茂盛ê林投树缝，伊看tio̍h反射光ê水面。瑞文停落来，目chiu金金看草phō，tī hia确实有一个水池，而且有鱼á teh跳ê声，m̄-koh鱼á mā无hiah大声ā。伊行óa去两三步，忽然一只m̄-bat看过ê粉鸟á大ê鸟á tùi草phō飞出来，伊chiah知影水声是chit-ê原因。瑞文koh一pái向水池看去ê时，伊ê脚忽然khiā tiāⁿ-tiāⁿ，因为伊看tio̍h水内有一个cha-bó͘ gín-á。伊koh进前两三步，小心mài hō͘ 对方注意tio̍h，kā面贴óa龙舌兰有刺ê长叶，tùi叶á缝看tio̍h cha-bó͘ gín-á ê身躯，ná有看tio̍h koh ná无看tio̍h。小水池是浊浊ê，m̄-koh，喷起来ê水滴tú-tio̍h日头，发出银色ê光。Cha-bó͘ gín-á ê面看bē真清楚，m̄-koh胸坎á看真明；是少女ê奶看kah一清二楚。瑞文偷偷á看，soah有想beh kā她hip相起来ê作孽想法。垂落来ê枝叶遮盖leh，瑞文真无容易chiah chhōe-tio̍h khah好ê所在，左右移动，终其尾tī十一、二公尺后ê灌木中间kā镜头对好tī水里ê少女。
Hit-ê cha-bó͘ gín-á听tio̍h快门ê声，惊一tiô大声hoah，koh有跳出水ê声。总是，瑞文仆tī草phō内，然后tùi tú-chiah来ê道路逃走。 Cha-bó͘ gín-á随tùi后壁jiok来，雄kài-kài大声骂瑞文，kah-ná起siáu 目，hàiⁿ头kā tâm湿ê kui束头毛ê水四界喷，koh手里hàiⁿ一支镰le̍k-á。
对chit-ê意外ê恐怖场面，瑞文惊kah身躯kiu-kiu，一直tòm头kā她会失礼，m̄-koh，hit-ê cha-bó͘ gín-á无beh听伊。瑞文就tùi lak袋á the̍h出一个五角ê银角á，讲：「Chit-ê hō͘ 你，请原谅，我无啥物pháiⁿ意。」
「我无ài钱，我m̄是趁食cha-bó͘ lah。你tio̍h kā hit-ê机械hō͘ 我，我beh kā它kòng pháiⁿ。」
「Án-ne bē-sái得，这是三百圆买来ê。」
「三百圆oh！」
庄脚cha-bó͘ gín-á惊一tiô就停止攻击，她tio̍h惊ê目chiu 特别大粒，ná亲像龙眼籽hiah-ni̍h乌，是非常野性惊人ê目chiu，m̄-koh，有带茶色ê美妙色彩，kah-ná野生可爱ê动物，同时hō͘ 人有妖艳ê感受。看tio̍h她ê目chiu ê时，chiah怀疑她kám是纯粹ê台湾人。后来，知影她有白人ê血统，chiah解开她茶色目chiu 仁带有灰色条纹ê谜。
「我ē-sái kā相机hō͘ 你，请你mài koh hàiⁿ hit支镰le̍k-á。」
「我无beh thâi你，你kah-ná是好额人，是tó位ê人？」 Hit-ê cha-bó͘ gín-á气势受挫折，就温柔落来；tú-chiah受气soah m̄知对方ê身分，chit-má平静落来chiah知伊m̄是庄脚人，hit-su m̄-bat看过ê特别服装hō͘ 她看tio̍h真无仝款。
「我是台南人，你kám tòa chia附近？」
「是lah。你tùi台南来chia chhòng啥物？Kám是用hit台机械hip chiah-ê风景？」
「是lah。我本来无想beh hip你，m̄-koh，因为你洗水浴ê光景非常súi，soah禁bē-tiâu kā你hip起来。请你mài kā我想做有恶意。」
「无法度lah！Hō͘ 机械hip去iáu无要紧，若hō͘ 你ê心肝hip去to̍h真讨厌。你若是村里ê cha-po͘人，我就无beh放你soah。」
「惊死人，连庄脚ê粗鲁cha-po͘人都hō͘ 你动镰le̍k-á，你真正是无对手。」
「空手我mā bē输，因为大家lóng叫我『山猫』á是『豹彪。』
Cha-bó͘ gín-á家己就向前行去，kah tú-chiah大受气ê她完全无仝，kah-ná无tāi-chì、无要紧ê态度，hō͘ 瑞文大惊一tiô。一开始hō͘ 她奇妙ê力量威胁，想beh赶紧逃走，m̄-koh，chit-má kah-ná受tio̍h无形ê命令，hō͘ 伊不得不tio̍h tòe她ê后壁行。Cha-bó͘ gín-á穿粗棉布ê衫裤，thǹg赤脚，对看惯势细脚ê瑞文来讲，她ê脚实在是siuⁿ过大kah hàu呆hàu呆。她ê身材并无koân大，体型真tú好，tùi洗了旧去ê棉布衫ē-tàng看出她双肩坚实ê肉。她ê背影看起来kah-ná有猛兽ê脚步，坚定而且敏捷，一点á 都无危险性，kah缚脚软chiáⁿ优美ê脚步完全倒反。行了大约五十公尺，cha-bó͘ gín-á又koh家己坐落来。He是一欉相思树脚荫影ê所在，四周围lóng是杂草ê小高台。瑞文kah-ná她ê部下，坐tiàm她ê边á。
「你beh pok薰无？」
瑞文想beh hō͘ 她欢喜，the̍h出一支茉莉牌ê薰hō͘ 她。Cha-bó͘ gín-á kah-ná无常常pok薰，用无惯势ê手势teh pok，m̄-koh津津有味，pok kah真欢喜。
「你kám真正beh用hit支镰le̍k-á kā我thâi死？」
「Ngh，he是锉甘蔗ê工具，你实在有够无胆。」Cha-bó͘ gín-á kah-ná无啥tāi-chì teh微笑，m̄-koh，瑞文ê恐怖感iáu tī-.leh，所以伊是轻声细说，非常温柔。
「Án-ne你是hō͘ 甘蔗园chhiàⁿ做工ho͘ⁿh？」
「是lah！无啥ài，m̄-koh mā无办法。」
「Kui工流汗做工chiah thàn一个五角银，有够刻薄。我若是地主，会hō͘ in khah chē。」
「Cha-bó͘ 工chiah三十一钱。阮老父若iáu tī-.leh，我to̍h免hō͘ 人差用。」
「你ê家族kám真chē人？」
「Kan-taⁿ老母kah我两人。」
「Án-ne有khah无伴。Lín老父kám mā是农民？」
「Ngh，m̄-koh，伊khah ài phah猎。」
听tio̍h phah猎，瑞文想讲她kám是原住民ê cha-bó͘-kiáⁿ，就koh详细看她ê面一pái。Hit-ê cha-bó͘ gín-á无细腻，chhìn-chhái倒leh，目chiu kheh-leh，目睫毛长koh厚，面hō͘ 日头曝kah乌金乌金。瑞文想beh问她是m̄是原住民，soah忽然讲bē出嘴。根据黄丙ê讲法，chia ê平地原住民早前kah台湾人通婚ê结果，chit-má外表上lóng kah台湾人过仝款ê生活；chiah-ê人极无ài hō͘ 人叫做番á。
Cha-bó͘ gín-á静静peh起来，ǹg山ê方向看去。
「我真想ài去phah枪（chhèng）？你bat phah猎无？」
「做gín-á ê时chūn bat用空气枪á是pha-chín-koh phah过白头壳á，m̄-koh....。」
「阮phah过熊、豹kah鹿á，阮老父是有名ê枪手，无比phah猎koh khah趣味ê tāi-chì lah。我十岁左右就tòe阮老父去phah猎，hit粒山m̄知peh过gōa chē遍。Ai-ah，我真想beh peh山。」Cha-bó͘ gín-á注目看遥远ê阿里山，回想以前快乐ê日子，ná亲像tī眠梦中ê目神。
「想beh peh山to̍h做你去，既然细汉就kah老父tàu阵去，你一定会晓phah猎，kám m̄是？」
「当然mā会晓，若是有ke-si，我chit-má随时ē-sái飞去，m̄-koh，我siōng重要ê枪无，火药、枪籽、弓箭ta̍k项lóng无。老父过身了后，厝里散赤，ke-si lóng hō͘ 老母卖了了。我真正想beh去，若有一支枪就ē-sái à。真悲哀！」
「若是ài枪，我买hō͘ 你。」
瑞文chit句话m̄是滚sńg笑ê，因为cha-bó͘ gín-á ê真情teh催逼伊，伊ê嘴自然án-ne讲出来。总是，对一个tú相bat ê cha-bó͘ gín-á讲话，伊ê自尊心bē允准。所以瑞文讲出嘴了后，随感觉后悔。
「Beh买hō͘ 我？」Cha-bó͘ gín-á ê目chiu欢喜kah发光，m̄-koh随时变面，改讲无ài。
「你叫啥物名？」
「山猫lah，正名叫Chîn Chîn。」
「Chîn kám是我ê姓hit字陈？名ê Chîn是tó一字？」
「Ai-ah。」
「你kám m̄-bat字？」
「是ah，m̄-koh kan-taⁿ会晓家己ê名姓。」
Cha-bó͘ gín-á gia̍h起镰le̍k-á，忽然伸手kā边á ê龙舌兰ê叶á一下to̍h phut落来。Hit-ê伶俐ê动作koh hō͘ 瑞文惊一tiô，m̄知她koh beh chhòng啥物。Cha-bó͘ gín-á tī软软ê叶á顶面用镰le̍k-á尖写字hō͘ 伊看。
「叫做陈阵oh，真好ê名。」
Chit-ê名一屑á都无súi，m̄-koh，瑞文惊她hit支镰le̍k-á，所以chiah讲好听话。
「无人叫我正名，我真受气。你ná会问我ê名？」
「只不过问看māi lah！」
「Koh hō͘ 我一支薰。」
瑞文kan-taⁿ chhun一支薰，若hō͘ 她，家己to̍h无ā，m̄-koh，伊已经无想beh koh pok薰。Chit-chūn已经是beh冬节loh，日头落山有khah早淡薄á。伊若beh赴十点ê尾班车iáu免烦恼，m̄-koh，若siuⁿ-òaⁿ tńg去，厝里ê人会感觉奇怪。到车头有三里半路，m̄-koh，一半以上是山路，瑞文忽然紧张起来。
金色ê日头漂tī深紫蓝ê空中，山脉iáu浮tī顶koân，kan-taⁿ hit tah吸引伊ê目chiu，瑞文kā视线移到khah低ê所在，山仑á脚已经阴暗loh，续落去ê平地ê田园kah树林mā盖一重乌暗ê薄膜，tùi溪ê对岸吹来ê风hō͘ 瑞文pih手ńg ê手股kah面感觉冷起来。
Cha-bó͘ gín-á hō͘ 薰烟tòe风吹去，她ê目chiu iáu无离开山。看起来她ē-tàng kui暗无tín动坐tiàm hia。她到底teh想啥物？听讲in老父是去hō͘ 野兽ê拆食落腹死去，可能是hit-ê报仇ê心火当teh to̍h起来。Chit-ê cha-bó͘ gín-á虽然m̄是纯粹ê原住民，m̄-koh，一定有lām-tio̍h原住民ê血。听讲割人头时代ê原住民，为tio̍h beh割敌人ê人头，mài讲是一工、两工，就是三工mā ē-sái免食免lim，bih tiàm草phō内埋伏。
瑞文开始起惊，颔颈感觉冷起来，想tio̍h她hit支利(lāi) ê镰le̍k-á to̍h真烦心。Cha-bó͘ gín-á无tín动无讲话，瑞文chhōe无thang好khiā起来ê机会。伊就倒leh，想beh装做伊对cha-bó͘ gín-á并无感觉惊惶teh警戒ê心，然后伊to̍h beh ûn-ûn-á起身，行向倒tńg去ê路。
当伊身躯倒落去ê瞬间，伊感觉手股一丝á kah-ná hō͘ 刺凿tio̍h ê痛niā-niā。伊忽然听tio̍h cha-bó͘ gín-á尖声teh hoah：
「龟壳花！」
瑞文跳起来，一尾蛇gia̍h起三角形ê头，ná亲像一支短拐á khiā teh；它有ná红色绢丝ê舌，乌珠ê目chiu ，白色条蚊光滑ê蛇皮。瑞文想讲若去hō͘ 它咬tio̍h就害loh，m̄知家己其实已经hō͘ 它咬tio̍h à，kan-taⁿ有意识ê反射动作赶紧退后。陈阵挥起镰le̍k-á，m̄-koh，刀á kan-taⁿ切tio̍h风，蛇就发出sa-sa叫ê声，tùi草phō内消失去。陈阵跳过来瑞文退后tǹg-lap坐ê所在。
「你去hō͘ 蛇咬tio̍h？」
瑞文听tio̍h chit句话chiah意识tio̍h倒手腕ê痛，伊ê面ná树叶á变苍白。伊伸手一看，kah-ná去hō͘ 针凿tio̍h，有两chōa hō͘ 蛇咬tio̍h ê痕迹。虽然khah无注射hiah痛，m̄-koh，死亡ê预感hō͘ 伊感觉比大孔嘴ê孔嘴khah痛。
陈阵忽然kā瑞文ê手股ân-ân掠tiâu，gia̍h起镰le̍k-á，瑞文强强脱开她ê手。伊ê脑海中闪过一个以前听tio̍h ê勇敢无比，会hō͘ 人感动ê故事，就是原住民ê手若hō͘ 毒蛇咬tio̍h ê时，in就会用番刀断然kā手切断。 瑞文宝惜家己ê手骨，拚命beh逃走。伊对chia ê地理无熟，随时无路好走，不得不tio̍h chông入去甘蔗园内。听讲为tio̍h beh掠一个走入去kui万支甘蔗园内ê贼á，tio̍h动员kui中队ê兵á。所以，陈阵叫kui暗，m̄-koh beh tī甘蔗园内chhōe-tio̍h瑞文是无可能ê。总是，一时逃走ê瑞文又koh tòe cha-bó͘ gín-á ê声óa近，因为伊发觉家己ê愚戆，知影jú慢处理是会jú接近死亡。
「拜托！拜托mài kā我ê手切断。」
「戆大呆，无割会死去。」
「若tio̍h失去手，我宁可死khah赢。」
「你是想对tó位去lah？Kan-taⁿ hō͘ 蛇咬tio̍h ê所在切hìⁿ-sak就ē-sái得。有索á无？赶紧，索á，索á」偏偏两人lóng无带索á，陈阵用瑞文ê皮带kā伊ê手股顶节缚tiâu，koh用家己缚头毛ê红色带á kah瑞文ê鞋带缚做伙，chiah kā伊ê手腕mā缚ân-ân。然后，不管瑞文beh á m̄，就用镰le̍k-á ê刀尖，kā hō͘ 蛇咬tio̍h ê所在做十字形切开。瑞文痛kah haiⁿ-haiⁿ叫，kah-ná鱼á teh滚liòng。陈阵tùi孔嘴kā有蛇毒ê血挤出来，án-ne iáu无够额，koh用嘴大力suh，了后kā血phùi出来。 行出甘蔗园，日头已经完全落山。瑞文用无tio̍h伤hit支手挂tiàm陈阵ê肩胛头，拖脚步teh行。伊ê倒手腕已经失去感觉à；kah-ná真正失去hit支手ê感觉。过一时á，孔嘴流血滴落去土脚，瑞文mā无注意tio̍h。剧烈ê心情战斗hō͘ 伊kui个人倦tauh-tauh，kui身躯mā无力去。伊ê胃hia soah变冷，想beh吐koh头壳眩（hîn）。
「阿阵，我会死bē？」
「Bē死lah！」
「我想beh逃走，实在有够戆，kiám-chhái已经耽误医治ê时间？」
「你是惊我是m̄是？」
「已经bē惊à。阿阵，你知影有hō͘ 蛇咬死ê人无？」
「Ngh，m̄-koh，你bē死lah！」
「Án怎讲leh？我无想beh死，我iáu少年。」
「你bē死lah！」
阿阵坚决一再án-ne讲。因为她一屑á都无不安ê声，hō͘ 瑞文感觉一股超越安慰ê神秘力量。瑞文心内一直想beh问她：「Ná会知影我bē死？」M̄-koh，伊讲bē出嘴。瑞文chit-má只好kā家己全部lóng交托hō͘ chit-ê cha-bó͘ gín-á，就ná亲像khîⁿ-tiâu大地ê大树，ân-ân掠tiâu她ê肩胛头。
