《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 夫妇 第十二章（更新版）
作者 庄司总一 着 杨东杰 指导 林俊育 台译 2017.06.04
陈阵hō͘ 瑞文困tiàm in厝ê稻草被里。
Hit暗发生ê tāi-chì差不多lóng bē记得，伊发高热，脚手kah嘴唇tiāⁿ-tiāⁿ起痉挛，昏昏沉沉继续困落去。伊困ê所在是一间kah-ná猪tiâu ê细间房，阿阵kah in老母阿笑全神贯注来kā伊看顾，部落ê人也赶紧去通知保正黄丙，村医也有来kā伊血清注射，chiah-ê tāi-chì瑞文kan-taⁿ有雾雾无清ê记智。
第二工天未光，清文阿兄就tùi台南驶车赶来。Hit时，瑞文chiah tú醒起来，握阿兄ê手，目屎kiōng-beh流出来，也渐渐回复意识。
「阿兄，是hit-ê cha-bó͘ gín-á kā我救ê。」
舌头麻痹ê关系，瑞文勉强讲出chit句话。清文向阿阵说多谢，m̄-koh，阿阵无beh开嘴，老母阿笑代理kā昨昏以来发生ê经过一一说明。她有庄脚人特有ê戆直kah无客气ê讲话，她讲若m̄是in cha-bó͘-kiáⁿ就无hit款ê应急处理，有in cha-bó͘-kiáⁿ ê关系，chit-ê人chiah无死去，kah-ná teh kā人讨人情leh，kan-taⁿ希望人紧hō͘ 她报酬。清文讲伊火急出门无准备钱，以后chiah koh来答谢，kan-taⁿ一kóa表示心意ê hō͘ 她。M̄-koh，一kóa表示心意ê小意思to̍h有十圆ê银票两张，庄脚人ê阿笑畅kah讲bē出话来。
病人随送去台南ê公立病院，m̄-koh，病情绝对m̄是hō͘ 人会放心得。台湾话ê龟壳花就是台湾ha-buh(译注：habu=动物界门: 脊索动物门亜门: 脊椎动物亜门纲: 爬虫纲目: 有鳞目亜目: 蛇亜目科)，是台湾毒蛇之中siōng毒ê蛇。
瑞文ê bó͘ 春鸾tī眠床头照顾，kui礼拜无困，若是病症恶化，丈夫to̍h会死去。病症kah痛苦免讲，kan-taⁿ容貌变形to̍h hō͘ 她bē放心。Hiah-ni̍h iân-tâu ê面容变成暗紫色koh浮肿ê丑面，hō͘ 人感觉真凄惨。
安子每工来探访，向神祈祷讲：「求你mài kā chit-ê人召去！」是春鸾哀求替伊祈祷。见若病人病症变bái，脚手痉挛，春鸾就会失态去揽tiâu安子ê身躯，ná亲像gín-á teh哀叫：「求你用祈祷ê力量来帮助瑞文，向神祈祷，祈祷！」一kóa有关丈夫ê闲á话，当然hō͘ 春鸾感觉无受气，m̄-koh，chit-má hiah-ê lóng m̄是问题ā lah！
二房ê bó͘玉帘也为tio̍h小叔，诚心准备好食ê糜kah汤。平时傲慢hō͘ 人认为心地不良ê玉帘，面对chit项大tāi-chì，mā显出hō͘ 人感觉意外ê热切人情味。老母阿娇每工chhiàⁿ道士来念经，有时也亲自去庙里抽签卜卦。老父阿山一开始to̍h嘴硬，表示免烦恼讲：「Bē死lah！Hō͘ 蛇咬tio̍h死去ê人无够一成。」伊阿片照食，m̄-koh，心内也是有小khóa忧虑，因为伊食阿片了后ê困眠中，lóng梦见滑溜溜ê蛇kah气味无好ê爬虫类。
陈家就án-ne团结一心，全精神集中tī三房瑞文ê身上。世俗ê欲望、怨恨、欺瞒、虚假，kah-ná tī冰面展开，美化koh净化去。瑞文虽然是无胆虚弱koh无作为ê男人，m̄-koh，伊人纯洁、温厚又koh有一点á寂寞ê好男子，所以厝里ê人lóng对伊有好感。
陈家因为chit-ê偶发ê不幸事件，颠倒团结一心展现和平起来。Tú chit-ê时chūn，长男清文ê身上忽然遭遇真意外ê pháiⁿ tāi-chì。 天iáu未光，日本式ê房间内，过年to̍h三岁ê清子tī清文kah安子ê中间，lóng困kah真甜蜜。
意外ê吵杂声音kā chit对夫妇吵醒，几位警官冲入来房间。
「真忽然，m̄-koh，请你来警察署一chōa。」
穿私服hit-ê人对清文讲。实在是超过忽然ê忽然，清文mā一时想bē起是发生啥物tāi-chì。想讲是m̄是老父阿山偷食阿片hō͘ 人发见？M̄-koh，无可能为tio̍h偷食阿片to̍h tī chit-ê m̄是时chūn冲入来。这显然是kah家己本身有关ê事件，恐惊是思想上受怀疑，短短十秒内，清文to̍h án-ne觉悟。
清文非常镇静，因为伊有充分ê理由kah自信，表现出必要以上ê自然态度。伊随同意kah in去一chōa，就做出外ê准备，同时mā讲出kah-ná khau洗ê话。
「Khà一通电话来叫to̍h好，ná-tio̍h hiah-ni̍h劳烦大家，我掠准厝里tio̍h贼偷，lín beh来掠贼hioh。我穿和服来去，安子，kā hit领有条纹ê hiaⁿh hō͘ 我。」
Chit款场合，一般人lóng会tio̍h惊、紧张、受气，而且不管有弱点á无，为tio̍h维持人格ê威严，一定会抗辩讲是án怎tio̍h去警察署。M̄-koh，清文无狼狈，无反抗，伊mā感觉家己真成熟。
总是，安子cha-bó͘人to̍h是cha-bó͘人，面色苍白，紧张不安问警察。 「阮丈夫kám有做啥物m̄-tio̍h ê tāi-chì？为何tio̍h去警察署？我完全bē理解。」
「我mā m̄知，无lah，我是知lah，m̄-koh....。」
「若án-ne，请kā我讲，阮丈夫是犯tio̍h啥物罪？」
「阮无讲ê权，第一，chit-má m̄是讲话ê场合。请赶紧准备。」 过一时á，清文hō͘ 四个巡查chhōa出去。 留落来一个穿私服ê刑事开始搜查住宅，koh有问陈家ê内情kah日常行动相关ê问题。
「请kā phoe信kah书类全部the̍h出来，若有凶器mā the̍h出来。虽然m̄是lín丈夫ê言词问题，chit pái ê检举是以前m̄-bat有ê大规模。若有平常对lín丈夫来讲有怀疑ê所在，请mài掩盖讲出来，án-ne对lín丈夫khah有利。」
「我想无啥物thang怀疑ê点，写hō͘ 我ê phoe lóng tī chit间房间，hō͘ 阮丈夫ê phoe lóng tī楼顶ê册房，请你免客气去the̍h。」 安子有讲白贼，她tiāⁿ-tiāⁿ烦恼in翁ê行动，m̄-koh无参加实际运动是事实，至少伊是án-ne相信。只是无了解伊头壳底ê抽象观念，he是小khóa不安ê种子。外国寄来ê phoe中间，两三张有chit款ê怀疑观念。 安子kā kui束ê phoe the̍h出来，她讲。
「阮翁kah我lóng是热心ê基督徒，无做半项m̄-tio̍h ê tāi-chì。」
Án-ne一讲，安子忽然感觉家己失言来惊一tiô。社会性 ê罪恶是另外一回事，针对个人ê罪来讲，基督徒，kám m̄是需要koh khah强ê自我意识？家己夫妇中间处处lóng是m̄-tio̍h ê所在，hiah-ê错误kah罪恶，tī被没收ê phoe中间已经看现现。第二pái惊一tiô ê tāi-chì是她ê日记，日记藏tī钢琴ê内面，连in翁都惊伊看tio̍h ê日记，若去hō͘ 无熟sāi ê人the̍h去读了会得tio̍h安慰等ê想法，其实kah赤露露hō͘ 众人监视仝款。
刑事peh起lih二楼，好佳哉有kā日记藏tī安全ê所在。刑事入去清文ê册房，kā phoe信、原稿、手册等全部lóng the̍h走去，然后环视四面壁顶ê册架á，发出hō͘ hiah chē册压倒ê「Ai-ah！」感叹声。
「M̄-koh无论如何，人iáu是m̄-thang siuⁿ过热心做学问，有人讲过：mài读册khah bē有忧患，像我生来to̍h是无读册无忧患ê人，哈哈哈！」
伊显然是teh笑家己ê卑下来耻笑别人，mā有感觉小khóa遗憾。伊m̄-bat横写ê字，无法度tùi hiah chē外国册中间chhōe出想讲有危险ê书籍。所以伊kan-taⁿ tùi文ê册架á the̍h出几本有关社会主义ê册，án-ne伊to̍h感觉真iāng。
今á日早起被检举ê m̄-nā清文一人，kah社会运动有关系ê人，全台湾一网打尽。禁止新闻报导chit件tāi-chì，m̄-koh，chit件事件tī街á路谣言不断，kah-ná滚雪球，jú滚jú大，变成一个大型ê怪物。日本人认为台湾人开始beh有不良企图，引起轻视、讨厌kah敌意。Hit当时殖民地ê人民并无显露出hit种狭心胸ê本性，其实台湾人并无抱tio̍h大反抗ê心。因为对全台湾社会运动领袖ê L氏厝里搜查，结果kan-taⁿ搜tio̍h一支空气枪。当时欧洲大战后ê自由主义思想之波浪也有phah到殖民地ê海岸，soah尾就提高一般ê阶级意识。结果各种ê运动kah结社，致使当局真伤脑筋。为tio̍h维持秩序，无十分ê警戒bē-sái得，m̄-koh，矫枉过正mā m̄是好办法。
假使清文tī检举前若无脱离当局嫌疑各团体之一ê文化协会，就会被判罪á是至少会罚金。Mài讲伊ê思想，伊ê人生观已经有起变化。总是，负责审问ê官员并无hiah容易相信伊ê话，因为清文写hō͘ in bó͘ ê phoe中间，有两三个无妥当ê所在，tùi巴黎写tńg来hit张phoe有án-ne写： 以后如何？听讲你已经怀孕，m̄知怎样我有小khóa心神不安。你讲chit pái身体无异常koh真有元气，m̄-koh，想tio̍h顶pái你身体衰弱，kám有法度生gín-á，我真bē放心。M̄-koh，若早知你ê身体无问题，我真后悔无chhōa你做伙出来。M̄-koh，tùi另外一方面来想，这绝对m̄是我ê辩解；你hiah-ni̍h慎重koh清净ê精神kah神经质，对chia ê环境kám会满足，我真有疑问。到底地上ê天国，去tó位mā lóng chhōe bē-tio̍h。 所以我家己恐惊mā感觉幻灭无望，对欧洲文化旧ê既成观念siuⁿ过受束缚，我一向lóng评价siuⁿ koân，无批判ê赞美，浪漫ê期待，chit-má lóng破碎à。尤其是欧洲chit-má teh破病，无法度lah！我原本想讲是真优美ê建筑物，却是一间病院。长期凄惨ê战争soah尾就结束，欧洲四界创伤当teh喘大气，过无gōa久kám会回复，文化koh再开花起来？开出无仝色彩ê花。今一切lóng hō͘ 残酷破坏，只不过是重新建设前ê破烂。原本ê道德观念kah精神秩序lóng失落去，女性ê堕落便是真好ê证明。无正派ê cha-bó͘人tī街路teh游荡无话讲，连有教养ê少女kah妇人mā是掠tio̍h无相识ê男人就相好，四界lóng看会tio̍h。M̄-koh讲tio̍h我，做你放心，我是金墙铁壁。
我到taⁿ lóng tòa tī豪华ê旅馆，约十工前搬去khah俗ê旅社。虽然讲我ê期待落空，m̄-koh，只有目头结结来逃避mā算是卑鄙无胆ê做法。有ê物件去到tó位mā有，tio̍h面对现实，持守正确ê认识。虽然是án-ne讲，我会想beh搬来chit-ê khah俗ê旅社，第一ê原因可能是身为豪华ê旅行者意爱搬徙。Chia óa近Mon-palu-nah-suh(译注：巴黎西南ê艺术街)，lah-sap街路顶面ê lah-sap旅社。
几日前kah tòa tī chit间便宜旅社ê一个cha-po͘人熟似，名叫Go-lih-chu-in ê 露西阿(Rusia)人，激烈ê Bo-lu-siu-bi-kih(译注：Bolsheviki，华语译做「布尔什维克」，提倡马列主义)主义者，年纪约二十二、三岁，无像Su-la-bu(译注：Slav，华语译做「斯拉夫」)族hiah-ni̍h魁武，体型瘦抽，面色苍白，hō͘ 人感觉是贫寒ê青年。我kah伊辩论两三pái，我用La-su-khin(译注：John Ruskin，1819~1900 ，英国ê社会改革家)主义—对社会组织ê改革kah人类生活ê提升ê各种理论lóng tio̍h用有人类包容力ê灵魂kah深深ê爱情做基础—来kah伊辩。
Hit-ê青年看起来无啥学问，知识贫乏，我想讲beh kā伊屈服是简单ê tāi-chì，m̄-koh结果m̄是án-ne。我m̄是hō͘ 伊ê主义、理论屈服phah败，只不过是不管伊ê思想kah理论án怎，伊to̍h是有铁一般ê坚定意志，有火一般ê热情，kah-ná宗教信仰一般惊人ê信念，chiah-ê气力到底是tùi tó位来ê，chit件事实hō͘ 我真大ê震撼。
容允我以后chiah详细kā你报告chit项tāi-chì，总讲一句，chit-ê青年有奇妙ê力量，我感觉若无小心会去hō͘ 伊吸引去ê危险，想讲tio̍h赶紧来搬离开chit间俗旅社。M̄-koh，tī我teh想ê chìn前，Go-lih-chu-in to̍h先搬离开。因为昨暗巴黎ê警察有来突检，伊真有技巧来脱离危险地逃走。
我知影你对án-ne ê phoe信一向无趣味，就kā伊当做是我海外旅行ê一个插曲。Koh过一礼拜我就beh去柏林(Berlin)，续落去beh经过瑞士去义大利，koh续落去beh去Pha-lé-su-tà-in（译注：英语Palestine，华语译做「巴勒斯坦」)圣地巡拜，然后去希腊，旅程非常ân-táu。Beh去hiah chē所在，khah chē时间mā无够，á我tī巴黎停留一个月以上，连我家己都感觉真奇妙ê矛盾心理。M̄-koh，chiah-ê暂时按下，回程kan-taⁿ经过印度，我tio̍h充分参观，这是值得观察、认识kah思考ê土地，因此chia可能是我beh停留siōng久ê所在。
Án-ne写到chia，遥祝你kah你腹肚内ê gín-á有丰盛ê幸福。 Chit张tùi外国寄tńg来hō͘ in bó͘ ê phoe受真重视，清文受tio̍h真严格ê审问。若无chit张phoe信，应该真简单就被释放，因为清文lóng无需要讲白贼ê弱点，一切照实在回答。红色ê画具(译注：共产主义)有吸引伊ê兴趣是事实，m̄-koh beh gia̍h画笔chìn前，hit-ê色已经薄去loh，思想iáu未肉体行动to̍h逃走去à。
过两礼拜，清文光明出来，这是一件无爽快ê tāi-chì。Chit-ê经验hō͘ 伊深入思考，伊kah-ná hō͘ 人绞汁ê柠檬，竟然hō͘ 人绞出汁来。这家己ê汁，气味无好。伊无偏右mā无偏左，伊koh khah意识tio̍h家己是中间路线ê社会人士。无论是善á是恶，伊无持有tio̍h tùi魂体抛出ê物件，家己mā感觉真不可思议。Tùi伊ê性格来讲，tiàm chit种暧昧ê中间地带微微á呼吸来活，家己mā无法度忍受。Hō͘ 伊浸tī chit种无烧无冷ê立场，确实是伊娶日本bó͘ ê关系。
因此，伊嘴须糊糊tùi警察局tńg来ê时，安子赶紧去迎接，欢喜kah tiô起来，清文一屑á都无欢喜。
「实在真好，我每暗lóng bē困得，án-ne我知影你无罪à，m̄-koh iáu真担心。」
「Kám án-ne？」
清文冷笑，in bó͘看起来是一个无知koh单纯ê女人，想beh kā她轻视。
「你真thiám ê款，好好á歇困一下，kám有受tio̍h刻薄ê对待？」
「无lah，无啥物特别，m̄-koh感觉真狼狈。」
「根据谣传，chit pái ê事件讲是真大，m̄-koh，我无相信。听讲台中ê L先生是一位思想极其温和健全ê人，我认为台湾bē有hit款恐怖无智慧ê 人，m̄-koh可能iáu是有chit种人，kám m̄是？」
「Bē-tàng讲无lah！日本内地kah世界各地mā lóng加减有chit种人。」
「Chit件事件kám有影有阴谋？Kám有明确ê组织teh推行？」
「无hit款tāi-chì lah！」
「总讲你无事to̍h好，你kám lóng无关系？好佳哉你有脱离文化协会。」
「真佳哉，好teh有你，若无我可能bē脱离。」
讲是感谢，其实hō͘ 人感觉tio̍h真强烈ê khau洗。
「Ngh，你tùi巴黎写hō͘ 我ê phoe，然后tùi印度寄tńg来ê phoe，我想hiah-ê内容有hō͘ in质疑，kám有受tio̍h严重ê教训？」
「有受tio̍h小khóa严重ê审问。我真thiám，想beh歇困一下。」 Cha-bó͘-kán-á抱清子tùi内埕chông入来。
Gín-á ê面kan-taⁿ几工无看就有变à，是清文感觉她有变。清文kā清子抱起来chim她ê面，嘴须糊糊目chiu 金金ê老父kah-ná是一个可怕ê小叔，所以tú会晓叫「爸爸」ê清子，chit时soah叫bē出来，tī清文ê手中感觉真gāi-gio̍h。清文为tio̍h beh弥补对bó͘ ê冷淡，极力爱惜gín-á，颠倒致使gín-á哭出来。入去眠床顶了后，清文流出热泪，he m̄是受气，mā m̄是怨恨，是孤单ê悲伤。Kah-ná想beh kā目屎流入去贮bē tīⁿ ê盆内，beh hō͘ 它满出来。
