《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 夫妇 第十三章（更新版）
作者 庄司总一 着 杨东杰 指导 林俊育 台译 2017.06.11
陈家ê门前围一大阵人。
Chit家ê二房景文tī安平ê鱼塭á，有一只大龟迷路行入来，chit工有两个贫民kā龟扛来。厝里有人好脚手，the̍h卷尺kah秤á过来量，长三尺五寸，重量约172公斤。
这是极好ê兆头，陈家感觉hiah chē人tī厝前真有光采。Kan-taⁿ当事人景文表面上真欢喜，内心却照常冷静。Chit只龟bē-sái讲是tùi伊ê鱼塭á掠tio̍h ê，其实是tùi真远ê海边偶然掠tio̍h ê，á是去ho͘大鱼网网tio̍h ê khah合理。可能是chit两人想beh得tio̍h赏金，chiah讲白贼。M̄-koh，无论án怎lóng好，只是ài开钱有khah费气。无论是吉兆á m̄是，tio̍h开kóa钱大家闹热一下来满足家己kah别人，这是台湾人ê pháiⁿ习惯。
Hit两个人要求一百两银来买chit只龟，景文真大方就答应。伊完全无出价，原因m̄是ài tī众人面前显示体面，是因为一开始伊to̍h无phah算beh家己来付chit条钱。
景文赶紧叫hit两个人kā龟扛去街里ê刻印á店，刻印ê人真技巧用钻á kah锤á tī龟壳顶面雕刻，雕刻ê所在微微á出血，就tī顶面抹(boa̍h)红漆。
雕刻字是 「甲子(1924年)上元(正月十五日)。放生。陈氏阿娇。」 景文刻老母ê名，无kā福气归家己，来归hō͘ 老母，所以厝里ê人kah看闹热ê人lóng真感心。景文叫人扛tńg去hō͘ in老母看。
「鹤千年龟万年，真恭喜ê记号，恭祝老母食百岁！」
阿娇爱听扶tháⁿ ê话，当然真欢喜。
「总是，景文ah，你ná会无kā你ê名mā刻入去？Tàu阵刻做伙真好，kám m̄是？」
「我iáu少年，老母ê幸福就是我ê幸福。M̄-koh，chit-ê福神并无俗，in讨价一百两银。」
「Án-ne ná会贵leh？一百两银买tio̍h一百岁，无比这khah俗ê lah。好lah，好lah，全部我出lah！另外包一个红包赏in。今á日是上元ê好日，大家真恭喜，kám m̄是？陈家也会koh khah繁荣起来。长男照常m̄知thàn钱，koh hō͘ 人召去警察局审问，有损tio̍h家风。瑞文是闲闲无tāi-chì做，罕得想beh kah一般人仝款去做khang-khòe，soah去hō͘ 蛇咬tio̍h，是漏屎马lah。厝里会靠tit ê kan-taⁿ你一人。大家tio̍h听hō͘ 好，平时lín lóng批评伊冻霜爱钱，m̄-koh，siáng ē-tàng比伊khah有孝？Eh，kám m̄是？」
到taⁿ m̄-bat有人看过阿娇hiah-ni̍h欢喜一直讲话。In koh再beh kā大龟放生去大海，teh beh扛起行。
「Oeh，大龟ah！请你做阮陈家ê守护神。下一pái koh来俗世ê时，一定m̄-thang bē记得来阮tau。我chit-ê年纪无一定ē-tàng koh再见tio̍h你，m̄-koh，我有真chē kiáⁿ孙，拜托你kā in照顾。Án-ne，大龟ah！祝你好好活落去！」
阿娇to̍h beh摸tio̍h大龟ê头，m̄甘放，连目屎都流出来。以后这成做一个笑谈，m̄-koh，hit时阿娇ê态度真诚恳，所以大家lóng kā它当做真实ê故事来听，来感动。
Hit工，tú好是旧历正月十五上元节，而且瑞文也救tio̍h一命tú出院，长男ê事件mā结局无事，所以陈家设宴庆祝。
筵席tùi下晡三点开始，排tī大厅ê桌顶，tùi料理店chhiàⁿ来总铺，料理一出一出teh出菜，大厅ê前埕mā有乐师teh演奏北管，非常闹热。
家族ê长辈lóng来赴宴，chit两年来一直无踏出房间门ê家长阿山mā有在场。虽然tòa tī仝一个厝顶下脚，mā有人一年半冬无见tio̍h家长ê面。阿山显然真老ā，看起来kah-ná春天无ǹg望会koh发芽ê枯木。伊经常悠哉悠哉微微á笑ê面，chit-má完全枯焦(ko͘-tâ)，有刻tiâu痛苦深深ê皱纹。「Chit-ê老爷koh活无gōa久loh！」大家私底下án-ne teh想。
阿山对今á日ê庆祝筵席真欢喜，当然会比平常时khah厚话一点á，m̄-koh，因为sau声，加上本来讲话速度to̍h慢，koh常常ài嗽，讲话中间ê断话时间koh长，致使话句ê前后意思hō͘ 人听bē清楚，也会听kah无趣味。所以大家无致意阿山ê讲话，ta̍k人讲家己ê话题；大家ê话题特别倾向三男瑞文。瑞文虽然已经出院，m̄-koh，面色iáu未回复，看起来iáu未回复到原来ê元气，hō͘ 大家问一kóa hō͘ 蛇咬tio̍h ê经过，随时to̍h疲劳起来。
一个阿叔问讲：「Tú-tio̍h hiah-ni̍h恐怖ê tāi-chì，你kám iáu-koh敢去庄脚？」
「我想讲最近无koh去一chōa bē-sái。」
「你实在会hō͘ 人tio̍h惊，真正有够勇感。我一直掠准你是软弱koh无胆ê gín-á，taⁿ我tio̍h改变对你ê看法。你kám有影beh koh去？瑞文。」 坐tī隔壁桌ê春鸾听tio̍h，赶紧插话提出异议。
「无lah！阿叔，瑞文绝对bē koh去hit款恐怖ê所在lah！」
「Beh去lah！」瑞文倔强án-ne讲。
「Mài去lah！若koh去hō͘ 蛇咬tio̍h，你to̍h会无命，bē-sái去！」
「Kám讲会去hō͘ 蛇咬第二pái、第三pái？」
「而且听讲tī真深山内底，kám是iáu有tòa生番？」
「生番已经变成顺服ê熟番，in mā穿kah咱仝款ê衫。」
「Mài去lah！Hiah-ni̍h恐怖ê所在。」
「我ê土地tī hia，无办法lah！」
「派人替你去to̍h好ā！Eh，请大家帮我劝伊mài去。」
春鸾真认真，她担心丈夫安全ê心chiâⁿ hō͘ 大家感动。M̄-koh，若讲瑞文明á载to̍h beh去，he to̍h是另外一回事。瑞文身躯都iáu khiā bē chāi，到底tang时chiah ē-tàng去庄脚mā iáu m̄知，春鸾chit-má to̍h hiah-ni̍h紧张，实在有够好笑。
景文微微á笑，半khau洗án-ne讲：
「你若是hiah担心，去poa̍h-poe好lah！求神明指示。」
「是ah！Án-ne mā好。」
春鸾真正tìm头同意，边á ê玉帘看她ê戆直bē爽快，用冷笑kah受气ê目chiu来睨(gîn)景文ê面。
「Eh，taⁿ mā好ah！瑞文财产ê土地决定tī hiah-ni̍h深山内底，mā是神ê旨意。所以瑞文hō͘ 蛇咬tio̍h险险á死，kám mā有hiah pháiⁿ心ê神oh？」
分财产ê结果，三男分tio̍h ê土地虽然真阔，m̄-koh，路途遥远koh交通无方便，而且土壤真瘦，厝里ê人lóng知这是景文设计ê狡怪策略，而且是伊亲身chhōa瑞文到hit-ê所在，结果hō͘ 瑞文tú-tio̍h hiah恐怖ê灾祸。所以大家听tio̍h玉帘对景文ê批评，感觉真爽快，mā teh等待当事人反应ê面色。M̄-koh，景文ê表情一屑á 都无变，kah-ná无hit件tāi-chì ê款。伊讲。
「玉帘最近变成一个无神论者，城隍爷、妈祖lóng是假ê，koh讲tio̍h ài破坏寺庙hit款惊人ê话。」
暂且mài讲玉帘讲过chit种话是真ê á是假ê，kan-taⁿ chit-má听tio̍h chit种亵渎神明ê话，chiah-ê老辈ê人，尤其是年纪大ê cha-bó͘人lóng会惊kah phi̍h-phi̍h-chhoah。特别是信神虔诚ê老母阿娇，听tio̍h chiah-ê话，ná会恬恬无讲话leh？
「玉帘真好大胆，lóng无teh惊会hō͘ 神责罚。若有hit种心，pháiⁿ事一定会临到她。准讲现世无事，来世mā无有好ê投胎。」
「会生做啥物？」
「无路用ê cheng-siⁿ lah！总讲bē koh做人lah！」
「转世做猪、牛á是鸟loh！若án-ne，chit只鸭kám是前世犯tio̍h重罪ê人loh？)
Tú好hit时，桌顶phâng来一盘鸭ê料理，玉帘thiau工用箸挟（nge̍h）一块鸭皮hō͘ 大家看。年纪大ê目chiu 显出谴责ê目神，嘴káuh-káuh念；少年ê感觉真好笑soah禁bē-tiâu大声笑出来。大家用chit-ê笑声做烟雾来掩盖亵渎神明议论ê方向。这是天官赐福人间ê上元佳节，chit种话题实在是khah无适合；阿娇kah玉帘互相停止争论。
总是，独独长男清文忽然koh再讲起chit ê问题。
「M̄-koh，咱bē-tàng断言讲寺庙一定bē去hō͘ 人phah pháiⁿ，á是讲hit-ê时代bē临到。」
「讲啥物痟话！Hit款ê大地动，一百年mā无一pái。」阿叔小khóa表示反驳ê气势。
「无lah！M̄是指天灾地变lah！是teh讲社会ê变迁。」
「Án-ne讲起来，koh khah bē有hit款ê hàm古。你to̍h是有思想上ê问题chiah hō͘ 顶司kā你注意，mài烦恼hiah-ê有ê无ê lah。啥物党，啥物协会？咱台湾人若lóng是án-ne hō͘ 总督伤脑筋ê人，he to̍h害tio̍h阮。你是食烧肉羹烫tio̍h，食冷肉片也pûn风(受害过，过头惊)。」
「寺庙ê tāi-chì只是一个例niā-niā，咱有种种ê pháiⁿ习惯kah复杂ê仪式等，koh过无gōa久受禁止ê时to̍h beh来ā。实际上，咱有真chē tāi-chì tio̍h改革kah禁止。Chiah-ê若hō͘ 顶面忽然一时强迫咱来做，不如咱家己反省，慢慢á来改chiah是良策。一时to̍h随时来改，打击会真大，mā会引起种种无好ê摩擦」
Chit-ê警告对台湾人来讲是真值得考虑ê事，m̄-koh，tī hit-ê场面无人ài beh议论。Tú成做话题，对手ê阿叔mā无beh听清文讲话。
「啥物？穿红衫ê cha-bó͘怎样？」
阿叔án-ne讲了就加入边á teh谈论色情ê人。
清文kah-ná去hō͘ 人冷落，心内感觉奇妙ê寂寞。想起来，筵席一开始大家就对伊敬而远之。景文ê龟ê tāi-chì，瑞文hō͘ 蛇咬tio̍h ê话题，闹热滚滚teh讨论，m̄-koh，无人beh kha̍p-tio̍h清文ê tāi-chì。这m̄-nā是大家因为伊phah-pháiⁿ陈家ê名声感觉无欢喜，对厝里ê人来讲，思想，to̍h是精神性ê事，大家感觉无啥有趣味；讲无趣味，其实是无法度理解。虽然in无法度理解，m̄-koh，清文是真ài in努力来理解kah批判。「无法度救ê一阵人，无法度救ê民族。」清文心内teh念，陷落tī失意ê心情。
Tī cha-bó͘人ê桌，大家谈笑闹热滚滚，其中发出娇艶笑声ê是玉帘，出字谜hō͘ 人ioh ê mā是她。
「两人十四个心，ioh看是啥物？」
玉帘kā所有ê人看一liàn，要求答案。娇艳ê目chiu仁因为有酒气变kah红kì-kì，她故意掩盖心内ê忧愁kah愤怒，装kah真活泼爽快。
「Eh，ioh-tio̍h ê人请kā杯á gia̍h koân。」
除了两个人以外，其他ê人大概lóng已经知影谜底，kā杯á gia̍h koân讲：「Ē-sái讲出谜底未？」M̄知谜底ê kan-taⁿ安子kah景文ê细姨阿龙。
「请大家mài siuⁿ早讲出来！」玉帘一方面阻止大家，一方面oa̍t头去看安子，对大家讲：「Ai-ah！你免客气lah，安子阿嫂明明知影答案，谦卑kah假做m̄知。」然后óa去她ê耳á细声讲：「德字lah，道德ê德。」Koh hō͘ 安子kā杯á gia̍h koân。
「大家lóng是才女，hō͘ 我chit-ê无学问ê人来出谜题，kah-ná无啥意思。」然后玉帘向坐tī对面siōng边á ê阿龙讲：「Oeh，阿龙ah，你kám也学安子？免客气lah，赶紧学（o̍h）安子kā杯á gia̍h koân。Oeh，你kám真正ioh bē出来？无可能lah，两人十四个心，是啥物？」
阿龙微微á摇头，玉帘明明知影她m̄-bat字，她是thiau故意beh kā她为难；仝桌ê人lóng掠阿龙金金看。若受tio̍h án-ne ê chhòng-tī，大家lóng会有想beh紧thang钻入去孔内ê心情。M̄-koh，阿龙kan-taⁿ小khóa头lê-lê，面lóng无红。阿龙ê婴á iáu未断奶，所以胀起来ê奶房kā青色ê衫á襟突起，挽了ê目眉无koh画眉。玉帘kā她khau洗，koh用目chiu kā她睨(gîn)，面色、动作lóng真扬（iāⁿ）气，目色koh kah-ná毒箭射来ê感觉，m̄-koh，对方kah-ná hō͘ 小胆ê狗吠却lóng无反应ê钝牛leh，hō͘ 玉帘看了koh khah bē爽。这是玉帘ê常态。
「Siuⁿ过简单lah，免想mā会晓答。Án-ne我koh出一个khah困难ê。乌纸画乌龙，ioh看是啥？四书内面ê一句话。」
「有看当做无看见。」
大家头脑iáu-teh想，iáu未kā杯á gia̍h koân chìn前，春莺to̍h抢头前回答。她看tio̍h玉帘用仝款ê手法teh虐待阿龙，实在忍受bē-tiâu。玉帘无欢喜。
「Án-ne bē-sái lah！Siuⁿ紧讲出来to̍h无趣味ā，一定tio̍h照规则来。」
Ta̍k项小心ê春莺hō͘ 玉帘极力责备，就kiu kah恬恬去。
「Án-ne koh来，化戴草khiā leh，啥物字？」
「Oah，厉害。虽然厉害，m̄-koh siuⁿ简单lah。」边á有人án-ne讲。
「简单mā ioh bē出来。是啥物字？」
玉帘án-ne讲了，kah siōng起头仝款teh为难阿龙，坐tī边á看kah挡bē-tiâu ê人教阿龙讲：「花，花。」化戴草khiā teh to̍h是花字。M̄-koh，hit-ê人用真细声kā她教，阿龙soah听m̄-tio̍h声调。
「是火。」
「Eh，是火oh，真奇怪ê解答。M̄-tio̍h lah！你，kám m̄是beh ioh花？
Taⁿ你堂堂是陈家ê第二夫人，mài koh讲花ê tāi-chì；卖花姑娘是古早古早ê tāi-chì lah。」
这是真大ê侮辱，因为卖花有卖春ê含意。
玉帘笑kah东倒西歪，她ê翡翠耳钩tōng-tōng-hàiⁿ。安子看玉帘chit-ê款式，感觉bē忍心，就无法度koh恬恬落去，小khóa严格责备讲：
「玉帘姊，án-ne好à lah！你kám无感觉阿龙真可怜？」
「她kah我是siáng khah可怜？你kám会知？」
「He我虽然m̄知，总是你酒lim了心情郁卒，请mài koh lim ā，phah-pháiⁿ身体to̍h m̄好loh！」
总是，玉帘无beh听她ê忠告，无beh放手，继续攻击。
「Chit-má来ioh女人khiā leh，是啥物字？好lah，好lah！Lín是有学问ê人，我无beh问lín chiah简单ê谜，我是teh问阿龙。女人khiā leh，你kám知？M̄知我kā你教。这to̍h是妾字。讨厌neh，你到底知á是m̄知？」
玉帘用拳头母phah桌顶，碗公ê汤溢出来，杯á倒落去，酒流出来。Chit款无成体统ê狼狈混乱，连cha-po͘ 都看bē落去，视线投向玉帘hit pêng去。Chit时tùi siōng远ê上座传来sau声ê声音。
「小等leh！妾m̄是立kah女neh。」
「Heh，á无是啥？老糊涂。」
「我看起来kám有像老糊涂？He m̄是立，是 （译注：造字：「立」下面一竖），就是罪ê意思；tī古早ê支那，kā罪人当做婢仆来使用，所以 kah女合做伙to̍h是侍女，所以....。」
「Ah！老父果然是大学者，kah-ná一部康熙字典leh。Án-ne，妾to̍h是有罪ê女人。」
玉帘ê面露出胜利ê光芒大声讲。Chit-ê胜利感hō͘ 她ê激动小khóa镇静落来，若无会演出一出koh khah失体面ê戏。阿山真巧，利用伊ê话来抚平新妇ê心；阿山有时á会显出chit种细条神经来。
总是，阿山chit pái已经尽全力来扭转场面气氛。筵席tú开始，伊to̍h无lám无ne，koh是jú来jú无精神。菜一盘一盘teh出，m̄-koh，伊lóng无gia̍h箸去挟（nge̍h），一直teh lim ê红酒mā感觉无味无素，chhńg瓜子ê手指(cháiⁿ)mā一直teh chhoah。坐tī边á ê阿娇看kah真无奈，着急讲：
「Oeh，你siōng爱食ê鱼翅上桌à！阿山，你ná会无ài食？以前hiah-ni̍h爱食，三人份ê量都食了了leh！」
「可惜，我已经到食m̄知滋味ê年纪loh！」
Án-ne讲了，阿山尽力，m̄-koh忍bē-tiâu，kiōng-beh hah-hì。
「你ná会hiah-ni̍h无元气？今á日m̄-nā是好日，咱ê鱼塭á koh掠tio̍h大龟，kám m̄是双重ê喜事leh？ Kan-taⁿ你一人kah-ná魔神á面青sún-sún。Ai-ah！加减食kóa，无会死去neh。」
阿娇用瓷(hûi)汤匙á khat鱼翅tu去到阿山ê嘴边，强叫伊食落去。
Tiàm后壁teh服侍ê cha-bó͘-kán-á素娥kā她阻挡，提出异议讲：
「无ài食to̍h mài勉强伊食，老爷今á日身体无爽快ê款。」
「M̄是kan-taⁿ今á日án-ne，伊今á日身体无爽快，到底是siáng ê罪？」
「你beh讲是我loh！」
「当然loh！你hō͘ 阿山变成烟鬼，你kā阿山ê寿命缩短十年至二十年。」
「Ai-ah！岂有此理！M̄-koh，chit-ê大人根本to̍h无想beh活到百岁。」
「你讲啥物？」
「无lah！咱tau老爷ê观念kah一般世上ê人有小khóa无仝，伊根据庄子ê学说，认为死亡mā是快乐ê境界。」
「你mài讲chit种夸口ê话，半字都m̄-bat，庄子、孔子若听tio̍h会起狂。若讲死亡hiah快乐，soah bē晓去后埕ê龙眼树吊tāu。」
阿娇kah素娥之间开始险恶ê争论。「Mài tòa hia做无意义ê冤家！」阿山án-ne kā in阻止，就ûn-ûn-á peh起来，就án-ne中途离席。伊虽然m̄是无ài kah家人享受天伦之乐，m̄-koh，伊giàn阿片giàn kah非常痛苦，实在忍受bē-tiâu ā lah。
阿山hō͘ 素娥陪伴退席，时间拖hiah长ê筵席，安子mā感觉真厌倦ā，而且玉帘已经相当酒醉，m̄知tang时会koh thut-chhôe，安子mā真担心。
「玉帘姊，你kah-ná真艰苦，咱就到chia来告辞，来我ê房间lim咖啡，然后咱来 ī 你顶pái教我ê九连环(译注：智慧ê环)。」
想bē到玉帘at-sa-lih to̍h答应，春鸾mā peh起来，要求tàu阵去，安子就chhōa in两人离开筵席场。
安子chhōa两人进入客厅，她phâng咖啡出来。玉帘kā咖啡杯óa去嘴唇，m̄-koh无随lim；她就án-ne无tín动。好强ê玉帘无ài hō͘ 人看tio̍h她teh流目屎ê面，微微á chhèng起来ê咖啡蒸汽，掩盖 bē-tiâu她ê目屎，tī siang-te-li-a灯(译注：chandelier，玻璃kah金属装饰ê室内灯) ê照明之下，珠泪闪sih银色ê光，流落来她ê嘴phóe。
「Án怎？Βeh ī 智慧环无？」
安子想beh提高她ê兴趣án-ne讲，春鸾用真高ê声回答讲：「好lah！咱来ī。」春鸾m̄是想beh phah破沉默来提高玉帘ê元气，是因为她m̄-bat有过像eng暗hiah-ni̍h充满幸福感；in翁拾回一条命，mā已经痊愈ā。Hō͘ 她感觉幸福ê m̄-nā是hit-ê tāi-chì niā-niā，实在是因为hit-ê灾难hō͘ 丈夫瑞文ê心改变。她对in翁诚心诚意全精神ê看护，显然比蛇毒koh khah深深刻tiâu tī瑞文ê心。结婚以来，瑞文m̄-bat对她流露一点á爱意，有时甚至恶言相对，动脚动手，taⁿ她一变to̍h变kah hiah温柔koh亲切。
「Tú-chiah乐师演奏九连环ê曲，若运气无好，我mā有可能陷入去智慧之环。」春鸾án-ne讲。
九连环曲ê由来是án-ne：古早有一个少年ê寡妇哀叹空闺寂寞，请求ta-ke hō͘ 她koh嫁。重视贞操ê ta-ke就想出一个九连环ê智慧之环，kā它制造出来hō͘ hit-ê新妇，若她ē-tàng脱出手环，就ē-sái再嫁。Chit-ê手环看起来真简单，却有六重ê底层。为tio̍h beh脱开hit-ê手环，新妇白白空过十几年ê岁月，hit时也已经超过chhōe翁ê年纪。结果因为ta-ke ê聪明，新妇也ē-tàng保守她ê贞操。
安子想beh the̍h出玉帘hō͘ 她ê九连环，m̄-koh，玉帘讲无想beh ī ā，kā她坦白拒绝。
「玉帘姊kám讲一屑á趣味都无？」春莺不服án-ne讲。
「He是你春莺siuⁿ过热。我有khah koh样，m̄-koh，eng暗你是án怎leh？平常时面thu̍h-thu̍h无话讲ê人，kan-taⁿ eng暗chho̍p-chho̍p叫，讲bē-soah。」
「无法度lah！Eng暗m̄知án怎，我感觉真幸福to̍h是lah！」
「Án-ne真好ā。」
「玉帘姊，你kám无幸福？家己若想讲beh有幸福，to̍h有幸福ê身份。丈夫纳妾，我lóng无所谓，也ē-tàng和睦相处，只要丈夫mài kā咱bē记得á是弃sak to̍h好，因为第一夫人比第二夫人khah占优势。你后头厝ê老父，kám m̄是有第三夫人leh，你siuⁿ过苦心坚持lah！」
「春莺，你单纯，真好。像你chit款ê cha-bó͘人，幸福就ná亲像去后园á挽果子hiah简单，你ná会有法度了解我ê心情leh？」
玉帘对春莺án-ne讲，无koh chhap她，就向安子讲：
「假使清文兄娶细姨，你会án怎？」
「当然kah你仝款会真苦恼。」
「你看，我讲了无m̄-tio̍h。」玉帘得tio̍h支持，就用轻视ê眼光teh看春莺，然后koh问安子：
「M̄-koh，若是细姨bái koh戆大呆，你会án怎？若是一点á可取都无，你会án怎？」
「Ngh，我bē了解你chit-ê问题ê意义，súi kah bái kám有啥物无仝？」
「无仝lah！大大ê无仝。」
玉帘激烈kā她否定，春莺tùi边á插嘴讲。
「你是teh指阿龙？M̄-koh，若是她比你khah súi，无lah，若kah你平súi，你一定会koh khah嫉妒，koh khah讨厌，kám m̄是？」
「你真戆，若是外表、心地lóng súi ê cha-bó͘人，án-ne to̍h有thang竞争；嫉妒kah受气mā会变成khah súi，我to̍h bē án-ne有反常ê懊恼。阮老父hiah-ê细姨lóng是美人koh贤慧，kah阮老母koh会投机，厝里lóng无风波。M̄-koh，阮hit-ê景文，虽然讲人各有所hèng，总是伊mā无必要选ah选，特别去选hit-ê野猫tńg来厝里。Kah-ná去hō͘ 狗夺魂了后ê白痴，koh bái-kâu-kâu ê cha-bō͘-gín-á，真是无体面，hō͘ 我无面thang见人，想tio̍h to̍h懊恼。我想beh出去吹暗风，咱lóng出来去怎样？」
Hit时，安子忽然想起一项tāi-chì；若是玉帘讲ê话是事实，án-ne她kah春莺两人ê想法根本to̍h无啥差别。女人对纳妾风俗ê观念，kan-taⁿ受个人ê感情左右，若tùi社会ê见解来讲，in一屑á都无kā它看做是罪恶。总讲一句，he m̄是道德上ê问题。 Chiah-ê风俗习惯已经深入人心，chit-má忽然想beh来改，对自我意识强koh有洁癖，而且使khioh-ka̍k（自暴自弃）koh带有破坏偶像倾向ê玉帘来讲，beh承认纳妾制度ê事实，会khah有自我矛盾ê感觉。
In三人tàu阵行出去。
街á非常闹热，冷冷ê暗风hō͘ 火把(pé)烘烧，hō͘ 烟充满，四界传来各种响音phah入耳孔。Tùi大厝ê深落，á是小路，á是庙埕，传来管弦音响、铜锣kah大鼓ê声、戏台hì-hè叫ê声、卖物ê声等。家家户户门口排列拜拜ê物，香(hiuⁿ)烟phōng-phōng-chhèng。走马灯liu-liu-se̍h，照出各种影像。大路顶面有长达五十尺ê龙灯，吊挂珠宝teh乱舞。打扮súi-súi ê cha-bó͘ gín-á kui阵teh游街；细汉gín-á提ta̍k人苦心制作ê虎、兔、狗、鸡等ê精彩ê彩灯杰作，得意洋洋teh游街。Chit暗，少女会得tio̍h爱人á是良缘，无子女ê妇人会得tio̍h kiáⁿ儿，人人抱tio̍h各种ê迷信来烧香、烧银纸，á是耍(sńg)到三更半暝。 安子in三人入去天后宫拜拜。
春莺想beh知影家己ê运势，tī chit工用某种方法来占卜家己一年内ê吉凶是一个习惯。玉帘讲她知影无论如何家己pháiⁿ运，所以免去卜卦。M̄-koh，安子劝她既然来ā，就入去卜看māi，所以in就入去庙内。
庙ê内堂充满蜡烛ê烟雾，hō͘ 人kiōng-beh bē喘气。春莺行óa神明头前，tùi烛台点to̍h香，拜拜了就kā香插入香炉，然后跪拜koh khiā起来拜，了后用牛角形ê筶(poe)poa̍h落去土脚。春鸾ê拜拜真虔诚，m̄-koh，玉帘to̍h kah-ná是义务leh，m̄情愿，安子却是一半趣味niā-niā。
Poa̍h-poe了后，就ta̍k人去抽签，签会指示方向。春莺抽tio̍h南签，玉帘抽tio̍h北签，安子抽tio̍h东签。各人照指示ê方向行去，tī路里á是人家厝偷听人讲话，根据所听tio̍h ê话来占卜家己一年中间ê吉凶；这叫做「听香」，是女人ê迷信。M̄-koh，ē-tàng充分暗示家己命运ê话真oh得听tio̍h，所以kan-taⁿ拾家己khah有合意ê话，然后请经验、学识khah丰富ê人来解说。三人tńg到厝chiah会去请教老父阿山。
讲tio̍h tú-chiah tùi庆祝筵席中途退场ê阿山，tńg到房间就赶紧叫素娥chhoân阿片膏来suh两三帖，chiah感觉爽快起来。
Chit时，长男清文入来。最近老父ê身体有明显衰弱起来，m̄知tùi tang时开始，伊每工讲《红楼梦》kah《金瓶梅》hō͘ 伊意爱ê cha-bó͘-kán-á素娥听，m̄-koh，chit-má听讲mā已经忽然停止à。Tī筵席中间，清文也tiāⁿ-tiāⁿ为老父ê身体teh担心。阿片若适当使用，kah酒精仝款，无一定有害，有时koh会提高沉重ê精神，hō͘ 无活气ê肉体活起来。阿山ê年纪已经无法度抵抗chit种药物ê刺激，mā无法度kā它合理化，已经是中毒ê状态，若chhut-chāi伊去，死亡只不过是时间ê问题niā-niā。M̄-koh chit中间，清文lóng有机会tio̍h劝伊禁阿片，m̄-koh，老父对阿片执迷不悟非常严重，讲若kah死亡交换也bē后悔，所以清文费尽千言万语mā无chhái工，最后mā看破；chhut-chāi伊去。最近因为卫生设施ê进步，阿片中毒ê治疗已经有相当ê成绩，所以kah-ná有一点á ǹg望。
「看你khah有元气à！Tú-chiah看阿爸痛苦ê情形，hō͘ 人不忍心看。」
「你，koh有我边á ê人teh为tio̍h我种种ê担心，所以我想beh改阿片。 Chit两三工kā量减少，结果身体bē堪得，致使到chit款情形；bē-sái siuⁿ过相信人ê意志，无法度lah！」
阿山微微á笑，tú-chiah痛苦ê ná溪谷一般ê皱纹中显出喜乐，深沉ê目箍也有活气ê眼神，sau声慢慢á讲ê话mā感觉加真正确。
「来pok薰草án怎？我án-ne ，kám m̄是品行眞好？」伊就phah开银色ê薰盒，the̍h出三年前in kiáⁿ回国ê时送伊做等路ê埃及薰草。The̍h一支起来点火ê阿山，全骨ê手指已经bē koh chhoah à；伊表情ê流露、身体ê动作，lóng比伊本来ê情形koh khah好。Giàn阿片ê人to̍h是chit款形，无像lim酒醉ê人有特别激动ê感情，精神上mā khah平静koh有秩序。清文看tio̍h老父活跳跳幸福ê款，感觉无需要勉强伊改阿片，致使伊失志。
实际上，清文ài in老父改阿片ê心情，m̄-nā是父kiáⁿ ê亲情，mā有顾tio̍h陈家tī社会ê体面。当时台湾ê阿片制度tú chiah成做舆论ê对象，对阿片渐禁政策ê疑问kah不满也表面化，政治团体kah社会运动团体ê纲领，一定tio̍h加禁止食阿片ê条款。清文虽然chit-má已经完全退出hiah-ê团体，m̄-koh，伊感觉家己ê亲人中若出一个违反时代ê人，是真无妥当ê tāi-chì。
「Án-ne讲起来，阿爸ê心中iáu teh想讲若ē-tàng，beh改掉阿片ê心情ho͘ⁿh？」。
「Chit ê 瑞文受tio̍h 灾难以来lóng一直梦tio̍h蛇，hit ê梦ê恐怖，bē-tàng用嘴讲」。
听tio̍h án-ne，清文忽然想起De Ouincey 写ê《英国阿片瘾ê告白》(译注： “Conffesions of an English Opium Eater”，如图： )。
「若是án-ne，食阿片ê人无一定会快乐，我chit-má想起有一个西洋作家写伊食阿片ê痛苦。M̄-koh，hit-ê人óa靠伊ê意志力，到尾征服沉重ê pháiⁿ习惯。」
「这无啥物奇怪，我tī日本内地来台chìn前就食阿片，你知我后来mā是有改掉ā。Tùi气喘khah严重起来了后，我chiah koh开始食，chit-má改bē起来 à，总讲一句，年纪大ā lah。」
「总是，入病院ē-tàng改掉。阿爸，咱来去病院做根本ê治疗，你看án怎？Hō͘ 你ê晚年ē-tàng过khah健康，khah快乐，kám m̄好？」
「若kah你仝款iáu少年，我会án-ne做。可惜，我知家己ê命数，你趁早为我准备棺材，chiah是有孝。」
「我想，若ē-tàng hō͘ 你长岁寿chiah是有孝。」
「我已经活有够久à lah。」
「我ǹg望你koh khah长岁寿；长岁寿本身是好德行，kám m̄是？」
「无lah！活leh tio̍h感谢，死koh khah tio̍h感谢，生死lóng仝款。
若kā两个分开，to̍h变成完全无去。孔子、老子kah你所信ê耶稣lóng是án-ne，in lóng tī in家己ê寿命到ê时to̍h死lah，kám m̄是？若活到chit-má会án怎？大概会成做病院ê研究材料，á是tī动物园ê闸(cha̍h)á内，á是博物馆内ê展览物，in ê真理、教义kah言论，mā会失去全部ê光彩。或者用你最近当teh珍惜ê古董来讲，有一工in会消失去；至少是因为有消失ê可能性，in chiah有价值。若kah经过十万年iáu tī-.teh ê石头仝款，to̍h啥物意义、啥物价值lóng无ā，kám m̄是？所以，死m̄是悲哀，mā m̄是恐怖ê tāi-chì。总讲一句，适来夫子时也，适去夫子顺也，安时处顺，哀乐不能入也。道理to̍h是án-ne lah。」
「总是，chit种思想kah理论，若无信仰ê根基，只不过是空空ê言论。道理beh án怎讲lóng ē-sái，m̄-koh，tùi人ê感性来讲，死亡当然有哀乐tī-.leh，m̄-koh，若kā死亡看kah hiah轻，我无认同是án-ne。听讲未开化ê人无啥惊死；对死有惊惶ê心hō͘ 咱ê人生变成有意义kah有发展，mā to̍h是hō͘ 咱koh khah有文化，kám m̄是？」
「若án-ne讲起来，你kah我中间ê看法kah-ná无真大ê差别。无lah，无lah！大无仝，kah-ná是koh kah-ná m̄是。清文，若照你ê讲法，结局死亡是恐怖koh讨厌ê tāi-chì，若án-ne，不得不tio̍h kah死亡争斗ê人生，to̍h无快乐à。」
「这是因为活leh无一定会快乐；人生ê意义ē-sái讲是忍受苦恼，koh再kā它超越ê一种欲望。」
「原来是án-ne，若是án-ne得tio̍h 智慧kah文化，我希望是án-ne。耶稣教ê教义to̍h是án-ne lah。我bat想讲若有机会ē-tàng去拜听耶稣教ê学说，taⁿ免听mā想像会到。Tio̍h lah，真久以前，我bat tī lín-tau看tio̍h耶稣ê像，he m̄是hō͘ 人看了有好感ê面。他ê头koh戴一个莿á ê王冠，面流血，是充满悲哀kah痛苦，亲像teh哭ê面；he kah慈悲、圆满ê佛像大大无仝。耶稣教认为人生是苦难ê，这是想讲人类tī大自然中是特别ê存在；kā人类siuⁿ过夸大，是一种自我ê骄傲kah傲慢ê想法。人类若kah草木禽兽相siâng生死兴亡，kah空中ê天体相siâng运行，to̍h bē有苦恼，kám m̄是？」
「总是，阿爸，我用一百年ê时间mā无法度深入了解chit种ê空虚kah无路用ê哲学，尤其是东洋ê人生观，tī支那、印度hō͘ 真chē人迷惑，这是认为快乐比痛苦khah好，无为比劳苦khah快乐ê一种想法。」
「你ê话真糊涂，痛苦容易快乐难。你若讲我án-ne是teh玩弄（oán-lōng）庄周ê言论，你to̍h大错loh。我今á日ē-tàng讲出chiah-ê话，是我用久长岁月努力出来ê结果。照你所知，我自少年就经历人生ê无常，因为瘟疫hō͘ 我ê bó͘-kiáⁿ同时死亡，hō͘ 我充分tam过悲哀kah痛苦ê滋味。我表面上看起来kah-ná悠哉悠哉，其实心底却m̄是án-ne。我不断观察大自然kah人生，也思考各种事务。到chit-má我已经ē-tàng自我超越，he是老庄学说ê致荫，m̄-koh m̄是老庄ê物件，是我ê人生观；无lah！应该讲是众人ê物件。」
离开阿片ê话题，阿山kah平常无仝，chit-má用严肃ê态度热心teh讲。清文无想beh继续kah老父讨论落去，he m̄是因为两人ê思想根本to̍h无仝，是因为无像平常时ê老父，chit-má严肃ê谈论hō͘ 伊感觉真意外，而且清文怀疑he是m̄是kan-taⁿ口头讲讲leh ê信念，清文感觉chit点真值得怀疑；这有可能是伊沉醉tī食阿片ê兴奋teh讲大话，á是伊急beh防卫in kiáⁿ禁止伊食阿片chiah做出ê姿态。无论如何，平常时清文sa无in老父ê性格，chit-má chiah知原来其中mā有隐藏对人生ê真诚kah热情。清文改变本来ê偏见，对老父开始敬畏kah深爱起来。
