《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 夫妇 第十四章（更新版）
作者 庄司总一 着 杨东杰 指导 林俊育 台译 2017.06.18
安子kah玉帘以后to̍h lóng无koh生kiáⁿ；玉帘是因为夫妇关系冷却，安子却是因为m̄是多产ê体质，加上身体虚弱ê缘故。她bat tio̍h过一pái寒热病(malaria)，以后几年中间koh有间断性ê复发，mā有可能是因为án-ne chiah造成障碍。
清子五岁了后，安子to̍h无koh怀孕，就án-ne无koh再存ǹg望。看tio̍h厝里四界teh添丁koh饲kah真活泼，安子真ǹg望ài koh有一个，m̄-koh她预感家己bē koh再生kiáⁿ。因此清子成做in唯一ê幼苗，夫妇ê疼全部灌入清子ê身上。幼苗渐渐勇健，成长大汉，m̄-koh，树枝看起来kah-ná小khóa弯曲ê款，因为伊ê苗床ê条件有khah差。
清子有小khóa狡怪，父母心内烦恼。
清文经常买chhit-thô物、o-lín-gió(日语ê人形，华语ê洋娃娃)、尪á册tńg来，hō͘ gín-á欢喜。夫妇有时想beh独占爱女；是m̄是家己khah爱她？是m̄是会hō͘ cha-bó͘-kiáⁿ喜爱？In露出一种beh独占ê欲望，连清文也无例外。M̄-koh，奶pô͘ 比糖á hō͘ gín-á koh khah恋慕，无论老父án怎做，幼儿iáu是真自然会khah亲近老母。因为án-ne，安子对cha-bó͘-kiáⁿ ê疼，家己有小khóa teh控制，hō͘ 老父有khah chē机会，án-ne就会tú好平衡。
总是，老父jú疼她，颠倒会hō͘ 清子感觉心烦ê款。
「清子，今á日阿爸kā你买一项心适ê物件，乖gín-á，目chiu掩起来，chiah看啥物走出来？」
阿爸tùi箧(kheh)á内底the̍h出一只chhit-thô物ê熊，绞ân发条，熊就慢慢á爬teh行。
「你看，有心适ho͘ⁿh？Chit只叫啥物名？」
「Hîm，hîm。」
「Hîm？M̄是án-ne讲，用别ê名，阿爸顶回用尪á册kā你教过ā，有乌毛，行路慢慢á，它是金太郎ê朋友，eh，叫啥物名？」
「Hîm lah.」
「M̄是lah，m̄是lah！用国语(译注：指日语)讲看māi。」
清子恬恬无beh回答，假做无听见，顾sńg chhit-thô物。Chit时，清文虽然知影勉强gín-á m̄是办法，m̄-koh iáu-koh是继续问落去。
「戆gín-á，清子，你kám已经bē记得à？阿母，这kám是叫做“hîm”？」
「Eh，m̄是lah，he叫做“khu-mah”。」
「Tio̍h hō͘ gín-á家己讲chiah好，kám m̄是？」清文小khóa面结结对清子讲。
「Taⁿ，你家己讲看māi。」
「Khu-mah。」
清子勉强细声án-ne讲，发音正确。她真知日语ê “khu-ma”，为啥物thiau故意用台语讲两pái “hîm” neh？
清文夫妇疼gín-á，用完全ê日本式教育来培养，有机会就严格注意来教，努力beh hō͘ 她习惯讲日语。M̄-koh，陈家hiah-ni̍h大，日本人kan-taⁿ安子一人，gín-á惯势讲台语是不得已ê。
「Chit-ê gín-á有小khóa狡怪。Bē晓to̍h无话讲，明明会晓，应该ài有gín-á款，直直讲出来chiah好。」
清文因为清子ê固执感觉无欢喜；其实第一是因为家己ê狡怪破坏gín-á ê快乐，所以后悔来厌气。
「Koh chit-ê gín-á bē ài kah人竞争。一般gín-á看tio̍h chhit-thô物，就会tiô óa来，kám m̄是？老父是无受欢迎ê，kám讲已经teh hô͘ng弃嫌ā？」
「Kám án-ne？你siuⁿ过疼伊，chiah成惯势。Gín-á有一大堆chhit-thô物mā会厌。Iáu有一点，咱ê教育方针若无放松，可能无好。Tòa tī chit-ê家庭，无beh hō͘ 她染kóa台湾ê风俗语言，mā是无理。」
「环境条件是án-ne，所以教育实在无简单。因为我tī外口注意bē-tio̍h细节，你日常kám有tú-tio̍h啥物困难？」
「昨hng是节日，我ài她穿长手ńg ê和服，m̄-koh，她无ài；m̄听话to̍h是lah。」
「Káⁿ是惊人笑，惊人kā她戏弄。」
「无no͘h，大家mā lóng o-ló她真súi，koh欣羡她，m̄-koh，她本人无sáⁿ欢喜。我想一定是tī chit-ê家庭kan-taⁿ她一人kah大家无仝，她会感觉无趣味。」
「这是你ê神经质。若án-ne，勉强她接受日本式教育ê tāi-chì mā tio̍h重新考虑。」
「横直她chiah五岁niâ，她会希望kah其他gín-á仝款穿台湾衫，讲台湾话。等她大汉了后，自然会发觉家己ê境遇。目前采用放任主义，顺她所ài khah好，kám m̄是？」
清文恬恬同意in bo͘ ê意见。听了tú-chiah ê话，soah禁bē-tiâu微微á笑。用日本式教育来培养cha-bó͘-kiáⁿ，m̄是出tī义务，是自发性kā它当做原则。M̄-koh因为án-ne，若hō͘ cha-bó͘-kiáⁿ 对台湾ê人情、风俗、语言完全轻视、讨厌，家己kám会欢喜满足leh？因为比起一切ê理论、思想、伦理，民族ê血统是koh khah微妙，koh有决定性。
M̄-koh，安子ê报告并无完全真实。清子模仿其他gín-á ê风俗习惯，并无相信he是好ê；她kah-ná感觉若无表现kah in同化，就bē-tàng防卫家己。当然清子iáu细汉，无亲像大人有明确ê意识，安子昨hng tùi清子ê反应有感受tio̍h chit种ê印象，心内有小khóa黯然ê感觉。
昨hng是女儿节(译注：三月初三)，安子hō͘ 清子穿长手ńg ê和服，缚phòng-koân鼓形ê腰带，穿有配铃á ê木屐，se̍h ta̍k人ê房间。
蝴蝶不及锦锈妆
桃花不竞美粧儿
阿公阿山写chit-ê对句hō͘ 她，阿妈阿娇hō͘ 她十圆ê红包。Ta̍k人lóng o-ló她「khah súi」á是「心适」。总是，清子本人并无欢喜，面àu-tu̍h-tu̍h。她大概是感觉án-ne hō͘ 人chhōa teh四界se̍h，kah-ná是teh hō͘ 人看傀儡leh。
下晡，安子招待其他gín-á朋友来庆祝，因为是三月ê女儿节，应当kan-taⁿ邀请cha-bó͘ gín-á，m̄-koh，清子强强beh请瑞文ê长男阿明。因为若án-ne会无公平，所以mā有邀请景文ê cha-po͘-kiáⁿ。
客厅装饰摆设人形尪á ê架á前，真大阵ê gín-á聚集tī hia。安子准备好食物kah糖á招待大家，请in kah清子相好，m̄-thang kā她排斥；因为根据cha-bó͘-kán-á阿英ê报告，gín-á伴teh耍ê时无ài清子加入。照丈夫清文ê方针，án-ne ē-tàng kah周围ê影响隔离，hō͘ 她有独立ê理想教育，m̄-koh，安子感觉bē-sái kā gín-á ê灵魂缚tiàm树木。 Gín-á食饱了后就开始游戏，安子建议一人表演一项。Gín-á ê才艺只不过是讲故事kah唱歌。
「白色ê底，染tio̍h红色ê圆日头」(译注：日本ê国旗歌)第一个唱ê是景文ê cha-bó͘-kiáⁿ美圆，她chiah读公学校一年，发音小khóa怪怪。M̄知siáng感觉好笑soah笑出来，美圆pháiⁿ势kah面红kòng-kòng，就停止，无koh唱。
「大家lóng teh笑我，我无ài唱à lah！」
「无lah！是美圆唱了真好，有心适chiah teh笑。好lah！Koh再唱一遍！」
安子kā她安慰，m̄-koh，gín-á张起来，无ài唱。总是，想tio̍h需要完成任务，美圆用gín-á认真ê态度，换用台湾话讲《无bó͘ 无猴》ê台湾故事。
「Bē-sái lah，讲故事a̍是唱歌lóng tio̍h用国语(译注：指日本话) lah。」
Tùi边á插话ê是三房ê是长男阿明。阿明mā是一年生，m̄-koh m̄是公学校，是日本人ê小学校。当时真无简单chiah实施日台共学制度，虽然讲是共学，其实台湾人tī一班内kan-taⁿ有两三人，所以被选ê少数台湾人lóng是优秀ê gín-á。阿明mā是头脑好ê gín-á，入日本人ê小学校，m̄-nā无感觉不便，而且所bat ê汉字比其他ê gín-á加十倍chē，写毛笔字连大人都不及伊ê笔势。Koh因为伊ê父母瑞文kah春莺lóng是真平凡ê人，所以in kiáⁿ ê优秀出群koh khah替in显明光彩。
「Oeh，阿明，无用国语(译注：指日本话)是án怎讲bē-sái？」
二房ê长男景仁随时kā伊反驳。伊是公学校ê三年生，是chit阵gín-á中间年级siōng-koân ê。伊像(sêng)老母，目chiu圆liàn-liàn koh五官四正，m̄-koh有淡薄á轻浮，看bē起别ê gín-á。Chit-má伊对阿明ê话表示异议，并m̄是真正beh维护小妹ê认真态度，只不过是thiau故意beh耻笑人而已。
「比勉强用发音奇怪ê国语(译注：指日本话)讲，用家己ê话来讲，kám无khah好？」
「M̄-koh，学校ê老师讲，tio̍h用国语(译注：指日本话) ā。」
「Hngh，假gâu。Án-ne chit-ê bē晓国语(译注：指日本话) ê细汉ê，beh án怎？」
「Bē晓ê人无话讲，m̄-koh已经入学ê美圆已经是一年生ā。」
「Khi-sa-mah(译注：日语叫对方侮辱ê话，华语ê「你妈的」)！臭屁gín-á！咱tī学校讲一句台湾话to̍h hō͘ 老师骂，tńg来家己ê厝koh bē-sái随便讲，he是啥物意思？Βa-kah-iá-ló͘ (译注：日语ê「马鹿野郎」，华语ê「混蛋」)！」
景仁靠势伊年纪大，án-ne吓(hat)阿明，m̄-koh，阿明mā无teh认输。
「骂人ba-kah-iá-ló͘就是ba-kah-iá-ló͘ lah。」
「Ba-kah-iá-ló͘父母所生ê就是ba-kah-iá-ló͘ lah。」
阿明认真teh对抗，m̄-koh，景仁半趣味teh kā伊凌治。「Mài lah，bē-sái讲pháiⁿ话。」安子温柔kā in制止，m̄-koh in m̄听，继续冤家落去。Ba-kah-iá-ló͘ ê骂语，除了是骂人ê pháiⁿ话以外，mā有一种新奇ê感觉。Án-ne对阿明来讲，听起来比用台湾话骂in父母koh khah hō͘ 伊感觉刺凿(chhì-chha̍k)。
「阮父母lóng m̄是ba-kah-iá-ló͘。好lah！我beh来tâu阮老父，讲你骂人！」
「我m̄惊，lín老父tiāⁿ-tiāⁿ去hiah远ê庄脚，今á日无tī-.leh。」
「伊liâm-piⁿ会tńg来。」
「伊又koh会去hō͘ 蛇咬tio̍h tńg来ho͘ⁿh？Koh再讲，chit pái ê蛇是koh khah恐怖ê女蛇，这是阮老父讲ê。所以讲伊是ba-kah-iá-ló͘ lah。」
Chit时，安子激烈kā in责备。
「讲啥物ah？Mài koh冤家ā lah。不管用国语(译注：指日本话) á是台语lóng无要紧，m̄-koh bē-sái讲“khi-sa-mah” kah “ba-kah-iá-ló͘ ”。」
真意外去hō͘ 安子阿姆严格责备，景仁kah阿明就án-ne kiu-kah m̄敢出声。安子忽然显出严格ê态度，m̄是kan-taⁿ针对gín-á讲pháiⁿ话，同时也tùi景仁ê话听出某种信息。少年人ê中伤m̄-nā是án-ne niā-niā，有透露某种意函tī-.leh。Kám讲瑞文tī庄脚kah cha-bó͘人有发生关系？两年前hō͘ 蛇咬tio̍h ê灾难了后，瑞文一时身体无好，无tāi-chì讨tāi-chì做，无gōa久又koh再去庄脚，最近koh khah捷去，超过程度ê chia̍p。伊ê理由第一是讲beh管理家己ê土地，二来mā讲是为tio̍h健康。大家ē-tàng理解，mā替伊欢喜有好ê倾向。M̄-koh，最近tùi in bó͘春莺ê面所显出无精神ê款式，安子感觉有啥物不妙ê tāi-chì发生à。Kah tú-chiah景仁显然是tùi in老父hia偷听来ê话合起来想，ē-tàng想像hit内面有新ê秘密tī-.leh。M̄-koh实际上，到taⁿ iáu m̄-bat听过有关瑞文ê丑（chhiú）闻，koh再讲，mā无人想会到，tī原住民tòa ê偏僻所在会发生ài重视ê痴情关系。
细汉gín-á ê讲故事kah唱歌，照顺序继续进行。阿明siōng gâu讲《月姑娘》(译注：日本siōng古早ê童话故事)，安子phah-pho̍k-á kā伊o-ló ê时，忽然看tio̍h阿明天真无邪ê面，她soah koh再致意in老父ê tāi-chì。安子想讲她chit-má对瑞文已经无抱tio̍h小叔á以上ê感情，m̄-koh，想tio̍h in bó͘以外伊koh有别ê cha-bó͘，安子就感觉kah-ná清清ê水泉hō͘ 人lā kah浊浊，真无ài。她希望瑞文时时lóng清气；he是安子奇妙ê感伤。
Taⁿ轮到清子ê表演。
「猫(Bâ )á猫á，猫á猫á。」
大家phah-pho̍k-á koh án-ne hoah，来催清子。「来唱上帝ê kiáⁿ耶稣！」安子讲了，就行向钢琴beh伴奏。M̄-koh，前奏弹了，清子iáu无想beh唱。
「Ai-ah！是án怎leh？大家为tio̍h你做hiah chē心适ê tāi-chì，清子，你mā tio̍h唱一条歌ah！」 安子án-ne讲，清子iáu是面臭臭无beh出声。她已经khiā起来，又koh坐落去。不管安子án怎kā她骗koh kā她拐，清子lóng无beh tín动，安子非常困扰。
阿明就讲：「阿姆，是阮大家m̄好，因为阮讲pháiⁿ话lah。」
「啥物pháiⁿ话？」
「阮讲：猫á猫á，猫á猫á。清子就受气lah。」 阿明 kā嘴kek尖尖，巡视大家。Gín-á teh向清子讲「猫á猫á，猫á猫á」ê时chūn，安子感觉是听起来真奇怪ê台湾话，m̄-koh想讲大概是爱ê称呼。
「阿明，猫á猫á是啥物意思？」
「我mā m̄知。M̄-koh，kah-ná m̄是好话。」
安子koh问景仁，景仁露出pháiⁿ势ê面。
「我mā m̄知。」
「M̄-koh，pháiⁿ话to̍h是pháiⁿ话ho͘ⁿh？。」
「大家kan-taⁿ án-ne讲，意思我lóng m̄知。」
景仁kek出为难ê面，表示伊m̄知意思。总是，he若真正是pháiⁿ话，追求到底，知影意思mā无啥物好处。后来，安子chiah知影猫á猫á，猫á猫á to̍h是原住民kah台湾人所生ê gín-á，是kah一般teh骂杂种仝款ê pháiⁿ话。虽然gín-á m̄知意思chiah án-ne讲，m̄是亲密ê称呼。总是，所以hō͘ 人án-ne讲ê当事人清子无欢喜，安子ē-tàng了解。
准讲清子有改变想法，安子mā无ài koh叫她唱歌。清子是台日lām（混）血，所以hō͘ 大家疏远ê事实，安子知影。Taⁿ亲目看tio̍h她hō͘ 人歧视kah欺负，安子心内非常艰苦，soah忧头结面起来。M̄-koh，tùi她心底chhèng起来ê受屈辱ê感受，随时to̍h陷落去tī无奈、寂寞kah看破ê路糊糜(lō͘-kô͘-môe)窟；这是她家己造成ê。她绝对无后悔kah清文结婚，mā无应该后悔。M̄-koh，两人生出来ê gín-á，bē-tàng讲是幸福ê。Kah-ná是灵魂tòa痣(kì)来出世，mā ē-sái讲痣hiah细粒无要紧，m̄-koh，hit粒痣一生lóng无法度消失mā是事实。尤其koh khah惨ê是痣会tòe年纪来变化，有可能会变koh khah大mā无一定。困扰koh可怜ê清子因为án-ne，就无koh表演才艺，老母暗淡ê心情自然流露出来。Ta̍k-ê gín-á感觉节目停顿，场面忽然冷静起来，才艺表演kah-ná to̍h beh结束ê款。
「我来表演一个趣味ê把戏hō͘ 大家看。」
景仁自我推荐án-ne讲，有想beh hō͘ 冷场koh闹热起来ê大人气慨ê聪明做法；其实一开始，伊to̍h眞想beh表演伊ê才艺。
景仁tùi学生服ê lak袋á the̍h出一粒玻璃珠á，伊用大头拇kah二(jī )指nih-teh hō͘ 大家看，chiah khǹg入去嘴内。Koh kek kah-ná kā它吞落去腹肚底ê款式，ku-lu-ku-lu tín动咙喉，最后显出已经吞落去ê款，tńg-se̍h目chiu 仁，吐一下大气hō͘ 大家看。Ná亲像是tùi街路艺人学来ê功夫，演技非常熟练。然后伊koh kā嘴peh kah开开开。Gín-á相信玻璃珠á已经吞入去腹肚内，用不可思议ê表情一直teh看伊ê大嘴孔。Teh看ê中间，景仁ê手做出tùi手ńg liàm ê动作，玻璃珠á就出现tī伊正手ê手心。Gín-á感动，讲眞正不可思议，koh惊kah gāng去，kah嘴á开开，随时koh phah pho̍k-á，欢喜kah chhia̍k-chhia̍k-tiô，要求景仁koh表演一pái。
景仁beh koh表演ê时，gín-á请伊表演别ê手艺。Chit pái景仁kā一个空碗khǹg-tiám桌顶khap-.leh，kā一个铜钱á hē入去，koh讲请大家注意看，铜钱á会变无去。大家恬落来，注目看hit块碗公。景仁手hōaⁿ碗公，面向阿明吐嘴舌，一面得意洋洋án-ne讲：「Án怎？Kah你ê《月姑娘》故事比起来，我ê变把戏(魔术) khah趣味ā ho͘ⁿh？你无论án怎gâu读册，mā无可能表演kah chiah-ni̍h gâu。」
「小等leh！」
Bē堪得忍受ê阿明án-ne叫讲。Chit-ê小魔术师吸引大家ê注意力，hō͘ 伊嫉妒kah挡bē-tiâu。
阿明m̄知啥物原因对大房ê生活发生趣味，伊kah意阿姆安子kah叔伯小妹，伊mā有听讲以前老父瑞文tiāⁿ-tiāⁿ来访问chit家伙。Tāi-chì ê真相是伊无法度判断ê，m̄-koh听tio̍h chiah-ê tāi-chì，hō͘ 伊感觉对大房ê人有一种特别深ê缘份。可爱ê清子hō͘ 其他ê gín-á疏远，伊用同情ê眼光teh看；hō͘ 人欺负á是无人ài kah她chhit-thô ê时，伊总是会来为chit-ê叔伯小妹。Tī hiah-ni̍h大ê陈家内面，伊感觉kan-taⁿ伊teh保护清子，伊也掠chit-ê做骄傲；伊真珍惜chit件tāi-chì。
所以，chit-má景仁tī安子kah清子面前有优越ê表现，伊to̍h bē-tàng忍受。其他ê gín-á真容易hō͘ 景仁ê变魔术迷惑，只有阿明用全精神真认真teh观察伊变把戏ê手法，想beh chhōe出景仁变魔术ê机密。
「景仁，hit内底ê铜钱á kám一定会无去？」
「若你来变，无法度变无去lah。」
「M̄-koh，景仁，你kám一定会kā它变无去hō͘ 大家看？」
「Ai-ah！若有失误，我hō͘ 你斩头。若完成，你beh án怎？你beh hō͘ 我啥物物件？」
「Hō͘ 你钱，我身躯有四个五钱ê铜钱á。」
阿明hō͘ 伊ê五钱取代tú-chiah ê一钱，景仁kā伊khǹg入去碗公内底。然后phah开一看，tú-chiah确实tī hia ê铜钱á变无去à。大家当teh惊kah gāng去ê时，钱tùi景仁ê lak袋á出来。阿明挡bē-tiâu koh the̍h出一个五钱ê铜钱á，叫景仁koh表演一pái。仝款ê手法仝款成功。阿明渐渐起懊恼，用伊全部ê钱kā in试了了为止。
安子当teh想讲无赶紧制止chit件事bē-sái ê时，阿明重要ê sai-khia钱全部去hông绞了了à。景仁ê手艺技巧，安子家己mā看kah真感慨。真m̄好ê tāi-chì！变把戏ê手艺一般是属khah下阶层ê物件，无适合纯真ê gín-á来耍。尤其是kā它当做poa̍h-kiáu来耍，koh khah无适当；安子渐渐讨厌起来。她忽然感觉tio̍h景仁有in老父ê seng-lí人手腕；血统iáu是无法度否定ê。
另外一方面，阿明真懊恼koh见笑，kiōng-beh哭出来，iáu-koh想beh倔强继续抵抗。
「奸诈，奸诈，你是贼á！」
「我beh kā你phah oh。咱，kám m̄是约束好ê？Ná会讲是贼á？你chit-má m̄甘输钱，哭mā无路用。」
「我m̄是m̄甘钱输去，你奸诈lah，hit款把戏siáng mā会晓。藏玻璃珠á我mā会晓。」
「Hngh，án-ne好，变来看māi leh。」
阿明无beh听安子ê阻止，kā景仁the̍h hō͘ 伊ê玻璃珠á khǹg入去嘴内。碗公ê变把戏，阿明án怎都想bē晓，m̄-koh，伊想讲玻璃珠á一定是藏tī嘴舌下脚。伊照景仁ê表演方法，假讲kā玻璃珠á吞落去ê动作，了后kā嘴peh开，玻璃珠á tī嘴舌下脚看无ā。细汉gín-á讲：「Ah！阿明mā会晓。」Gín-á koh一pái惊惶，m̄-koh，同时也有失望ê款，因为景仁带hō͘ in ê惊异感减半去à。Hit时，阿明顾tiâu面子，m̄-koh，hō͘ 伊料想bē到ê是景仁讲：
「免假仙lah，kám m̄是iáu tī-leh？你看，嘴舌下脚露出玻璃珠á。」 景仁微微á笑，kā伊挑出毛病。阿明惊一tiô，赶紧努力kā玻璃珠á tī嘴舌下脚藏hō͘ 好势；若马脚sô出来就会hông笑，所以伊拚命努力kah面红kòng-kòng。
「真好笑，kah-ná hō͘ 医生挽嘴齿ê面，你看，看tio̍h à，看tio̍h à！」
景仁tiàm边á thiau故意kā伊为难耻笑。玻璃珠á滑溜溜，kiōng-beh tùi嘴里溜出来，阿明想beh kā它阻止mài溜出来，嘴舌尖一直teh tín动，已经无啥物撇步à。如果tī众人面前，尤其是阿姆kah清子面前漏气，伊宁可去死。伊kā心掠坦横，目chiu nih起来，chit pái真正kā玻璃珠á吞落去咙喉内底。
Chit-má m̄是teh变把戏ā，玻璃珠á塞tī咙喉，阿明起艰苦。安子惊一tiô走óa去，kā伊ê头chhi̍h向下脚，phah伊ê kha脊phiaⁿ，大舞一场；结局hit粒玻璃珠á隔早起tùi伊ê裤脚溜出来。
清子khiā-.leh，目chiu全目屎，手the̍h茶瓯(au)，受气ê面直看向景仁。安子看tio̍h，惊若hō͘ 她kā茶瓯掷去，就tāi-chì大条ā。安子kā它抢起来ê 时，清子忽然大声哮出来。她的确眞m̄愿，mo̍͘ h tī老母ê手，哮kah眞thiám。比起对欺负人ê景仁ê怨恨，清子koh khah可怜hō͘ 人欺负ê阿明 hit种迫切心情，hō͘ 安子心酸痛。
清子一直担心阿明ê tāi-chì，问老母讲伊m̄知会破病bē？会死去bē？看会出她是不止á烦恼。Hit暗半暝，清子káⁿ是眠梦醒起来，mā问讲：
「阿母，阿明ê腹肚会痛bē？」
「无问题lah，玻璃珠á已经kah大便tàu阵放出来à，免烦恼，好好á困。」
「真正ho͘ⁿh ？」
心底真正安心ê款，清子露出微微á ê笑容。安子感觉gín-á真可爱，结果开嘴问一个无需要问ê问题：
「清子，你有kah意阿明无？」
「真kah意。」
「为啥物kah意伊？」
「我beh做阿明ê新娘lah。」
安子笑出来。
「Ah，是啥人讲ê？」
「阿明讲ê。」
老父醒起来。
「Oeh，半暝á teh讲啥物tāi-chì？」
「Chit-ê gín-á iáu-teh担心玻璃珠á ê tāi-chì，我teh kā她讲无问题，免烦恼。」
「真趣味ê gín-á，án怎会hiah-ni̍h kah意阿明neh？」
「她讲beh做阿明ê新娘。」
「原来是án-ne oh。」
清文ná hah-hì，无意无意án-ne讲。伊不管有趣味á是无趣味，伊khah爱困。
「Eh，你想chit-ê gín-á ê未来翁婿是啥物款ê人？」
「讲kah kah-ná阿明明á载to̍h beh相亲ê款。」
「M̄-koh，我感觉奇怪，beh成做chit-ê gín-á ê丈夫ê人；oh，bē-sái讲是人，chit-má iáu是gín-á；已经定tio̍h存在tī世界ê某所在。」
「有啥物thang好奇怪ê？只要她m̄是beh kah比她少五岁ê人结婚，to̍h无啥物好奇怪ê。Eh，清子，你bē嫁一个比你少五岁ê新郎，kám m̄是？Ai-ah！Koh困去à，真紧。」
「你kah我ê婚姻，tī咱出世以前to̍h由神kā咱决定ā；án-ne想起来，世界上ê tāi-chì无一项是偶然ê，lóng是必然ê。」
「瑞文爱慕一个原住民cha-bó͘ gín-á mā是必然ê。」
「这m̄是hō͘ 人会感动ê必然，m̄-koh，瑞文ê脑筋有小khóa糊涂，伊何必tio̍h去迷恋一个原住民cha-bó͘ gín-á leh？实在有够糊涂。」
下晡，阿明kā玻璃珠á吞落去ê时，安子感觉家己siuⁿ过大意，就去kā春莺会失礼。春莺为tio̍h kiáⁿ ê事iáu不如为tio̍h丈夫ê事hiah-ni̍h心cha̍t-cha̍t。何况阿明并无感觉身体有啥bē爽快，所以in ê话题自然to̍h tùi瑞文ê tāi-chì谈起。春莺终其尾讲出实情，向安子透露心中ê痛苦，因此安子明了瑞文kah hit-ê女子ê tāi-chì是事实。M̄-koh，对方是hit种ê cha-bó͘人，mài讲是春莺，就是安子mā无法度想像he是事实。 Hit暗，安子随kā清文讲chit项tāi-chì，清文mā是第一pái听tio̍h，感觉非常意外。对安子来讲，koh有一个意外，就是丈夫并无她所料想ê hiah-ni̍h愤慨。伊以前对无道德ê tāi-chì lóng有强烈ê正义感kah严格ê批判，chit-má soah变kah hiah温柔koh宽容。Hit种态度hō͘ 安子感觉不满，她认为chit项tāi-chì真严重，心内感觉愤慨，她ǹg望丈夫ê反应mā kah她仝款认真。
「你kám知影是啥物款ê女子？瑞文hō͘ 蛇咬tio̍h ê时，你赶去到hia，所以你bat看过，应该知影。」
「我看bē出她是原住民。」
「若无，kám会是台湾人？」
「Kah-ná有外国人ê混血。」
「He是你ê亲小弟ê问题，你soah kā它滚笑teh讲。」
「我m̄是teh滚笑。」
「Án-ne讲起来，hit-ê女子是青目红毛loh？」
「虽然m̄是án-ne，m̄-koh，hit山顶ê原住民有西洋人ê血统，比死海ê水流入去地中海koh khah有可能。你也知早前台湾bat hō͘ 荷兰人统治过，到郑成功ê时代，一kóa荷兰人逃入去深山内。前无gōa久，瑞文the̍h一块荷兰ê瓷á来hō͘ 我看，听讲是tùi hit-ê部落来ê。这相当引起人对考古学ê兴趣。」
不管清文án怎讲kah hiah-ni̍h趣味，安子kan-taⁿ感觉伊ê讲法真奇怪，而且她感觉是清文为tio̍h beh hō͘ 她讨厌hit-ê原住民cha-bó͘ ，chiah thiau故意kā tāi-chì讲kah hiah-ni̍h好听。
「你讲kah hiah-ni̍h lo-man-tih- khuh (romantic)，m̄-koh以现实问题来讲，到底tio̍h án怎chiah好？瑞文mā真头痛。」
「你to也真关心，kah-ná咱ê清子teh关心阿明吞玻璃珠á仝款。」 Hō͘ 清文án-ne一讲，安子感觉kah-ná去kha̍p-tio̍h她内心ê痛。她对瑞文好回忆ê感伤ê影，iáu留tī心中ê一角。她知影chit点hō͘ 清文看破，所以清文对小弟瑞文所发生ê tāi-chì，thiau故意kek做无teh关心，á是用冷笑来反应。
「M̄-koh，án-ne春莺真可怜，她讲最近kah瑞文ê感情chiah有khah好淡薄á，hō͘ 她感觉真欢喜。你看有啥物好ê解决办法无？你去hit-ê庄脚行一chōa，详细kā它调查一下。」
「我来去看māi mā好，hoān势ē-tàng the̍h一kóa趣味ê古董tńg来mā无一定。M̄-koh，瑞文实在有够戆大呆。」 清文án-ne回答。Chit种讲法若准讲是为tio̍h小弟，不如讲是为tio̍h收藏古董。安子想beh koh kah清文参详tāi-chì，m̄-koh，伊soah改变话题。
「讲tio̍h lo-man-tih-khuh，hit-ê原住民cha-bó͘ 有可能是基督徒；如果她有西洋人ê血统，至少她ê祖先是基督徒。因为当时荷兰ê宣教师深入山地努力教化ê结果，bē少原住民信基督教。He hoān he，tī hia ê野蛮人中发见tio̍h上主ê话，会hō͘ 人感觉真lo-man-tih-khuh，kám m̄是？其实瑞文hō͘ 我ê荷兰盘á ê内面有写圣经节，hiah-ê拉丁文有小khóa磨损，所以真pháiⁿ判读，我真无简单chiah解读出来，是箴言ê经节：上主创造万物各有所用。有趣味ho͘ⁿh？」
清文得tio̍h chit块有特别故事ê盘á，的确hō͘ 伊ê心欢喜tiô跳。因为tú-tio̍h思想问题所受ê痛苦，所以对社会ê生态kah人，伊tio̍h尽量目chiu放khah细蕊，kek无看tio̍h。伊颠倒开始提高对以前to̍h小khóa有ê古典美术兴趣，其中siōng意爱ê是瓷á，尤其是注重支那陶器ê研究kah收集。
「我手中有一kóa荷兰瓷盘， hiah-ni̍h显明ê蓝色釉药色彩，实在是真罕得看tio̍h。当然这是极早期ê Ti-hoe-lu-toh(译注：デフエルト=Delft Blue，如图：
)ê瓷á，to̍h是leh。Ah！已经一点à，kám m̄是？半暝iáu-teh讲啥物古董ê话，好来困ā lah！」
清文家己讲话koh家己phah断，然后kā荷兰瓷盘记载ê圣经节 “Universa propter semet ipsum operatus est Dominus”（译注：上主所造ê lóng合他ê路用；连pháiⁿ人mā是为tio̍h灾祸ê日来存在。=箴言16：4），当做床头ê祈祷，chhi-chhi-chhu̍h-chhu̍h teh念。了后就有轻轻ê困声，留安子孤独一人，眞久lóng困bē落眠。
