《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 夫妇 第十五章（更新版）
作者 庄司总一 着 杨东杰 指导 林俊育 台译 2017.06.25
两年中间，陈阵ê厝变成部落中siōng好额ê，原来chit-ê部落无够五十户，每户lóng真sàn-chhiah。
陈阵ê厝大改变。土角叠起来ê壁kah竹柱起ê简单厝á，外观无法度整修，照原，m̄-koh，内部已经吹入想bē到ê文明气息。Kah-ná鸟siū ê稻草床变成樟材ê床台，绸ê棉被顶面挂薄绵纱布ê蚊罩，镜台靠壁边，化妆台顶面排列bē输都市cha-bó͘ gín-á ê化妆品。一kha厝里本来to̍h有，旧ê张皮ê大衣箱，内底贮满真chē súi衫裤。
房间改变，cha-bó͘ gín-á mā改变。她ê皮肤变白，变芳。这是瑞文眞用心teh买白粉、红胭脂kah衣服hō͘ 她，kā她雕塑起来ê；tùi正面kā她看，kah-ná变一个人。M̄-koh，陈阵爱phah猎，赢过化妆kui十倍，所以离ē-tàng满足瑞文ê高尚容貌姿态iáu真远。
安子tùi二房ê长男景仁ê话鼻tio̍h秘密，知影瑞文是tī女儿桃á节ê前一日，来到chit ê部落。瑞文因为有特别ê tāi-chì ài参详，却无看tio̍h阿阵本人，伊就问in老母讲：
「Kám koh去山顶à？真无她法。她明明知影我今á日会来，kám m̄是？你mā tio̍h khah致意chiah tio̍h ā。」
「是lah，实在真pháiⁿ势。我tiāⁿ-tiāⁿ讲kah嘴酸，hit-ê siáu-cha-bó͘ lóng m̄听我ê话。四、五日前透早趁我iáu-teh困，枪带leh to̍h出去。Chit ê cheng-seⁿ！ 到昨暗lóng无tńg来。Chit pái我无beh放她soah，我beh kā枪抢来放火烧。大人ah，chit pái请你tio̍h赦免，今á日过昼一定会tńg来。」
「Bē相信得。你去山顶kā她chhōe tńg来。」
「Ai-ah，你ná会对我chit-ê老大人讲hiah无理ê话？Mài hiah-ni̍h急lah，eng暗tòa tiàm chia好lah。」
「我koh khah án怎mā无ài tòa chia，我讨厌chit间厝kah chit-ê部落。」
「这是án怎讲leh？ Kám讲你beh放sak chit-ê cha-bó͘ gín-á？」
「Chit件tāi-chì soah尾厝里ê人lóng知ā lah。总是，chìn前lóng无人发觉chiah是不可思议。M̄-koh一旦暴露，káⁿ会变khah麻烦。所以，今á日beh来kah阿婆参详一下」
瑞文tùi门口sòa接ê房内ê竹椅á探身出来；椅á顶chhū野猫ê皮。Chit间kah隔壁hit间充满粉味ê困房完全无仝款，一kóa phah猎得tio̍h ê物tún kah kui厝间，非常杂乱。壁顶挂熊皮，吊鹿角，阴暗ê壁角有lâ-lí ê标本，kah-ná beh慢慢á行出来ê款式。自然ta ê软皮kah制造标本产生ê臭hiàn味，hō͘ 瑞文感觉kiōng-beh吐。伊看tio̍h kui厝间lóng是野蛮无慈悲ê杀生，甚至想讲beh照tú-chiah阿阵ê老母ê话来弃sak阿阵。伊本来想beh kah阿阵ê老母参详，m̄-koh，伊忽然又koh kā家己挡起来。
我ná会对chit-ê无受教育ê cha-bó͘ gín-á迷kah án-ne leh？伊常常teh想，iáu是m̄知原因；hō͘ 人笑戆大呆、siáu-.ê，mā无办法，所以时常讨厌家己。假使hit当时无tú-tio̍h毒蛇，chit-má伊可能已经tī东京teh读大学à。Hit时，安子mā有劝伊改变心情，thang展开新ê生活，伊mā真想beh án-ne。M̄-koh，病好出院ā，身躯却iáu常常关节痛疼，情绪无好，到隔tńg年三月，可能iáu bē堪得去留学，所以to̍h无去东京，然后热天就又koh到à。有一工，伊带一支枪beh做伴手去庄脚。一支枪做救命ê谢礼实在是无够额，m̄-koh，对接tio̍h礼物ê阿阵来讲，kah-ná是天赐ê大礼物，欢喜kāh bē讲得。
听tio̍h chit项tāi-chì ê部落头甲长张忠，为瑞文举行一个欢迎会。因为tī chit-ê村里tú-tio̍h灾难ê瑞文koh健康tńg来访问，对村民来讲是好兆头。In就tī甲长厝前ê大埕跳舞，三十个左右穿kah súi-tang-tang ê姑娘，沿路唱歌，沿路手牵手跳舞。服装是台湾衫，m̄-koh，唱ê歌词kah伴舞ê音乐lóng是原住民庆祝丰收ê各种歌舞，显然in是平埔族。平埔族也就是平地番，早前kah tùi支那来ê移民接触做seng-lí，因为文化低，土地hō͘ 人夺去，生活范围soah缩小，渐渐去hō͘ 人同化，hông叫做台湾人，失去in固有ê风俗习惯kah语言。所以tī日本ê统治下，虽然有一视同仁ê制度，m̄-koh，平埔族犹原生活tī弱势者ê屈辱心态中。
因为chit-ê缘故，瑞文问起张忠ê祖先ê时，伊mā讲m̄知，无愿意去kha̍p-tio̍h hiah-ê故事。M̄-koh，瑞文ê疑问m̄是in祖先是m̄是生番，伊是想beh知影in kám有外国人ê血统。Hiah-ê老人以外，少年cha-bó͘ gín-á ê面貌to̍h hō͘ 人有hit种外国血统ê感觉。In hō͘ 强力ê日头曝，皮肤虽然bē-tàng讲是白色，m̄-koh，曝了是淡薄á小麦色。跳舞ê cha-bó͘ gín-á中间to̍h有一个真显然是红头毛。Koh再讲，原住民一般lóng是疏(se)毛，m̄-koh，瑞文bat tī chit-ê部落内看tio̍h一个胡须koh脚腿全全毛ê青年，而且面形ê线条真清楚。M̄-koh，甲长张忠断然否定，讲in根本都无外国人ê血统。因为无啥物证据，瑞文只有tìm头bē-tàng讲啥。此后瑞文常常来chit-ê部落，iáu是对chit-ê问题抱tio̍h疑问，设法beh来chhōe出证据，伊就去附近几个部落进行调查。瑞文只要付十钱ê铜钱á，就ē-tàng自由出入任何一间厝，随便chhiau-péng in ê家财用具。十钱ê入场观览费in to̍h感觉真chē，可见每一家ê日常用品lóng真欠缺koh粗俗，像讲大支ê葫芦瓠(hia)-á，粗胚ê水瓮，老旧ê弓箭等等。有一工，瑞文tùi一个原住民ê厝发现一块荷兰瓷盘，盘底有kah-ná是外国文字，瑞文根本to̍h m̄知he是啥物字，啥物意思。因为伊惊hō͘ 人发觉伊来庄脚ê行踏，一直m̄敢kā chit-ê瓷á交hō͘ 清文去调查，而且mā显然无法度用chit块瓷á来证明in kah外国人ê血统有关联。因为早前荷兰人传教师准讲有来过chia ê历史事实，koh in确实bat来到chit-ê偏僻ê所在努力宣教。总是，荷兰人kah原住民通婚ê情形iáu是无清楚。M̄-koh无gōa久，瑞文to̍h有机会掠tio̍h证据。有一工，阿阵tùi附近部落ê厝the̍h来一个文件箱。He是一个外表张牛皮，真结实ê盒á，漆红色ê漆，tùi la̍k漆ê所在露出文字。为tio̍h mài去伤tio̍h皮面，用小刀kā漆khau掉，发见有用毛笔记载下面ê字：
顺天命结婚 1668年复活节
Martin Beets 陈麻木 婴莫
郑成功带领大军攻入台南，取得Phu-lo-bin-jia城(译注：普罗民遮城=Provintia，今台南赤崁楼)，攻陷Je-lan-ji-a城 (译注：热兰遮城=Fort Zeelandia，今台南安平古堡)，kā荷兰人tùi台湾赶出去；he是明朝永历十五年 (1661年) ê tāi-chì。Hit当时差不多全部ê荷兰人，lóng退去Ba-ta-bi-ah(译注：巴达维亚Batavia，印尼雅加达ê旧名)。M̄-koh有一kóa失去撤退ê机会，á是热爱台湾chit块土地，无愿意离开ê，就入去山内避难，soah定居落来；ē-tàng想像hit种不得已ê情形。Chit-ê文件箱顶面记载ê年号ē-tàng证明chit-ê历史事实。陈麻木是“Martin Beets” ê汉字名，邹族语ê数字「五」发音是 “e-i-moh”，án-ne kā它推测起来，「婴莫」ē-sái讲是女原住民ê名。
由此可见，chiah-ê原住民有白人血统是明确ê，m̄-koh，m̄知hit当时逃来到chia ê荷兰人有gōa chē。若用常识来判断，人数可能m̄是真chē，而且因为in kah台湾人已经有teh通婚，经过二世纪半ê今á日，in所接受tio̍h ê西欧人ê血，ē-sái讲ná亲像是大海中ê一滴水。其实in对家己ê族谱系统完全m̄知，m̄是in故意隐瞒，是因为in无文字，kan-taⁿ靠单纯ê语言，致使in变成蒙雾不知，七、八代以前祖先ê tāi-chì，lóng bē记得了了à。
M̄-koh，对历史小khóa有关心ê人来讲，这确实是一个真有趣味ê发现，ē-tàng刺激in ê研究心，而且恐惊án-ne iáu未满足，会koh想beh探求koh khah有力ê历史资料，亲像文书kah器物，koh进一步去调查风俗习惯kah口传历史，驱动探究事实ê欲望。M̄-koh，瑞文ê探究欲望kan-taⁿ到chia为止；tùi荷兰人kah原住民通婚ê事实来讲，阿阵ê身上有白人ê血统，准讲kan-taⁿ大海中ê一滴水mā好，瑞文只要知影chit件tāi-chì，án-ne就有够额à。Chit-ê秘密ê tāi-chì增加瑞文ê情绪快乐感；金屋藏娇ê秘密绝对bē-sái漏泄，同时chit-ê第二秘密ê味mā无beh hō͘ 任何人鼻tio̍h。
当然chit种浪漫ê感受是tī无gōa久以后，也是确定hiah-ê原住民有红毛人ê血统以后ê tāi-chì。这hó͘ 瑞文tùi kah原住民女子发生关系ê屈辱感得tio̍h解救；伊致意血统ê问题是chit-ê目的。事实上，伊tú犯chit-ê过失ê时非常bē爽快，想讲无beh koh去hit-ê部落。因为第一，伊感觉kah hit-ê cha-bó͘ gín-á发生关系只不过是逢场做戏，而且mā是因为有lim酒ê关系。接受部落甲长欢迎会hit工，瑞文酒量无好，soah醉kah hō͘ 人扛去困，忽然醒起来ê时已经接近黄昏。伊自本并无beh tòa落来ê phah算，所以伊随时准备beh tńg去。M̄-koh到火车站有四里gōa路，到台车ê起站也有二里半路，若随出发，tī半路无gōa久就会天暗，而且koh惊路草无熟，会去tú-tio̍h危险ê tāi-chì，hō͘ 蛇咬tio̍h ê记忆犹新。所以瑞文就拜托甲长派两个勇壮ê少年村民kā伊护送，m̄-koh伊感觉hō͘ 两个siuⁿ过粗勇ê cha-po͘人来跟tòe，虽然ē-tàng壮胆。总是，颠倒感觉有khah bē安心。瑞文就拒绝叫人护送，kan-taⁿ叫阿阵牵水牛来行向归途。
晚霞消失，日落西山，厚厚ê云罩tiâu天空。雨期已经接近尾声，hit两三工连续好天，m̄-koh，天气容易变化，含水气ê hip热夜间空气，一屑á微风都无，kiōng-beh bē喘气。水牛踏tio̍h空虚ê蹄声，行kah phīⁿ-phēⁿ喘。
过一时á，in两人骑起lih牛ê kha脊phiaⁿ，阿阵骑tiàm头前，沿路phah水牛ê头，沿路hoah叫牛拚势走。
「Teh beh落雨ā，若ē-tàng赶到火车头to̍h好。」
「Bē按算得。」
「若落雨，你hit领súi衫to̍h会ak-tâm去。」
「我无要紧，像你hiah-ni̍h lám身ê人会感冒。都市ê好额人kám lóng kah你仝款lám身？」
「我并无lám身ā。」
「Lám身koh无胆。」
「若koh讲pháiⁿ话，我就beh kā你ê枪收回。」
「Ai-ah，khah忍耐一下。你若kā我ê枪the̍h tńg去，我就beh开枪phah你。」
「Mài heⁿh惊人。Oeh，雷公teh tân à neh？」
「Teh tân ā。」
「你无teh惊oh？你是虎豹母。你神经ná会hiah-ni̍h大条？」
「你问我hit-ê问题，我mā m̄知。Ai-ah，大人，你ná会hiah-ni̍h软chiáⁿ无胆？M̄-koh，我m̄-bat看过像你chit款hiah好ê cha-pō͘人。」
「你ê心胸真好，kám m̄是？」
「乌白讲，若án-ne乱讲，心神无定，会tùi牛顶跋落去o͘h。」
「无讲白贼lah，穿súi衫看起来to̍h无仝款。」
Hit工，阿阵照老母ê交带，穿hit领kan-taⁿ拜拜chiah穿ê薄桃á色人造丝ê衫裤，平常时thǹg赤脚，今á日也穿布鞋。虽然非常han-bān ê手路，她也有化妆，头毛koh梳kah真整齐，后壁也有结龟甲形ê发髻，顶面插一蕊黄栀á花。这是她siōng súi ê打扮，m̄-koh，瑞文想tio̍h厝里ê cha-bó͘-kán-á若有tāi-chì就会打扮kah比她chit-má koh khah súi。总是，阿阵chit-má看起来已经比平常时穿破旧衫裤khah影目chē loh。瑞文想讲她若穿都市teh时行ê盛装，一定会相当súi。
「若到寒天，你ê皮肤会变khah白，kám m̄是？」
「Eh，会小khóa白。讨厌，你chit-ê人，ná会问人chit种怪问题？」
「想beh hō͘ 你穿khah súi ê衫。」
「你若hiah-ni̍h亲切有心，后chōa来ê时，买枪籽hō͘ 我lah。无lah，m̄免lah，因为以后我ē-tàng去phah猎，我beh家己thàn钱来买。Hiah-ni̍h好ê枪来到我ê手中，kah-ná teh眠梦leh。M̄-koh，你ná会对我hiah亲切leh？」
「我kā你讲过几nā pái à，无啥物不可思议ê tāi-chì。这并m̄是答谢你对我ê救命之恩lah。」
「Kám án-ne？Á无，你koh去hō͘ 蛇咬一pái kám好？」阿阵无论án怎想，都想bē到讲会值得hiah大ê报酬；该感谢ê是她chiah tio̍h ā。她热切ǹg望想beh ài ê枪，hiah-ni̍h简单to̍h得tio̍h，这ē-sái讲是超自然ê tāi-chì。Tī街路边teh hō͘ 人拜ê土地公叫做「有求必应」，大家lóng去kā伊感谢。对阿阵来讲，chit位都市来ê好额人比土地公koh khah像神明。
担心落雨kah火车时间bē赴，所以若行到平坦ê路，阿阵就hō͘ 牛用走ê。水牛沉重ê脚步tī乌暗中赶路，m̄-bat骑过马á是牛ê瑞文，tī慢慢á koh摇动无稳ê牛kha脊phiaⁿ顶面，惊去 siak落来，心内不安。因为无啥物thang hōaⁿ，伊只好用手lám-tiâu阿阵ê腰。「你若惊sia̍k落去soah bē晓khiú牛尾！」阿阵kā伊khau洗讲，m̄-koh，瑞文lám她ê身躯，她并无挂意。阿阵ê手无khiú半项，m̄-koh，她ê身躯tòe牛ê摇动，非常调和，一屑á都无危险ê感觉。Ná亲像去hō͘ 蛇咬tio̍h mā无tāi-chì，瑞文感觉只要掠tiâu chit-ê cha-bó͘人，to̍h免烦恼跋落去。Hō͘ 龟壳花咬tio̍h ê时，tùi甘蔗园到部落，是chit-ê cha-bó͘人āiⁿ伊去ê。Hit时，她ê肩胛头坚实有力koh可靠。「Bē死lah！」她肯定án-ne讲，kah-ná宣言一般自信满满ê话；这tī chit-má想起来mā ē-tàng hō͘ 伊有安心ê感觉。
赶到车头已经teh beh九点，差几分钟无赴tio̍h车班。离尾班车tio̍h koh等一点半钟，而且koh teh落大雨，连车轴都kiōng-beh流去ê大雨。 两人tī车头hit条街ê亭á脚bih雨，对水牛来讲，这是siōng好无比ê淋浴。因为大雨泼到亭á脚ê内底面，瑞文kah阿阵就不得不退到店面ê门脚口。Hia tú好是料理店，店头垂挂鸭肉kah猪脚，tú入口ê所在就是料理台，传来油ê芳味kah炒面chhi-chhi chha̍h-chha̍h ê声。
腹肚iau koh需要等火车，两人就入去店内，因为楼脚lah-sap koh tâm-lok-lok，所以in就peh起lih二楼。
食面了后胃就khah烧lō，瑞文发现chit间店m̄是kan-taⁿ饮食ê店；壁顶挂一幅框玻璃ê上海美人ê挂图，内底房间传来弦á伴奏ê歌声kah淫秽ê笑声。瑞文m̄-bat来过chit款ê所在，一知影这是cha-bó͘间，心内就bē爽快起来。M̄-koh，外面落大雨bē-tàng出去。过一时á，一个cha-po͘人入来，讲beh chhōa in入去内底ê房间。瑞文kā伊拒绝，讲in是teh等火车，店内ê人看出瑞文是好额人，极力kā伊游说。瑞文感觉真ak-chak(ak-chak)，m̄-koh，也无法度抵抗hit-ê kô-kô缠ê cha-po͘人，心内虽然困惑，结局mā是kah阿阵tàu阵hō͘ 伊chhōa入去房间内。约十二尺四方ê狭房间内，光线暗淡，kan-taⁿ ē-tàng看tio̍h面模。过无一时á，粉抹kah ná壁hiah厚ê两个cha-bó͘人入来，一个phâng酒kah薰盘，另外一个揽弦á。然后in就开始唱歌；tú-chiah hit-ê cha-po͘人用拍板phah拍，一个cha-bó͘大声唱黄色ê歌，另外一个挨弦á。In bē晓调节音乐ê调，kan-taⁿ拚大声唱kah奏，狭狭ê房间kah-ná teh做风台hì-hè叫，hō͘ 人头壳痛koh起乌暗眩。阿阵kah-ná预感危害teh beh降临ê动物，感觉奇异koh恐怖，目chiu peh-kah大大蕊，挽tiâu身躯来做防卫。一曲了后，瑞文挡bē-tiâu，付了赏金就kā in赶出去。
火车ê时间iáu ē赴，m̄-koh，也tio̍h赶紧离开chia。总是，iáu有一项伤脑筋ê tāi-chì；chit-ê女子beh án怎chiah好leh？不管她是án怎野生ê勇敢cha-bó͘ gín-á，她ná会有法度tī chit-ê大风雨中赶四里路tńg去leh？准讲她无讲无愿意，瑞文mā bē堪得án-ne做。伤脑筋！伤脑筋！瑞文看tio̍h滴tī壁角眠床头ê雨水，心内一遍koh一遍án-ne teh挂虑。M̄-koh，困惑ê m̄是kan-taⁿ chiah-ê tāi-chì；忽然误入酒楼淫秽ê霉气，渐渐tī伊ê心中扩散起来。精神ê枝叶jú hō͘ 风摇动，肉体ê根jú坚固不动ê情形下，瑞文几nā pái想beh冲出去，m̄-koh，雨jú来jú大，风也jú来jú强。Kah-ná厝顶teh钉（tèng）钉ê雨声，hō͘ 伊ê心koh khah ak-chak起狂起来。尾班车进站ê声跟tòe风雨声微微á传来，然后火车起行ê水螺声响起。害ah，死loh！着急烦恼ê心情变成绝望ê看破。
「阿阵，咱无法度tńg去à，eng暗只好tòa-tiàm chia。来ah，koh来lim酒！」
瑞文hit暗ê经验无真爽快，有kah-ná第一pái kah妓女接触ê hit种无爽快、后悔kah幻灭ê感觉。女子真奇妙无感动，mā无表示反抗，也无进一步显露热情。真不可思议，tī原野无碍奔放ê形影，来到chit间酒楼soah完全消失去；kah-ná一只hō͘ 人at断翼ê鸟á，kiu-kiu无气力ê款。 期待落空，瑞文非常失望无奈，而且对方是无知koh下贱ê原住民女子，瑞文无法度美化家己ê愚戆行为，想讲以后无ài koh去hit-ê庄脚。总是，跟tòe时间ê消失，伊ê心koh去hō͘ 一种奇异ê力量吸引。伊感觉hit暗所发生ê，只不过是偶然koh无意义ê tāi-chì。Hit时，hit-ê女子一屑á 都无sêng hit-ê cha-bó͘ gín-á，真正ê她是另外一个。瑞文常常看hit-ê十字形ê孔嘴，想起她tùi孔嘴kā血吸出来，心中就涌出不可思议ê深koh亲密ê感情。伊kah春莺ê婚姻生活无完满，以及对安子失恋ê伤痕，一切伊tī人生上ê不如意，kah-ná lóng想beh tùi chit-ê孔嘴来得tio̍h安慰。伊常常对in bó͘讲：「若无hit pái ê受伤，chit-má我就bē án-ne kah她tī hia做伙。」见若án-ne讲ê时，春莺就相信丈夫ê爱情不移，听kah神神神。
就án-ne，瑞文ê脚koh去hō͘ 庄脚吸引去，此后伊kah阿阵ê中间变成真oh得切断ê关系。车头边hit间暗淡ê厝已经无koh hō͘ 伊幻灭ê感觉，结局mā无koh有hit暗ê想法。瑞文ê热情kah阿阵对伊ê反应自起头便无一致；伊经常ǹg望阿阵tio̍h kā面容kah穿插装饰hō͘ súi-súi，m̄-koh，阿阵lóng嫌麻烦，无teh致意。因为阿阵对phah猎装备比胭脂水粉khah kah意，瑞文买hō͘ 她ê mo͘-je-ru枪(译注：Mosel，德国制)，对她来讲是比玉á珠宝kah金手指koh khah贵重。她m̄是无ài súi，只是因为装饰打扮会减弱她对phah猎ê热情；她chit种对趣味ê热狂，瑞文实在也无她ê法度。瑞文虽然有两三pái陪她去山顶，m̄-koh，伊对phah猎lóng兴趣bē起来。瑞文ê脚siuⁿ过软弱，bē堪得行危险ê山野路，koh再讲，被射tio̍h ê花鹿á是羌á身躯全血，哀求ê两蕊目chiu teh睨，四脚phi̍h-phi̍h-chhoah，瑞文看tio̍h真不忍心。
「你实在是一个siáu cha-bó͘，phah猎，kám m̄是cha-po͘人ê tāi-chì？」
「我若生做cha-po͘ ê to̍h好à。」
「我拚命beh hō͘ 你妆súi-súi，变成温柔ê cha-bó͘ gín-á，你ná会 bē了解我ê心意leh？你若是lóng无beh听我ê话，我就无beh koh来你chia。」
「你siōng好mài koh来。」
「你到底对我是有án怎ê想法leh？ Kah意á是弃嫌？」
「Kah意lah，kah意lah。」
「Án-ne，你tio̍h听我ê话，mài koh杀生！」
「M̄是teh杀生lah，hit-ê可恶ê豹咬死阮老父，无论如何我tio̍h ài报仇lah。M̄-koh，可惜我生做cha-bó͘ ê；我bat两pái看tio̍h hit只豹，两pái lóng phah无tio̍h。」
阿阵无论是gōa野生，女人to̍h是女人，无男人一般ê体力。她无法度照家己所意爱ê án-ne，踏入去峻险ê山岳，枪ê瞄准mā iáu未正确。她tú-tio̍h hit只豹两pái；一pái是豹落来山谷lim溪水，另外一pái是她看tio̍h豹teh peh koân ê桧木树。她两pái lóng phah无tio̍h它了后，to̍h m̄-bat koh看tio̍h hit只豹。 若射tio̍h hit只豹来达成她ê愿望，to̍h ē-tàng停止使用枪à。瑞文ǹg望阿阵早一日来达成她ê宿望，m̄-koh，siōng重要ê是m̄知hit只豹tang时会koh再出现？
因为chit-ê女子性质ku怪，瑞文ê热情soah teh空转。起初瑞文掠准伊对chit-ê庄脚女子，用金钱ê力量就ē-tàng照她ê意思，m̄-koh，无phah算伊一屑á 都bē屈服。她用对待村里cha-po͘人仝款粗鲁ê言行来对待瑞文；有时真无掩盖，随时to̍h发泄感情；有时若想tio̍h，不管是m̄是放瑞文一人，就家己走去phah猎。Chit种无受束缚，放任ê心也有她ê吸引力，m̄-koh 她kah-ná一只oh饲ê动物，m̄知到tang时chiah饲会饱？瑞文感觉真遗憾。所以tī外人看起来是一幅爱欲图，实际上并m̄是án-ne，颠倒是欠缺肉体ê喜悦。瑞文想办法beh kā阿阵占做伊家己ê，为tio̍h beh达成目的，tio̍h先除去她ê野蛮性癖，m̄-koh，若继续hō͘ 她tòa-tiàm chit-ê山野，一定是无可能ê。
所以，瑞文开始想讲tio̍h ài来hō͘ 她吸收都市ê文明空气。事实上，因为周围种种tāi-chì ê变化，瑞文知影已经无可能继续tī庄脚kah她保持关系。
「阿婆，我今á日做最后ê决心，想来想去，我以后无办法koh来chit-ê庄脚。所以....。」
阿笑听了，感觉m̄-tio̍h，赶紧kā瑞文插话；她想讲chit-ê金库若去hō͘ 伊走去，tāi-chì to̍h大条à。
「无lah，大人，请你mài受气lah。Hit只m̄知报恩ê山猫若tńg来，chit pái我一定教hō͘ 她乖，你chiah kā我看māi leh。真害！她ā m̄去做日工，kan-taⁿ照家己所爱，我有法度过chit种安乐ê生活，lóng是大人ê致荫，我tio̍h大大kā你感谢，koh感激kah流目屎。总是，该吃罪ê siáu-cha-bó͘ 是….。无noh，我ê cha-bó͘-kiáⁿ mā 是心内真知影。她有感谢á是欢喜，m̄-koh因为iáu细汉，惊见笑，lóng bē晓好好á表达出来。她bē晓ho͘ cha-po͘人欢喜，iáu kah-ná幼chíⁿ ê鸡母，iáu真han-bān lah。M̄-koh，她对你是真热情，想讲已经是真正ê夫妻ā，听tio̍h你讲beh kā她放sak，她beh án怎哮閙，你kám知？」
「Oeh，oeh，请kā话听清楚。我是想beh kā阿阵娶tńg来台南ê厝做cha-bó͘-kán-á。阿婆，你bē反对chiah tio̍h ho͘ⁿh？」
阿笑oh得回答，kah-ná teh想。她原本是一个贪欲koh奸巧ê cha-bó͘人，m̄-koh，一旦运气若tháu，to̍h kah田庄人常有ê情形仝款，会得意忘形，陷落tī贪欲ê无底深坑。
「真感谢，m̄-koh，我tio̍h小考虑一下。」
「为啥物？」
「她出世tī山里，又koh是hit种怪癖，若去lín hiah大ê家庭，恐惊bē晓做khang-khòe。」
「M̄是kan-taⁿ做cha-bó͘-kán-á，chit种情形我免讲，你应该会知chiah tio̍h ā。」
「所以，我chiah tio̍h koh khah ài考虑。你kám有kah长辈序大众亲人讲好势？」
「无讲过，m̄-koh，chhiàⁿ cha-bó͘-kán-á是我ê自由。」
「Bē-sái，bē-sái，án-ne bē用得，会出麻烦lah。」
「你既然无ài就无法度，我kah lín cha-bó͘-kiáⁿ ê缘份就到chia为止。Kám无其它ê方法？」
瑞文ê心情会án-ne，实在是因为阿阵洗身躯ê相片去hō͘ in bó͘ 春莺看tio̍h，伊kah阿阵ê关系koh hō͘ 二兄景文tùi土地管理员黄丙ê嘴鼻tio̍h秘密。Chit-ê不名誉ê批判tī厝里当teh传开，现chēng问题to̍h beh爆发à。到chia来，to̍h趁chit-ê机会来清算丑闻关系，á是先kā阿阵用cha-bó͘-kán-á ê名义安顿tiàm厝里，以后chiah koh来设法完善处理。瑞文已经面临二选一ê决定时刻；而且chit-ê必须迫切决定ê原因iáu有一个，就是部落居民ê反感。In起初对chit-ê都市好额人抱一种难得见面koh敬畏ê心，m̄-koh，in渐渐回复到庄脚人本来ê排他倾向。瑞文kah阿阵ê艳事惹人注目了后，in就表示明显ê排斥，充满tioh beh kā她赶出去ê受气惊人ê目神。
「总是，我bē-sái无考虑村人对我ê敌视眼光。最近我有听tio̍h in teh讲，beh放火烧hit间破厝，我真惊in对我ê hit种受气。」
「有啥物thang好惊？In因为欣羡你，chiah来引起hit种看bē顺眼ê心。咱ā无做啥物pháiⁿ事，无做贼也无惹人麻烦，做你免烦恼，免chhap in。M̄-koh，你若一定beh chhōa hit-ê魔女去做cha-bó͘-kán-á，我mā无你ê法度。」
「你若同意就好。Án-ne你紧讲，我tio̍h hō͘ 你gōa chē钱？」
「无no͘h，你mài án-ne讲。到taⁿ为止，你hō͘ 阮hiah chē好处，我无应该koh要求金钱，若koh贪心就会受罚落地狱neh。」 她án-ne假大方，瑞文就问她一百五十圆如何，她kah-ná无满意，恬恬无回答。
「Kám讲嫌siuⁿ少？」
「M̄是lah，是讲阮sàn-chhiah人对tāi-chì tio̍h详细考虑。Hông chhiàⁿ做cha-bó͘-kán-á，如果hō͘ 人赶出来就会有困难；染tio̍h都市奢华ê生活习惯，tńg来到庄脚就会变成无路用去。这可能是无必要ê挂虑，m̄-koh mā是需要考虑在先。」
阿笑想讲cha-bō͘-kiáⁿ m̄是kan-taⁿ做cha-bó͘-kán-á，koh是细姨，横直会成做人ê笑柄，如果hō͘ 人赶出来，就会失去chit欉摇钱树，所以iáu是保持现状khah稳当。
「而且我hit-ê魔女ná亲像山顶ê树á自然成长，三岁ê时得tio̍h麻疹险险á死去，服用各种药物：十岁ê时tùi檨á树顶跋落来，腰骨断去，长时间hō͘ 医生治疗。」
「Án-ne，我koh加添五十圆，m̄-koh无beh koh加ā，你tio̍h了解。」 瑞文soah尾就火giâ起来，受气对她án-ne讲。Beh卖cha-bó͘-kiáⁿ，连药费都算chham落去，实在是一个贪心不足ê阿婆á。瑞文想讲她若koh无理要求，就beh kā她吓（háⁿ）beh降低价数，m̄-koh，家己ê弱点去hō͘ 她掠tiâu-.leh，只好应付她ê要求。
Chit时，甲长张忠来访。瑞文本来to̍h有想beh kah伊参详有关kah阿阵之间ê tāi-chì，伊来了真tú好。瑞文最近惊去tú-tio̍h张忠，因为伊有警告讲：Lín hiah派头ê做法，对纯朴ê村民带来pháiⁿ影响，应该小khóa检讨一下。伊面色乌mà-mà koh人大欉，容貌带有一种警察ê威严，瑞文有淡薄á惊伊。台湾一向有保甲制度，十户做一甲，十甲做一保，自备壮丁来保护各自ê地区，是维持安宁秩序为目的ê自治团体，ē-sái讲是警防团，是历史悠久koh组织复杂ê坚固制度。保正kah甲长有调解处分民间纷争，以及训戒不良子弟ê义务kah权利，所以，若败坏纯良ê风俗，当然tio̍h受警戒，甚至接受私刑mā无话讲。M̄-koh，chit-má瑞文已经免担心ā。
「甲长，kā你加添真chē麻烦，真失礼。M̄-koh，今á日我决心beh kā tāi-chì处理hō͘ 它完全清楚。」
「Án-ne真好ah，横直部落村民有种种不满ê讲法。M̄-koh，我今á日来访，有另外一项tāi-chì。」
「Kám是ta̍k-pái teh讲ê土地ê tāi-chì？」 又koh是chit件tāi-chì，瑞文目头结结。这是比追求异性ê神魂颠倒koh khah现实ê问题，是hō͘ 伊相当懊恼ê事件。
大体上，农业m̄是伊所想像ê hiah单纯，mā m̄是愉快ê tāi-chì。看tio̍h农民劳动chē报酬少ê悲惨情形，瑞文也会体会tio̍h伊家己chit种小地主ê烦恼滋味，因为伊ê土地ê地质无好。虽然伊ê心hō͘ cha-bó͘ 缚tiâu，总是，伊mā m̄是kā重要ê田园ê tāi-chì完全放bē记得。颠倒因为cha-bó͘ ê影响，hō͘ 伊软弱ê精神坚强起来，hō͘ 伊对人ê行为koh再感觉活泼起来，有竞争ê斗志。Tī炎热kah-ná火烧ê日头下，mā tio̍h去巡田园，mā tio̍h监督鼓励工人，koh tio̍h研究甘蔗耕作ê改良kah增产。虽然是án-ne，结果收成iáu是lóng不如意；毒虫kā甘蔗食kah冇(phàⁿ)心蛀孔，赤腐病害kā甘蔗心变红色，ná亲像用红墨水染过。Chiah-ê病虫害经过研究了后，也有渐渐得tio̍h防治，m̄-koh，siōng伤脑筋ê是风kah水ê灾害；尤其土地ê位置是tī河川流域，见若热天河水泛滥ê时，耕地lóng淹水，致使甘蔗茎烂去á是完全失去糖分。
Tī chit种情形下，瑞文无经验koh无有够精密ê头脑，所以估计出来ê计算lóng落空，达bē到预期收成ê一半。瑞文怨恨景文kā kan-taⁿ讲面积阔，m̄-koh，地质bái ê土地分hō͘ 伊；m̄-nā án-ne，伊mā知影chit块来路有问题ê土地早慢会带来麻烦。有一工，瑞文来到chit块土地，一个cha-po͘人行óa来，一直问伊chit块土地tang时tùi啥人ê手买来。瑞文感觉kah-ná tī tó位见过chit-ê人，详细kā伊看真，原来to̍h是kah二兄第一pái来看土地ê路中，tī轻便车顶tú-tio̍h ê hit位农民，而且照伊hit工所讲ê，伊主张tī chia有in-tau ê土地。以后koh有出现几个人讲出仝款ê主张，瑞文详细kā in问起来，chiah知真相是án-ne：大约二十年前做大水，河川流域ê chit所在ê耕地流失去。后来chit所在变成抛荒ê免租地，过无gōa久koh浮起来ê土地就归入国库。不知情ê原本所有者重新开垦，m̄-koh，in ê所有权kah使用权lóng无被承认，然后tī乱杂ê中间，经过几nā人ê手，chit-má变成瑞文所有。
受害ê是瑞文；伊原本lóng m̄知，chit-má soah绞入去是非ê中间，lóng无办法。伊有去kā景文投过chit件困扰ê tāi-chì，m̄-koh，景文一直lóng无真诚kah伊讨论，每pái lóng是án-ne讲：「Hiah-ni̍h无胆bē-sái得lah，无论hiah-ê人án怎讲，你ê物件to̍h是你ê ，kám m̄是？Chit块土地ê权利是绝对无问题ê，无需要烦恼lah，若有问题，法律会保障。」
是lah，家己无有啥物违背正义ê tāi-chì，in无论án怎来干扰，用法律来kā in对抗，in无可能kā土地夺tńg去lah。虽然án-ne想起来有理，m̄-koh，心内总是bē有真正平安；准讲是间接去夺别人ê物件，hit-ê霸占ê事实无法度消失去。
众农民并m̄是要求chit-má beh讨回in ê土地，kan-taⁿ ǹg望ē-tàng租in耕作；若是bē-tàng án-ne做，就希望ē-tàng hō͘ in一kóa补偿费。农民chit种ê要求并m̄是无理，m̄-koh，tùi社会秩序来讲是无合理koh无妥当ê诉求，所以瑞文一概无beh chhap in。M̄-koh，农民继续来kô-kô缠，纷争渐渐扩大，因此张忠出面来调解。
「照我顶pái kā你建议ê，你小让一步如何？虽然对你来讲有khah khek亏，m̄-koh，若án-ne坚持落去，总是无法度解决。」
「我mā头尾lóng想过，m̄-koh，我无法度lah。」
「我tiàm中间调解mā无啥物法度，tio̍h看你tī情面上小让步leh。In所要求ê，对你来讲虽然无理，m̄-koh，mā有值得同情ê所在。我mā ǹg望lín小khóa kā我同情leh。我若是林本源，hiah-ê土地ē-sái hō͘ in，金钱上，mā ē-sái随时hō͘ in一千、二千，我mā免得有hiah-ni̍h讨厌ê心情。可惜我m̄是真富裕，kan-taⁿ ē-tàng勉强维持生活niā-niā。」
事实上，瑞文ê生活并无旁观者所看ê hiah富裕。伊原本想讲家己持有财产ē-tàng自由来使用，会khah khùiⁿ活，m̄-koh，实际kā它看起来，m̄-nā金钱ê支出增加，麻烦mā真chē，并无感觉比以前khah富裕；连伊家己mā感觉真奇怪，何况ài别人来kā伊了解，当然to̍h相当困难。张忠mā无相信伊ê话，伊ngh一声，用鼻孔teh kā伊耻笑。
「你koh kah平常时仝款teh讲笑。你对hiah chē ê都市美女厌倦ā，来kah chit-ê庄脚cha-bó͘ tàu阵解闷，为她开hiah chē钱。Chit种ê风流，kám讲无钱ê人做会到？Chit pái问题变kah hiah-ni̍h复杂，mā是因为看tio̍h你án-ne teh开钱kah-ná teh lim水ê款式，in感觉bē爽快；这是我ê看法。若有tàn落去水沟á ê钱，mā分kóa hō͘ 阮chiah-ê sàn-chhiah人；in to̍h是chit-ê理由lah。」
「这kah-ná teh勒索leh。」
「是ah，这m̄是teh讲道理，是teh讲感情ê问题。Tāi-chì若恶化，m̄知in会变啥孔缝。你可能会想讲我是teh乌白讲，m̄-koh到chia来，你mā是tio̍h加减hō͘ in一kóa好处，这是为你设想ê lah。」 张忠ê话kah-ná是teh暗示有性命ê危险tī-.leh。瑞文内心有感觉恐怖，m̄-koh感觉若án-ne to̍h认输，未免siuⁿ过头无志气。伊想起景文无惊啥物ê精神，受挫折ê心情to̍h koh再奋发起来，伊断然拒绝对方ê苦劝。
「无论如何，我无法度接受无理ê要求，chit项tāi-chì到chia为止，以后mài koh提起。」
「Án-ne o͘h，我mā无办法ā。」 张忠露出伤透脑筋ê沉痛面色，小khóa恬恬一下，看瑞文会回心转意，显出一屑á ǹg望bē，m̄-koh伊发见对方lóng无动静，就看破，沿路ka̍uh-ka̍uh念，行出厝外去。
「我m̄是为tio̍h家己ê利益，是考虑tio̍h双方ê立场来尽力，尤其是希望你mài做m̄-tio̍h ê决定。M̄-koh，我也无beh koh插手，以后若有三长两短，此事kah我无关。」 张忠出去了后无gōa久，瑞文听tio̍h hì-hè叫ê声传过来，伊掠准是张忠tú-chiah所讲ê tāi-chì发生ā，所以面色苍白，chông出去一看，真意外看tio̍h阿阵tńg来，koh有两个原住民扛一只豹，后面一阵人tòe teh看闹热。
阿阵kui面汗水kah尘埃，嘴phóe 有hō͘ 刺phè割tio̍h ê伤痕，头毛ta燥koh乱，面顶衫破裂裂；chiah-ê人teh替她讲出她苦战五工久ê故事。阿阵kah-ná凯旋ê军队，意气扬扬；虽然疲劳kah-ná云kā她ê身躯盖tiâu-.leh， ná亲像tùi一角ê空隙射出欢喜ê光，带血丝ê目chiu仁teh闪sih发光。
「我pôaⁿ过阿里山去到新高山(译注：现今ê玉山)neh，我出门ê时就下决心chit pái beh拚命射tio̍h hit只豹为止。M̄-koh，无想讲会去到hiah-ni̍h远ê深山，我发见一只豹，m̄-koh无射tio̍h，感觉真可惜，就继续追去，tī不知不觉ê中间，soah入去到新高山。我chhōe了三四工，iáu无tú-tio̍h hit只豹，想讲看破beh tńg去ê时，就是今á日ê透早天phú光ê时，我发见一只花鹿来tī溪谷ê浅滩teh lim水，它ê脚步歪来歪去无力ê款，我想讲一定是tio̍h伤ê鹿á。果然一只豹mā落来溪谷，眞雄跳向hit只鹿á。鹿á一下to̍h被制服teh滚liòng，我随时开枪。你看，phah-tio̍h chia lah。」
阿阵非常得意指豹ê枪籽痕hō͘ 瑞文看；腹肚边kah胸坎á，总共有两个孔嘴。
「我ê手小khóa phi̍h-phi̍h-chhoah，m̄-koh，我不管如何对它开枪，花鹿mā中三枪死去。我soah尾就射死hit只豹。看tio̍h美丽澄清ê溪水被染红，我有讲bē出ê心情。溪水渐渐koh清起来，我kan-taⁿ戆神teh看，chit时我chiah发见我teh流目屎。」
平常时一句一句直接表达ê阿阵，chit时tòe-tio̍h感情ê流露，kā hit时ê情景描写kah活跳跳，kah-ná诗情流露出来。
M̄-koh对瑞文来讲，事实ê说明以外伊无趣味。伊看tio̍h阿阵凄惨ê款式，soah起鸡母皮；ē-sái讲伊讨厌ê感觉是kah阿阵ê欢喜相像重量。Chit-ê cha-bó͘ gín-á已经无ǹg望ā，她对in老母所讲ê hiah-ê话，瑞文心内想讲iáu是取消khah妥当。
阿阵请瑞文赏hit两位扛豹tńg来ê原住民各五十钱，伊the̍h一罐酒hō͘ in tńg去。瑞文bē了解她hiah-ni̍h仓仓pōng-pōng ê态度，就用khau洗ê口气讲：
「你án-ne chhìn-chhìn-chhái-chhái to̍h hō͘ in tńg去。这，kám m̄是你一生siōng欢喜ê tāi-chì？应该tio̍h大大庆祝一下。Eng暗请村民来开庆祝会如何？」
「我mā有teh想，m̄-koh无法度lah。」
「为啥物？」
「无人会为我欢喜。你，kám m̄是想讲我kah-ná phah-tio̍h一只鼬鼠leh？」
「我真欢喜lah，你长年ê宿望已经完成，m̄-koh，我iáu有真chē宿望未完成。」
「是án-ne o͘h！」
老母阿笑tùi边á插话，kā cha-bó͘-kiáⁿ大大责备。
「像你chit款hiah戆ê cha-bó͘ gín-á，全世界无tè chhōe lah。你想讲án-ne to̍h是为老父报仇o͘h？你ná会知影咬lín老父咙喉ê to̍h是你phah-tio̍h ê hit只豹？」
「He无要紧lah，像阿母chiah-ni̍h糊涂ê阿婆，ná会有法度了解我ê心情？」
「讲啥物痟话！你chit-ê siáu cha-bó͘，án-ne好lah，以后不准你koh the̍h枪。你若koh m̄听话，我就用枪kā你phah死，你tio̍h好好á kā我记得。赶紧去kā身躯洗清气，大人tùi早起to̍h teh等你，等kah真烦ā lah。」
阿阵入去内面洗身躯。Chit中间，阿笑tī围炉起火，kā阿阵ê枪tàn入去内底。
阿阵身躯洗好倒tńg来，惊一tiô，kā枪tùi火中the̍h出来，m̄-koh，枪托已经烧尽，bē-tàng koh再使用ā。阿阵对老母大受气，siàn老母ê嘴phóe，老母也m̄认输，起pháiⁿ面摔碗盘。
「Mài冤家lah，母á-kiáⁿ án-ne bē看得lah！」瑞文插入来kā in两人劝，阿笑非常懊恼，对阿阵讲：
「Chit款枪有啥物thang可惜ê？不管有枪á无，横直不准你koh去phah猎to̍h是lah。实在真害，连tó一只豹都分bē清楚，你chit-ê cha-bó͘ gín-á，ná ē-tàng去做大家族ê cha-bó͘ kán-á leh？」
「你讲啥物tāi-chì？」 「你beh去做大人in-tau ê cha-bó͘-kán-á ê tāi-chì已经决定ā，知影无？」
「无啥物thang好感谢。」
「你chit-ê阿阵ah，你若koh án-ne讲，to̍h会受责罚，像chit只野兽肠á肚hông the̍h出来！」
「Mài koh chho̍p-chho̍p念ā lah。已经beh到食暗顿ê时间，mài koh冤家，紧去thâi一只鸡来食kám好？」 瑞文制止阿笑罗嗦，催她去煮暗顿，阿笑就行出去。瑞文m̄是腹肚iau，伊是想beh单独kah阿阵讲话。
「你过来chia，坐tiàm椅á顶好无？」瑞文án-ne讲，m̄-koh，阿阵坐tī土脚豹ê尸体边á无beh tín动，瑞文mā因为气味bái无beh行óa去。
「阿阵，to̍h是照lín老母所讲ê，我已经决定beh hō͘ 你来阮tau。表面上是讲来做cha-bó͘-kán-á，实际上是第二夫人lah。你kám无beh去？Ē-tàng过好日子，tòa kah chit间kah-ná lah-sap猪tiâu无仝ê大厝，穿súi衫，食好料，看戏，mā ē-tàng看电影」
瑞文为tio̍h beh探阿阵ê真实心情，thiau故意用膨风ê讲法beh来引诱她。M̄-koh，无论瑞文án怎pûn笛á，伊lóng无法度摇动阿阵ê心；她kah-ná m̄知teh想啥物，恬恬á kā目chiu移向hit只豹看。
「是án怎？你bē ài做夫人oh？」阿阵iáu是恬恬无讲话。「Kám án-ne？你无ài去ho͘ⁿh？」
「M̄是讲无ài去，m̄-koh，我想beh维持chit-má ê现状lah。」
「是o͘h，若án-ne to̍h mài勉强，就照你ê ǹg望好lah。 」瑞文横直已经决心beh放弃chit-ê女人，阿阵ê无意愿，hō͘ 伊有得救ê感觉，心情就án-ne轻松起来。总是，她讲无意愿ê时，并无固执beh kah伊ko-ko缠；hiah at-sa-lih显出她无意愿ê态度，hō͘ 瑞文感觉有一点á遗憾；伊iáu是对她迷恋，m̄甘放。
「M̄-koh，你bat讲过，射死hit只豹，愿望达成就无beh koh杀生，我ǹg望chit点你做会到。」
「Ngh，我mā有án-ne ê phah算，m̄-koh chit-má有改变à。Chit只豹真可爱，射死它chìn前，它咬死阮老父，实在真可恶。M̄-koh，chit-má愿望达成ā，soah感觉真奇怪ê失望；m̄-nā无koh怨恨，颠倒感觉它真可怜、真可爱，这是真奇妙ê心情。」
阿阵摸hit只勇壮美丽倒tī土脚ê豹ê腹肚边，kah-ná teh摸天鹅绒一般。将近二米koân ê高砂豹，美丽茶色ê皮顶面有乌斑纹，有一个jia̍h tú好hō͘ tùi门口照入来ê夕阳光线照tio̍h，kah-ná金丝teh闪sih。瑞文ê心也忽然hō͘ chit-ê难得ê光景打动，注目teh看。阿阵ê手指摸tio̍h豹身有欢喜ê感觉，kah-ná chit只野兽iáu活leh，有体温，有脉动，传来到手掌有深深ê亲和感，甚至有情欲感，真是不可思议ê情景。 瑞文chit时chiah忽然清楚觉醒，家己kah chit-ê cha-bó͘ gín-á，无论经过gōa chē岁月，无论是tī啥物情形下，结局两人iáu是各别无仝ê人。
「原来如此，我mā ē-tàng了解你ê心情。阿阵，你生落来to̍h适合生活tī chit-ê庄脚所在，若去到都市，我mā m̄知你kám ē-tàng适应无？虽然我kah lín老母有做决定，m̄-koh，咱来kā它取消。以后我可能bē koh常常来chia，因为土地ê问题hō͘ 我感觉真厌烦。」
「M̄-koh，我kah你仝款，我tī chit块土地mā tòa bē落去。」
「是我m̄好，你为tio̍h我soah去hō͘ 村民大家怨恨。」
「无要紧lah，mài勉强来交往就bē有困扰，人lóng是án-ne无定tio̍h。Chit只野兽ê牙真恐怖，m̄-koh，人类，kám m̄是koh khah恐怖？人类对人类mā是会露出beh食人ê牙，kám m̄是？Án-ne讲起来，你iáu无想beh tńg去。你eng暗siōng好mài tòa chia。」
「你真现实，hiah-ni̍h急beh kah豹困o͘h？」
「M̄是teh讲sńg笑，chiâⁿ实今á日tńg去有khah好。」
「有啥物理由？」
「M̄知啥物原因，我有chit种感觉；我预感kah-ná会发生对你不利ê tāi-chì。」
瑞文感觉她ê话真奇怪，kah日时拒绝农民要求ê时，张忠所警告ê话仝款。尤其是阿阵无讲明确ê理由，kan-taⁿ是出tī她一种不吉ê预感。 瑞文已经感觉不安，想讲beh赶紧tńg去，m̄-koh，koh想起kah chit-ê女子ê关系to̍h beh结束à，所以koh引起寂寞爱惜ê想法。伊一再拖延时间，食了暗顿，日头落山loh。 瑞文phah算eng暗beh tòa落来ê时，忽然听tio̍h远远传来吵杂ê声。
「是啥物tāi-chì？」 瑞文反射性 khiā起来。
「果然m̄是好tāi-chì。」阿阵mā kah-ná动物察觉有危险，身躯随时防卫性tēng起来，peh金目chiu khiā起来。
「大概是村民开始相phah，lín两人ná会hiah紧张，坐落来koh lim一杯！」
Kan-taⁿ阿笑无teh紧张，笑两个少年人hiah仓pōng。M̄-koh，吵杂声渐渐接近chit间厝，过无gōa久就到门脚口来。阿阵kā门闩起来，koh kā灯火pûn hoa。
「我tio̍h设法hō͘ chit-ê人逃走，阿母，chia to̍h拜托你。」阿阵án-ne赶紧讲soah，就出力掠tiâu瑞文ê手，tùi后门逃走，chông出去外面ê乌暗中。Chit时，背后传来前门hō͘ 棍棒粗鲁kòng破ê声，同时koh有 「有thâi死hit-ê少年好额人！」ê叫骂声。另外一方面koh传来「有话好好á讲，mài暴乱lah！」ê极力劝解暴徒mài受气ê声。 阿阵kah瑞文两人tùi后门逃走出来，穿过三、四户人家ê后埕，走到大通路。然后tùi大通路向草欉下面ê断崖溜落去。两人逃命tī断崖下面teh phīⁿ-phēⁿ喘ê时，听tio̍h一队暴民tùi in后面jiok来ê声。 然后两人koh继续一直逃走，连地理真熟ê阿阵mā因为乌暗暝koh火急，应该án怎逃走，soah完全sa无方向。
伊kan-taⁿ知影确定tio̍h逃向kah追手倒péng ê方向。
过无gōa久，in真意外来到一个部落。阿阵认bat chit-ê部落，就用chia做基准，大概知影方向，也明白hia ê地形kah路草。
因为天chiah tú-á暗，如果ē-tàng利用比人脚khah紧ê交通工具，可能hit暗to̍h ē-tàng到台南，所以阿阵就随便借用缚tī一个人家厝ê黄牛。 过无一时á，载两人ê牛行到高台地脚步放慢，阿阵忽然回头过去看ê时， 「Ah！」一声就tùi牛顶跳落来。然后，kah-ná身边有一个tio̍h抵抗ê对手tī-.leh，她顿足捶胸，手舞脚tiô，尖声hoah-hiu。
「Cheng-seⁿ！In下手à。」瑞文mā随时落来，ǹg hit-ê方向看过去；tú-chiah拚命逃走过来ê乌暗起伏ê山仑á khah远hit pêng，空中升起红红ê火光。
「害ah，老母m̄知án怎？」
瑞文忽然担心阿阵ê老母 ê安全，m̄-koh，阿阵ê心内kah-ná有比老母ê安全koh khah致意ê tāi-chì，对瑞文ê担心无应半句，kan-taⁿ注目看hō͘ 火焰染成浅柑á色ê天空hit pêng。她粗暴ê动作随时消失去，kah-ná看破oh得抵抗ê tāi-chì，ná亲像无风ê旗á静静khiā tī hia。过一时á，她又koh恬恬骑起lih牛顶，她已经连赶牛ê气力都无去à。
「Lóng烧了了，变成火hu去à，鹿角、鹿皮、美丽ê雉鸡，iáu有hit只豹lóng」
阿阵用暗淡哀伤ê声án-ne讲。
然后随时koh用bē-sái bē记得ê口气加添讲：
「而且真可惜，kám m̄是？你买hō͘ 我hiah-ê súi衫kah装饰品」 Chiah-ê加添ê话m̄是kan-taⁿ顾虑瑞文chiah来讲ê应酬话，因为她已经无厝thang tòa，mā失去thang tńg去ê故乡；她有觉悟beh进入需要hiah-ê物件ê另外一种生活。银河tī天顶teh流，牛发出单调ê脚蹄声，ǹg猎户三星ê方向，也就是陈家所在ê方向行去。
无论是成做cha-bó͘-kán-á á是瑞文ê细姨，总讲一句，to̍h是阿阵beh成做陈家ê人lah。阿阵本身kah瑞文早to̍h默认，这是一种命运ê安排。
