《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 夫妇 第十六章（更新版）
作者 庄司总一 着 杨东杰 指导 林俊育 台译 2017.07.02
有一工，陈清文kah安子去大南门外墓地ê山仑á。
Chit-ê高台in两人kā它号做「各各他之丘」，tú结婚hit当时，两人tiāⁿ-tiāⁿ来chia散步，m̄-koh此后已经几年无来ā。
Hit工tú好是清明节，真chē人来pōe墓，重重叠叠ê土馒头之间，烧香kah烧银纸ê烟chhèng上天，四界ē-tàng听tio̍h哀哭ê声。
安子bē了解，为何清文专工选chit-ê伤感ê日子，chhōa她来chia？清文挂乌目镜来遮日头光，hō͘ 人看bē出伊ê表情，mā oh得亲近，kah-ná心内有啥物心思。最近台南ê市内，因为chit-ê台湾人墓地ê迁移有引起纠纷，清文mā相当关心chit-ê问题。
果然清文tùi山仑á看落来墓地，对安子讲：
「讲tio̍h墓地迁移chit-ê老问题，如果chia是日本人ê墓地，来pōe墓ê是日本人，你对chit-ê问题有啥物看法？」
伊专工chhōa bó͘ 来chia散步，to̍h是beh问她chit句话。清文hiah-ni̍h用心良苦，不得不采取án-ne ê态度，安子体会tio̍h伊ê心非常苦闷。
市府用祖先祭祀大典ê事业名义，beh来kā台湾人ê墓地迁移整理，三年前to̍h开始计画beh建设运动埕kah go-lu-huh(译注：golf，华语译做「高尔夫」) 球场。自hit时以后，m̄-nā台湾人chit pêng强烈反对，连日本人kah官厅ê一部分人mā反对，致使当局无容易实行，mā不断引起种种ê纠纷。清文chit-má m̄是政府官员，mā无参加任何社会团体，所以无需要发表家己ê见解，mā无发表ê机会，m̄-koh，伊个人ê意见自开始to̍h是赞成。这是一个自由人ê单纯意见，m̄是因为惊官府ê权威，mā无迎合时局ê卑鄙之心，所以伊问心无愧，无啥物见笑tāi。总是，伊周围所bat ê人，虽然反对意见有强弱之差，m̄-koh lóng是持反对ê意见。因为án-ne，伊soah成做是异端者，hō͘ 人khǹg-tiám难堪ê孤立立场。人人lóng讲伊娶日本人做bó͘ ê关系，chiah会硬kā家己伪装做赞成者。Tī chit种情形下，辩解mā无khah choa̍h；伊试过几nā pái，已经经验过à，到chia来，伊对人ê误解mā无感觉án怎苦恼。M̄-koh，chit pái墓地ê问题一直挂tī伊ê心肝头，剥bē离，渐渐soah tùi kah人ê关系游离出来，变成tiàm-tī灵魂中两个家己teh格斗ê形态，实在是不可思议ê tāi-chì。 昨hng，文化协会ê王茂堂理事真难得来访问。清文虽然已经退出协会，m̄-koh，因为伊bat担当过重要ê干部之一，所以无论表面如何，若phah开腹肚来看，当然别人会认为伊对目前ê问题事实上是无抱赞成ê意见。王茂堂来是beh kā清文使弄，讲：「若án-ne，chit-má是你抛开思考无明ê小市民生活方式，来勇敢面对现实，重新回归家己ê绝好机会，kám m̄是？最近阮beh开一个反对说明会，你若有意愿，希望你来扮演一个角色。」
M̄-koh，清文lóng无踌躇就kā伊拒绝。
「我料想bē到，你是tùi心底赞成ê人，我却无发觉tio̍h。」 王茂堂露出失望ê表情，然后用khau洗ê口气讲：
「一段时间无见面，你to̍h变成一个优柔寡断ê机会主义者à。」
「Chhut-chāi lín án怎讲lóng无要紧，m̄-koh我án-ne teh想，如果lín gia̍h双手来赞成墓地迁移，he实在是hō͘ 人尊敬ê精神。」
「阮kah-ná对你ê评价siuⁿ过kôan；你ê心底结局是抱tio̍h无聊ê基督教和平主义。」
「M̄-koh，你kā它想看māi leh，hiah-ê ná亲像土馒头重重叠叠ê pháiⁿ看墓地，到底妨害都市ê发展有gōa chē？我无beh采用lín hiah-ê会hō͘ 都市变成曲痀ê计划，我希望ē-tàng tī枯骨ê顶面起现代建筑物á是绿园。」
「哈哈，你kah-ná是穿高等官服ê官僚讲法。Lín可能认为家己是进步主义者，其实你只不过是一个常识家niā-niā；你是完全丧失社会观念kah阶级意识ê空壳á。若是kā你ê近代建筑kah绿园ê伟大美梦暂时khǹg-tiám边á，为tio̍h beh起造一部分特权阶级ê运动埕kah go͘-lu-huh球场，tio̍h需要来挖掘十万市民埋葬in重要祖先ê墓地，án-ne，你ê看法如何？而且对一个无产阶级ê人来讲，一个墓kan-taⁿ补偿二十圆，会造成人民ê大负担，chit点你认为如何？何况对chit种刻薄ê现实，你kek kah有看tio̍h kah-ná无看tio̍h，你kan-taⁿ kā你ê梦画tiàm空中来满足家己，kám m̄是？陈先生，你kám无感觉家己内心一屑á纯洁都无？」
「Chit种话是我想beh问你ê。Lín以民众指导者ê身分来反对墓地迁移ê中间，kám讲lóng有纯洁ê心？迁移费用ê负担kah具体ê方法，结局是次要ê问题，kám m̄是？若讲这是刻薄，lín ē-sái抗争到底ā。M̄-koh，lín基本ê理由m̄是án-ne，lín kám m̄是kan-taⁿ为反对来反对？用尊重祖先崇拜思想 kah拥护传统道德来做主要ê理由，以chit种美德做藉口来诉求道义感，我感觉lín无适合án-ne做。Lín一向轻视koh弃sak心胸狭、卑鄙惊死、感伤ê精神，kám m̄是？Lín án-ne就会陷入自我矛盾lah。」
若去凿tio̍h chit-ê弱点，对反对阵营来讲，尤其是有左派色彩ê人，会感觉tio̍h刺痛。所以，若继续koh议论落去，清文chit pêng会赢。M̄-koh，清文tī掠准胜利ê瞬间，伊soah感觉一种微妙ê败北。用理论做武器，伊并无输对方；m̄-koh，气魄kah气魄相接触ê时，清文就忽然开始双脚无力起来。
王茂堂拚命beh深入去清文ê内心弱点，伊用鼻孔冷笑对伊讲：
「我无法度kah你仝款安份tī小资产阶级；阮有大目标，所以有时tio̍h扮演m̄是家己意爱ê角色，á是你所耻笑ê陷入自我矛盾ê情境。阮爱民族，爱大众，除了这以外无其他ê意思，而且阮为tio̍h chit-ê目的，点to̍h热烈ê精神，应该持有ê阮mā lóng有持有。M̄-koh，陈先生，你到底持有啥物？」
清文hō͘ 伊án-ne一问，就小khóa恬落来。M̄是oh得回答，是伊感觉回应chit种幼稚ê议论，颠倒是表示家己无成熟。「爱民族，爱大众，我一屑á都bē输你。」伊kan-taⁿ án-ne回答就有够额。Á是伊tio̍h koh khah根本性，koh khah广义来回答讲：「爱国家，名叫日本ê国家kah国民。」？。M̄-koh，清文koh感觉chit两句话kah-ná比王茂堂ê口气koh khah幼稚，koh khah无信念。思想kah理论对茂堂来讲，iáu是tī黏糊糊ê果冻状态，伊kan-taⁿ会晓用嘴讲讲leh。M̄-koh，充满迫害肉体ê怀疑chìn前，不管讲gōa chē话，lóng kah无价值ê白纸仝款，必要ê kan-taⁿ一块纯金；王茂堂to̍h是teh指责清文无持有这。
墓地迁移ê赞成kah无赞成ê争论，清文chit pêng加真占优势。M̄-koh，清文忽然感觉损伤ê m̄是对方，颠倒是家己kui身全伤。对方极力teh讲：
「台日结婚hō͘ 你失去台湾魂，koh抹消你ê信念；除chia以外你iáu有啥物？」清文惊一tiô，soah紧张起来，kah-ná伊到taⁿ lóng完全m̄-bat注意tio̍h chit件tāi-chì。伊会惊一tiô koh紧张起来ê原因，其实是伊kah安子结婚以来，这kah-ná是一种病不断teh kā伊侵犯，渐渐变成慢性病，chit-má甚至已经差不多变成无自觉ê严重症头。M̄-koh，因为chit-ê机会，soah hō͘ 伊觉醒起来；伊忽然间发觉，若无彻底治疗to̍h会活bē落去ê hit种迫切感。
清文想beh tùi chit-ê墓地，直接接触守护墓地ê众人，来探究家己ê真正心意。伊对安子ê假定问话，其实ē-sái讲是对伊家己ê反问。
「人lóng mā无ài家己祖先ê墓hō͘ 人挖起来迁移，我当然无反对bē-sái。」安子án-ne讲。
「无m̄-tio̍h。」
清文kah-ná同意，án-ne回答，了后随koh用khau洗家己ê口气讲：
「连你都án-ne讲，总是我却无提倡反对ê论述，这是啥物原因leh？」
「这是因为你ê想法比社会khah进一步，无受感情束缚，超越自我，kā你ê心khǹg tī真正高尚ê理想顶面。」
清文ê态度严肃，安子mā有注意mài去凿tio̍h伊尖锐ê神经。
「Chia是郑成功以来三百年ê坟墓之地，起造现今时代基础ê先人tī chia teh安眠，taⁿ beh kā in挖起来迁移，任何人lóng会有深深ê感慨。M̄-koh，chit种感情kah现实问题是两回事，我认为你ê意见无论如何lóng是正确ê，m̄-koh….。」
「无lah，你án-ne简单to̍h做结论会伤脑筋，你可能无真了解我ê心情。我m̄是kan-taⁿ teh讲墓地ê tāi-chì，是teh讲koh khah重大ê精神问题。针对chit pái ê问题，有心ê人可能会评论讲我态度堂堂正正，m̄-koh，我kám有影值得hō͘ 人án-ne评价？总是，我可能无把握tio̍h坚定koh确实ê物件。我提倡相反ê讲法，家己想讲án-ne真超然，其实难免会感觉奇妙ê孤单、内疚；chit种感受hō͘ 我挡bē-tiâu。」
不管瑞文是m̄是用乌目镜来掩盖伊ê表情，安子已经非常清楚in翁ê想法。她惊一tiô，清文ê气力kah热情kah-ná枯焦ê树叶四界飞，m̄-koh，án-ne bē-sái得，bē-sái hō͘ 伊tī chit-ê时chūn软弱落去。Án-ne teh想ê中间，她随kā绿色ê阳伞收起来，hō͘ 日头光kah-ná kā心烧焦án-ne，点to̍h她激烈ê怒火。
「你到taⁿ iáu是chit种怀疑论ê俘虏。」
「我并无án-ne想，m̄-koh….。」
「你koh-beh讲是我ê原因ho͘ⁿh？」
清文恬恬无话。
「M̄是lah，是你想beh án-ne讲ê。你sēng pháiⁿ家己，你是罪人。」
「请你mài误解。Tī咱两人ê关系上，我实际上无啥物thang好kā你责备ê。我所讲ê m̄是chit种人kah人之间ê关系，是抽象形态ê问题。咱两人台日婚姻ê形态所产生ê一种悲剧，我只是想beh设法来解决lah。」
「你讲是悲剧！悲剧、悲剧！」
这真是出tī安子意料之外ê话，因为siuⁿ过惊kah gāng去kah愤慨，她hit句「悲剧」ê音听起来颠倒有欢喜ê款。
「这是我ê失言，应该讲无幸福khah妥当。无论án怎讲，kah世间一般ê意思有小khóa无仝to̍h是lah。若讲无幸福，我是teh指质，m̄是量ê问题。譬喻讲，我娶台湾bó͘ kah娶你ê chit两种都合，虽然仝款会有苦恼ê所在，m̄-koh，性质会无仝款；我是teh指chit-ê意思。」
「Ai-ah，你án-ne ê想法可能有m̄-tio̍h；若是抽象ê物件to̍h lóng无量kah质ê区别à。幸福kah无幸福，结局kan-taⁿ是一种性质，可能是一种色彩无分明ê物件；有kah无，kan-taⁿ án-ne，kám m̄是？」
「我无像你hiah单纯ê想法，我所讲ê无幸福，是指有形ê无完全所产生ê精神无平衡。」
「清文！你ê头壳真正有问题o͘h。」
安子就án-ne直称伊ê名，无加尊称。Hō͘ 她án-ne叫ê清文感觉真意外，叫出嘴ê安子本人mā惊一tiô；两人lóng感觉不可思议，互相对看。安子直接叫丈夫ê名，以前kah以后lóng m̄-bat án-ne，kan-taⁿ有chit pái niā-niā。可见chit时ê安子想beh超越一切ê障碍，来消除她kah清文两人中间ê隔离，想beh深入清文ê内心。两人相看，因为紧张soah带有敌意ê目神中，流露微微á ê笑神。这to̍h是尖锋相对ê时，所发出ê美丽火花。
「你chit-má当teh苦恼，我真了解你chit种一筹莫展ê心情。你ê心情hiah-ni̍h沉重，m̄-koh，你iáu koh beh辩解，想beh挂面纱来掩盖家己。你ná会无ài khah率直，khah尽力对我来透露leh？无lah，应该是讲你tio̍h面对全部ê现实来向前突破。若是讲bē出嘴ê苦恼，to̍h m̄是值得重视ê苦恼；它mā m̄是你hit种意义kôan ê苦恼，却是无聊ê偏见kah扭曲。你kah-ná是一个无讲理ê gín-á，陷落tī真大ê错误。你所讲ê重大ê精神问题，详细kā它想起来，kah精神一屑á关系都无，我认为he kan-taⁿ是感情问题。我án-ne讲ê证据to̍h是：你虽然讲m̄是teh kā我责备，m̄-koh，你án-ne teh辩解，结局soah kā你真正ê内心lóng显露出来。我m̄知你家己有清楚了解á无？你ê心底总是有一个心结，你想讲因为娶日本bó͘，所以无法度发挥家己所意爱ê想法。我当然真了解chit点，我mā有责任；我所生活ê世界真狭(e̍h)，koh想beh kā你拖入来chit-ê世界，thang hō͘ 你过平凡ê日子，这是确实ê tāi-chì。M̄-koh，这是一个做bó͘ -.ê ê心，并m̄是因为日本bó͘ ê关系，你绝对无理由án-ne特别kā她限定。你ê错误to̍h是tī chia；你因为kah日本人结婚，soah kā所有ê问题lóng赖赖tùi chia来，koh受tio̍h它ê束缚。你一直停留tī hit种低路ê心情，你做啥物phah算？Ai-ah，拜托一下，从今以后，请你mài kā我khǹg tī你ê眼中，自由去做你意爱做ê tāi-chì；你认为是好ê，你相信是正当ê，to̍h照你想beh ài ê去做。Án-ne你无受束缚，用自由开阔ê精神所做ê tāi-chì，若koh tú-tio̍h困扰kah苦恼，我mā会感觉心安意足。你我两人今á日kā次要ê tāi-chì讲hō͘ 它清楚。你是台湾人，我是日本人，这tī咱两人ê真正性命中，kám m̄是无啥物关系？神用一种血创造所有ê人类，准讲无tùi圣经中得tio̍h chit-ê教示，咱mā真清楚，kám m̄是？人类kah狗to̍h bē有chit种关系。用仝种血来创造ê人类，国界ê界定kah语言风俗ê无仝，有它ê意义，kám m̄是？当然有时会引起种种ê摩擦，m̄-koh，我无认为这是bē-tàng挽救ê无幸福；至少he bē消磨人ê心灵，mā m̄是会hō͘ 人失去信念ê悲剧á是无幸福。」
安子讲话kah-ná机关枪，一句koh一句讲bē soah，完全无hō͘ 清文插嘴ê余地。平常时惊见笑koh温柔ê bó͘，清文想bē到她会有chiah-ni̍h激烈ê热情kah正确ê理论，以及有力koh悲壮口气。清文kah-ná去hō͘ 她khiú tiâu-.leh，soah无话thang讲。安子本身tī兴奋过了后，对家己án-ne kah-ná the̍h演讲稿khiā tī讲台顶teh高谈阔论ê tāi-chì，感觉真pháiⁿ势。
结局，安子phah开心胸，无留枪籽，án-ne kā话吐出；虽然有得tio̍h满足，m̄-koh，心情并无得tio̍h完全tháu放。颠倒感觉该hō͘ 丈夫ê soah lóng无chhun半项ê莫名空虚，而且因为án-ne，她想tio̍h丈夫到底有得tio̍h gōa chē？伊无得tio̍h啥物lah，安子soah悲伤起来。
