《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 夫妇 第十七章（更新版）
作者 庄司总一 着 杨东杰 指导 林俊育 台译 2017.07.09
了后koh过两三工ê暗时，清文kah安子本来约好beh去病院探访老父阿山，m̄-koh，清文讲有一个熟似ê人收集真chē唐三彩，约好beh请伊去参观，所以伊就家己一个出门。安子感觉清文kah-ná是故意án-ne变更，就决定家己一个去病院，就开始准备出门。
阿山为tio̍h治疗阿片中毒，chit一个月tòa入去一间私人病院。因为m̄是普通ê破病，厝里ê人并无显出烦恼ê气氛。M̄-nā án-ne，厝里ê人认为阿山已经年纪hiah大，chit-má为tio̍h戒除一向所意爱ê物件，何必特别来入院受苦leh？其实阿山显然本人并无意思beh án-ne，he是清文建议ê；大概是清文家己无ài ê物件mā beh强制人戒除。阿山年纪已经超过七十岁，chit-má to̍h ē-tàng为伊准备棺材ê时候à。所以清文硬ài老父接受治疗ê理由中，希望老父健康kah长岁寿ê孝心mā有，m̄-koh，khah主要ê是惊社会ê批判，尤其清文bat一时是社会运动ê一份子，对hiah-ê进步ê人来讲，伊不得不tio̍h顾陈家ê面子。所以厝里ê人lóng耻笑清文ê私心，对伊劝老父接受痛苦治疗来戒除阿片ê无慈悲行为真不满。M̄-koh，阿山今年以来身体加真衰弱，若无脱离阿片中毒ê病症，医生诊断恐惊今年活bē到年底。所以不管清文ê动机如何，伊劝老父入院治疗是必然ê措施。治疗结果iáu算良好，是值得庆贺ê tāi-chì，所以bē-sái kan-taⁿ批判清文。
安子穿和服开始准备beh出门ê时，她忽然想讲为tio̍h beh hō͘ 老父欢喜，eng暗to̍h穿台湾衫。M̄-koh，一下beh穿ê时，soah发见丝á袜lóng破去，每一双lóng有破裂，无一双她看会满意。因为真久无穿洋装ā，安子无想beh去补丝á袜，soah kā in放leh。Chit时，她mā pîn-tōaⁿ去补，若beh送去店铺hông补mā嫌费气，结果iáu是穿原来hit领和服。换穿和服ê原因就是kan-taⁿ án-ne niā-niā。M̄-koh，做梦mā无想bē到，穿和服竟然帮助她脱离险险á to̍h丧失性命ê灾难。这是hit暗发生ê tāi-chì。
安子行出家己ê厝，来到陈家前门围墙ê时，去tú-tio̍h也tú行出家己房间ê瑞文。In真罕得是夫妇两人同齐beh出门，m̄-koh，详细kā她看，koh m̄是春莺。
「Ah，真久无见面loh！」
瑞文pháiⁿ势，án-ne讲。事实上，安子已经有一段时间kah伊无相tú。总是，伊有几nā pái来探访老父ê款，m̄-koh，安子lóng m̄-bat kah伊相tú过。
「春莺，eng暗lín夫妇beh去tó位？」
因为前门hia光线khah暗，安子ē-tàng thiau故意假讲认m̄-tio̍h人án-ne讲。瑞文对家己ê放荡行为，不管啥人对伊án怎耻笑，lóng无比hō͘ 安子看tio̍h koh khah hō͘ 伊艰苦心。
「Chit位是chit pái chhiàⁿ ê cha-bó͘-kán-á。Oeh，向大嫂请安！」
瑞文用kah-ná受气ê声音对边á ê cha-bó͘人讲。
「Ah，失礼！是非常有派头ê cha-bó͘-kán-á o͘h。」 她穿一领水蓝色ê长衫，面抹白粉，啥人看tio̍h都bē想讲是cha-bó͘-kán-á；chit位to̍h是陈阵。
安子想讲山顶落来ê cha-bó͘ gín-á bē晓日语，所以无顾虑就án-ne kā她khau洗。Hō͘ 主人叫讲tio̍h kā人招呼，阿阵就恬恬á行礼。看起来kah-ná bē习惯ê款，态度硬piàng-piàng。其实阿阵来到陈家chiah无几工niā-niā。Hit暗受tio̍h暴民ê攻击，tùi部落逃走，来到台南已经是半暝ā。因为时间hiah-ni̍h òaⁿ，瑞文安排她暂时tòa街á ê旅馆，kan-taⁿ家己单独tńg来厝里。过几工了后，chiah用tùi庄脚chhiàⁿ来ê cha-bó͘-kán-á ê名义，kā阿阵chhōa入来厝里。
安子eng暗第一pái看tio̍h chit-ê问题中ê女子，因为好奇心ê使弄，就无客气kā她斟酌看。有一pái清文tùi荷兰瓷盘ê历史事实讲起，提起chit-ê女子ê时，有半sńg笑teh讲她可能身上有流外国人ê血。Chit-má安子禁bē-tiâu 注目kā她看，并m̄是想beh tī暗时探出她ê滥血微妙特徵，却是kah-ná忽然面对情敌，只不过是奇妙嫉妒引起ê冲动动作niā-niā。
「Eng暗真热，一点á风都无。」
Tùi房间门行出步道，安子用手ia̍t面；她bē记得带葵扇。
「Oeh，kā你ê葵扇hō͘ 夫人用。」
瑞文tùi有小khóa距离ê后壁命令阿阵。安子mā随时oa̍t tńg身过来。
「多谢。」
安子tòe嘴án-ne讲，tùi阿阵惊惊the̍h hō͘ 她ê手中，kā葵扇接过来。安子表现出来ê动作无啥物，m̄-koh，心情kah-ná是瑞文被夺走ê感觉。接过葵扇了后，随时koh tńg身向前，赶紧kā葵扇ia̍t一下ia̍t一下。Chit时，她鼻tio̍h ná亲像茉莉花ê幽香ê味，kám是chham tī葵扇ê味？Á是kah瑞文并肩teh行，tùi伊身躯芳油散发出来ê味？安子忽然心内有所感触。
「想bē到你也会娶细姨，毕竟你是一个台湾人。」
安子惊一tiô ê口气中，有参杂怨叹kah侮辱轻视。
Chit时，若是丈夫清文to̍h会随时反驳讲：「娶细姨也m̄是限定台湾人chiah会！」M̄-koh，瑞文无辩解，无受气，kan-taⁿ因为见笑kah困惑，面红kòng-kòng。伊对安子一向lóng是完全无抵抗ê态度，伊chit种温和ê款式，安子看tio̍h就常常同情伊，soah无气力thang kā伊责备；其实安子想讲她ná有权利kā伊责备leh？
所以，安子ê口气随时温和落来，koh改变话题。
「Lín kám是beh去看电影？Chit-má teh演Chhia-puh-lín (译注：Chaplin，喜剧电影短片ê影星) ê电影，kám m̄是？」
「Ngh，á阿嫂你beh去tó位？」
「Beh去探访老父。Chhia-puh-lín ê演技真好，电影叫做《巴黎ê妇人》，kám m̄是？Chit pái伊无出来演，家己做导演，听讲chit出电影非常好，我mā有想beh去看neh。」
「最近阿兄kah-ná无啥teh看电影ho͘ⁿh？」
「因为伊去hō͘ 古董迷去，真无好！」
「总是，阿兄ê头脑iáu是离bē开社会问题。Eng暗伊kám m̄是去公会堂？」
「伊讲是beh去朋友ê厝看古董，eng暗公会堂kám有啥物聚会？」
「你kám m̄知？墓地ê老问题lah，有一个反对迁移ê演讲会，一定会大暴乱，危险！危险！」
瑞文无意中án-ne讲出来；伊并无特别kā阿兄ê tāi-chì khǹg-tiám头壳内。M̄-koh，安子听tio̍h，就想起清文可能藉口beh去别位，却是去hia。这忽然引起她奇妙ê不安，就tī步道ê oat角所在，kah瑞文in告别离开，赶紧叫出：「拖车ê！」，然后向公会堂ê方向去。
Tú-chiah瑞文讲一定会有大暴动，m̄-koh，安子担心ê m̄是清文身边危险ê tāi-chì。只是几工前文化协会ê王茂堂来访问，劝清文上台ê时，清文断然拒绝，m̄-koh，安子想tio̍h若是伊心境忽然改变，tāi-chì to̍h不妙loh；若án-ne to̍h有khah过份。为啥物安子对chit点hiah-ni̍h担心leh？He是清明节hit工，她有讲了siuⁿ过头；m̄-nā是án-ne，ē-sái讲是kā清文彻底痛击，这kah-ná hō͘ 伊相当ê震撼，清文到taⁿ lóng m̄讲话。Tùi好ê方面来讲，若是伊ê心有反应是bē bái，若kan-taⁿ伤tio̍h感情soah hō͘ 伊有使khioh-ka̍k（自暴自弃）ê反弹，无的确伊to̍h会去参加eng暗ê演讲会。今后免管lín bó͘，做你照你ê信念自由去做；安子hit时真清楚án-ne讲。其实何必hiah-ni̍h冠冕堂皇án-ne讲leh？安子忽然tùi女性ê弱点生出后悔ê想法。
公会堂内底听众满满满。安子先去看贴tī头前ê演讲题目kah演讲者ê名，结果并无看tio̍h清文ê名；伊结局是无来。安子对家己ê加操心，无去探访老父soah走来chia，bē了解为啥物家己会hiah-ni̍h紧张。
M̄-koh，她确实是chông来到不妙ê所在，会场内面kah-ná风吹菅草sa-sa叫teh吵闹。演讲者不时teh煽动听众，鼓励ê声kah共鸣ê hoah-hiu声tùi四界传来。维持秩序ê治安人员阻止演讲者ê铃á声大响，演讲者向hit-ê方向看一下随停止，m̄-koh随koh继续演讲。然后铃á声koh再响，亲手án-ne，有几pái连续ê铃á声kah演讲停止。中断演讲ê时间kan-taⁿ两三分钟niā-niā，公会场内ê气氛充满一种紧张ê压迫感，ná亲像风灌kah饱饱ê汽球，随时会去hō͘ 人凿破，场内ê气氛充满一种紧张ê压迫感；现现看会tio̍h危险迫tī目睭前，果然phòng一声汽球破去à。
若去hō͘ chit-ê可怕ê扰乱绞入去to̍h真头痛，佳哉安子khiā tī siōng后壁，她随时tùi正门ê门口逃走出去。M̄-koh，tī chit-ê瞬间，后面传来比激烈战场koh khah恐怖ê声。
「陈清文有在场，chit-ê背叛者，kā伊phah hō͘ 死！」
Chit-ê忽然传入耳ê声，安子掠准是听m̄-tio̍h；chit-ê「kā伊phah hō͘ 死！」ê声可能m̄是teh指陈清文，是teh指别人。骂声是tī暴乱chìn前，tùi群众ê中间传来。吐出煽动言词ê演讲者不断teh做个人攻击，K氏kah L氏是受攻击ê目标，in两人是市内ê头面ê实业家。照演讲者所暴露ê讲法，chit两人勾结官厅来包揽墓地整理事业，想beh thàn一tòng大钱，chit种官厅ê走狗，出卖同胞ê卑贱ê人tio̍h受纠正、批评。In后来chiah知，chit两人偷偷á来傍听；一旦想beh chhòng chit项事业，in真知舆论反对ê声真大，所以趁eng暗chit-ê机会beh来观察群众ê真正意向，chiah来决定是m̄是beh去承包chit项事业。Hit时，因为听众起乱狂，in两人险险好好á遇害，是由警察保护chiah脱离灾难。
Án-ne讲起来，清文kah hiah-ê利用民众ê切实问题beh来thàn一tòng大钱ê tāi-chì一屑á关系都无，为啥物会kah hiah-ê人仝款，成做攻击ê目标neh？这是因为前几日王茂堂来拜访ê时kah陈清文不欢而散，王茂堂就因为愤慨，提出以陈清文为赞成者ê例，这hō͘ 清文成做民众ê敌人来kā伊责备，结果激动听众kā清文当做是kah出卖同胞ê奸商仝款。虽然清文khiā tī kah民众相反ê立场是为tio̍h正义，m̄-koh，听众mā是无beh放伊soah。
Chiah-ê全部详情，安子tī事件了后chiah知影。面对危机ê hit当时，她kan-taⁿ想讲beh如何来拯救丈夫，kui头壳内kan-taⁿ想chit项tāi-chì。她忽然又koh beh chông入去会场，m̄-koh，混乱ê群众中间，无孔缝thang hō͘ 她进入去一步。安子kan-taⁿ着急，其他无啥物办法。Chit时，她忽然看tio̍h清文tùi群众中间跳出来，走向门口，差一屑á to̍h kheh-tio̍h安子ê肩胛头。伊禁bē-tiâu叫出：「你」，m̄-koh，清文显然无注意tio̍h安子ê存在。安子随时tùi后壁jiok去，m̄-koh，几nā个cha-po͘人比伊khah tāi先jiok-tio̍h清文，以公会堂头前暗淡ê大王椰子树做中心，kā清文包围起来。
安子想beh叫警察，m̄-koh，警察kan-taⁿ集中精神teh镇压暴徒，以及保护K氏kah L氏，kah-ná无闲thang来照顾清文。Hit暗ê事件本来kah清文lóng无关系，只是伊pháiⁿ运去hō͘ 人绞入去niā-niā，而且清文tī社会ê地位ná亲像一张白纸，警察当然kā伊放bē记得。安子发觉tī chit-ê场合无法度óa靠警察ê保护，所以她勇敢突破包围，khiā tī丈夫ê头前。Chit时，光亮ê一刀tùi她ê目chiu前liô过去。
清文抱tiâu teh beh向后倒落去ê安子，无顾一切走向大路去，cha̍h一台人力车落来。
「来去回春病院，拚速度！Khah紧leh！」 He是阿山入院中ê病院，以普通ê速度，只不过是十分钟ê距离。 三轮车tī合欢木ê路树中间跑走，安子倒坦横tī车ê后座。清文kā她tháu开衫裤ê带，看tio̍h白色ê内衫流出鲜血，伊惊一tiô。Tùi热天薄衫凿落去肠á ê部位，若万一，有可能是致命ê深伤。
「安子，会痛bē？」
「Bē lah，无啥要紧。」
「真失礼！」
安子thí开目chiu，露出微微á ê笑容。丈夫kā她会失礼ê低沉声音，ná亲像寺庙ê钟声，神秘koh庄严ê余韵渗入去她ê全身。「真失礼！」Chit句清文ê声，确实意义深长；he m̄-nā是对in bó͘ 拯救伊性命ê行为表示感谢niā-niā，是有超过感谢ê意义tī-.teh；就是一种对teh beh失去家己所爱ê人á是家己面临死亡ê时，大部分ê人lóng会发出ê话。对过去一生ê精神kah行为做总决算，清文发现伊对安子ê付出比伊tùi安子所得tio̍h ê少一大码。伊ê悔恨沉重压缩了后，结果所发泄出来ê谦卑话就是 「真失礼！」。
无no͘h，清文无感觉安子teh beh死去，却去hō͘ chit种心情束缚tiâu leh，到底是án怎leh？伊忽然tùi恶梦中醒过来，直直看安子ê面。安子ná亲像细只鸟á hiah-ni̍h温柔，目chiu mi-mi，几条散乱ê头毛落tī苍白ê面上；bē讲得ê平静面容，握tiâu ê手掌有汗湿koh温暖。清文看tio̍h tòe车体teh摇tín动ê头壳，伊感觉安子kah-ná死去à ê款。
来到病院，安子hō͘ 人送入去治疗室接受急救。清文tī外口teh等ê中间，伊想像siōng bái ê phah算，紧张kah行来行去。Tòa tī病院teh照顾阿山ê老cha-bó͘-kán-á素娥听tio̍h消息，赶来问讲夫人是án怎leh？有性命ê危险无？素娥真不安ê面色teh问，tī hia teh行来行去ê清文无发觉tio̍h她，无kā她回答，mā无kā她看一目。 过无gōa久，治疗室ê门phah开，院长出现。
「院长，情形án怎？有要紧无？」
医生明朗ê微笑暗示状况bē bái，伊用tú洗了iáu未ta ê手phah清文ê肩胛头。
「陈先生，你ê运气真好，受伤ê部位是要害，我mā真烦恼，m̄-koh详细kā她看，却无啥物大伤。孔嘴六公分，深二公分半，内面ê肠á lóng无异常，一礼拜了后就ē-tàng出院ā。」
「Án-ne真多谢，因为她是hō͘ 人tùi薄衫顶面凿落去，我掠准会....。」
因为感觉安心，伊后壁ê话to̍h无koh续落去讲。
「你若是日本人应该早to̍h注意tio̍h，为啥物夫人hō͘ 人凿hit刀无啥物严重？」
医生chhōa清文入去治疗室，指安子ê腰带hō͘ 伊看。一看，原来如此，果然腰带ê银丝菊花图样正中央ê结蕊hō͘ 刀凿破去。如果安子若穿洋装á是台湾衫，he就不堪设想loh，清文想tio̍h to̍h koh起惊。伊án-ne teh想，就kā tàn tī篮á底乱乱ê腰带the̍h起来折hō͘ 它好势。 为tio̍h beh接受好ê治疗，清文决定hō͘ 安子tòa院。Tī hit栋台湾式房屋改造ê病房边á，有一栋独立ê日本式病房tú好有空位，安子就án-ne tòa入去。
Chit-ê意外事件报tńg去陈家，大家随时赶来到病院。Cha-bó͘-kán-á阿英哭teh来chhōa清子，玉帘kah春莺坐车赶来，in比其他ê人khah早到位。去参加seng-lí场ê宴会ê景文kah去看Chhia-puh-lín电影ê瑞文，in接tio̍h紧急通知也lóng赶来到病院。新闻记者明知事件内容禁止刊登，in mā是走来问一kóa讨厌ê问题。
Tāi-chì处理到一个段落，清文吐一个大气来轻松一下。Chit时听tio̍h有人细声teh叫伊，一看to̍h是素娥。Tio̍h lah，伊chit-má chiah发觉，tú-chiah当teh处理急救ê时，tī伊边á ê to̍h是素娥，她一定是iáu-teh烦恼，beh来问安子ê状况。清文无beh惊动老父，就叫素娥注意，tio̍h对老父简单提起to̍h好。M̄-koh，素娥心情非常着急，kā清文报告ê是另外一个意外事件：阿山失踪à。
病院koh引起一chūn ê喧哗；各病房、ta̍k角落lóng chhōe透透，m̄-koh，to̍h是chhōe无阿山。阿山一定是趁大家teh无闲安子ê意外灾难ê时，早to̍h脱出chit间病院。
「真害，伊已经治疗到chit-ê坎站，soah….」
院长S氏改变tú-chiah讲tio̍h陈夫人ê时ê乐观面容，chit-má有小khóa失望。S氏mā是基督徒，kah陈清文夫妇是朋友关系，所以对阿山ê治疗特别用心；这ē-sái讲是超越职业意识ê奉献努力，m̄-koh，伊无一定有成功ê把握。阿山m̄-nā是阿片ê中毒者，而且是koh活无几年ê高龄者，肉体上有真chē毛病tī-.leh。若处理bē好势，有可能会变成为tio̍h beh矫正牛角soah去thâi死牛ê结果。阿山一向ta̍k工食一两半ê阿片，以伊ê年龄kah体力来讲是相当超量，所以医生采取ta̍k日减量ê方法，hō͘ 伊避免因为禁食来受剧烈ê痛苦。一般来讲，若是对有体力ê人就会采用对症下药ê办法，然后chiah hō͘ 伊食镇定剂á是安眠药来减轻痛苦。M̄-koh，对阿山tio̍h特别谨慎，m̄-nā án-ne，chit种阿片中毒者ê特徵之一是gâu讲白贼，所以为tio̍h beh分辨患者讲话ê真假，tio̍h调查看伊有偷藏阿片á无。而且因为患者若心理上过头绝望会去自杀，所以医生mā tio̍h随时记tiâu精神病学ê方法。因此，勒戒阿片对患者来讲，当然是真辛苦，主治医师也tio̍h谨慎注意，koh ài有耐心。经过努力ê结果，阿山渐渐有起色，chit两三工已经无禁食ê症状，koh有食欲，S氏医生当teh开始放心松一口气。Chit时，阿山soah来溜走，莫怪医生非常失望丧气。Kám讲一切lóng变成乌有，已经绝望ā？阿山溜走，除了去chhōe阿片以外，无可能有别ê目的。
果然tī市内四界chhōe了ê结果，到半暝chiah发现阿山去ê所在，就是tī lah-sap koh杂乱ê街头；阿山倒tī一间阿片薰馆ê眠床顶。
长时间禁食阿片，阿山对阿片hah-kah beh死，伊一定心内充满欢喜kah爽快teh食阿片。伊tī hia困重眠，无论án怎kā叫kā摇，lóng无法度kā伊tùi武陵桃花源叫tńg来。清文bē-tàng离开安子，所以无在场。景文、瑞文kah几位仆人kā阿山扛起lih车顶载tńg去厝里。Chit时，有人建议koh送tńg去病院，m̄-koh，in想讲病院对阿山来讲等于是监狱，送伊tńg去颠倒是无慈悲ê行为，所以in iáu是先kā伊送tńg去厝里。
清文接tio̍h已经发见老父ê报告就安心落来，m̄-koh随koh接tio̍h电话讲：「人已经往生à！」
阿山ê死hō͘ 人感觉是解bē开ê谜；kā伊扛入去伊ê房间ê时，景文iáu滚sńg笑讲：「Beh去阿片薰馆mā chhōe一间khah好ê所在，án-ne hō͘ 阮thiám kah beh死，无kā伊the̍h运搬费算bē hô。」In根本lóng无想讲伊已经死去à，听tio̍h老母阿娇悲伤哮起来ê时chiah知。Tī阿片薰馆发见ê时，in想讲伊是iáu活leh。瑞文讲：「真奇怪，我有听tio̍h老父teh困喘气ê声，而且身躯mā iáu烧烧，m̄-koh....。」景文讲：「我看tio̍h伊ê目chiu皮有teh tín动，m̄-koh....」言语上in án-ne断言，m̄-koh，心内iáu-teh怀疑是m̄是tī阿片薰馆发见ê时，伊to̍h已经死à？真是不可思议。Chiah三十分前ê tāi-chì，m̄-koh，记忆kah-ná陷落tī云雾中，无法度确实证明真相。所以in认为是tī车底ê时，伊不知不觉断气去；这是chit时siōng适当ê解释。M̄-koh，一直无法度排除tī发见ê时无感觉是teh扛尸体ê奇怪想法。
阿山ê死无hō͘ 真chē人现场感觉tio̍h，是真自然ê过程。
老母阿娇若讲是teh可怜丈夫，不如讲是对丈夫死kah hiah pháiⁿ看teh掠狂哀哭。大家族ê家长应该是tī家族同齐用心看护kah疼惜之下，tī豪华ê眠床顶瞑目chiah tio̍h。Taⁿ阿山kah-ná流浪汉死tī路边，这beh ná会看口得？而且无一个人看tio̍h伊断气，án-ne阿山kah-ná是灵魂无tè去ê鬼。老母对清文无停teh批评攻击讲：「伊会落到chit-ê地步，lóng mā是你出ê主意。」
清文承认m̄-tio̍h koh kā她安慰，m̄-koh lóng无法度hō͘ 老母平静落来，最后伊大声讲：
「阿母，请mài koh hiah-ni̍h激动。老父m̄是像（chhiūⁿ）lín所想像ê小人物，伊绝对无认为死亡是悲哀ê tāi-chì，koh khah无像阿母hiah-ni̍h迷信，kan-taⁿ讲hiah-ê无合故人意志ê话。请你详细看老父ê面容！」
阿山年老体衰土色ê面，浮出ná有ná无ê微笑；生前bat伊ê人，对伊乐观飘逸ê风采，到taⁿ iáu ē-tàng tùi伊ê面容看出。半开ê嘴kah-ná teh讲：「Tùi自然来生koh回归自然，有啥物thang悲哀leh？我用siōng适合我ê死法来死。」
十工后举行葬式。
清文想beh采用尽量简单ê仪式。台湾ê冠婚葬祭非常繁杂koh浪费，所以m̄是kan-taⁿ清文主张tio̍h极力来纠正，新时代ê人mā lóng抱仝款ê看法，而且像阿山chit款已经达到生死相同ê悟性，简单ê仪式颠倒khah sù配。M̄-koh，因为阿山是家长，而且享受长岁寿来往生，所以全家族无人beh听清文ê意见。尤其是阿娇，她认为阿山hiah-ni̍h pháiⁿ听ê死亡款式，为tio̍h beh回复伊ê名誉，洗清世间pháiⁿ听ê传闻，tio̍h大大铺排chiah ē-sái得。
所以，无论清文ê意向如何，阿山ê葬式是chit-ê城市前所未有ê盛大奢华。亲像神轿装饰ê棺木由三十二个人扛，绵延数百人ê送葬行列，鸣钲、phah鼓、pûn鼓吹等等闹热ê出山音乐，混合众女子ê哀哭声，形成一种奇怪ê交响曲，盛况空前。
身穿麻衫，头戴麻布三角帽ê孝男，跟tòe棺木ê边á teh行，cha-bó͘人坐轿跟tòe tī后壁。安子孔嘴痊愈ê情形真好，五工前to̍h出院，她chhōa清子参加出山ê行列。
「阿母，阿爸teh哭neh。」
清子kah-ná bē堪得hiah闹热ê行列kah哀哭震天ê送葬ê刺激，频频对老父感觉不安，所以来问老母：
「阿爸为啥物teh哭？」
「你gín-á m̄-bat tāi-chì，我已经kā你讲过阿公死去à。」
「M̄-koh，阿母你无teh哭，为啥物leh？」
幼儿ê疑问hō͘ 安子有一点á困扰，oh得kā她回答。每pái行到街路oat角ê所在，安子ē-tàng tùi轿ê窗帘看tio̍h清文ê形影；伊身穿麻衫，thuh拐á，穿草鞋，双pêng有人扶伊teh行。M̄-koh，清文tī chit-ê场合，kan-taⁿ ē-tàng表现风俗上充满形式ê哀伤，只不过he是kah伊真情哀悼老父往生无仝ê另外一种方式；所有ê人lóng是án-ne，尤其是chhiàⁿ来做孝女ê cha-bó͘人，甚至捻（liàm）坐tī仝轿ê幼儿ê kha-chhng-phóe hō͘ 伊哭，来忠实达成她ê义务。
以家庭做社会单位ê生活，一个人ê生死对伊本身ê意义kah感情，hō͘ 背后khiā-.teh ê庞（pâng）大家庭ê影遮tiâu-.leh，soah失去伊ê光辉。所以，像讲安子头胎夭折ê gín-á án-ne，十岁以下ê gín-á死亡，被用非常冷酷ê方法处理，kah-ná teh处理厝里死去ê狗一样。若讲chit-má chit-ê家长ê情形，he是为tio̍h beh夸耀家己ê富裕kah繁荣，无惜千金，大大铺排。清文chit-má陷落chit种旧传统，感觉真无奈。他想讲沿路teh看送葬行列ê日本人á是新时代ê台湾人，大概会笑伊讲：看你chit-ê款式！这to̍h是提倡社会文化进步ê男人ê后果。M̄-koh安子知影，清文chit-má ē-tàng充分忍受chit种ê侮辱。
无gōa久，埋葬完成了后，陈清文夫妇tńg来到厝。
Thǹg掉丧服，换穿清爽ê浴衣，两人坐tī二楼楼台ê藤椅顶。Hō͘ 死人入土为安，清文暂且放落肩胛头ê重担，大大吐一口气。夫妇两人一时无话，眺望外口。天空罩云一片灰色，水气饱满ê空气重kah bē tín动。白蚁成群teh飞，hō͘ 人感觉黄昏ê脚步近óa loh。
一只白蚁落入去咖啡杯á内，安子叫一声「Ai-ah！」，m̄-koh，清文不管，伊kā白蚁掠出来，kah-ná无啥tāi-chì，就kā咖啡lim落去。安子忽然想起几年前ê tāi-chì；tio̍h lah，是结婚了后无几年ê tāi-chì。Hit时，清文抱tio̍h希望进入官界服务，无gōa久伊去hō͘ 人排斥出来，当teh陷落困境ê时chūn，安子为伊泡一杯kha-lu-phi-suh饮料，却粗心大意，无看tio̍h杯á内落一只胡蝇，hit时，清文对她ê态度是非常恐怖ê激烈。Chit-má tī丧事期间，清文ê心情无法度hō͘ 激情入去，m̄-nā是án-ne，伊ê人格成长，冷静koh心胸开阔，安子感觉真欢喜。
「时间过了真紧，咱结婚已经十年ā，chit中间发生种种tāi-chì。」
「各种tāi-chì lóng有。」
「M̄-koh，虽然结婚已经十年久，咱iáu是gín-á ê想法，无了解生活ê方法，kám m̄是？」
「确实是án-ne，所以，hit工你为我做尊贵ê牺牲ê时，你若有三长两短，我想我会bē堪得。Chit十年中间，对我来讲是
受侮辱kah混乱ê时代，以后希望咱会有koh khah光荣ê时代。」
然后两人又koh恬恬眺望天空，kah-ná云雾一般ê白蚁阵，tùi陈家ê厝顶飞向天空，过无gōa久，蚁翼lak落来土脚；白蚁hō͘ 地基朽烂，柱á蛀孔，酝酿（ùn-jiòng）陈家败坏摧毁ê势面。M̄-koh，两人án-ne teh看，心内却teh想：过无gōa久，hō͘ 陈家改变ê m̄是白蚁，以后是咱ê时代。
