《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 第八章（更新版）
作者 庄司总一 着 杨东杰 指导 林俊育 台译 2017.05.07
清文ê决意真坚定，安子虽然有kā伊苦劝，m̄-koh lóng无法度改变伊ê决定。安子期待chit件事对in翁来讲是好ê试炼，以后tùi新生活出发，ǹg望对in翁本身á是对in两人会成做thang欢喜ê tāi-chì。
退出官界无gōa久，清文就受聘去长老教ê中学教册；he是长老教会经营ê学校，学生差不多全部 lóng是台湾人。起初清文头壳内对学校ê教师有轻视感，认为 in 是无法度驶向人生大海ê细只koh无力ê小船，或者是一旦出帆就会去tú-tio̍h凄惨海难ê hit种人。事实上，hit当时景气好kah会惊人，tùi远远来到殖民地ê教员中，mā有teh混日子ê流浪者。M̄-koh，清文实际做老师了后，chiah发见教育事业并m̄是伊所想ê hiah-ni̍h无价值koh无效果ê事业。因为是伊m̄免靠做老师来维持生活，而且hit间学校ê前身是伊细汉ê时所读ê学堂，也to̍h是伊ê教育摇篮ê关系，所以hō͘ 伊ē-tàng有亲密感来教育学生。尤其这是宗教教育ê学园，环境自然清纯，气氛mā真好，所以伊对教员ê看法就有所改变。
辞掉官厅ê头路，逃出浊流，开始ē-tàng静思家己自由学习ê身份，清文颠倒有机会放落重担，感觉真轻松。Hit时，伊常常tī食暗顿chìn前，陪安子出去散步，tiāⁿ-tiāⁿ行向南pêng ê郊外去。Hit tah是台湾人ê墓地，in并m̄是beh去pōe墓，是因为tī hia ē-tàng静思，thang好来敬虔祈祷。
起起落落ê旷野，一面是重重叠叠ê墓盖(khàm) leh，hiah ê墓是叫做风水ê马蹄形ná亲像扁扁ê土馒头ê墓。Hit-ê phòng-naih无平ê土仑á对面有一段 koân起来ê所在，hit tah是无墓地ê草埔，看起来有各各他ê头壳碗(译注：耶稣受钉十字架ê所在)ê款式，所以清文in两人kā它号做「各各他之丘」。Khiā tī hit-ê土仑á ê顶koân，tùi市区参杂ê厝顶看过去，ē-tàng仿佛看tio̍h台湾中央山脉tī云中连绵不断，mā ē-tàng眺望tī hia附近ê城墙残骸。Hit-ê kā古早ê市街围起来ê弯弯oat-oat城墙，mā hō͘ 文明ê潮流冲击崩坏去。两百年前kah-ná梦teh过去ê清朝遗迹，chit-má kan-taⁿ一部分留落来；石灰泥kah石头已经崩落，露出红土，杂草茂盛。Hit-ê留落来ê城墙一头，有一个叫做「大南门」ê城门；顺hit栋城门ê双重厝顶，青苔四界生湠，Chit种古城ê雅气会引出人ê艺术感，所以时常有人tī hia chhāi起画布动起画笔。土仑á ê草埔顶面，有chiâⁿ十个thǹg赤脚ê台湾gín-á，in发出可爱ê ki-ki叫声，悠哉悠哉lóng无惊惶ê款式，tī hia teh牵牛食草。黄牛kah水牛ê kha脊phiaⁿ顶，有台湾鸟kah-ná khiā tī岛屿ê石头顶面，一屑á都m̄惊，牛mā欢喜kā kha脊phiaⁿ借in khiā。日头一下落山，雀鸟á kah白头壳á虽罔无风，m̄-koh kah-ná是hō͘ 强烈ê风吹tio̍h，快速飞向树林内入去。有时chūn，chit只黄鹰受tio̍h beh沉落西山ê日头照tio̍h，展开它金色ê翼，飞过天空。空气不时lóng真ta燥，tī街路引起eng-ia ê季节风，tī野外也轻松吹过野草kah灌木。热天，常常beh有雷公雨ê款式，碧蓝ê天空无tiuⁿ-tî to̍h出现满天一大堆厚厚ê积乱云(译注：十种云形之一)，chit时ê日落天色hō͘ 欣赏ê人kah-ná心内mā染tio̍h玫瑰红，心情变kah koh khah súi。
Peh起lih chit-ê土仑á ê沿路，清明节ê时chūn，会tú-tio̍h带香、银纸、祭物来pōe墓á是拾(khioh)骨ê人，mā会tiāⁿ-tiāⁿ听tio̍h父母过往ê少女á是死翁ê寡妇teh哀哭ê声。
有一工，清文夫妇kah一个pōe墓了beh tńg去ê老cha-bó͘人相闪身。当in已经行到距离约五十公尺ê时，清文kah-ná想tio̍h啥物tāi-chì，对安子讲：「小等leh！」就赶紧se̍h翻头去jiok hit-ê cha-bó͘人。
「果然认m̄-tio̍h人ā。」清文随时翻头tńg来，感觉小khóa pháiⁿ势讲：
「想讲她一定是老母，结果m̄是；实在有够像(sêng) lah！」
「Ai-ah！Án-ne真无chhái。」
安子oa̍t头来看，看向hit-ê渐渐消失tī林投树林中ê老人ê背影，心内感觉tio̍h清文发现她m̄是亲生老母ê怀念心情kah in翁知影hit-ê人m̄是亲生老母ê遗憾。清文面露苦笑，m̄-koh mā m̄是hiah-ni̍h灰心丧志。总是，chit-má认m̄-tio̍h人，雄雄狂狂jiok去，可见tī伊心内，生母ê形影显然iáu未消失。
「你对老母ê tāi-chì iáu无bē记得neh？」
「实在是bē记得ê款，soah去认 m̄-tio̍h人。」
「无lah！M̄是面形ê记忆问题....。」
「确实是无bē记得；面形iáu小khóa会记得，m̄-koh，细汉时ê记忆khah无hiah稳当，而且阮父母离婚后，我kah她kan-taⁿ见面一二pái niā-niā。M̄-koh，因为是老父出手beh娶她，所以应该m̄是众人所讲ê hiah-ni̍h无好ê cha-bó͘人。」
清文m̄惊；以前连对in bó͘ 都隐瞒m̄肯讲ê tāi-chì，chit-má hiah-ni̍h坦白án-ne讲，真是小khóa不可思议。这kah-ná是看bē起chit-má chit-ê无正义ê老母，á是以前隐瞒家己ê见笑事(tāi)，chit-má感觉颠倒应该tio̍h讲出来；总讲一句，是出tī无虚伪ê怀念所自然讲出来ê话。Tùi伊ê目色ē-tàng看出来，m̄-nā是chit件tāi-chì niā-niā，最近清文对安子无拘束ê坦白态度，安子感觉真欢喜。
「Tùi瑞文听tio̍h你ê运命了后，我对老母ê tāi-chì常常挂tī心肝头，真可怜neh！Chit-má m̄知beh án怎chiah好？Kám讲无论án怎，lóng chhōe无方法thang见面？」
「可能是án-ne。听讲hit当时她tńg去tòa tī嘉义附近田庄ê外家厝，m̄-koh，以后去tó位to̍h lóng无消息。Tāi-chì已经过了二十gōa年，mā有可能她已经往生à。横直chit-má koh再见面，mā无啥物路用ê款。」
「Bē án-ne lah！若是神赐大恩，一定会引chhōa她来kah你来会合。我mā感觉你真可怜，我一直认为你是手不动三宝（娇生惯养）大汉ê cha-po͘ gín-á，m̄-koh，其实你有想bē到ê苦楚neh。」
「Mā无讲有啥物苦楚lah！Tùi家己ê出世来讲，应该是siuⁿ过受恩赐。若是hit当时母kiáⁿ lóng hō͘ 人赶出去，咱两人to̍h无法度有chit-má ê结果；现此时可能是tī tó一位lâ-sâm ê田庄，做一个下贱ê苦工á是作穑人。Tùi chit点来讲，我一直非常感谢老父阿山。」
「话虽然是án-ne讲，你bē记得koh看bē起抹大拉ê马利亚(译注：四福音书跟tòe耶稣ê女人) ê tāi-chì，he可能m̄是利己主义。」
「M̄是看bē起lah！M̄-koh，假使讲我现实ê亲生老母是下贱ê，她ê血若tī我ê血中净化，变成灵性上伟大ê母性。所以，阮宁可mài见面khah好。」
对chit种运命ê人常常有一句话án-ne讲：M̄认输就看破。，kám m̄是？Kám是伊ê心本来to̍h看bē起koh恨in老母，chiah惊去见面，á是伊无teh关心？不管是tó一种情形，chit-má tùi伊认m̄-tio̍h人ê事来看，安子并无ǹg望听伊坦白讲：「无论如何，想beh见面to̍h是lah。」虽然是án-ne讲，对记忆中无清楚ê老母hiah-ni̍h真实teh爱慕，安子无ǹg望清文有浪漫主义ê感伤；想tio̍h三年做官的生涯中，清文hō͘ 世俗、乖癖、受气、懊恼khîⁿ-tiâu ê灵魂中，安子ài伊ē-tàng洗清hiah-ê lâ-sâm，回复单纯ê精神。
「咱án-ne ê祈祷，kám无sêng Mi-lé (译注：Millet，法国画家，华语译做「米勒」)所画『晚钟』内面ê夫妇？咱虽然m̄是作穑人，mā会体会作穑人ê心，无体会mā bē-soah得lah。」
Peh上土仑á，安子ê面hō͘ 日落ê天色染kah变玫瑰色，安子小khóa默祷了后án-ne讲。清文轻轻á微笑，恬恬无应话。安子感觉伊无挂虑任何项事，thang讲伊是恬静温和ê翁婿。「不管是掖种ê女人á是切割石头ê人，Mi-lé chit-ê画家tī平凡ê生活中，确认真实ê súi kah价值，其中mā有耶稣ê精神。你认为án-ne ê想法是弱者ê哲学，m̄-koh，人类ê本质是软弱ê，所以人类ê坚强有一定ê限度。你是一个真好ê人物，精神mā真旺盛，当然mā有野心。你想beh做官，你讲这是你ê大失败；总是，失败m̄是做官hit件tāi-chì，我想是你本身ê问题。为tio̍h beh加强提高家己ê事，所以去要求社会，he是无chhái工ê lah！Ná亲像寄生á ê壳是借来ê，容易剥离、毁坏，而且内面是hiah-ni̍h-á软弱。你虽然ē-tàng做官，若记tiâu耶稣所讲ê：想beh做头ê tio̍h做人ê路尾；án-ne，我想你to̍h m̄免艰苦kah hiah凄惨落魄。无lah！你iáu是辞掉khah好，我实在mā 无真ài你做威严ê官员。」
安子第一pái án-ne对in翁讲kah hiah坦白，而且无客气用说教ê口气teh kā in翁khau洗。两人融入tī chit-ê土仑á ê美丽大自然，沉浸tī心胸开阔ê敬虔气氛中。清文kah-ná尾hō͘ 人踏 leh，咬人bē-tio̍h人ê狮á hiah-ni̍h温和，实在是不可思议。伊kah-ná悔恨家己ê过去，àⁿ耳孔听in bó͘句句lóng有道理koh充满真情ê话，后来ná亲像恬恬á phah开心门ê款开嘴讲：
「确实....，我确实真骄傲自大，lóng无顾虑家己ê下脚手，kan-taⁿ想beh peh上天，chiah会失败kah siak落来。佳哉我iáu未peh到siuⁿ koân ê所在，所以结果无受tio̍h真大ê伤害。虽然我m̄是戆kah lóng无注意tio̍h你tú-chiah所讲hiah-ê tāi-chì，只是我无法度控制流tī我身躯中ê血；我继承支那南部人ê血，个性好强，koh有物欲ê野心。若是tī别ê环境中，譬喻讲我若生做支那人，我ê个性可能会koh khah激烈，mā有可能会变成权谋弄术ê人。」
「M̄-koh，你chit-má ，kám m̄是日本人ā？你比普通ê日本人有koh khah koân ê教养kah真深ê学问，是一个堂堂ê日本人。」
「是lah！我感觉号日本人ê名是光荣ê tāi-chì，m̄-bat后悔过；若无án-ne，我ná会有法度kah你做伙，而且chit-má tī chia mā iáu ē-tàng做伙。我所讲ê血m̄是指民族上ê偏见hit种感情上ê tāi-chì，请你mài误解；he kan-taⁿ是个性ê问题，致使我tī办公室hō͘ 人抵制；我无想讲he是hō͘ 人歧视，mā bē án-ne想；我想he是家己态度ê错误，bē-sái埋怨tit。Oeh，安子，当初你来到陈家ê时，对陈家ê风俗改良kah提升生活水准ê做法，有保守思想ê你kah有进步思想ê我，意见上有差别，而且无管你tī边á不安kah流chhìn汗，我犹原照我家己ê意思去做。厝里ê人目头结结对我起反感，kah我作对，我却傲气十足，phah胸坎á对你讲：『若采用温柔、phô͘-tháⁿ ê方法，对方反tńg会展威起来。威严ê高姿态....。』我对家族高压ê权势主义，chit-má想起来，已经降临tī我家己ê身上。这是神对我ê警戒教示，我lóng bē责备埋怨啥人。M̄-koh，我最近渐渐心平气和起来，尤其是kah你做伙来chia散步，心情有不可思议ê平和气氛。」
清文khiā起来，伸腰hah-hì一声，kā黄昏ê空气深深吸入去。伊忽然想起前几工tī学校教学生ê hit首 Ui-liam-suh O-su-oh-suh (译注：Williams Wordsworth，英国诗人，1770-1850) 所作ê诗—《美丽ê黄昏》，就轻声念出chit首诗ê第一chōa kah最后一chōa:
美丽ê黄昏，心静自由自在； 神常常kah你同在，咱虽然m̄知。
安子听了in翁坦白ê忏悔kah静静自我反省ê话，真受感动，khiā起来óa靠tī in翁ê身上，请伊koh kā hit首诗唱一遍。她kā清文ûn-ûn-á发音ê诗句当做音乐来听，忽然感觉想beh kā伊lám ân-ân ê爱心，充满她ê胸坎，目屎soah teh beh流落来。清文真艰苦心；chit chūn伊ê心内iáu bē-tàng稳定，bē-tàng自由，伊无想讲当真ê告白中mā会有隐藏虚假。
伊chhōe求心灵ê安歇是事实，m̄-koh，伊无真正得tio̍h in bó͘所想ê安歇。Tī hit-ê「各各他之丘」光辉ê黄昏，伊ê灵魂镇静落来，变成谦卑敬虔ê人，ē-tàng kah古早人仝款相信创世记kah基督ê记戴。总是，若koh再落去世俗ê街路，hō͘ 家族制度ê墙包围起来，一踏入册房，hit-ê信仰就koh崩盘去。阅读《向权力ê意志》等ê册，hō͘ 「Tio̍h强起来！Tio̍h强起来！」ê hoah声惊kah起烦恼。我tio̍h kā力量kah才能用tī啥物所在chiah好neh？一生做一个神学校ê教师，我kám会满足？是m̄是应该满足？若是持看破ê态度，可能无gōa久就会养成惰性，真容易就ē-tàng习惯过安隐ê生活。Án-ne讲起来，我kám hiah简单to̍h会屈服？我无ài平和、安静koh稳定，颠倒对人生有激烈奋斗ê性格，我若kā它硬at弯曲来减弱它ê力量，án-ne kám chiah真正是美好ê生活方式？
「弱肉强食，适者生存」是科学讲法ê战争kah革命，chit-ê科学ê神话带hō͘ 人类残酷ê屠杀。M̄-koh，耶稣ê神话kám无仝款teh杀害人类？为tio̍h想beh净化灵魂，soah kā灵魂变弱，无kā理想hō͘ 人类soah hō͘ 人类产生幻觉。
总讲一句，清文并无in bó͘所想ê，心情hiah-ni̍h安定落来。伊ê梦真简单就破碎loh；伊ê发展被阻止ê愤怒kah失意，kah-ná用吗啡止胃痛仝款，kan-taⁿ暂时用宗教ê热情来掩盖leh。
Tī chit-ê时chūn，厝里发生真费气ê问题；财产继承ê tāi-chì重新koh再提起，渐渐具体化起来。清文退出官界ê现此时，本来无必要硬进行ê tāi-chì，事实上，已经bē记得了了à，因为当时是家己讲起ê，所以chit-má soah bē救tit。
陈家全部家族ê人tiāⁿ-tiāⁿ聚集tī大厅，一再协议。习惯上是所有ê继承人平均分配财产，虽然有平等分配ê原则，m̄-koh，实际上是无可能ē-tàng正确公平分配，所以各人意见无仝，iáu是会发生纠纷。事实是小弟景文所分配ê ná像比阿兄超过无应该ê chē，所以清文无欢喜。He m̄是份额chē少ê问题，是因为大家对小弟偏心ê态度siuⁿ过明显。话虽然是án-ne讲，因为对清文来讲，hit ê金额mā m̄是大kah无重视bē-sái得ê程度，目chiu放 kheh-kheh，khah大方leh就无tāi-chì à。总是，清文ê忍耐无够，就提出异议，soah无意中tio̍h坚持家己ê主张。Tāi-chì就án-ne tùi金钱问题变成感情问题。起初大家iáu对伊ê异议轻轻来接受，á是siōng-chē kā伊khau洗ê程度。M̄-koh，清文头尾lóng无beh让步，所以soah尾大家团结，ǹg伊表示露骨ê挑战态度。
「各位，我再三提起，我反对大家ê意见，决断m̄是出tī贪婪ê心，请大家了解。无m̄-tio̍h，小弟景文确实勤勉工作，hō͘ 陈家繁荣，增加家产，我mā十分承认伊有功劳tī-.leh，咱全家tio̍h kā伊感谢。M̄-koh，tùi另外一方面来讲，这若是无陈家ê背景kah资产，mā是无法度有chit-má ê家产。本来咱习惯『九世同堂』ê方式，无论经过几代lóng无beh分厝，夸耀咱是大家族主义。总讲一句，家产m̄是特定ê某一人专有，我想应该是附属tī chit-ê家族ê物件....。」
清文无用hō͘ 人khah好了解ê讲法，颠倒用硬beh说服人，koh小khóa有恐吓意味ê演说口气。早前若用chit种手段，可能有相当威吓（hek）效果。M̄-koh，chit-má jú án-ne做，大家jú无beh听，只是jú增加轻视kah反弹而已。大家并无乖乖忍受，颠倒私下chhi-chhi chhu̍h-chhu̍h，无teh听伊讲话；有人嘴舌tak-tak叫，mā有人公然挑战。清文四界，看看无一个赞同伊ê讲法，ē-sái讲是「四面楚歌」ê状态。伊chit-má chiah知影大家对伊相当尊敬ê想法是大错误ê，in只是对伊ê官服ê敬畏kah惊惶niā-niā；伊chit时chiah惨痛觉醒。伊想beh徵求同意kah支援ê老父阿山，mā是表情无好，用责备ê口气讲：
「Oeh！清文，你小khóa khah撙节(chún-chat)leh！Mài讲kah一大堆道理来反对。这已经有经过众亲族ê充分协议，mā是众人目chiu 金金teh看所决议ê，绝对bē有无公平ê tāi-chì，kám m̄是？」
老父阿山对chit-ê kiáⁿ hiah-ni̍h认真teh反对，真bē-tàng了解，mā感觉非常苦恼。准讲伊对in kiáⁿ ê心理 ē-tàng了解，伊mā bē硬beh khiā出来为伊辩护。Chit项tāi-chì ê决定并m̄是多数决，是照惯例尊重长辈ê意见，所以若阿山有一点 á热心，发言表示权威，清文ê主张mā m̄是讲bē通过。M̄-koh，阿山ê个性是一个无 ài争执koh嫌麻烦ê人，一屑 á 都无beh发号令。
清文ê目chiu向边á ê景文lió一下。伊是敌对ê当事人，却无因为多数赞同伊ê意见表示得意，mā 无露出一屑 á兴奋ê款式，真是不可思议。Hit种一屑á在意都无ê款式，hō͘ 清文想beh kah伊讲话都感觉真倦(siān)，所以就oa̍t过去看三男瑞文，m̄-koh mā无得tio̍h伊ê支持。虽然几nā pái ê协议，瑞文lóng有参加，m̄-koh，chit-má却kah-ná哑口bē讲话。瑞文可能感觉无论家己án怎主张、要求，大局lóng bē有改变，该得ê当然lóng得会tio̍h，所以看起来真冷静ê款式；mā有可能伊想讲无小心加讲话，家己应得ê份额会hō͘ 人减少去，所以谨慎张持(tiuⁿ-tî)，无发言。
清文koh再对大家发言，m̄-koh，声势kah面色lóng已经显出khah输ê势面。
「显然大家对我有误解tī-.leh，我绝对m̄是自私自利teh讲话，只是想讲我是长男ê关系，为tio̍h家族ê兴起，tio̍h照顾 chit-ê大家族。景文家己积聚ê财产当然tio̍h归伊所得，m̄-koh为 tio̍h chit-ê家庭工作，来ho͘伊二十甲ê不动产，我认为有khah过份一点á....。」
讲到chia，厝里ê一位阿叔khiā起来，身躯àⁿ过桌á，挥手极力反驳清文讲：
「Oeh！清文，chit-má mài koh讲 hiah-ê哭iau ê tāi-chì lah！你讲景文ê功劳额siuⁿ过份？你kám有啥物义理thang讲？Kah伊比起来，你到底为家庭尽过啥物气力？你去日本内地留学，中学到大学十年中间开掉gōa chē钱？而且娶一个日本bó͘ tńg来，起新厝、食美食、穿好衫，奢华浪费，你kám无想tio̍h chiah-ê tāi-chì？」
「阿叔ê话有khah超过，我并无感觉有hiah-ni̍h奢华。」
清文án-ne应话了后，四界就发出「mài讲白贼」、「mài乌白讲」等等ê反驳kah骂声；清文若针对chiah-ê话辩解，大家to̍h koh khah喧嚷起来；照án-ne落去，会变成bē-tàng收soah。
「大家静落来！大家静落来！」
坐tī主席位，名叫林明哲ê老人用sau声来压制大家。伊挂一副龟壳框ê老花目镜，留白山羊á 须，身材kah-ná鹤hiah-ni̍h瘦抽，财大koh有学识教养koân ê气质。Tī分财产等ê场合，lóng会tùi家族亲戚外面请一位chit款德高望众ê人，拜托伊来判断tāi-chì ê是非曲直chiah做决议；总讲一句，to̍h是扮演kah-ná议长ê角色。
等候大家安静落来，林先生就慢慢á开嘴讲话。伊ê声带kah-ná生青苔，发出低低koh粗粗ê sau声，koh齿缝(phāng)真chē，会漏风，致使发音mā无真清楚，hō͘ 人感觉kah-ná咙喉生sian hiah-ni̍h oh得听。
「清文大兄，你所讲ê mā有一kóa道理tī-.leh，我mā bē-tàng无kā你承认。M̄-koh，继承者m̄是kan-taⁿ你kah景文niā-niā，lóng总有十一房hiah-ni̍h chē。我若接纳你ê要求，其他ê人mā是会讲话，我mā bē-sái无听in ê话。Án-ne tāi-chì m̄知 tio̍h到tang时chiah会有结论。当然koh无gōa久，你就ē-tàng成做家长，原来ê陈家tùi chit-má开始就变小，chit项事mā m̄是值得庆贺ê kám是？我有了解你ê感受，m̄-koh，án-ne ê家庭分裂，本厝就会缩小，这是当然ê tāi-chì，mā是真不得已ê，我有听讲这是lín兄弟所希望chiah来决定ê。第一来讲，阿山老先生 iáu真勇健，何必tio̍h hiah-ni̍h麻烦neh，这实在是....。」
林先生话讲到chia soah起含糊。实际上，老父在世ê时 to̍h beh分财产，除非是老父已经衰老，á是破病来失去执行家政ê能力，若无，因为兄弟之争成做一家bē和ê原因，绝对m̄是名誉ê tāi-chì。林先生无意中表明chit点遗憾ê意思，m̄-koh，事到如今，讲啥lóng已经无路用loh！ 「若án-ne，照阿兄所讲ê，景文先生ê功劳额有khah超过一kóa，其实我mā有想过，是chē少加减niā-niā。」林先生贤明附加但书，用是m̄是 ē-tàng让一步ê口气，kā视线移向景文ê面。林先生是一个富翁koh德高望众，chit件事bē-sái kah伊暗中勾结。Hō͘ 伊án-ne讲，景文soah心内chhia̍k一下。M̄-koh，林先生ê话并无特别硬ài伊让步ê意思。
「你看án怎？景文君，二十甲中间让五甲左右ē-sái得bē？」
「林先生，你讲kah ná seng-lí买卖leh，án-ne m̄好lah！这是神圣ê 财产继承。M̄-koh，我无家己提出啥物要求，完全委托在座各位尊长ê安排。若讲kan-taⁿ分一只猪á-kiáⁿ hō͘ 我，he mā是无可奈何ê tāi-chì。我bē去吊tāu自杀lah，请免烦恼。」
林老先生因为一直bū-sà-sà bē收soah ê问题当teh厌气，终其尾用讲sńg笑ê口气来问景文ê意见，景文mā用koh khah gia̍t-khiat ê话kā伊回答，结局大家紧张ê气氛忽然化解，soah大声笑起来。In ê笑声ná亲像波浪向清文溢过来，伊感觉无啥物好笑，是伊hō͘ 人当做笑柄而已。林老先生ê chit句「让步」，本底想beh向沉重ê场面投入一帖清凉剂，无想讲药效siuⁿ过强，soah全场大声笑起来。林老先生就án-ne改用正经ê口气，对身为家长ê阿山小khóa有批评ê语气讲：
「阿山先生，你一向对tāi-chì lóng无要无紧，m̄-koh，chit项tāi-chì是你一生kan-taⁿ一pái ê重大问题，请你tio̍h慎重考虑，tú-chiah讲ê二十甲土地，希望你kā心内话讲出来。」
「无lah！我pháiⁿ讲出来lah！若接纳长男ê意见会án怎？次男一定bē服，讲kah tio̍h-beh吊tāu自杀。这一定tio̍h请你定夺chiah会解决。M̄-koh，我mā认为二十甲有khah无合理，若一半比较khah适当lah！」 阿山 án-ne一讲，大家随停止笑，又koh开始杂嘴反对，林老先生目头结结。无论阿山是一个gōa-ni̍h-á好好先生，对siōng尊重ê人mā bē-sái态度hiah-ni̍h无大无细。林老先生感慨世风浅薄，beh án怎来处理tú-chiah ê场面，伊soah sa无寮á门。Chit时，清文忽然使khioh-ka̍k（自暴自弃）叫讲：
「Mài koh讲à lah，林先生，请照起初ê协定去做。」
「Ai-ah！Án-ne问题就完满解决loh！最后就是抽签ê手续。」林老先生担头轻松落来，就催办事ê人紧进行。亲chiâⁿ中间负责办事ê人，开始翻阅财产目录kah相关ê文件。
Kā祭祀公业(祭祀祖先、kiáⁿ孙ê教育、慈善事业费)、养赡(父母ê养老金kah葬式费)、嫁妆（女子ê出嫁费用） chit三种金额扣除了后，kā财产分配hō͘ 众继承人。Chit-ê财产包含现金、不动产、日用家具等，分做平大份了后照抽签来分配。
「Án-ne最后ê决定：XX郡XX庄ê水田六甲做第一号—天，第二号—地，第三号是安平街ê盐田—人....。」
照án-ne，kā每一份财产用天地人、春夏秋冬、仁义礼信等做符号标示，koh kā每一个符号写tiàm纸里，卷起来做签条。然后选一个黄道吉日，koh再tī亲族ê严格环视之下，进行抽签分配。
一直争执不断ê财产分配问题，就án-ne解决好势。清文感觉家己真戆，为啥物tio̍h hiah-ni̍h认真去争取neh？伊所要求ê m̄是金钱，mā m̄是土地，只不过是希望hō͘ 大家承认伊做一个长男ê权利，保tiâu伊ê体面niā-niā。伊án-ne用心去争取，结果颠倒koh khah惨，伊ê面子无了了，变kah真无光彩。
清文忽然感觉世间真无聊。就算是tú-tio̍h强风大涌，mā tio̍h ài有战斗ê对象；chit-má伊kan-taⁿ tio̍h面对家己，伊ê心内充满各种ê思想，m̄-koh m̄知beh án怎去克服处理。伊ê心理有病à，kui身躯 lóng无气力，伊chiah三十一岁niā-niā，就面对现实中不可思议ê厌倦阶段。Án-ne落去bē-sái得；kan-taⁿ óa靠信仰，而且是参杂理智ê自我信仰，he是kah-ná亲像teh食吗啡hō͘ 家己困落去，绝对bē-sái得。
Tī chit款ê情形下，清文kah一般人仝款，忽然想beh去旅行。伊bat想过tio̍h出国旅行一chōa。总是，促成chit-ê计画马上实行ê动机是伊去tú-tio̍h一件tāi-chì。
He是圣诞节暗时发生ê tāi-chì。Hit暗，清文想beh去安子ê教会看看leh。
「Eng暗我想beh穿台湾服去，你感觉怎样？」
清文出门chìn前真罕得án-ne问；平常出外伊lóng是穿西装á是日本和服。
「我毕业tńg来ê时，老母替我订做ê hit套衫，请kā它hiaⁿh出来。我lóng iáu m̄-bat穿过，一半pái kā它穿穿leh mā bē bái，kám m̄是？」
清文chit时无啥物理由，竟然真难得beh穿台湾服出门。
两人就án-ne来到日本基督教会ê门口。Hit时，安子tú-tio̍h一个女信徒，两人就tī阴暗ê前埕khiā teh讲话。清文想讲cha-bó͘人话长，khiā tòa hia戆戆 á等mā m̄是办法，m̄-koh，伊并无想beh家己一人先入去礼拜堂，所以kan-taⁿ peh起lih教会ê门廊看māi。入口ê所在有一张细只桌á，有一张写「接待」 ê字条垂落来，hō͘ 人感觉是tiāⁿ-tiāⁿ看tio̍h ê普通开会场所ê款式，kah chit时tú好传来「平安夜」ê儿童合唱声ê圣殿无啥对tâng。
Tùi hit-ê入口tú好有五六个男女挨挨阵阵teh入来，hit位接待ê人一屑á都无信徒ê款式，用无情理ê口气讲：「Bē-sái得，bē-tàng随便入去。Lín kám是信徒？」可能是有非信徒想beh入去，清文想讲欢迎都bē赴à，ná会有chit款无通情理ê教会？Chit时，伊hō͘ 人挤(chiⁿ)到接待ê所在，接待ê cha-po͘人展开双手，挡伊ê路讲：
「你，m̄-thang，m̄-thang！」伊用kē路ê台语讲，然后嘴里chho̍p-chho̍p念：「实在无伊法，连清国奴也beh入来！」
清文起惊kah gāng去。Chit种骄傲koh无感性ê态度，kám ē-sái算是基督徒？清文感觉真意外；意外变受气，清文tī无意识中用激动ê目神kā伊睨(gîn)。Chit-ê接待ê人ka短头毛，有小khóa白头毛，五十岁左右，目眉kah嘴须乌乌，kah白头毛无啥对tâng。伊ê目神尖利，kui个人看起来汉草真好；tùi伊身上所穿ê罗纱ê khiā领服装，hō͘ 人一看就知伊是一个官员中职位siōng低ê人。
清文并无想beh辩解，讲伊是教会会友陈安子ê翁。
「惊死人！Chit间教会饲一只凶霸霸ê顾门狗？」
清文kan-taⁿ án-ne nauh一句，就tùi门廊行落去，开门chông出教会。安子马上jiok过来。
「你，小等leh！因为秋山先生m̄-bat你....。」
清文一句话都无回，一直chông beh tńg去，到一间台湾厝宅前约一百公尺ê所在chiah hō͘ 安子jiok-tio̍h。安子掠tiâu伊ê长衫手ńg，苦劝讲：
「秋山先生讲伊真失礼，我若kah你做伙入去，就bē发生chit款tāi-chì。请mài受气，咱koh来去教会。」
「Kah-ná台湾人无权利入去。」
「Hit-ê人讲hit款失礼ê话？」
「放开我ê手ńg！」
「Hit-ê人hō͘ 教会真头痛，伊ê头脑小khóa怪怪。」
听讲秋山chit-ê人是早前满州ê鲈鳗，是行为无好ê cha-po͘人。因为伊以前ê恩主是一个相当有地位ê官员信主，为tio̍h beh报答伊ê恩情，最近有teh出入教会。伊本来lóng无信仰，听牧师ê讲道常常lóng teh tuh龟，m̄-koh，像讲排椅á lah，算人数lah，chiah-ê事务性ê khang-khòe，伊lóngē-tàng做kah真轻khó。Án-ne算是bē bái，m̄-koh，伊eng暗ê粗鲁骄傲态度，教会mā感觉来了一个怪人，真oh得处理。虽然有chit-ê缘故tī-.leh，m̄-koh，安子chit-má无时间thang kā in翁解说；准讲有说明，她mā无法度hō͘ 清文马上了解来体谅，这hō͘ 安子非常为难。
「Hit-ê人kah-ná鲈鳗leh，mài kah hit种人受气，这是难得ê圣诞节，请回心转意，咱 koh tńg来去教会lah！」
「Án-ne讲，你lóng无teh挂意loh，因为你是伟大ê日本妇人。」
「M̄是án-ne lah！我会叫伊kā你会失礼。你若án-ne tńg去，我会真艰苦。总讲一句，咱koh来去教会lah！」
「无ài lah！放开我ê手ńg！」
清文坚持hàiⁿ开手ńg，hit-ê力头hō͘ 安子ê身躯phiân去撞tio̍h厝壁。Tī安子惊kah gāng去ê时，清文已经消失tī乌暗中。
