《《陈夫人》日译台e5台湾小说 第一部》

 | | | 转寄

《陈夫人》第一部 第七章（更新版）

作者 庄司总一　着 杨东杰 指导 林俊育 台译 2017.04.30

过了年，安子ê身体iáu是无爽快，倒tī眠床顶，mā无法度kah顶年底仝款，kah in翁做伙去街á买有写吉祥对句ê春联。虽然其中有一个春联án-ne写：「喜溢高堂椿萱茂，庆钟洞府琴瑟和」，m̄-koh，今年无办法有像chit款thang欢喜ê情景。新正（chiaⁿ），安子kan-taⁿ食一块甜粿，只有kā新年ê气氛小khóa用舌tam一下niā-niā。正月初一hit工中昼，气温koân到摄氏40度，无适合新年ê气氛。

一般人ê病kiáⁿ期已经过去，m̄-koh，安子iáu是吐bē停，lóng无食欲，身体一工一工消瘦落去。清文渐渐心情忧郁bē爽快，无ài讲话。安子想讲kám是她家己一直无爽快，倒tī眠床顶，chiah致使清文感觉无趣味，而且看伊身体渐渐衰弱，soah开始烦恼in bó͘ ê身躯；本来是欢喜安子有娠，chit-má 却烦恼安子若无tú好可能会流产，所以hō͘ 伊感觉不安。M̄-koh，有一工，清文来到她ê枕头边，讲：
「你看怎样？咱chhōe一工来做人工流产，kám好？Gín-á随时ē-tàng koh怀孕来生，kám m̄是？」

清文án-ne讲ê时，安子心内感觉m̄是滋味；「gín-á随时」 chit句话，hō͘ 人听tio̍h 感觉是一种冷淡无热切koh无谨慎ê口气。受气hit当时，清文tú听tio̍h她有娠，伊满心欢喜牵她ê手讲：「圣Ga-bu-li-l（Gabrial，天使长）终其尾来报喜loh！」。Chit两种情况比较起来，差别真大，安子感觉孤单不满。
「医生kám有对你讲我ê身躯chih载bē-tiâu？伊bat对我讲chit-má iáu未到tio̍h采取最后手段ê必要时刻。」
「讲是án-ne讲，m̄-koh，你ê身体hiah-ni̍h衰弱，我chiah会án-ne想。准讲你忍受艰苦，勉强kā婴á生出来，mā是无法度保证是健全ê gín-á，而且你ê身体若有万一ê tāi-chì发生，to̍h无thang补救loh！」 「无问题lah！医生有保证，一切lóng有神好旨意ê安排。假使知影会生出智障á是残障ê gín-á，我想这mā是咱人类tio̍h去面对，来kā它好好处理ê tāi-chì。」
「无聊！」

清文用轻视ê口气讲，koh露出kah-ná无欢喜ê pháiⁿ面chhiuⁿ。
「Ai-ah！真失礼。无lah！无hiah无聊ê tāi-chì！咱会生一个受祝福ê优秀ê gín-á lah！我时时刻刻teh期待—gín-á若会像爸爸，有勇壮ê体格，聪明ê头脑，是一个完全传承你ê gín-á，我to̍h会真欢喜neh。」 He是安子真实ê ǹg望，lóng无扶tháⁿ ê意思，m̄-koh，tī清文小khóa火大ê chit chūn，soah hō͘ 伊感觉有扶tháⁿ ê口气，这mā是难免ê lah！既然是án-ne，伊m̄是m̄知in bó͘ bē讲白贼ê正直性格，若beh koh khah受气是无理ê。
「你最近kah-ná有啥物tāi-chì teh烦恼ê款，若是为tio̍h我，he是khah无要紧；你是m̄是有其他烦恼ê tāi-chì neh？」
「无lah！」
「Án-ne to̍h好。若有艰苦心ê tāi-chì，请随时kā我讲讲leh。我án-ne kan-taⁿ倒tī眠床顶，hō͘ 你感觉真烦，而且我koh bē-tàng kā你tàu做啥物，可能án-ne soah hō͘ 你bē-tàng kah我参详tāi-chì，m̄-koh….，tio̍h lah！无gōa久前ê财产问题，chit-má变án怎ah？最近lóng无听你讲起chit件tāi-chì。」
「你án-ne烦恼东烦恼西，m̄好lah！这对你ê身体无好。有关财产分配ê tāi-chì，我已经bē记得à。景文kah-ná是考虑你teh破病，最近mā lóng无koh来；有时相tú-tio̍h，我提起Chit件tāi-chì，伊kah-ná无啥物心思，就讲tùi别项tāi-chì去。这本来是伊家己先提起ê问题，实在真奇怪。」

清文讲tio̍h kah自身有关ê tāi-chì ê时，bē输小弟hiah认真，m̄-koh，chit-má soah讲bē记得，所以清文ê忧郁显然kah hit-ê问题完全无关系。安子想讲一定是kah伊ê职务工作有关系；以前她bat问过hit-ê问题，m̄-koh，清文含含糊糊回答，kah-ná尽量无ài去kha̍p-tio̍h chit-ê问题，看起来相当伤脑筋ê款。安子bat小khóa听讲in翁tī办公室内无啥受欢迎，m̄-koh，最近引起排斥运动等等ê tāi-chì，她一点á都m̄知影。既然翁婿无beh讲明，安子感觉对公务方面伊mā不便插嘴；虽然心痛，她mā是就án-ne，无beh koh提起。

Án-ne ê日子一工一工过去，安子临盆ê日子到à，生产过程非常无顺，胎儿hō͘ 老母足足艰苦两日两暝，终其尾chiah生出来。 总是，chit-ê gín-á拒绝出世做人ê光荣，却tī暗暗ê所在来死去，因为脐带ân-ân卷tiâu伊ê颔颈。

男婴ê发育相当好，夫妇两人更加灰心失望。若是心脏小khóa有teh tín动，m̄知gōa好leh！Án-ne 伊to̍h会哭、会笑，koh会读册、谈恋爱，mā有优秀ê思想kah伟大ê行动，有无限发展ê可能性。Án-ne kā有活命ê恩惠kah趣味放弃，hiah-ni̍h无胆to̍h死去，做老父ê清文感觉chit-ê婴á实在有够乱来，心内非常受气。M̄-koh，做老母ê khah单纯，她感觉连一分钟ê生都m̄知ê死实在是全无意义；受一点á祝福都无ê婴á，实在有够可怜。安子无kā婴á当做死去，kah-ná伊iáu活leh hō͘ 伊困tī身躯边，禁bē-tiâu kā面贴tī无血气冰冷ê婴á ê面。 连ta-ke阿娇mā来到眠床头，流目屎讲真可惜，表示遗憾，讲出真怨叹ê话：
「所以我m̄是有kā你讲过，ài请道士来诵经安胎，pháiⁿ器具mā tio̍h贴安胎符。M̄-koh，你感觉我讲ê话无路用，无beh听，chiah会致到chit种ê不幸。总是，你iáu少年，以后iáu ē-tàng生几nā个gín-á，m̄-koh，chit-ê婴á bē-sái án-ne khǹg leh，因为死去ê婴á有鬼附身。」

阿娇án-ne讲了，就命令cha-bó͘-kán-á kā死婴tùi安子身边抱走。
「Ah！Chit-ê婴á你beh kā伊怎样leh？」
「Tio̍h kā伊tàn落去水里。」
「Ai-ah！Hiah残酷！Βē-sái对婴á做hiah-ni̍h可怜ê tāi-chì lah。阿母，chit-ê gín-á死去à，我无beh kā伊浸tòa水里，mā bē kā伊用火烧。」
「死去ê gín-á无án-ne处理bē-sái lah！若无kā死婴á tàn落去水里，伊会变做鬼来kā你作怪，你to̍h bē-tàng koh再生kiáⁿ。M̄-nā是án-ne，咱全家mā m̄知会遭遇tio̍h啥物款ê灾厄neh。」
「我无ài lah！请mài kā伊抱走。Lín绝对无随便kā伊处理ê权利，伊是我ê gín-á，神ê kiáⁿ。」

安子知影台湾人迷信，mā知影chit位老大人koh khah特别迷信，m̄-koh，她无法度容允chit款愚戆koh无慈悲ê迷信。安子ná亲像孵卵ê鸡母向侵害者做拚生死ê防卫kah狠猛ê反抗，雄kài-kài ê目chiu金sih-sih，kā婴á揽tòa胸前保护tiâu-leh，极力拒绝ta-ke固执ê旧习惯ê要求。M̄-koh，he只不过是冰冷koh软siô-siô ê一块肉，横直iah bē-tàng kā伊饲奶，也bē-tàng永远hō͘ 伊困tī身躯边。Tāi-chì m̄-nā án-ne niā-niā；虽然m̄是应验阿娇ê讲法。总是，续落来死神行óa来到产妇本身。

安子起月内风，体温koân到摄氏四十度以上，开始讲陷眠话，有时koh会乱tín动，乌白讲话，真是意外ê tāi-chì。若这是病症ê一时发作，就无特别奇怪，m̄-koh，tùi平常时hiah-ni̍h安静优雅ê性情看起来，清文无法度相信安子会有chit款发狂乱来ê姿态出现，而且她ê胡言乱语无完全是乱来ê妄想；清文感觉he是ná亲像平常时讲bē出ê心思意念，kah-ná酒醉ê人大胆kā伊ê坦白话lóng piàⁿ-piàⁿ出来。其中对陈家厝里ê人不满ê话非常刻薄pháiⁿ听，骂in ná亲像猪hiah-ni̍h kē路、无知、固执、无人情味等等，终其尾对家己翁婿ê不平kah不满mā lóng拚拚出来，chiah-ê话恶毒kah卸(sià)伊ê面子，伊m̄知beh怎样chiah好。

陷眠话中间不时出现「想beh食蒜葱！」M̄-koh，清文m̄-bat看过mā m̄-bat食过，所以m̄知她teh讲啥。In bó͘ ê命好佳哉救活了后，伊为tio̍h beh探查hit句「蒜葱」ê秘密含意，就恬恬á去查《言海》(译注：日本ê国语辞典)。伊查tio̍h蒜葱是「葱类，叶真细，绿色，春天过了，叶ê味真重，无适合食用。」

Kan-taⁿ án-ne ê解说，清文无法度理解到底蒜葱是有gōa好ê滋味，m̄-koh，he应该是安子故乡ê植物chiah tio̍h。安子怀念hit-ê记忆中ê滋味，可见tī她ê潜在意识中有真深ê乡愁。 安子ê健康日日回复起来，清文特别会记得hit件蒜葱ê tāi-chì。
「你kah-ná有思乡病，是m̄是？你tńg去日本内地ê故乡一chōa看māi leh。」

有一工清文án-ne讲，安子感觉chit句话无真体贴，清文并无hit种心，kah-ná是teh kā她khau洗leh。
「你讲思乡病oh，无hit-ê tāi-chì lah！你ná会忽然讲chit款话 neh？」
「台湾无蒜葱chit种物，he kám m̄是真好食？你ē-sái tńg去故乡一chōa，kā它食一下chiah tńg来。」
「Ai-ah！你讲啥物话？」
「你kám bē记得ah？」清文苦笑，ná像bē通tèⁿ戆讲：「前pái你生产破病ê时，你讲陷眠话讲乱嚷，kā所有ê tāi-chì lóng讲讲出来。我听tio̍h心肝真艰苦，hiah-ê话lóng是事实，m̄-koh，hō͘ 我小khóa失望，感觉孤单。」
「Ai-ah！我kám讲kah hiah-ni̍h过份？我lóng bē记得了了à。无lah！我是知影家己病发作ê时，ná起siáu teh乱来，乌白乱嚷，m̄-koh到底讲啥物，我已经记bē清楚à。」
「Kám án-ne？你kám bē记得所讲ê一切？」
「我kah-ná有讲真pháiⁿ听ê话，请原谅，因为hit当时我已经精神失常。请你kā我讲hit时我所讲过ê话，koh kā我责备，一直到你心爽；你若恬恬m̄讲，会比啥物lóng khah艰苦。」
「是lah！恬恬m̄讲确实真艰苦。无lah！我m̄是teh kā你责备，kan-taⁿ感觉真意外，soah小khóa失望。」

In bó͘ tī危险状态ê时，清文一心kan-taⁿ想beh救她ê命，根本都无心chiâⁿ去思考安子hiah-ê陷眠话。M̄-koh，chit-má in bó͘回复健康，tùi危急中救tńg来，因为安心kah欢喜ê感情渐渐消退，soah有反常ê想法。清文就kā以前买了bē记得读ê佛洛伊德(译注：Sigmund Freud，德国出名ê心理学家) hit本《梦ê解析》(“Die Traumdeutung”) 掀开来读。作者讲：「直接ê责备kah正面ê受气是ē-sái得，m̄-koh，ná亲像狐狸hiah-ni̍h疑心重来试探bó͘ ê内心，chit种做法是下贱ê。」清文是因为伊tī社会上有tú-tio̍h非常ê逆境，就不得不kā chiah-ê失意kah不安ê心情对in bó͘来tháu气。
「He叫做潜在意识。Tùi无ê内底无法度生出啥物物件；心内有物件chiah会讲出来。你ná亲像圣女hiah-ni̍h纯真恬静，温柔koh有耐心，我真感心，mā真kā你感谢。M̄-koh，你心中若有抱不满，感觉无幸福，án-ne 就lóng无路用，kám m̄是？若是án-ne，你显然teh对我表示随在你大声乱嚷，我m̄知gōa-ni̍h-á好leh。」
「无lah，无lah！Hit时，我kui个头壳变kah真奇怪。我m̄知你讲ê潜在意识是啥物意思，m̄-koh，kā我起siáu ê时所讲ê话当做真ê来kā我责备，我感觉有小khóa khah过份。你家己最近chiah是有小khóa变，焦心koh多疑，你lóng kā tāi-chì想偏去。」
「Mā有可能，m̄-koh，你看起来ná亲像无幸福；你无幸福是我siōng无ài ê tāi-chì。」
「你家己若无幸福，我ná有可能幸福neh？」
「你问讲我有幸福á无？我想我kah-ná是kah幸福lóng无缘ê人。第一，咱ê婚姻一开始to̍h无顺利，你ê亲chiâⁿ硬beh kā你giú离开我，唯一ê理由是因为我是台湾人。我去到你ê故乡，tī tha-tha-mih顶磕头kā lín老父哀求，m̄-koh受tio̍h极其冷淡ê拒绝。Hit种屈辱感时时kah-ná旧伤发作teh刺伤我ê心。我知影chit种无像(sêng)基督徒ê狭(e̍h)心胸真见笑，m̄-koh也无法度改善。Hit当时，你决定beh kah我分离，若是你ê疼kah理解有够深，hit时，我tī火车站大声hoah，唱「愿主保护咱后会有期」(译注：台语圣诗第446首)，á是发生铁路事故mā无定tio̍h，m̄-koh….。」
「请mài koh讲hit件tāi-chì à！Hit时，我是软弱ê人，我无像你hiah坚强，欠缺突破命运ê气力。我感觉对你真pháiⁿ势，m̄-koh，神若有指示咱方向，我to̍h绝对bē koh摇动á是迷路，ǹg望你ē-tàng了解chit点。我若后悔kah你结婚，若讲对tī陈家ê生活不满，感觉艰苦，án-ne tī提出分财产，你讲beh离开chit间厝ê时，我ná会无gia̍h双手赞成leh？你siuⁿ过神经质teh挂意我ê tāi-chì lah。你若硬beh问我讲幸福á是无幸福，án-ne，终其尾会hō͘ 我变成无幸福；ná亲像无罪ê人经过拷问，mā会讲出假ê口供。」

安子目屎含leh，真罕得hiah激动án-ne回答。她不得不慎重反驳清文无合情理ê讲法，m̄-koh，她家己心内kám有bē堪得hō͘ 清文kha̍p-tio̍h ê所在？她时常án-ne teh疑问，不时挂tiâu tī心肝内。清文看tio̍h in bó͘无幸福，比啥物都khah艰苦心，m̄-koh，问题是两人所追求ê幸福，性质有真大ê距离。清文对无幸福感觉恐怖，尽力beh逃避，也就是kah世俗追求幸福ê人仝款；安子却kah伊对反，她m̄惊无幸福，会直接面对事实，有时颠倒会去接近hit-ê无幸福ê状态，也就是beh追求宗教上精神安定ê人。

清文ê理性知影in bó͘讲了有理，m̄-koh，感情上却无法度心平气和。安子因为失落婴á，心内空虚，无容易解脱，所以短时间内，夫妇ê感情无真融洽(ha̍p)。秋天已经临到，m̄-koh，四界lóng无秋季ê气氛，热kah kah热天差不多仝款，而且树叶á mā无变红，mā无落叶。Kan-taⁿ街á因为台湾人过中秋节真闹热，mài讲庙祭ê闹热喧哗免讲，连陈家mā是连续几nā日吵吵闹闹ê声不断。放炮á、烧金纸银纸ê烟满四界，宴席排到半暝，吵闹ê音乐响无停。M̄-koh，安子对看台湾歌á戏无趣味，食月饼mā无感觉好食。安子目chiu 金金看hiah-ê人剧烈生活欲望ê表现，koh khah hō͘ 她感觉家己ê孤单。她心内tiāⁿ-tiāⁿ想起tī日本内地ê亲兄弟kah众亲人ê tāi-chì，一工过一工，她kah in jú离jú远，对chit种hō͘ in bē记得去ê悲哀命运，她感觉心痛。她tī病床无意识中讲出chiah-ê乡愁；以前一直沉tī心底ê chit种无幸福感，iáu无成做精神生活ê障碍，iáu无显露tī表面，m̄-koh，清文chiah-ê话kah-ná弄草惊蛇，颠倒引起她ê乡愁。

清文有一工kah平常无仝ê情形tùi办公室tńg来；激动ê眼色，变横ê面有小khóa苍白。安子比平常时koh khah小心，kā伊ê官服thǹg落来。已经是凉爽ê季节，m̄-koh，伊ê siá-chuh 却hō͘ 汗湿kah是tâm lok-lok。
「你是m̄是身体无爽快？」

安子phâng加冰角ê kha-lu-phi-suh (译注：可尔必思，是一种乳酸菌饮料) hō͘ in翁，心内胆胆(tám-tám)kā伊问。
「Ngh！」清文发出暧昧ê声，用吸管lā杯á内ê饮料，嘴角振(tín)动kah-ná想beh讲啥物话。忽然，伊受气大声骂：
「无路用！」

因为siuⁿ过突然，安子kah-ná去hō͘ 电电tio̍h，感觉kui身躯麻起来。
「Chit款ê饮料kám会lim得？」

清文激动kā杯á tu还安子，安子ǹg杯á内一看，原来内底有浮一只胡蝇。
「Ai-ah！我真无注意，m̄知tang时飞入去，我紧来换一杯。」
「我无ài à lah！」

清文用kah-ná beh吐出ê口气讲了，懊恼kah目头结结行出房间，peh起lih二楼ê册房。安子想无撇步，一时tī hia惊kah gāng去。清文个性相当激烈，m̄-koh，到taⁿ为止伊iáu m̄-bat对in bó͘发出hiah-ni̍h明显ê受气。

食了无味无素ê暗顿了后，「Tú-chiah我m̄好，请赦免我！」清文án-ne会失礼。虽bóng伊率直讲出，其实伊ê心内有啥物痛苦bē堪得忍受ê款，伊ê目chiu甚至有看见目屎。
「无lah！是我无细腻，失礼lah！因为我lóng无注意tio̍h有胡蝇飞入去。」
「M̄是胡蝇ê tāi-chì；hō͘ 我受气ê是人，人kah-ná胡蝇浮tī杯á里。清文teh beh苦笑ê面随时变成痛苦ê严肃气氛，「安子，我决定beh辞职无ài koh去上班lah！」

因为以前m̄-bat听过伊讲chit款话，安子真意外tio̍h惊。Chit-chūn伊chiah明白kan-taⁿ一只胡蝇hō͘ 伊hiah-ni̍h受气ê理由。对安子本身来看，无论如何，对清文来讲一定有种种ê理由tī-.leh，所以是大问题koh是重大ê变化，安子kan-taⁿ感叹一声「Ai-ah！」以外，无法度koh讲落去。
「最近课长ê人事变动已经决定，你想看啥人beh来接chit-ê缺？是kah我仝期ê大学同学，这hō͘ 我非常愤慨，而且对方是落第两pái ê漏屎马neh。若无仝课iáu无要紧，伊却是kah我仝课chiah害。我tio̍h每工早暗tī chit-ê以前仝期ê漏屎马面前tòm头，服从伊ê命令。我kám有法度忍受chit种ê侮辱？Kám-tio̍h án-ne忍受？」
「Ná会发生chiah-ni̍h奇怪ê错误？准讲是出tī偶然，mā是有khah过份。」
「并m̄是偶然。」
「Án-ne kám讲是thiau故意ê？」
「真恶毒ê计略！In显然是thiau故意beh惹我受气，án-ne hō͘ 我tòa bē落去，偷偷á溜soan，chiah hō͘ 人来kā我耻笑。」
「有够可恶！你kám知是啥人想出chit种恶毒ê主意？你无kah人结啥物冤仇chiah tio̍h。」
「M̄是lah！我kah-ná是容易惹人无欢喜ê人；至少对hit款社会ê人是án-ne。我无法度做到清浊合流，m̄-nā是做bē到，无ài lah，我讨厌án-ne做。无四正、暧昧、马马虎虎ê tāi-chì我真讨厌。我想beh hō͘ 社会来肯定，所以kah-ná有小khóa着急，这是我ê见笑。M̄-koh，我一直要求家己ê价值来肯定人，我m̄是m̄知扶tháⁿ、丑陋ê设计，á是利用金钱ê做法，m̄-koh，我绝对做bē落去lah！我ê性格kah in bē合，m̄-koh，chit pái m̄是个人怨恨引起ê小khóa tāi-chì，是全体ê联合抵制(boycott)。到chit-ê地步，我无beh koh再厚面皮去上班；我已经看破官僚生活，所以我断然决心提出辞职书。」
「变kah hiah-ni̍h惨！无chhái你抱tio̍h热情kah ǹg望teh行chit条路。对chit件tāi-chì你tio̍h平静落来好好á思考leh，一时ê感情用事来放弃生涯是算bē hô lah！」
「M̄是一时ê感情用事，绝对m̄是。虽然我m̄-bat对你讲起，m̄-koh对chit件tāi-chì，我早to̍h不断teh思考，teh操烦。」

清文ê声讲到chia忽然变无力ê声说(soeh)，kah-ná无beh koh讲落去ê款。清文激动ê火镇静落来，看起来kah-ná向oh得抵抗ê压力àⁿ头投降ê款。Chit时，安子chiah清楚了解in翁ê心情；台湾人差不多lóng无法度升任高级官员。安子以前加减有听过in翁无属tī chit款ê例，m̄-koh，不管in翁gōa-ni̍h努力、gōa-ni̍h用苦心，伊总是有无法度超越ê障碍，伊ê升迁有一定ê限度。大约一年前开始，伊就有不安操烦ê面色，偏见、猜疑心kah急性等性格ê缺点mā非常明显。安子hit时真无法度了解一个人ná会变kah hiah-ni̍h无温柔koh刺凿（chhì-chha̍k），m̄-koh，她chit-má lóng了解à。如果in翁若是日本内地人，tú-tio̍h siâng款ê逆境、苦恼ê时，hit-ê程度虽然相仝，m̄-koh，情况会小khóa无仝chiah tio̍h。这m̄-nā是针对单纯社会制度高升ê限制，顶koân iáu有民族ê思想kah感情参杂tī-.leh，所以仝款ê愤慨kah仝款ê苦恼，有可能呈现出无仝koh复杂ê面貌。
「我虽然一直无kā你讲....。」清文án-ne讲，伊ê话中有悲伤。
「若是án-ne，ná会无beh量早 kā我讲neh，ná会无beh kā所有ê烦恼对 我讲明，无ài全身óa靠我leh？」安子án-ne teh埋怨。 清文不断teh挂意ê「无幸福」，安子m̄-bat亲像chit-má用chiah明显强力ê形貌来hō͘ 伊感觉tio̍h。