《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 第六章（更新版）
作者 庄司总一 着 杨东杰 指导 林俊育 台译 2017.04.23
景文sak开银行ê门行出来，凉风对面吹来，感觉真爽快。已经是十二月天，微弱ê日头照tio̍h厝瓦，m̄-koh，感觉m̄是寒冷ê天气，景文会án-ne感觉，是因为伊ê面烧烧。
景文tú tī银行存入去一大笔钱，而且chit笔钱差一点á to̍h kah-ná去hō͘ 大风吹tio̍h树叶á，飞了了；伊tī米市thàn来ê一万圆差一点á to̍h去hō͘ in bó͘玉帘抢去。因为玉帘ê súi面貌，景文对玉帘ê固执kah奢华，一向lóng有某种程度ê容允；这是kah-ná teh割肉，姑不而将ê做法。所以，对玉帘来讲，丈夫对她ê所做所为，她lóng无感觉tio̍h一屑á好意ê温暖，而且景文容允她自由使用ê钱mā是有限。最近几年来，玉帘ê后头厝手头无方便ê时来借钱，她讲借in一千圆好无，景文就回答讲：「我to̍h m̄是teh开银行。」她若beh借一百圆，siōng加hō͘ 她十分之一来融通to̍h算bē bái à。
玉帘明知丈夫hiah-ni̍h冻霜，她偏偏beh向伊ê冻霜性格挑战，奢华乱开钱。她ê容貌姿色、服装á是生活水准，lóng无ài输陈家任何一人；事实上，是无一人ē-tàng达到她ê水准。M̄-koh，忽然间，tùi安子chit-ê外来分子踏入陈家以后，她ê优越地位开始受tio̍h威胁。安子lóng无意beh kah伊竞争，只是玉帘无beh输人，soah起着急；tùi边á kā她看起来，实在真好笑。玉帘mā无明白家己为啥物tio̍h án-ne kah安子竞争neh？玉帘若知影安子使用进口ê白粉，家己若无赶紧去模仿她soah bē-sái得；若看安子穿洋装，家己mā beh去做洋装来穿；安子ê手指(chí)若有钻石闪光，她就要求in翁买钻石手指hō͘ 她。
Kan-taⁿ像chit款ê装饰品，景文会勉强kā她应付；钻石手指就买五圆左右ê玻璃模仿品来kā她瞒过去。M̄-koh，有时她会提出koh khah无理ê要求。
「你mā为咱起一间á新厝leh！咱tòa ê是百gōa年ê老厝，有臭phú味koh四界lóng是siān尪á kah ka-choa̍h。阿兄ê厝真好，新koh现代化，看起来真爽快，而且in koh m̄知tang时也买一台钢琴ā。Tòa hit款厝，心情自然to̍h明朗起来，mā khah 高尚。你kan-taⁿ会晓积聚金钱，无路用lah！咱来起一间bē输in ê新厝kám m̄好？」
Chiah-ê竞争心kah虚荣心，景文ē-tàng kā她当做是浅薄ê女人心，笑笑á kā她应付to̍h ē-tàng解决。M̄-koh，chit-má soah発生koh khah现实koh迫切ê问题来。最近玉帘ê后头厝kiōng-beh面临经济崩盘。
玉帘出世ê王家，tùi清朝时代起to̍h代代做官，有一代做到县知事，ē-sái讲是名门世家。总是，到日本统治以来，王家就发展无路来。假使玉帘ê老父王世泽做人khah温柔忠厚leh，靠伊ê家世背景留落来ê光辉，应该ē-tàng hō͘ 伊tī社会上有某种程度ê地位。事实上，有一段时间伊bat担任过市ê协议员kah某合作社ê社长。总是，伊是一个见识koân，急性koh无深思ê人，kha̍p-bē-tio̍h to̍h beh kah人起冲突。因为chit种生来to̍h án-ne ê性格缺点，最后无人beh kah伊往来，继承ê财产mā渐渐开了了，chit-má就用冤家kah相争来发泄伊ê郁卒。 有时父kiáⁿ、夫妇之间mā去法院相告，ē-sái讲是台湾人爱诉讼ê例。王世泽经常kah人惹起纠纷，去法院kah-ná是伊ê兴趣leh。
王世泽续尾行到破产ê地步，只好chhōe看有啥人thang哭求；伊已经无啥物thang koh顾体面kah志气à。对cha-bó͘-kiáⁿ玉帘来讲，这mā已经m̄是像白粉kah sui衫hiah-ni̍h简单ê tāi-chì。她kah in老父仝款，有真高贵ê优越感，chit-má是她第一pái谦卑，àⁿ头向in翁拜托。
「若老父所讲ê两万圆有困难，á无he ê一半mā好。这m̄是讲beh hō͘ 伊，是beh kā你借ê。」
「Hō͘ 伊kah借伊ê讲法虽然无仝，实际上是仝款ê tāi-chì。」景文显出一屑á都无参详余地ê口气。
「无no͘h，一定会还lah！阮老父是信用可靠ê人，因为siuⁿ过清廉，所以chiah会kah人无法度和睦tàu阵lah！伊绝对m̄是hit款有借无还奸巧ê人lah！」
「讲是án-ne讲，m̄-koh，无手ńg to̍h ia̍t无路来lah！亲chiâⁿ眞正起纠纷ê时，我无hiah大胆去控告丈人，准讲lín老父告我，我mā m̄敢。」
「Koh khah án怎，伊mā bē做hit款tāi-chì，而且还钱mā m̄是讲无望ā。阮小弟肇基明年beh进入医学院，等伊做医生了后，会加倍还你lah！我无法度目chiu金金看我ê后头厝破产，年老ê双亲kah小妹kah-ná乞食tī街头流浪，若是án-ne，我宁可死死leh khah好。Ah！景文，我一生chiah kā你求chit pái。过去我固执拗蛮，真失礼lah！以后我会注意，bē koh ài奢华ê衫裤kah贵重ê装饰品，ta̍k项tāi-chì mā lóng会照你ê意思，做一个好bó͘ lah！你phah拚thàn钱ê心情，我chit-má知影lah！你不管别人án怎kā你耻笑，lóng无摇动向你自信ê路勇敢前进，实在是无tè比可靠ê人，真伟大！我以后mā会改头换面，phah拚kā你协助。若有一工，咱ē-tàng成做亲像林本源án-ne ê亿万富翁，m̄知beh gōa好leh！」
玉帘用幼绵绵ê手指(cháiⁿ)kā in翁ê手惜命命tēⁿ-.leh，kah-ná龙眼籽ê乌目chiu仁偷看伊ê面，一时á头to̍h àⁿ落去，目屎chha̍p-chha̍p滴。景文khǹg tī桌顶ê手hō͘ 她ê目屎滴kah tâm-lok-lok；伊感觉家己亲像tēng土ê心kah-ná hō͘ 温柔ê雨水ak tâm去。总是，景文平常lóng是利益赢过感情，何况女人ê心kah天气仝款，变化无常，尤其是chit-má玉帘所讲ê话kah所流ê目屎，若kā它当做是真正对翁婿ê信赖kah恋慕，he to̍h siuⁿ过愚戆无知loh！景文到taⁿ iáu记kah真清楚：结婚后一礼拜，玉帘ê老母来探访hit工，她讲：「阿母，我嫁来chia lóng无快乐，我对伊一屑á kah意都无。」景文有偷听tio̍h她对婚姻ê失望kah不满。实际上，伊ê爱情到taⁿ iáu未开花leh！虽然结婚chiah一年ê时，景文用尽苦心beh得tio̍h súi bó͘ ê爱，m̄-koh，hiah-ê热心kah痴情lóng无效，结果伊晓悟女人不过是hō͘ 男人ê活动力变迟钝，甚至是kan-taⁿ破坏niā-niā。
玉帘用尽sai-nai、哀求ê办法，m̄-koh，in翁ê心完全hō͘ 她phah bē tín动。开钱比人加倍大方，性情激烈koh感情脆弱ê玉帘，对in翁ê冷酷感觉无奈kah失望。
M̄-koh，玉帘每工哭teh哀求，景文ê硬心肠也渐渐软落来。总是，昨暗景文phah开khǹg tī客厅地板下ê金库，发见内底ê银票lóng无了了去à！He是会hō͘ 伊面失色ê大条钱。伊随时注意tio̍h，就chông去隔壁ê房间，玉帘倒tī眠床顶teh假困。
「玉帘，你是án怎lah？钱lám-teh困bē bái ho͘ⁿh！」
景文目chiu金sih-sih koh面青sún-sún，看起来非常激动；真冷静ê冷笑参杂khau洗ê口气，koh显露出一种会hō͘ 人起惊惶ê面chhiuⁿ。玉帘tùi眠床顶落来，m̄-koh，她一手若无掠tiâu眠床边就无法度khiā在。Tùi她浅红色格á纹ê困衫下面ê蓝色天鹅绒裤脚，ē-tàng看tio̍h她可爱ê缚脚，in显然无法度支持她phi̍h-phi̍h-chhoah ê身躯。为tio̍h无ài hō͘ 人看tio̍h，她一手the̍h物件藏tī kha脊后，用她惊惶，ná beh消失ê声讲。
「我m̄知lah！」
「我是一个非常无警觉ê人，竟然tī厝里，我ê身边有饲一个贼á。」
玉帘chit时kah-ná一只hō͘ 猫á相tio̍h ê niáu鼠。景文对in bó͘ 从来m̄-bat粗鲁动手过，mā m̄-bat kā伊大声吓(hat)过，所以eng暗伊面色发青火色ê大受气，hō͘ 玉帘感受tio̍h m̄-bat见过ê恐怖，而且她是想kah无法度chiah采取chit种无应该ê卑贱行为，致使本性有洁癖ê玉帘感受tio̍h侮辱ê剧痛，soah hō͘ 伊失常，完全失去辩解kah抵抗ê气力。
她原本一手the̍h钱藏tī腰ê后壁，m̄-koh，tī in翁冲来beh抢去chìn前，她kui气the̍h出来tī伊ê面前。总是，m̄知是出tī啥物心思，大概是beh救后头厝ê chit大笔钱iáu放bē落手，她并无kā百圆ê银票马上交出来，soah tùi中间抽出几张，向空中tàn去。Chit时，tú好西pêng ê窗á吹入一chūn风，hō͘ 银票四界散落。In翁tio̍h惊，赶紧去拾(khioh) hiah-ê银票ê姿态，hō͘ 玉帘紧张ê心真奇妙放松落来，忽然大声笑出来。然后koh the̍h几张银票tàn出去。
「Ah！有够好笑，你宛然kah-ná乞食生(chheⁿ)狂teh拾钱。你虽然财产百万，m̄-koh，你ê心kah乞食仝款。鸟á飞ê时mā会lak一支羽毛，m̄-koh，你连一粒鼻屎都m̄肯hō͘ 人；你是一个见钱死，无人性ê人lah！我嫁来一开始to̍h无kah意你，chit-má我koh khah讨厌你。清文兄kah你是无仝ê，lín两人成做兄弟，ē-sái讲是神明ê作弄。伊hō͘ 人一看to̍h知是一个可靠ê高尚人物；chit-má我明白à，我m̄是teh恨安子阿嫂，是有一点á teh嫉妒。我是嫉妒她ē-tàng kah hiah高尚ê人teh过美好ê生活。我所恨ê是景文，m̄是她lah！M̄-koh，我又koh kah你生两个gín-á，实在有够愚戆。总是，án-ne mā好ā！无论如何，我以后无beh koh kah你生kiáⁿ，你以后chiah家己lám钱困好lah！」
玉帘ê怨恨kah pháiⁿ嘴乱讲无soah，m̄-koh，景文kah-ná lóng无听入耳，伊kan-taⁿ全心teh一张一张拾(khioh)落tī土脚ê银票。
讲实在，景文有phah算beh为tio̍h in bó͘ the̍h出一万圆，m̄-koh，伊慎重ê想法soah hō͘ in bó͘ 拒绝。景文án-ne teh为昨暗无爽快ê tāi-chì自我辩解；伊常常kā利益khǹg tī感情ê tāi先，所以玉帘乱来ê行为，颠倒hō͘ 伊免付chit条大钱，讲起来mā算伊好运。
讲是án-ne讲，tú-chiah kā hit笔钱存入去银行了后，心情却有一种奇妙ê后悔kah失落ê感觉。玉帘当然mā有khah过份，m̄-koh，景文mā bē-sái讲无伤tio̍h她ê心。
假使hō͘ 家己ê bó͘ hiah-ni̍h侮辱kah lé骂，koh看破到伊ê心底，伊当然mā会bē爽快。景文为tio̍h报复，心中想beh chhōe别ê cha-bó͘，m̄-koh，无一个cha-bó͘ 会hō͘ 伊kah意得。伊想beh去妓女户开cha-bó͘，m̄-koh，he是kan-taⁿ想niā-niā。事实上，hit种欲望一屑á都无；伊是一个kah人无仝款，有志气ê人。除了思春期ê一段时期以外，女人对伊来讲，kan-taⁿ是极其小部分ê存在，m̄-koh，chit-má伊kah-ná忽然觉醒，原来he是男性本来ê渴慕。景文家己想讲，世界上无一个cha-bó͘人会真正信赖伊koh爱伊；一想tio̍h án-ne，伊就感觉家己无完满。金钱对伊来讲是kah-ná有性命ê物仝款，因为强烈追求金钱ê强烈欲望发出lòng-lòng叫ê大声，hō͘ 伊tńg-se̍h kah失去方向。Chit-má chit-ê欲望机械忽然停止ê奇妙时刻，伊心内soah感觉空虚寂寞起来。
无no͘h，我mā bē-sái讲完全无kah意ê人，景文忽然想起一个cha-bó͘ gín-á。伊虽然是无闲kah bū-sà-sà，hō͘ 伊bē记得hit-ê cha-bó͘ gín-á，其实是日时无闲办tāi-chì，到暗时倒tī眠床顶ê时，伊ê脑海中就浮起hit工teh讲seng-lí kah利纯ê tāi-chì ê时，出现hit-ê叫做阿龙ê cha-bó͘ gín-á。M̄-koh，he kan-taⁿ是瞬间ê tāi-chì，伊随时to̍h困落重眠，连眠梦中mā无koh看tio̍h hit-ê cha-bó͘ gín-á ê面。
「啥物？Hit种面容无好看ê戆cha-bó͘ gín-á，无法度lah！」景文醒起来就án-ne kāu-kāu念，m̄-koh，伊ê脚iáu是行向hit间厝ê方向去，真是不可思议。
Tī台湾人真chhiaⁿ-iāⁿ ê市场ê 一角落，kah-ná hō͘ 人bē记得ê巷á内，有一间满地尘埃koh旧ê药草店。Hit-ê姓杨ê店主欠景文一kóa钱，m̄-koh lóng无法度还，就提起beh用cha-bó͘-kiáⁿ来还债。总是，景文无想beh接受；店主一直teh ǹg望ê交换条件，伊lóng无意向。Hit-ê cha-bó͘ gín-á无súi，若用hit-ê债务ê金额，伊ē-tàng买tio̍h加倍súi ê cha-bó͘。
M̄-koh，景文mā m̄是完全讨厌chit-ê cha-bó͘ gín-á，只是伊m̄知chit-ê cha-bó͘ gín-á ê优点tī tó位。她身材粗大；m̄是丰满，ē-sái讲是骨格粗大ê感觉。因为她无缚脚，双脚亲像客人ê大脚蹄，大kah真无好看。她ê容貌若kā它一一详细看起来，mā m̄是讲gōa bái，m̄-koh，她全然欠缺hō͘ 人ē-tàng明确分别súi-bái ê容貌，kan-taⁿ kah一般人仝款平凡。她无像都市cha-bó͘ gín-á hit种ê活泼敏捷，hō͘ 人感觉迟饨bē轻爽，随时会hō͘ 人想讲她是田庄cha-bó͘。景文想讲家己若是hō͘ chit款cha-bó͘吸引去，实在是无比这koh khah见笑ê tāi-chì。景文家己辩解讲，伊tiāⁿ-tiāⁿ来杨家ê目的，m̄是beh来看她，是希望ē-tàng早一日讨回债务。
景文一旦peh上药草店ê二楼，姓杨ê店主就退去，换 cha-bó͘-kiáⁿ phâng点心kah乌龙茶出来。景文真粗鲁kā茶瓯(au) the̍h起来，大嘴lim落去，然后无讲话，目chiu chîn阿龙ê面一下，随时to̍h心神不定，oa̍t头看别位。平常时态度爽快ê景文，今á日却真奇妙心神定定，一时无开嘴讲话。阿龙感觉景文kah以前态度无仝，想讲m̄知会发生啥物tāi-chì，soah kui身躯lóng硬起来。总是，对方是gâu讲话ê社交专家，并无挂意阿龙对伊无讲话ê冷淡态度，m̄-koh，mām̄知tó一位teh款待。讲起来mā无啥物调戏ê动作，到taⁿ iáu m̄-bat对她有情欲性ê戏弄。老父命令她无论啥物要求lóng bē-sái拒绝；她记tiâu tī心肝内，m̄-koh，chit-ê大人一向lóng无hit款意思，对她从来m̄-bat有动脚动手ê下流行为，beh tńg去ê时koh lóng会塞（siap）五十钱tī她ê手心。对阿龙来讲，无koh有比伊khah安全ê人客à。虽然án-ne，总讲一句，chit-ê男人的确对她无爱意，只是对sàn-chhiah koh bái ê cha-bó͘ gín-á表示可怜niā-niā。想tio̍h án-ne，kah-ná是不动感情ê娼妇，尤其是手里the̍h hit五十钱ê时chūn，奇妙伤tio̍h她ê自尊心，hō͘ 伊感觉寂寞起来。M̄-koh，男人总是男人，今á日kah-ná有啥物tāi-chì beh发生ê款，所以伊ê身躯kah-ná石头tēng起来。
「阿龙，你ná会惊惊teh见笑啥？过来chia lah！」
景文án-ne ná讲ná离开椅á行óa去。阿龙kah-ná beh防卫tńg身向后，景文kā她厚厚ê双肩掠tiâu。
「Oeh！阿龙，你来做我ê细姨kám m̄好？」
伊án-ne讲，kah-ná晴天tân雷公，阿龙惊kah phi̍h-phi̍h-chhoah。她想讲伊若ài她ê身躯，买一副耳钩ê代价就siuⁿ有够额à，ná-tio̍h用hiah-ni̍h过份ê甜言蜜语leh？
「大人，请mài kah我讲sńg笑，我会听你ê吩咐to̍h是。」
「Ai-ah！你teh惊啥物？Ha-ha！你误会我ê意思lah！Oeh！阿龙，你kám无相信我chit-ê人？」
Cha-bó͘ gín-á iáu是紧张，kiu-kiu无讲话。「我tī seng-lí场ê做法是信用第一，其它方面mā是仝款，我无pháiⁿ意，kan-taⁿ想beh hō͘ 你知我真kah意你，你kám m̄相信？」
阿龙oa̍t tńg身，正面直直看景文，露出kah-ná无听tio̍h伊讲ê话hit款正经ê面容。
「大人，mài án-ne kā我糟躂lah！厝里kā你借ê钱，阮一定会还lah！」
「戆大呆，啥人teh讲借钱ê tāi-chì，你kah-ná牛hiah-ni̍h gōng。」
景文án-ne kā她骂，就离开她，tī室内操烦kah行来行去。本来真罕得受气ê景文，chit pái是真正受气à；伊是真无容易动感情ê人，chit-má soah去hō͘ chit-ê小姐拒绝，伊想tio̍h án-ne就感觉家己愚戆，soah起受气；伊平常时是chiok gâu算，bē hō͘ 感情控制ê人，今á日会án-ne，实在是不可思议。 M̄-koh，受气hō͘ 伊有真愉快ê新鲜感，过一时á伊就露出平常时ê微笑，半sńg笑讲：
「Ngh，若án-ne，我接受你还一kóa钱to̍h好，m̄免用你ê身躯来抵账(tú-siàu) lah！」
「Eh，虽然无法度全部还，m̄-koh，我有一kóa钱。」
「Haⁿh，你有存一kóa钱oh，真感心neh。到底有gōa chē？Ē-tàng还kóa mā bē bái ā。」
「M̄-koh….。」
「无to̍h是无，无法度lah！Á是可能有钱，mā m̄甘the̍h出来。」景文想beh刁难，目chiu向阿龙ê面金金看，m̄-koh，随时又koh bē记得伊ê phah算，口气温柔讲：「你免烦恼hit种tāi-chì，我m̄是teh ài你ê sai-khia钱ê人。」
「M̄是án-ne讲lah，该还ê钱无还bē-sái得，m̄-koh….。」阿龙有困难ê款式，吞吞吐吐讲。
「M̄-koh，因为beh kā钱the̍h出来，tio̍h破坏厝」
「会kā厝破坏？这是lín tau ê tāi-chì，lín chit间破厝mā值无三文钱ā。Mài koh讲chiah-ê，我m̄是teh讲钱ê tāi-chì，你lóng听无，你chit-ê cha-bó͘ gín-á ná会hiah戆直，hiah固执。」
「M̄是lah，大人，我讲ê m̄是厝宅lah，我是讲厝内，我存ê钱khǹg tī厝壁内底lah！」
Chit-ê意外ê秘密hō͘ 景文惊一tiô。伊kā四周围ê壁看一liàn。若讲是khǹg tī壁ê凹窝(naih-o) á是别ê所在to̍h m̄是不可思议ê tāi-chì，m̄-koh，若讲khǹg tī无破坏厝宅bē-tàng the̍h出来ê深入所在，he to̍h真奇怪loh！景文受tio̍h好奇心ê使弄问她讲：
「Án-ne，到底是tī tó位？楼脚á是二楼？」
「Tī hia lah！」阿龙手kí hit堵kah隔壁困房中间ê壁，就行óa过去。景文phah她所kí ê所在了后，soah禁bē-tiâu笑出来。
「孔嘴tī tó位？无孔ê钱筒á一厘mā lok bē落去。你koh真gâu骗人，bē-sái kā你看轻得(tit)neh。」
「M̄是lah！我无乱讲，无白贼lah！」
阿龙认真辩解，就讲出故事ê因端。He是约十年前ê tāi-chì，她去街á卖花，想讲thàn来ê钱beh khǹg tī tó位chiah好。有一工，她忽然发现二楼房间壁面ê砖á会tín动，徙tín动一下就ē-tàng the̍h落来，而且壁内有一个真狭(e̍h)ê孔嘴，内面是深沟。Tùi hit-chūn开始，她就kā卖花thàn ê钱、中元节(七月半)kah过年钱，就是所有她得tio̍h ê钱lóng tàn入去hit-ê壁孔，tàn入去了后，又koh kā砖á khǹg tńg去原位。双亲以下ê厝里所有ê人lóng无注意tio̍h，家己mā极其小心注意，mài去hō͘ 人发见。有时她想beh买kóa糕á饼来食，m̄-koh，沟真深，手伸bē到，而且mā无法度看到底已经存有gōa chē钱。到少女ê年纪，她mā kah一般cha-bó͘ gín-á仝款，自然会ài粧thāⁿ，想beh买新衫裤、 头毛簪、耳钩，m̄-koh，她ê钱连一sián都the̍h bē出来。虽然是án-ne，对阿龙来讲，爱súi ê本能欲求kah世俗ê消费欲望，bē比积聚钱银带hō͘ 她ê快乐khah大。钱一工一工、一年一年存落来，终其尾到底总共存有gōa chē钱，她家己mā估计bē出来。Mā bat有时险á hō͘ 想beh the̍h出来看ê好奇心khah赢；其实，beh kā钱the̍h出来，用一支鉄槌to̍h ē-sái；kah-ná gia̍h菜刀破鸡腹肚hiah简单。M̄-koh，ná亲像破开了后露出讨厌ê肠á肚；若是金额无大，就可能会失望。所以，她宁可永远kā它khǹg tī hia，chit-ê秘密就永远属tī伊家己ê，mā是一个谜。Hit-ê宝库已经超越kan-taⁿ是钱ê计算，它已经扩展，成做几何级数ê想像空间，所以，不管别人她看做是sàn-chhiah cha-bó͘ gín-á，她认为家己ē-sái讲是无限ê富有。Chit十年来，她tī单独kah-ná káu蚁teh勤勉积聚ê中间，她有感觉tio̍h无人知ê甜蜜kah骄傲。M̄-koh，一年gōa前，in老父发见hit块砖á会tín动，伊m̄知内底有真chē钱银，就用红毛土kā它糊密起来。Tùi hit时起，阿龙ê愉快无限ê空想kah对富有ê精神进展，soah一时陷落tī停止状态。若 án-ne落去，无赶紧kā它the̍h出来，就会变做死钱。
Chit-ê cha-bó͘ gín-á ê告白，景文听了感觉她赢过任何美德。她开始tiām-tiām-á俭钱ê时，in老父无像chit-má hiah-ni̍h sàn-chhiah，m̄惊会kā单纯ê cha-bó͘-kiáⁿ phah拚俭ê钱抢夺去，所以阿龙kah-ná káu蚁án-ne teh积财欲望，ē-sái讲纯粹是她天生ê性格。
Chit时，景文chiah晓悟，亲像phah伊家己ê脚头u，看起来无啥可取ê cha-bó͘ gín-á，她teh吸引伊ê魅（bī）力to̍h是tī chia lah！
