《《陈夫人》日译台e5台湾小说 第一部》

 | | | 转寄

《陈夫人》第一部 第五章（更新版）

作者 庄司总一　着 杨东杰 指导 林俊育 台译 2017.04.16

安子渐渐khah chē时间tòa厝里无出门，连教会mā无去。有一pái，当牧师读圣经读到「约翰用草蜢kah野蜜做食物」ê时，她忽然间想beh吐。做gín-á ê时chūn，bat去田里掠草蜢á，她对hit种臭chhèⁿ味真了解，hit当时感觉气味好真好食。Kám会是hit-ê联想khah强，soah直接刺激她ê感觉？

Hit时起，她就会惊去kā教堂ê土脚chhòng lah-sap，所以她就暂时m̄敢去礼拜。安子想beh吐ê情形日日增加，mā开始会有头壳痛、头眩(hîn)。她有大概á教台湾cha-bó͘-kán-á煮mi-soh汤、加芝麻ê凉菜á是加醋ê凉菜等日本式料理，m̄-koh，一个味觉基本上无仝ê人，无可能期待ē-tàng做出满足安子ê料理。Chit-ê cha-bó͘-kán-á虽然讲会晓án-ne teh煮日本料理hō͘ 安子食，m̄-koh，煮她家己ê菜ta̍k项lóng用油炒á是用油chìⁿ，油烟每pái lóng hō͘ 安子反腹想beh吐。Chit时，安子teh想，若是外家厝tī附近，她就想beh飞tńg去。嫁来台湾了后，安子第一pái感觉tio̍h hiah-ni̍h激烈ê思乡，he是tùi味觉深深感受tio̍h ê。安子出世ê故乡农村有新鲜ê菜蔬，尤其是早蕨(koeh)、丝葱、蘑菇等清淡ê菜蔬；m̄是，可能是迟钝ê舌chiah会感觉清淡，in实在是有真甘甜ê滋味，总讲一句，to̍h是味感好ê内行人所ài食ê，安子mā lóng ài食。以山珍海味来讲，chia无法度kah寒冷ê故乡相比。The̍h ài食ê菜蔬来讲，chia kan-taⁿ展讲五谷丰收，he是因为强烈ê日光kah高温度ê缘故，m̄-koh，因为án-ne soah丧失美妙ê真味。有一工，景文ê bó͘玉帘kah-ná知影安子ê食物兴趣，送来一只烘鸭。Kui只油lop-lop ê鸭khǹg tī盘里，kha-chhng翘翘，颔颈kah头挺直，kah-ná teh讲：Beh食chìn前，看一下á我惜别ê姿态leh！安子看tio̍h就起鸡母皮。玉帘ê意思可能是beh庆祝长男ê出世，应该tio̍h解说讲是善意，m̄-koh，对安子来讲，却kah-ná hō͘ 刀á tu̍h-tio̍h仝款。安子反腹想beh吐，灰心丧气，心内着急，而且chit几工来，因为道士teh pûn鼓吹做法事，安子kah-ná被迫加添不安ê气氛。厝里若有人破病就请道士来念经保平安，这真正是无聊ê迷信；可能是pu-pu叫ê声音ē-tàng kā病人tùi昏迷状态惊醒起来ê款，m̄-koh绝对无法度医好病人。Chit-ê民族到底为何hiah-ni̍h喧哗neh？In lóng m̄知是tùi孤独感，á是恬静感，á是深思感，就是tùi安静ê中间来发见活力kah意义ê方法；in kan-taⁿ想beh tī日常生活ê喧哗中kah婚丧喜庆中，用极其复杂ê习惯性ê吵闹来表现性命。这m̄是野蛮ê表现，ē-sái讲是比其他民族khah旧ê文化，是已经中毒ê状态，kám m̄是leh？

Ta-ke阿娇讲病kiáⁿ严重tio̍h请道士来念经，所以bat派人来kā她亲切建议。总是，pûn鼓吹、kòng钲、pûn phín-á有可能会安胎赶鬼，m̄-koh，要紧ê是本人mā有可能会昏倒neh！安子只好kā伊辞退。过几工了后，ta-ke阿娇吩咐讲有话beh对安子讲，叫安子去一chōa。安子烦恼她拒绝道士，会遭遇责骂，所以心肝头胆胆（tám-tám），行向阿娇ê房间。M̄-koh，安子知影ta-ke kah in翁无血缘关系，颠倒感觉心头khah轻松。

身材kah-ná鹤(ho̍h) hiah瘦抽ê阿娇，双手挂金环khòa tòa椅hōaⁿ，端正坐tī枫á柴椅顶。她ê pān势hō͘ 人感觉有一种大家族老夫人ê风格。她梳一粒真整齐ê「大头鬃」，乌sìm-sìm ê头毛，插金簪koh挂玉á耳钩，尤其是tùi头壳后小khóa影tio̍h红色ê发髻（kè），kah日本老妇人ê朴素tú好相反。Iáu有，她ê额（hia̍h）头kah-ná除去杂草ê地面真清气(台湾妇人无习惯头毛散乱，所以一生出来就kā她挽面挽kah清气清气。) kah瘦抽ê体材无啥合ê圆面，双pêng嘴phóe丰满，hia-ê嘴phóe有khah垂落去，he是年老ê结果，m̄-koh，mā可能是因为她身躯bē liú-lia̍h，lóng tio̍h用讲话来做唯一ê武器，所以面肉也tio̍h khah发达起来。她时时刻刻lóng有恐怖ê预感，hō͘ 人有刺giâ-giâ面chhiuⁿ ê感觉，m̄-koh详细kā她看，小khóa圆圆ê鼻á、kah-ná象ê细蕊目chiu kah厚厚ê嘴唇，chiah-ê颠倒是神经质ê形；原来hō͘ 人真oh亲近ê印象kan-taⁿ是hit-ê相当阔ê头额（hia̍h）。虽然是án-ne，hit工阿娇ê心情真好，所以安子无真致意hit-ê头额（hia̍h）。

阿娇ê招待态度是真亲切体贴，可能是知影安子有娠，她无the̍h kui只ê烘鸭出来，却the̍h出酸酸ê杨桃蜜饯，也tùi保温袋内ê茶kó͘ thîn茶hō͘ 安子lim，koh请她suh水烟草，而且tī顶pái看tio̍h安子穿台湾衫ê时特别kah意，kā她o-ló讲：「实在真súi，真sù配，kah-ná支那ê杨贵妃á是西施leh！」因为in中间话bē通，当然是透过瑞文ê翻译，m̄-koh，tùi她ê表情、手势kah平常时ê无仝，安子明白ta-ke心情愉快，而且颠倒teh kā她扶tháⁿ ê款式，soah hō͘ 她感觉滋味无好。因为安子会记得kah-ná无gōa久以前，因为kā ta-koaⁿ冲kha脊phiaⁿ，有惹阿娇大受气。

Ta-ke ê话题是有关chìn前景文来讲起分财产ê问题，m̄-koh，为tio̍h chit件tāi-chì，何必tio̍h专工叫新妇来讲话？这显然是beh试探看有啥物怀柔策略á无。当事者清文真有chit-ê意思，chit-ê问题早慢一定会实现。Án-ne讲起来，到底为啥物tio̍h来问她chit-ê无权力ê新妇ê意见neh？Kám讲是想beh来kā她劝解、拐骗，hō͘ 她顺服leh？安子摸bē清楚阿娇腹肚内teh想啥。总是，hiah-ni̍h重大ê tāi-chì，安子讲她bē-tàng表示意见，m̄-koh，她会kā清文转达老母ê意见。Án-ne回答了，她就离开阿娇ê房间。

「阿嫂，你tio̍h小心，景文kah老母同谋，伊是奸巧ê人。」翻译ê瑞文行出房间，就细声kā她讲。假使瑞文无讲，安子mā iáu会记得初见面ê时，景文hō͘ 她非常狡怪(káu-koài)ê印象。尤其是安子看伊来chhōe清文，提出分财产ê款式，koh khah深深感觉伊ê狡怪。伊罗嗦缠绊不时来chhōe清文，藉tio̍h小khóa杂事，á是ta̍p-ta̍p滴滴ê家政来hō͘ 清文操烦；这m̄是一一请示大兄来表示尊敬kah讲义理，颠倒是景文知影án-ne做一定会有啥物tāi-chì发生，是另外有用心tī-.leh。景文掠tiâu大兄对金钱计算无关心koh急beh追求社会上ê名声ê学者性格，想讲无gōa久大兄就会bē堪得俗事ê繁杂，主动提出分财产ê问题。

总是，tú-chiah是通过翻译，一定有无充分了解ê所在。安子想beh koh khah了解清楚，就chhōe瑞文来她ê厝。
「每pái来，我lóng感觉日本式ê khiā家真好。」

瑞文伸手想beh the̍h插chhiám-á ê羊羹，又koh停手，kah-ná有感触ê款式，koh一pái kā房间内看一遍。
「若hiah-ni̍h kah意，你mā ē-sái起一间日本式ê khiā家ā。」
「我无钱，无法度lah！」
「Kám m̄是teh beh分财产à？」
「Bē-sái，bē-sái lah！假使手里有钱，我mā bē-tàng像大兄án-ne自由使用。阿兄有钱koh有地位，不管周围ê人án怎讲，lóng ē-tàng自由去做，我无办法lah！我kan-taⁿ读到中学，当然mā无阿兄hiah-ni̍h优秀，我mā有想beh读khah koân ê学校，真想beh去日本内地。M̄-koh，固执ê老母kah爱管闲á事ê亲chiâⁿ lóng反对，而且koh勉强我娶一个我无kah意ê cha-bó͘ 做bó͘。娶hit种无súi ê cha-bó͘做bó͘，我宁可吊tāu死死leh khah赢。」
「Ai-ah！你koh开始beh讲不满ê tāi-chì，若án-ne，春鸾未免真可怜。春鸾是一个性情温柔ê好人，因为你iáu年轻，所以无注意tio̍h她ê心灵kah内在ê súi….。无影lah，她m̄是hiah-ni̍h bái，kám m̄是án-ne？其实是你对她ê爱情无够额，所以你是先用偏见来看待她，而且你kā家己ê立场想了siuⁿ过偏激。M̄-koh，chit-má若分财产，你就变成一个有钱人，想beh读大学á是去日本内地lóng有可能。」
「若ē-tàng án-ne to̍h bē bái，m̄-koh阿嫂kah-ná反对hit-ê问题，为啥物？真奇怪neh。」

瑞文显然真oh得推测安子ê意思。
「Ai-ah！请m̄-thang误解，瑞文。我m̄是反对，我lóng无teh考虑金钱kah财产ê问题；我只是根据老母ê话，听起来kah-ná是她ài景文继承陈家ê家业，我感觉chit点需要koh小考虑一下。M̄-koh，如果是家族全体ê意思，我就无话thang讲。总是，到底是怎样leh？ Chit pái ê问题kám是大家自然产生出来ê意见？Á是....？」
「这无一定是án-ne；这完全是老母kah景文两人想出来ê，然后chiah成做大家ê意向。M̄-koh，in也无hiah容易照in所想ê来达成，因为虽然大家对大兄无好感，m̄-koh，对景文mā无kah意。景文表面上对人bē bái，m̄-koh，背后是真gâu计较ê冷酷ê人。春鸾嫁妆kah来ê三万圆mā去hō͘ 伊the̍h去，讲he m̄是属她个人ê，应该是属陈家ê。Cheng-seⁿ (译注：chit句是日本人骂人á是怨叹ê话)，实在有够过份，无hō͘ 我得tio̍h半sián钱，而且in bó͘玉帘是ài súi、骄傲koh pháiⁿ心，无好。以前她bat tī你ê房间泼尿泼kah满四界，mā bat剪破你ê衫裤，kám m̄是？ Chit件tāi-chì我lóng知。五十人ê家族án-ne tòa做伙，真乱杂，四界lóng有间谍，ta̍k项lóng通过话传来传去；chiah-ê恶作孽lóng mā是玉帘叫她ê cha-bó͘-kán-á去做ê。」
安子koh想起已经bē记得ê hit件泼尿ê tāi-chì，而且午前送来ê hit只烘鸭koh再出现tī眼前。她忽然感觉想beh吐，面色koh khah苍白，目chiu 露出艰苦ê款式。瑞文kah-ná kah她同感痛苦，目头结结讲：「阿嫂真可怜，为啥物你偏偏走来chit-ê艰苦ê所在neh？」
「M̄-koh，án-ne看起来，阮翁bó͘无法度一生lóng tòa tī chia loh！」
「阿兄家己有想beh搬出去chiah tio̍h！ 伊是一个名誉心真强ê人，为tio̍h家己ê成功发展，lóng无beh关心厝里ê tāi-chì。M̄-koh，阿嫂kah-ná无想beh离开chit间厝，几百年mā beh tòa落去ê口气，真奇怪，实在有够不可思议。我若是你，亲像笼里ê鸟，早to̍h飞出去loh！」
「我无翼，假使飞出去，会chhōe无物thang食koh hō͘ 雨lâm，kám m̄是会死去？阮翁bó͘ 有chit款ê命运，我想这是神ê旨意。」
「Kám án-ne？我bē了解。阿嫂，这到底是啥物原因leh？你有啥物特别ê tāi-chì，我想beh知。」

瑞文对阿嫂tī chit种一般人无法度解说ê心情，伊有真chē疑问，koh有好奇心一直teh问，m̄-koh，安子无kā伊回答。她到chit-má lóng iáu无法度明确对翁婿清文讲出chit种心情。两人是台日联婚，清文是台湾人命运ê立场，两人所生ê混血儿ê事；若考虑tio̍h chiah-ê情形，in夫妇两人ē-tàng安心khiā起ê所在，陈家是比世界ê其它所在lóng khah好。安子无法度用嘴讲出chiah-ê理由，he是一种直觉，一种灵感。
「阿嫂ē-sái讲是典型ê贞节日本妇人，而且koh有基督教ê教养kah信仰，所以我真kah意阿嫂，ǹg望你ē-tàng一直tòa tī chit间厝；我无法度说明我是gōa-ni̍h-á希望ē-tàng án-ne。M̄-koh，若án-ne，阿嫂会siuⁿ辛苦，bē-tàng有幸福；虽然有百万财产，也bē-tàng自由使用。」
「所以我讲，瑞文，是你误解我ê意思lah。我绝对m̄是为tio̍h财产来结婚ê，若kā我看做有hiah-ni̍h污秽ê心态，我会真伤心。」
「M̄是lah！Chit点我真清楚。阿嫂ê心kah你ê面容仝款súi，自你来到陈家ê时，我to̍h感觉tio̍h你有súi ê心，纯真koh温纯，有小khóa孤独ê款式....。Oh！kah-ná khǹg tī床头美妙色彩ê青瓷花瓶，真súi；若一摸就会破碎ê，hō͘ 人感觉真可怜。」

瑞文过头ê形容hō͘ 安子ê面小khóa红起来，m̄-koh，tú-chiah提起ê财产问题，瑞文已经无koh曲解家己ê清白态度，安子了解了后就安心。Án-ne是好，m̄-koh，为啥物瑞文一直teh感觉她可怜，对她流露超过程度ê同情neh？她远离故乡来到无习惯ê所在，嫁来复杂ê陈家chit件事，安子想讲是青年人常常有ê纯情关心，到taⁿ lóng无特别去kā它注意tio̍h，m̄-koh，今á日伊讲话ê声音kah态度有超过平常ê压迫感。她无意中面对面kā伊看，伊有一种紧张koh苦恼ê面貌，苍白ê嘴phóe微微á发红，目神热情teh烧起来。安子tio̍h一惊，kah-ná想beh逃避，kā目chiu 垂落来。M̄-koh，逃闪ê视线又koh看tio̍h瑞文khǹg tī紫檀桌角ê白siak-siak ê手，以及苍白、纤细，显然是teh chhoah ê手指(cháiⁿ)。
「真讨厌neh，你为啥物beh tiāⁿ-tiāⁿ讲我可怜？多谢你关心我种种ê tāi-chì，m̄-koh，你想讲我ê人生无幸福，he是你想了siuⁿ过头lah！」

安子掩盖胸坎受tio̍h奇妙压迫ê面色，thiau故意露出轻视ê微笑。
「不管你án怎掩盖，我lóng知你有无幸福ê人生。」
「为啥物？」
「因为并你无hiah-ni̍h爱清文大兄....。」
「你讲啥人？Kám是teh讲我？」安子对小叔意外ê话tio̍h一惊，她gia̍h头挺胸，用强势ê口气讲：「你teh讲啥物痟话！Án-ne随便想像是一种罪恶oh！」
「若是án-ne，你为啥物无beh kah大兄做伙离开chit间厝来自由生活neh？而且he是真简单ê tāi-chì ā！真奇怪neh，我无认为你真正爱阿兄。阿嫂是m̄是看破chit-ê世间？看起来确实是án-ne。若是看破，就会成做m̄是幸福mā m̄是无幸福中间ê心情；假使眼前有好事，连想beh kā它掠tiâu ê气力都无。我to̍h是án-ne，kah阿嫂仝款....。」
「你乌白讲lah！拜托mài koh án-ne乱讲好无？」
安子禁bē-tiâu发出粗鲁ê声，想beh阻止伊án-ne讲。

两人瞬间变成敌意ê眼神相对。瑞文感觉后悔；伊因为热情soah讲出无应该讲ê话，坐tī hia，脚头u soah teh chhoah起来。安子ê胸坎á mā起大涌，有一种不可思议ê摇动。虽然是瑞文ê话hō͘ 她感觉真意外，m̄-koh，她mā ē-tàng用平常心，笑笑leh to̍h hō͘ 它soah去ā，ná会有需要对瑞文所指出ê tāi-chì hiah-ni̍h正经来表示反对neh？ 这可能是她有娠容易激动。讲实在，最近她感觉对清文有小khóa疏远，家己对伊忽然冷淡ê心理变化，安子mā真oh了解到底是啥物原因。这kah-ná雌雄同体ê双性花leh；chit-má腹肚内ê性命hō͘ 她感觉真充实，为tio̍h kah新性命结合，她感觉无需要其他ê异性，甚至到感觉讨厌ê状态。这一定是一时性ê心理变化所产生ê结果，m̄-koh，若回复tńg来常态ê时，iáu-koh持续hit款心情，án-ne beh án怎chiah好？安子忽然担心起来。Chit种无依óa ê感觉，讲起来kah-ná是因为两人当初相识ê时开始，她就一直是被动ê缘故。Tùi家己ê性情来讲，安子想tio̍h家己tī恋爱时ê痴情，就感觉讨厌起来，感觉被动是khah tú好。爱人kah被爱lóng ē-sái讲是幸福，被爱对她来讲，颠倒khah轻松koh有节制，ē-tàng保持美好ê自尊心。总是，tú-chiah瑞文讲一kóa意外ê话，kah-ná无意中hō͘ 伊讲tio̍h要害，安子soah心虚koh紧张起来，到底是为啥物leh？

M̄知tùi tó位吹来huh-huh叫hō͘ 人感觉无爽快ê风声；过昼了后，厝里ê鸡、鹅mā发出奇怪ê叫声，这是风台beh来ê前兆。Iáu未到黄昏ê时刻，厝内忽然暗落来，雷公ná大炮teh震动门窗，sih-nah扫过两人ê胸坎。安子联想tio̍h各各他(译注：耶稣被钉十字架ê所在)ê乌天暗地，她想无家己有犯tio̍h 啥物hō͘ 天受气ê罪过，m̄-koh，为啥物tùi心底一直惊惶起来？瑞文mā后悔讲出收bē tńg来ê话，想beh向安子解说，m̄-koh，m̄知beh án怎来开嘴。就án-ne，到安子teh beh关窗á门khiā起来ê瞬间，她hō͘ 天地所产生ê异常之力打倒，面tēng，身躯kiu起来；两人面对面坐leh，lóng无发见瑞文ê bó͘ 春鸾满腹嫉妒，tùi纸门外ǹg in两人金金teh看。