《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 第三章（更新版）
作者 庄司总一 着 杨东杰 指导 林俊育 台译 2017.04.02
新婚ê玫瑰棉被排除一切世间ê烦恼，一年时间kah-ná眠梦过去。陈家年轻夫妇ê新居也已经完工，tī本来凹形建物ê一pêng，接续落去增建二楼ê西洋式楼á厝，内底特别为安子设计一间八块tha-tha-mih大ê日本式房间，漆过油漆ê槟榔树床柱kah樟树目纹ê棚架，kā chit间tha-tha-mih房间加添异国风味；楼á厝内底当然mā有便所kah铺地砖ê siau-oah (shower)浴间，iáu有西洋式ê客厅kah册房，koh有葛藤棚ê楼台，以及ē-tàng仰望南国星辰ê厝顶庭园等等。旧厝是一栋续接起做伙ê kui簇厝，它ê栋梁弯曲，墙围á生青苔；chit栋竹林包围ê纯中国式khiā家，kah增建ê现代楼á厝比较起来，形成一种无调和ê对比。Tùi旧厝内传来古典哀怨旋律ê弦á声，另外新厝chit pêng有听见贝多芬á是萧邦雄壮华丽ê现代音乐。这对陈家ê人来讲，感觉真无爽快。In对清文beh起新厝有让一步，m̄-koh反对伊起楼á厝。几代落来，陈家lóng无分厝，家族渐渐增加，也增建真chē新厝，形成一个大家族，总是，所有ê厝顶lóng bē-sái比厅堂ê厝顶khah koân；这m̄-nā是严格ê规矩，mā是一般ê常识惯例。总是，清文ê楼á厝看会tio̍h厅堂ê厝顶，久长历史所传承落来ê秩序kah调和，beh tùi chit间新派建筑ê一角崩落去à；老一辈ê人lóng怨叹吐气。Koh来，清文mā对家族无卫生ê习惯á是不良风俗，发言纠正；亲像bē-sái phùi痰tī地面，bē-sái用手挖鼻孔，洗尿桶ê水bē-sái泼tī庭园等等。总是，对in来讲，感觉chit款ê责备真好笑，因为in认为in所做ê一屑á都无lah-sap，也无m̄好；若是讲无清气、pháiⁿ习惯，只不过是比较性 ê问题niā-niā。日本人tī厝角囤积屎尿ê习惯，西洋人看起来是绝对无卫生。总是，西洋人相chim，嘴唇可能有结核菌，咱看起来mā是真无卫生。Koh再讲，无食无煮过ê物件ê台湾人，看日本人食sa-si-mih mā感觉会起鸡母皮。所以，若kā卫生习惯kah单纯ê风俗习惯当做文明ê标准，未免是有khah幼稚ê想法；这只不过是文明人对无清气kah pháiⁿ风俗ê反感khah强niā-niā。
Án-ne讲起来，清文惊hiah-ê tāi-chì，kah-ná teh证明伊是一个文明人。伊讨厌台湾文化ê劣势，soah bē记得去kā它爱护，kan-taⁿ tāi先感觉轻视。伊kan-taⁿ嘴讲tio̍h改善陈家ê生活环境，却惊手bak垃圾，soah无beh下动去做。伊挂文明夸耀ê手套，目头结结，kan-taⁿ beh póe尘埃。其实伊无kā厝里ê人看在眼内，kan-taⁿ急beh提高in夫妇两人ê生活水准。另外一方面，伊mā kan-taⁿ关心kā家己推出，踏入去社会ê tāi-chì；tī政府机关ê聚会场合，清文常常高谈阔论，mā tiāⁿ-tiāⁿ tī公会堂讲演。清新ê思想、丰富ê学识，加上正确ê日语发音kah充满热情ê声量，ē-tàng充分迷惑听众；市民早to̍h开始注意清文chit-ê杰出英才。
虽然是án-ne，清文内心iáu是心内不安。高等官ê任命一直延迟无下落，hō͘ 伊真着急，烦恼是m̄是伊家己ê价值无受肯定，á是这是出tī民族偏见。
陈家ê人对长男夫妇ê现代化新厝感觉真无爽，另外一方面mā是感觉好奇来看待in。无探查别人，尤其是女性ê房间，是台湾人ê好习惯，所以虽然大家心存好奇，mā bē入去in ê厝内底。总是，in ê gín-á lóng天真无邪，想beh入去to̍h入去。安子会hō͘ in糖á饼kah chhit-thô物，所以kah in变真熟似；in ê老母tī外面大声hoah，gín-á mā无想beh tńg去。其中有几个已经读公学校(译注：日本时代ê小学)，会晓日语，真ài听日本ê童话故事。来过清文新厝ê大人，kan-taⁿ小弟景文kah瑞文，in两人常常来借用hú-loh桶洗身躯。后来老父阿山mā发见浸hú-loh桶ê爽快，就常常来洗浴。因为安子对阿山有好感，所以比对别人khah亲切teh kā伊款待；她kā伊冲kha脊phiaⁿ，koh hō͘ 伊穿家己缝制ê浴衣。阿山kah平常时仝款，露出温纯ê笑容讲：「好，多谢，多谢！」伊非常欢喜。有时浸hú-loh桶起来，tī楼台ê椅á坐teh歇困，安子就开电风hō͘ 伊吹，koh phâng冷饮hō͘ 伊lim。
楼台ê头前有一个整齐ê小庭园，无松kah梅，m̄-koh，有多样色彩叶á巴豆、千岁兰、榕树、印度树木、仙丹花、台湾莲花、白奶藤等等，koh有将近一丈koân ê仙人掌当teh开白色ê花。Chit-ê庭园ê内角续接陈家自早to̍h有ê广阔后埕，园内ê南国树木苍翠茂盛，不断传来细只鸟á可怜ê叫声。Koh khah内面ê围墙边á有竹林，成群结队ê暗光鸟飞来飞去，ná亲像竹á顶teh落雪。
「阿爸，你身上ê伤痕是án怎来ê？」
有一pái，安子下决心án-ne kā伊问。阿山ê肩胛到kha脊phiaⁿ有一条斩tio̍h ê大伤痕，浸hú-loh桶ê时，安子看tio̍h lóng会惊一tiô，想讲到底he是án怎来ê。
「He是我ê武勇故事。」
阿山就慢慢á讲起hit-ê伤痕ê由来。伊ê日本话ná亲像gín-á无完整ê讲话，听起来真食力，m̄-koh，意思大概是án-ne：
四十年前有一暗，陈家受一团土匪包围。Hit时，阿山tī老父ê房间里，赶紧gia̍h挂tī壁顶ê枪，beh冲出去外口。老父忽然tùi内面kā门锁起来，仓仓pōng-pōng阻挡in kiáⁿ。阿山hit当时二十二、三岁，tú娶bó͘，血气当旺。
老父ê房间外传出cha-bó͘人「哀哀叫」ê悲惨声；缚脚ê cha-bó͘人tī chit款危急ê时刻，koh khah陷落tī无法度抵抗ê状态。阿山急beh救出新婚ê bó͘，m̄-koh，无胆ê老父哀求伊mài出去，kā伊ê手ńg giú tiâu-.teh m̄放。
过一时á，动乱静落来，贼á抢夺物件了后已经退去ê款。阿山枪(chhiuⁿ) gia̍h-.teh冲入去家己ê房间，一个贼á手gia̍h大刀khiā tī眠床边。In bó͘ 失神倒tī眠床顶，阿山掠准她已经被thâi死à，因为她横身倒leh。Chit时，贼党已经撤退，事不延迟，chit-ê掠贼ê好机会to̍h tī面前，若去hō͘ 伊走去就真可惜，伊就四界chhōe贼。阿山tùi贼á ê背后，出力kā枪cha̍k去，真可惜hit-ê贼á已经有注意tio̍h，身躯闪开，枪尖kan-taⁿ tùi贼á ê koeh-lang-kha穿过。贼á反tńg用青龙刀大力斩tio̍h阿山ê肩胛头。
Hō͘ 贼á走去chit件tāi-chì，阿山ê威武故事ê光彩有小khóa减少。总是，hit当时家族内无一人像伊hiah勇敢。这虽然mā是因为年轻血气旺ê关系，m̄-koh，伊本来就是khah笨chhiâng，对事务无容易摇动ê人。普通chit种得意ê古早事，会hō͘ 人感觉情节真紧张，所以讲起来自然会加油添醋；将近半世纪前发生ê tāi-chì chit-má讲起来，事实ê顶面koh加上一kóa幻想，soah jú讲jú膨风，soah kā家己当做英雄。M̄-koh，阿山大人时时笑容满面，ná准普通故事慢慢á teh讲。
「以前不管tó一个国家，kah chit-má无仝，社会真乱；hit时，阿母一定大tio̍h惊，佳哉你有脱险。Chit-má ē-tàng安乐过日子，lóng是hit当时阿爸你ê勇敢表现。」
「她m̄是阿娇，hit-ê老母已经过往à。」
「Ah！Chit-má你讲ê是....？」
安子无了解，所以án-ne问。她想讲hit时伊ê新bó͘ kah chit-má ê老bó͘ 阿娇有可能是无仝人。总是，阿山tèⁿ m̄知，无koh讲起。
「以前真chē土匪、贼偷，chit-má khah安全，真好。日本政治，真好，真好。」
Chit句话绝对m̄是扶tháⁿ ê话，tī伊六十年ê生涯中，siōng大ê tāi-chì to̍h是政治变化。Chit-ê政治变化，就是台湾hō͘ 日本统治，无论如何是欢喜ê tāi-chì。阿山到壮年为止hit段清国统治ê时代是啥物款？Kah伊tú-chiah讲ê仝款—凶徒匪贼横行，无法度高枕无忧。尤其是资产家，in性命财产无保障，加上官衙ê刻薄剥削，致使有双重ê痛苦。Hit时，街路iáu狭kheh koh lâ-sâm，恶疫不断。长男清文ê顶面本来iáu有两个cha-po͘-.ê，in to̍h是有一年流行寒热病ê时过身去ê。Kah过去生活困难ê时代比较起来，现今ē-sái讲是超过安全ê安全。阿山身躯洗了，theⁿ-tī楼台ê藤椅á顶，深深感受tio̍h太平ê气氛，目chiu kheh-kheh kah-ná teh眠梦。长男清文娶日本bó͘ tńg来ê时，阿山心内一时无爽快，m̄-koh，清文chit-má堂堂做官，新妇koh性情温柔，而且因为án-ne，koh享受tio̍h一生lóng m̄-bat经验过ê浸hú-loh桶ê快乐，加上súi koh年轻ê新妇亲切招待，就án-ne，伊to̍h m̄-bat koh加讲话。总讲一句，阿山chit-ê人bē-sái讲是用头脑接受文明开化ê恩惠，伊kan-taⁿ ē-sái讲是用皮肤感觉ê快乐主义者。
M̄-koh有一工，安子teh kā阿山冲kha脊phiaⁿ ê时，ta-ke阿娇chông来到tè，大声嚷。阿山仓仓pōng-pōng，身躯bē赴拭ta就穿衫裤，想beh讲几句话来安慰in bó͘，m̄-koh，阿娇ê激动teh bē-tiâu。她一手thuh拐á，一手由cha-bó͘-kán-á kā她chhah-.leh，用嘴来补她身躯ê无自由；阿娇一支嘴chhiah-pê-pê，非常厉害。安子hit-chūn bat几句简单ê台湾话，m̄-koh，ta-ke气phut-phut，讲话koh紧，安子听无她teh讲啥物。
厝里ê人听tio̍h阿娇大声keh-keh叫，tùi ta̍k-ê房间出来，khiā tī新厝ê窗á脚。阿娇行出hú-loh间，向kui大阵ê家族，发表街头演说讲：「大家听我讲，hit-ê日本新妇摸阮翁ê身躯，koh是tī人teh看ê面前bē见bē笑án-ne做。我活六十gōa岁à，iáu m̄-bat受过chit款ê侮辱。Hit-ê cha-bó͘人面皮有够厚，是敢kah ta-koaⁿ行奸淫ê妓女，是一个淫妇lah。」安子若是听有chiah-ê话，一定会晕倒。阿娇吐出chiah-ê垃圾pháiⁿ话了后，箭头转向in翁阿山讲：「Hit-ê ta-koaⁿ kám有像ta-koaⁿ款？ 老khok-khok也无啥物气力，koh是一个老不修，tio̍h kā伊khah严厉管辖chiah tio̍h。总是，chit-ê老不修kah hit-ê cha-bó͘人kô͘-kô͘缠lah！我本来to̍h大反对娶日本新妇入门，m̄-koh，阿山lám-nōa koh无志气，结果发生chit款tāi-chì。听起来kah-ná野狗ê交合，真m̄是款，竟然堂堂娶入门，欺骗大家来办婚宴，kám m̄是一个厚面皮ê大骗子？Lín想看māi，chit款人kám-ē-sái做陈家ê后嗣？咱若忍耐落去，in to̍h会koh khah得意，kā咱看做ná狗á猫á，看咱bē起；hō͘ in án-ne无法无天，hō͘ 咱动肝火，hō͘ 咱咬牙切齿。Oeh！Lín大家感觉án怎？Kám bē受气？」
Ta-ke阿娇ê嘴kah-ná受气ê喷火口，她激动ê情绪无thang tháu，人ta燥kah用龙眼树ê拐á kòng地板。她一时想bē出好办法，就kā cha-bó͘-kán-á beh kā她扶ê手poe̍h开，用家己ê tò手挥舞。M̄-koh，无人kā她扶ê身躯摇hián，有向前倒落去ê危险。
阿娇ê抗诉引起各方面ê回应，观众ta̍k-ê lóng是感情性 ê厚话ê女性，所以忽然间引起喧嚷ê旋涡。安子m̄知beh án怎chiah好，á当事人老父阿山m̄知逃去tó位？伊无在场，无人ē-tàng同情她，来为她辩护。尤其是次男景文ê bó͘玉帘一直teh附和阿娇ê话，呼应阿娇ê讲法，气势真iāⁿ。玉帘面形长，头毛乌sìm-sìm，目chiu kah-ná龙眼籽，乌koh大蕊，hō͘ 人妖艳ê感觉；她浓妆koh美丽ê穿插，挂金银、翡翠ê装饰品，tī女性家族中算是真影目。安子想讲chit-ê人是无法度帮她ê忙，她就四界chhōe看有人thang来救她脱离困境。Chit时，她发见三男ê bó͘春鸾khiā tī人影后，就行óa去想beh请她助一臂之力。春鸾感觉同情，kā她看一下，就随时目chiu 看下脚。春鸾浅乌色ê圆面，厚眼皮内面ê目chiu仁无真清亮，鼻孔、嘴唇lóng无啥物特徵，kah in阿嫂玉帘比起来，颠倒有khah浅白ê面色。她做人谨慎，khah无嘴尾，日本话相当gâu讲。安子就拜托她来做翻译，beh知影ta-ke讲啥物，为啥物受气，家己若做m̄-tio̍h就需要赔罪。总是，春鸾无beh答应，无意无意，藏入去人影内面。Tī chit种四面楚歌ê状况下，忽然出现一个救星，就是春鸾ê翁瑞文。安子iáu未kā tāi-chì讲soah，瑞文就勇敢行去老母ê面前，开始替阿嫂辩解。伊当然无法度hō͘ 阿娇理解镇静落来。另外一方面，聚集óa来ê女性家族中间，插嘴ê kah骂声四界发出，瑞文只好也tio̍h向in解说。伊讲kah面红耳赤，挥手顿脚，目屎mā流落来。
安子知影koh拖落去mā无法度解决问题，就走离开hit-ê所在。她se̍h过家己ê小庭园á ê角边，行出去广阔ê后庭园，ná来ná踌躇ê脚步，tī树木中间se̍h来se̍h去。
「阿嫂ah！」安子无gōa久to̍h听tio̍h有人teh叫，oa̍t头看，原来是为tio̍h她拚命辩解kah面青sún-sún ê瑞文teh行óa来。 瑞文ê目chiu 内iáu有兴奋kah受气ê火气，伊安慰安子讲：「阿嫂，请 原谅，大家lóng真过份，请mài挂意。」
「无要紧！实在真pháiⁿ势，soah hō͘ 你变做受人怨戚(chhè)。」
「这无啥物，我为tio̍h你啥物tāi-chì lóng愿意做，我非常同情你受委屈ê立场，非常....非常。」
「M̄是án-ne lah！是我khah han-bān，ta̍k项lóng无了解，等khah了解咱ê习惯kah话语了后，我想大家to̍h会khah接纳我，因为我chit-má啥物lóng m̄-bat。」
「Tio̍h lah！阿嫂，今á日ê搅扰mā是习惯无仝来引起ê。Tī台湾男女ê tāi-chì真费气，男女七岁起就bē-sái坐做伙。Hit款思想到taⁿ iáu有，所以cha-po͘人bē-sái随便入去cha-bó͘人ê房间，连老父mā bē-tàng入去cha-bó͘-kiáⁿ ê房间。因为án-ne，你kā老父洗身躯chit件事mā….。」
「Oh！是án-ne oh！我实在m̄知，我想讲he是好tāi-chì。Tī日本内地，kā cha-po͘人冲kha脊phiaⁿ，无人会责备，何况是对老大人。」
「M̄-koh，引起hiah-ni̍h大ê搅扰ê原因m̄是kan-taⁿ chit件事，其实阿嫂受大家怨戚....m̄是，受人怨戚ê是清文大兄。Lóng是阿兄m̄好，伊展威风，固执koh压霸，所以大家对伊无好感。实在讲起来，伊有khah超过lah！」
瑞文kah其他家族ê人仝款，对清文不满，就án-ne怨言to̍h开始。安子恬恬无讲话，她真了解in翁做人siuⁿ过份，清文án-ne做kám好？她开始烦恼起来，m̄-koh，真明显ê责备听了siuⁿ-chē，mā会感觉无爽快，她就想beh替清文辩护。
「因为伊长期间tī日本内地生活，soah bē记得家己出世生长ê家乡ê风俗习惯。伊ê做法过份是事实，m̄-koh，伊无感觉家己轻视家族ê人koh展威风。夹tī新旧社会ê中间，感觉真pháiⁿ适应，koh硬beh设法突破，我想伊是án-ne ê情境lah，一屑á恶意都无。伊真条直koh m̄知妥协ê方法，所以会hō͘ 人误解。」
「条直kah bē晓妥协？我想m̄是án-ne，是因为伊激骨lah！阿兄讲起来mā是无幸福。」
「你讲伊是无幸福ê人？」
安子惊一tiô。清文是拥有百万财富ê家族ê大kiáⁿ，就是一般所讲ê含(kâm)银匙出世。伊koh有优秀ê头脑，tī hit当时ē-tàng去难得ê日本内地留学，koh得tio̍h最高学府ê毕业证书。伊lóng无欠半项，想beh ài啥物lóng得会tio̍h。伊tú-tio̍h siuⁿ好ê境遇，soah kā伊sēng了过头，chiah hō͘ 伊有个性强ê原因；这是安子ê想法。
「因为娶我，就受无必要ê劳苦，我感觉真遗憾....。」
「M̄是án-ne！阿兄m̄是kan-taⁿ hit-ê tāi-chì，iáu有其他ê问题，伊kah老母ê关系....。」
「Kah老母ê关系....？」
「阿嫂kám无注意tio̍h in中间无好势？」
「Eh，比bē和koh khah严重；kah-ná外人，一屑á亲情都无。」
「是ah！阿嫂kám m̄知？阿兄kám lóng无kā你讲？」 瑞文露出真无了解ê面容，续落去用愤慨ê口气讲。：
「真奇怪ê人！若是我对家己siōng爱ê bó͘，啥物tāi-chì lóng会讲，好事pháiⁿ事，尤其是艰苦心ê tāi-chì，koh khah需要吐出来tháu气，祈求得tio̍h安慰chiah tio̍h ā！清文大兄做bē到，可见伊ê自尊心真强，koh真固执。阿嫂mā是真可怜ā！」真可怜lah！参杂台湾话腔ê chit句话，听起来tī语感上增加微妙ê哀愁感觉。老父阿山无热心koh靠bē住ê情份是另外一回事，陈家全家kah-ná lóng是她ê敌人，kan-taⁿ三男瑞文对她有同情kah理解；虽然是不可思议，m̄-koh，安子感觉无论tī啥物所在，神lóng有为伊安排一两个友善ê人，hō͘ 她感觉有óa靠。起初，安子感觉瑞文是一个讨厌ê青年，头毛抹油，麻纱ê外衫漂出phang水味，皮肤滑溜有一点á苍白，五官头面是三兄弟中间siōng秀气ê。起初，感觉瑞文讨厌讨厌，chit时感受tio̍h伊ê亲切，soah感觉伊变成一个天真无邪ê贵公子气质，看起来iáu真gín-á款，hō͘ 人m̄敢相信伊已经是一个有bó͘-kiáⁿ ê人。
瑞文一时顺势无注意讲出来，kā连丈夫都对她隐瞒ê tāi-chì讲出嘴，多管人ê闲á事，m̄知有适当á无，家己soah起踌躇。伊感觉mài讲出来hō͘ 它自然过去khah好，就对阿嫂讲：「你有想beh食柚á无？若想beh食，我peh起lih树á顶挽。」无意识中，两人ê脚移动几步，行到果树中ê一欉柚á树脚。Tùi青绿色ê枝叶中间，安子看tio̍h果实kah-ná装饰垂落来，丰硕ê柚á tī金色ê秋阳中发光闪sih。安子仰望，胸坎á自然展开，柑橘类特有ê苦味kah酸味参杂ê气味，thàng到胸坎内底。
「等一下chiah peh树á，请先讲你tú-chiah提起ê tāi-chì。」安子虽然着急，m̄-koh用镇静ê声请求。想beh知丈夫有啥物重大ê tāi-chì ê时，却忽然抱tio̍h chit种晴朗koh充满微笑ê态度，安子对家己ê无谨慎自责，所以改变口气，koh讲一pái。
「Neh，你讲清文ê不幸是指tó一项tāi-chì，我lóng m̄-bat听伊讲过。伊lóng m̄-bat对我讲起，显然是重大ê tāi-chì。你讲伊kah老母ê关系是....？」
「清文兄m̄是老母ê亲生kiáⁿ。」
听tio̍h chit件tú知ê事实，安子就明白最近老父阿山讲tio̍h年轻时ê威武故事。Hit当时安子忽然感觉ê疑问，chit-má tùi瑞文ê话得tio̍h解答。Án-ne ê答案虽然有够额，m̄-koh，chit件事实所产生出来有关清文ê境遇，以及以后所发生ê种种tāi-chì，安子当然mā有想beh详细知ê好奇心。总是，hiah-ê枝叶问题问丈夫本身mā是ē-sái；安子想讲chit-má急beh tùi第三者来探听，对丈夫来讲是一种侮辱。M̄-koh，瑞文已经讲出来à，kah-ná堤防崩一隙（khiah），无办法thang挽救ah。瑞文知影阿兄清文是cha-bó͘-kán-á生ê，to̍h是私生子lah！Chit件tāi-chì厝里ê人lóng知，无算是啥物秘密。总是，kan-taⁿ in bó͘ 安子m̄知。Chit时，老母阿娇ê pháiⁿ声sàu态度中，mā有讲出chit-ê侮辱人ê事实。话语bē通ê安子当然无了解，án-ne无知受骗，一般来讲伊是幸福ê，瑞文soah反tńg感觉he是悲惨ê tāi-chì，所以bē禁得愤慨起来。
Chit-má ê家长阿山起初有一个叫做金枝ê正bó͘，夫妇生一女两男。M̄-koh，有一年流行严重ê瘟疫，bó͘ kah两男hō͘ 病魔夺去性命。Hit时，猛烈ê瘟疫大流行，棺材供不应求ê悲惨情景，家族内mā有其他四人死亡；阿山ê bó͘ kah后嗣一时连续死亡。阿山m̄是为tio̍h chit种不时ê需要；其实tī chit-ê惨事发生chìn前，伊一时疏忽花心，kah一个叫做玉女ê cha-bó͘-kán-á生kiáⁿ，chit-ê kiáⁿ就是清文。讲是失去后嗣ê不便，其实也是beh安慰创伤ê心灵，阿山就考虑beh kā cha-bó͘-kán-á生ê kiáⁿ来做伊ê后嗣。台湾人用钱买来ê差用叫做cha-bó͘-kán-á，hō͘ 人看轻，m̄-koh，hit当时台湾ê继承制度非常败坏混乱，细姨生ê á是cha-bó͘-kán-á生ê，照父母ê旨意kā伊当做正后嗣ê情形mā有。以陈家ê家世，bē-tàng随便，所以阿山ê希望当然引起反对。总是，阿山无beh放弃清文，伊虽然个性随和，m̄-koh，伊一生中坚持到底tio̍h照伊ê意见来做ê，只有chit件事。当时iáu活leh ê阿公kah老父，lóng屈服阿山ê热情。总是，为tio̍h beh kā hit-ê kiáⁿ当做后嗣，伊就必须kā hit-ê cha-bó͘-kán-á纳入做正bó͘，因此kan-taⁿ手续上辨理结婚。其实，当时阿山是年轻好色，对玉女并无爱情，所以照计画，结婚了后随时离婚，hit-ê cha-bó͘-kán-á就被赶出陈家。另外一方面，tī chit件tāi-chì发生chìn前，阿山已经有一个细姨叫阿娇。阿娇美貌，m̄-koh是一个乖癖ê女强人，阿山无想beh kā她升做后siū，m̄-koh，阿娇逼好性地ê翁，无gōa久就得tio̍h后siū ê地位，koh生景文kah瑞文，以及其他所有出嫁ê cha-bó͘- kiáⁿ。
因为阿娇想beh hō͘ 亲生kiáⁿ景文做陈家ê后嗣，所以lóng kā清文当做kah-ná眼中钉来kā伊养饲长大，而且清文是一个优秀ê gín-á，后母koh khah嫉妒khioh恨。汉学á ê老师tiāⁿ-tiāⁿ褒奖讲：「chit-ê gín-á是神童！」就是因为伊有聪明ê头脑，体格koh koân大勇壮。小弟景文mā m̄是thûi-thûi，mā是相当结实，m̄-koh，tī读册chit方面to̍h kah阿兄无tè比，而且体格mā khah细汉，看起来to̍h输伊真chē。M̄-koh，伊有亲生母做强ê靠山，ta̍k项tāi-chì lóng m̄认输，经常kah阿兄相phah。M̄-koh，无论án怎对抗，景文总是hō͘ 结实ê阿兄压倒tī土脚teh哭，hoah救人。见若兄弟相phah ê tāi-chì，阿娇lóng kah-ná tú-tio̍h杀人事件teh喧嚷，kā清文掠来用竹棍á phah kha-chhng-phóe。清文无感觉受phah ê痛是一种教训，颠倒ē-sái讲是jú受虐待jú phah小弟，一直到两人lóng超过十岁，chiah忽然停战。Gín-á到chit-ê年龄，缚脚ê阿娇想beh掠清文来phah，mā已经m̄是hiah容易ê tāi-chì à！而且准讲掠tio̍h，beh phah chìn前，家己颠倒会hō͘ 清文sak倒。Koh景文本身有觉悟，tī学问kah体力，伊真oh得kah阿兄对抗，而且清文对使用gín-á性ê暴力来解决问题bē-tàng得tio̍h满足；伊已经进入复杂人生ê阶段。另外一方面，hit当时伊已经开始去教会，成做一个bat tāi-chì ê少年人。Hit当时，亲chiâⁿ中间有一个阿婶是基督徒，常常chhōa清文去教会，无gōa久就入教会办ê小私学á读册，tī hia读台语圣经，学罗马字(白话字)。除了ē-tàng读册，清文也真紧对信仰热情起来，老师Mak-nè-l（Mcnneil）宣教师特别疼惜清文，无gōa久chit位外国人就安排伊去日本神户读教会学校。因为有chit-ê契机，伊以后就继续tī日本内地受教育。
「后来ê情形，阿嫂一定真清楚chiah tio̍h。阿兄去日本内地十几年，其中真少tńg来厝里，ē-sái讲是算无几pái。阿兄kah你是án怎熟似ê？是恋爱结婚ho͘ⁿh？真好neh。」
瑞文真欣羡，án-ne讲。伊tùi án-ne发觉阿兄ê运命，想起来mā是kah其他ê人仝款，对清文抱tio̍h反感kah欣羡。容貌优秀koh智慧比人khah koân一段；瑞文对日本人时时lóng án-ne teh看待，所以伊想像kah日本妇人结婚是何等ê súi。M̄-koh，嫉妒以外，hit-ê súi ê感觉是脆弱ê，伊若想起来，to̍h随时有稀微ê感觉，就bē爽快，所以对安子ê同情有参杂讨厌。
「Hit-ê叫做玉女ê老母，后来变án怎？」
「Ah！无啥清楚。M̄-koh，kah-ná是去tó位ê田庄做田。我会记得bat见过hit-ê cha-bó͘人，我五六岁ê时，确实是tī hit pêng！」瑞文kí一phō竹，继续讲：「我有看tio̍h in母kiáⁿ见面，chit-ê穿kah无啥好看ê cha-bó͘人the̍h糖á hō͘ 阿兄。她kah-ná是pôaⁿ过墙围á，偷偷á入来厝宅内ê款。」
「她káⁿ是真艰苦心，不幸ê老母ho͘ⁿh！」
「无no͘h，ná会是án-ne！」瑞文带真轻视ê口气讲：「横直是一个无受教育ê下等cha-bó͘人。Hit款tāi-chì随时就bē记得，来kah亲生ê kiáⁿ见面，前后mā是kan-taⁿ hit-pái。Hit-ê cha-bó͘人是老父一时ê好色，到taⁿ iáu时常hō͘ 人当做笑话teh讲起。无论án怎讲，玉女是一个身躯粗鲁，皮肤乌乌ê bái cha-bó͘ lah！」Chit种侮辱ê讲法，mā是对安子本身ê侮辱。总是，对he感觉bē爽快以外，安子koh khah感觉陷入忧郁ê气氛。Tāi-chì既然是án-ne，安子想讲无论koh khah án怎努力，mā无法度kā家己tī陈家ê立场变好。这hō͘ 她忽然感觉无奈，心情开始坠落。 「是án怎leh？失礼lah！阿嫂。我讲了siuⁿ过头，hō͘ 你心情bē爽快。」
安子忽然沉思起来，恬恬无讲话，看她ê面teh流目屎ê款，瑞文hō͘ 伊tùi幸福之座小khóa溜落来，虽然有一点á欢喜，m̄-koh，伊原本是出tī一番好意，所以伊心内iáu是感觉有亏欠，就安慰她讲：
「请mài挂意，一切tāi-chì lóng过去à！Chit-má无tāi-chì à！清文大兄堂堂是陈家ê后嗣。来，我挽一粒柚á hō͘ 你。」瑞文peh起lih树á顶，挽一粒手掌大ê黄色球形ê柚á。为tio̍h beh hō͘ 安子欢喜，就用明朗ê声hoah:「我是猴山á，你是毛蟹，我beh tìm落去loh！」瑞文就做出beh出力tàn柚á ê手势。
「Ah！危险！」安子身躯退后，一粒柚á tú-tú好lak tī她ê胸前，她用双手kā它接起来。Gia̍h头一看，瑞文ê脚挂tī树枝，双手展开掠tiâu枝桠(oe)，le̍k目眉koh露出牙齿，装做猴山á ê款式hō͘ 安子看，安子自然笑出声来。
安子ê笑声hō͘ 背后一个cha-po͘人ê大声笑phah断去，她chiah注意tio̍h是翁婿清文下班tńg来，穿官服行óa来。
「你teh chhòng啥？瑞文，你kám是siuⁿ闲teh学猴山á ê款式？」清文ê心情算是bē bái，若无，安子感觉kah-ná hō͘ 伊看tio̍h无妥当ê tāi-chì，一时心肝chhia̍k一下；peh起lih树á顶ê瑞文mā m̄敢koh学猴山á ê款式。
白奶藤
