《《陈夫人》日译台e5台湾小说 第一部》

 | | | 转寄

《陈夫人》第一部 第二章（更新版）

作者 庄司总一　着 杨东杰 指导 林俊育 台译 2017.03.26

经过朋友ê走chông调解，清文ê工作决定被分派去台南府ê行政课，m̄-koh去到tè，soah讲无缺，不得不tio̍h转去水产课。无照原来ê ǹg望，清文真失望，真不服。

「总是，政府官员lóng mā仝款，tùi tó一课开始lóng mā好，kám m̄是？」安子án-ne安慰。清文苦笑讲：「我想beh辨理政治kah人事方面ê tāi-chì，以鱼做对象bē chhiaⁿ-iāⁿ。」 其实，m̄-nā工作单位无kah意，面试hit工，课长koh对伊质问一个无意义ê问题。
「安平鱼ê问题kám bē-tàng好好á处理？Tùi卫生上来讲真无好，你有啥物妙计？」

这是课长teh戏弄清文。因为市内ê鱼塭自早以来to̍h用人肥做饲料，鱼池á边到处设公共便所，鱼类直接tùi hia得tio̍h饲料。安平鱼特别爱食屎粪，这tùi风俗习惯á是卫生上来讲，确实是一个问题。M̄-koh，课长ê质问态度无真正经，清文感觉受tio̍h侮辱，因为这确实是对台湾人生活品质低ê phì-siùⁿ。

总是，这对伊有新希望kah活泼ê欢喜chìn前，这不过是小khóa tāi-chì而已。做一个政府官员，chit-má伊ê人生当beh出帆，当teh扬起满帆。清文每早起穿纯白色ê官服，威风凛凛去办公厅上班。因为伊m̄是军人，也m̄是警官，腰里却佩短剑，安子看tio̍h感觉真奇怪。Hit当时，tī殖民地ê台湾，学校ê老师、医生，以及凡若称做官员ê人lóng tio̍h佩短剑。尤其是节日庆典ê时，挂金肩章koh佩长刀，看起来koh khah威严。

陈家ê人从来m̄-bat想讲tùi chit家口会出一个有官员头衔ê人物，in对长男清文威风凛凛ê官服，当然非常佩服。因此，清文结婚典礼邀请ê时，不管亲chiâⁿ内心án怎想，in表面上lóng欢喜接纳。

清文原本kan-taⁿ计画beh宴请内亲族内ê人，除了宣布结婚ê消息以外，想讲透过chit-ê婚宴，mā ē-tàng达tio̍h kah族人亲睦ê效果。总是，万项事lóng ài复杂化koh ài大chhiaⁿ-iāⁿ ê支那习惯，以及为tio̍h家世面子，喜事就办kah真大。Hit工，炮á放kah phi-phi-pia̍k-pia̍k，喜酒、鸡肉、猪肉、绸缎布料等等祝福ê礼物堆积kah ná山leh。清文m̄是无欢喜，本来想讲穿简单ê洋服to̍h好，m̄-koh，看chit种场面，不得不也tio̍h穿台湾式ê礼服。清文中学时代就去日本内地留学，soah bē习惯台湾服，尤其礼服ê长衫是第一pái穿，穿起来bē自在koh pháiⁿ势pháiⁿ势。安子讲，你若是án-ne我mā无beh穿台湾服。清文家己是不得已tio̍h穿台湾服，m̄-koh，伊无勇气mā要求安子穿台湾服，就án-ne，安子穿水色ê洋装。喜宴tī大厅举行，chit-ê大厅类似日本人ê佛堂兼客厅，所有ê仪式lóng tī hia举行，也用来做接待人客ê所在；起厝ê时lóng用chit-ê大厅做中心来起造。清文tú-chiah就来大厅探头几nā pái，宾客却慢来，iáu未全到。入席时间定tī下晡四点，到五点iáu无半人出席，清文着急起来。Chit种无准时ê习惯是文化低ê证据，清文起懊恼；伊甚至怀疑kám会大家无beh出席，beh hō͘ 伊pháiⁿ看无面子。 「是án怎leh？ Kám会报m̄-tio̍h时间？」清文问小弟景文。 「Chit-má已经派人去催！无gōa久就会来ā。」

景文态度悠哉悠哉，甚至teh微微á笑，清文就án-ne起受气。
「Kám tio̍h派人去催！无催to̍h m̄来！既然hiah无愿意，mài来好lah！」
「阿兄ná会tio̍h hiah-ni̍h受气？无人会准时来；人客若来，咱mā iáu未准备好势。咱tio̍h-koh派人去敦请，人客chiah会来，这就是礼仪，kám m̄是？」
「无意义ê礼仪！」

清文chho̍p-chho̍p念，原来台湾式ê习惯to̍h是án-ne oh。伊已经kā chiah-ê tāi-chì bē记得了了，tī不知不觉ê中间远离家己ê民族。「我已经m̄是纯粹ê台湾人lah！」伊忽然用长衫ê手ńg遮额苦笑。 清文所m̄知影ê，m̄-nā是招待宾客ê tāi-chì，宾客来了ê席位顺序，mā是相当费气。这kah日本内地ê风俗仝款，宾客互相让位，beh就座mā无hiah容易。
「列位嘉宾，请mài客气厚礼数，eng暗请大家和和谐谐来坐桌，随便坐lóng无要紧lah。」

清文无ài麻烦去催宾客就座，总是，席位顺序绝对m̄是ē-sái随便ê，这是真严重ê tāi-chì。人人lóng teh等指定ê座位。主角清文讲随便坐to̍h好，家己soah去坐tio̍h无应该伊坐ê位，大家koh khah m̄知beh án怎chiah好，互相看来看去。「阿兄，你坐m̄-tio̍h位ā lah！」小弟景文pháiⁿ势kah面红，giú伊ê手ńg叫伊起来，soah tio̍h替伊安排宾客ê座位。

料理一chhut一chhut出菜，主人tī每chhut菜上桌ê时，lóng tio̍h举杯请宾客动箸用菜。清文因为无lim酒，soah bē记得chit项tāi-chì，坐tī边á ê景文to̍h提醒伊来注意。为tio̍h beh hō͘ 宴席完满进行，主人tio̍h制造闹热气氛，m̄-koh清文bē晓chiah-ê做法，场面to̍h khah冷淡。大家为tio̍h beh消除chit种冷场，就加减chhńg瓜子。
「清文kám完全无lim酒？」亲族中ê年长者án-ne问。
「我bē晓lim酒，而且因为我是基督徒，mā无pok薰。」

清文无pháiⁿ势ê款式án-ne坦然回答。大家互相对看，chhi-chhi chhu̍h-chhu̍h讲：「耶稣教」。In是反对清文娶日本bó͘ ê人，chit-má koh听tio̍h讲耶稣教，koh khah感觉清文chit-ê人骄傲koh臭屁。总是，in lóng是社会经验丰富ê seng-lí人，bē kā感情表现出来，而且清文已经做官，今后seng-lí上无的确有需要伊tàu设法ê所在，所以chit款ê phah算teh支配in ê心情。喜宴继续进行，不管主人hiah-ni̍h bē晓款待宾客，大家自然lóng有支那式ê礼数，互相愉快谈笑起来。大家就向新娘安子讲种种好话，in真知这是清文siōng欢喜ê tāi-chì。有一个人án-ne讲：「台日间ê合一和好m̄是kan-taⁿ用嘴讲ê，付出行动来台日联婚ê清文大兄，chiah是值得咱称伊做先驱者，á安子大嫂真正是勇敢ê伟大妇人。」Chiah-ê话hō͘ 理想主义者ê清文渐渐欢喜起来，就khiā起来发表殖民地问题kah民族论。

安子mā真欢喜，m̄-koh，kah清文ê欢喜性质无仝款；清文是kā chiah-ê人看低一级。若是用西洋式ê礼节，像hit暗hiah-ni̍h无技巧ê演出，清文家己应该感觉见笑面红；m̄-koh，对台湾礼数生疏，清文一屑á都无挂意，mā无感觉见笑，看起来反tńg真得意。Chit款ê优越感hō͘ 人真无爽快。M̄-koh，因为chit种优越感ê缘故，清文无注意tio̍h hiah-ê人ê巧言令色内底所隐藏ê反感。安子ê欢喜内面有参杂不安，因为她知in两人有一个缺点。
「夫人ê洋装真súi。若是信基督教tio̍h穿洋装结婚，kám m̄是？」亲chiâⁿ中间一个ná是知识分子ê án-ne讲ê时，安子ê不安就án-ne giâ起来。

清文kah安子iáu m̄是完全ê夫妇，因为安子ê双亲无承认in ê婚姻，所以bē-tàng正式结婚，kan-taⁿ是同居关系。Chit项tāi-chì，in两人以外无人知；tùi老父阿山起，到清文ê所有亲chiâⁿ，lóng想讲in tī日本内地已经完成结婚式。安子感觉无结婚式，chit-má却teh办喜宴，in两人算是teh欺骗chiah-ê人，所以心内ê自责kah不安hō͘ 安子真困扰。总是，清文ká入去闹热ê宴席中，kā chit件tāi-chì tèⁿ bē记得ê款，满面春风teh谈笑。

Tùi开始出ê料理—鸡肉、猪肉、鸭肉、粉鸟卵羹、炸蟳á、鱼翅、燕窝等，安子chit时已经食bē落去à。Chiah-ê lóng是上等ê料理艺术，m̄-koh，每一项lóng有用tio̍h油。Ài食chiáⁿ味ê安子，对她ê味觉来讲，每一项菜lóng有一点á siuⁿ过头油。她ê心情本来to̍h无真稳定，因为án-ne就koh khah食bē落去。Koh来出一个汤，其中有kah-ná脚ê物teh泅，清文tī边á kā她说明讲：「这是水鸡，m̄是养饲ê，是自然野生ê，koh khah好食。」安子听了，忽然想beh吐。

Lò-lò长ê喜宴结束，紧张ê心情一时轻松落来，安子siàng落去家己房间ê眠床，面青sún-sún，流汗，大气接小气倒teh喘。
「无爽快hioh？紧kā洋装thǹg起来khah轻松。」

清文用体贴ê口气讲，beh帮安子kā洋装tàu thǹg落来。
「内衫siuⁿ ân，而且腹肚内koh食hiah chē物件lah！」
「我看你食无jōa chē，kám m̄是？」

清文感觉淡薄委屈，伸手去安子ê腰beh帮她thǹg内衫。Hit时，她ê下腹忽然弯落去，顶身摇hián。安子sak开清文，双手掩(om)嘴，chông去khǹg洗面盆ê所在。

气氛khah平静落来了后，清文就讲：
「安子，你有娠à ho͘ⁿh？Mài瞒骗，坦白讲！」
「无lah！m̄是án-ne lah！Chit-má若生kiáⁿ to̍h麻烦....。」
「是án怎讲leh？」
「Beh án怎讲？」

Kah-ná断线ê丝弦，两人就án-ne恬恬无话讲，心情渐渐暗淡起来。清文mā不时teh考虑生私生子ê困扰，m̄-koh，eng暗闹热ê喜宴soah hō͘ 伊暂时bē记得。

因为hit暗夫妻有án-ne ê对话，安子感觉chit项tāi-chì一刻都bē-sái koh再延迟。为tio̍h beh请求老父答应in ê婚姻，安子早to̍h再三写phoe hō͘ in老父，总是lóng无回音。安子ê小妹时子常常替bē晓写字ê老母写phoe来，lóng讲老父ê受气iáu未soah。清文认为两人无gōa久就会到ē-tàng自由结婚ê年龄，坚持无需要hiah担心，mā无欢喜安子对固执ê老父哀求ê委屈态度。总是，想tio̍h生kiáⁿ ê tāi-chì，安子ê心koh khah tio̍h急。这m̄-nā是出世ê gín-á ê不幸，mā会hō͘ 清文有继承陈家立场上ê痛苦。Tī复杂ê家族制度中，当然会发生争执，而且精神上mā可能会tú-tio̍h超过一般ê屈辱。

安子koh一pái kā chiah-ê困境向故乡ê老父诉求，讲chit pái若无得tio̍h答应，家己就活bē落去。她加写一kóa chiah-ê恐吓ê话句，iáu无把握，想来想去就决定tī chit张phoe寄到老父ê手ê时，发一通电报讲：「Chit-má我beh去药房买毒药。」

老父若忽然收tio̍h chit张电报ê时，一定会莫名其妙。总是，phoe mā已经收tio̍h à，「Chit-má我beh去药房买毒药」，已经充分暗示不吉ê恐怖。安子ê老父确实有惊tio̍h，马上回电讲：「M̄-thang冲动，万事答应，立刻寄印去。」

就án-ne，清文kah安子就ē-tàng成做光明正大ê夫妇。清文固执无beh表示真欢喜，m̄-koh心内长期ê不安消失，应该是非常放心chiah tio̍h。安子事后想起来，对家己发hit通奇妙ê电报ê时，竟然会晓使用chit种妙计，家己都感觉真不可思议。Lóng无想beh演戏ê她，竟然演了一棚大戏。

无gōa久老父ê印鉴就寄到，结婚手续办好势，两人lóng无需要koh挂虑啥物tāi-chì à。虽然án-ne，安子tī语言上kah风俗习惯lóng iáu未了解ê台湾家庭，她ê辛苦iáu未减少落来。

有一工，m̄知啥人kā粪埽(pùn-sò) tàn入去安子in ê房间；这是台湾人常用ê报复手段。Koh有一pái，挂tī衫架顶ê高级薄丝绸织ê和服kah金纱ê羽织和服ê衫á裾，hō͘ 人用剃头刀hit类ê割破。虽然时常tú-tio̍h chit款可恶ê破坏，m̄-koh，因为言语bē通，安子颠倒无受损坏；hiah-ê人ê话比屎khah臭，á是姻卑鄙ê表现，若安子会了解，她一定忍受bē-tiâu。尤其是ta-ke阿娇，无顾面子ê骂人，安子一句都听无。Koh来，好佳哉阿娇缚脚，行路无自由，所以只要闪避她，她真少远征过来chhōe她麻烦。

Chiah-ê无爽快ê tāi-chì lóng发生tī清文出外ê时，因为大家lóng敬畏清文做官ê权威，所以tī伊ê面前lóng装kah真温和。安子mā知影清文是一个重感情ê人，清文无tī厝里所发生ê tāi-chì，她绝对bē kā伊讲，hō͘ 伊无爽快。M̄-koh，有一工发生一件tāi-chì。Hit工是礼拜日，少年夫妇lóng困khah òaⁿ，m̄-koh安子khah早起床，出去厝外kōaⁿ洗面ê水。她一踏出门，就tī沿中庭ê gîm-chîⁿ脚，偶然看tio̍h一个koh样ê物。有一个cha-bó͘人坐tī低椅头á顶，双脚向前伸出，tī金属脚桶前，teh tháu缚脚布。身材肥大ê老人，确定是阿婶其中ê一个。她坐teh ê上半身肥chut-chut，裤脚卷起来所露出ê脚腿，细kah kah-ná竹á。脚腿ê尖尾ē-sái讲是无脚蹄á，kah-ná捏(tēⁿ)手掌，chéng头á向内弯，kan-taⁿ chhun大pû翁，其它chéng头á lóng kah脚底连leh，看起来kah-ná树á目hit款ê物，顶面贴一重枯(koa)水有一板一板ê薄皮。

安子chông tńg去房间，心肝头phōng-phōng-chháiⁿ，家己mā知面色有变。清文看tio̍h安子仓仓pōng-pōng ê款式，tùi眠床顶跳起来。
「是án怎lah？」
「无啥tāi-chì，小khóa惊一tiô。」
「Kám是有蛇？」
「M̄是lah！是我头一pái看tio̍h缚脚tháu开ê细脚。我想，án-ne缚脚一定真痛neh。」
「你chit-ê人，hâm he也teh大惊小怪。」

清文安心落来，soah笑出来。总是，伊忽然用怀疑ê目神看安子，然后渐渐露出无欢喜ê面容，改变口气开嘴讲。
「你最近变kah真神经质。我无tī厝里ê期间kám有发生啥物tāi-chì？ Hō͘ 你艰苦心ê tāi-chì….。」
「无lah，kan-taⁿ tú起床看tio̍h无惯势ê物....tī气氛好ê礼拜日。」
「安子，你mài掩盖，我看你ê面色就知。我看会出你无幸福ê寂寞面容，真无奈。」
「我生本to̍h是chit款面chhiuⁿ。 无啥物tāi-chì，我本来看起来to̍h是án-ne。」

安子确实m̄是花开明朗ê面貌，她ê举止单纯，siuⁿ过安静；除非有意识beh做，若无她bē显出活泼、爱娇、sai-nai ê面貌。尤其是若kā带寂寞ê特色除去，就会hō͘ 人感觉她ê面貌kah心情随时变kah真平凡。Chit款表面ê感觉特别hō͘ 清文容易误解，怀疑她是m̄是无幸福。安子若有一点á无幸福，清文to̍h无法度忍受。伊ná亲像感觉娶日本bó͘，tio̍h hō͘ in bó͘特别幸福chiah tio̍h。幸福ê本质是一个，家己认为拥有幸福，只不过是相信拥有ê状态niā-niā。幸福ná亲像kā薄雪khǹg tī手心中，beh详细kā看，结果，幸福是m̄是随时to̍h消溶去？清文ná准无看tio̍h hit-ê khǹg tī手心内ê薄雪就bē-sái得。
「你不管亲父母兄弟ê反对，选择tòe我走遍天涯，而且来到hiah远koh人地生疏ê所在，我非常感谢你。M̄-koh，你若心内有不满to̍h是讲感觉无幸福，án-ne咱ê结合就无啥物意义。」
「我一屑á 都无感觉无幸福，是你siuⁿ过操心lah。」
「可能是án-ne。总是，我知你iáu是真痛苦。Hit款小tāi-chì ia̍h惊kah án-ne，痛苦当然m̄是无理ê，因为咱是异端者，而且咱tī日本内地无正式结婚ê tāi-chì，也hō͘ 人知ā。」
「Ai-ah！是án怎讲leh？」
「令尊ê回覆电报到你ê手chìn前，已经有人开来看过，iáu-koh有phoe mā是仝款。厝里ê人背后讲咱是同居夫妻，结局你对老父使用ê小计策，mā是无啥物意义lah。」
「Chiah-ê tāi-chì我lóng m̄知，我颠倒做了pháiⁿ事ah。」

安子kui个人伤心失志落来，清文为tio̍h beh掩盖心内愤怒不平发出来phì-siùⁿ ê笑声，kah-ná一支刺凿tio̍h安子ê心。
「Ai-ah！Án-ne chiah是bē-sái lah！你随时变无抵抗，软弱ê态度。我m̄是teh kā你责备，每pái我lóng抱tio̍h无限ê同情kah理解，bē为tio̍h chiah细项ê tāi-chì责备你，只是ǹg望你tio̍h khah坚强起来。耶稣ê心怀有粉鸟，同时也有藏剑，kám m̄是？咱bē-sái无坚强，所以有时tio̍h ài用策略，mā需要使用谎言，必要ê时tio̍h展威风hō͘ in看。生活就是战斗，你chit种老实koh khiā tī下方，无技巧，颠倒会hō͘ 对方欺负。对厝里ê人ê态度，若采用温柔、phô͘-tháⁿ ê方法，对方反tńg会展威起来；若是用威严ê高姿态，大家颠倒会变khah乖，结果是会带来家庭ê和平，kám m̄是？虽然这m̄是真理想，m̄-koh tī某种情形下，若无采用chit款方法是bē用得，kám m̄是？」

清文讲ê chit种坚强ê生活方式，确实是正确可靠ê办法。安子并无反对chit种看法，她愿意尽量接受。M̄-koh，思想并m̄是亲像穿tī身躯ê衫裤，清文ài她穿ê hit领衫裤，对安子来讲，无论如何lóng bē合身。 清文kā想beh讲ê话做一气吐出来了后，心情就回复明朗起来。
「Mài koh讲chiah-ê lah！因为今á日是记念主日。Ah！木匠已经来ā！Βeh去教会chìn前，咱同齐来去巡看māi leh，kám好？」

Khiang...khiang ê kòng锤á声，tùi室外传入来室内；陈家约一个月前就开始增建新厝。
「Chit间为你设ê日本式房间床柱(译注：tho-kho-ba-si-lah，khǹg装饰物ê台) ê材料，本来想beh用桂竹，m̄-koh竹á会变色，m̄知你想án怎？」

清文想beh补偿tú-chiah对安子讲了siuⁿ过头，就用koh khah hō͘ in bó͘欢喜ê口气teh讲话。
「用槟榔树án怎？我想经过加工磨了，一定真súi。」
「是ah！Siuⁿ过饮茶室ê款式mā无真妥当，咱iáu未到hit-ê年老ê程度neh。」
「小khóa khah派头leh。若采用南国式ê装饰，颠倒khah趣味neh。Án-ne mā kah周围ê建物khah调和。」
「Tang时ē-tàng落成？」
「台湾ê工人脚手khah慢，真伤脑筋；大概明年四月一定ē-tàng完工，tú好是气候好ê时chūn，全然无thang嫌。」

若开嘴，两人ê话题就随时sóa到新厝ê建筑，安子mā感觉真快乐。她想像坐tī有木材芳味ê tha-tha-mih kah siò-jih(译注：日本式纸门)ê房间，泡茶、插花，进入hit种快乐ê梦想，其它ê tāi-chì to̍h lóng bē记得了了。用一块快乐ê吸纸kā世间ê苦汁墨水，免bak-tio̍h手to̍h ē-tàng轻轻松松kā它吸收起来，这就是年轻ê好处。

实际上，in起新厝chit件事，厝里ê人有提出反对，引起种种ê争执。总是，清文不管一切，坚持家己ê意见。Án-ne to̍h是照伊所讲ê道理，人人lóng屈服，无koh加讲话；m̄-nā是起厝chit项事，其他万事lóng是án-ne。
这kám m̄是家己矛盾？伊kám有注意tio̍h思想kah行动ê矛盾？安子忽然感觉真不可思议。因为tī当时ê社会潮流中，清文是身怀自由、博爱、平等ê民主主义者。总是，当伊面对家己身边ê直接问题ê时，不知不觉soah陷落tī打压ê权势主义。Á chit时伊对in bó͘ 讲出对待家族ê人tio̍h用专制主义；「若采用温柔、phô͘-tháⁿ ê方法，对方反tńg会展威起来；若是用威严ê高姿态，就....。」Chit句话无gōa久就变成teh对抗家己，伊眠梦mā无想tio̍h以后会为这来牺牲。