《《陈夫人》日译台e5台湾小说 第一部》 |
 |
 |
|
 转寄 |
《陈夫人》第一部 第一章（更新版）
作者 庄司总一 着 杨东杰 指导 林俊育 台译 2017.03.19
若是海面平静，应该是一个真完美ê蜜月旅行。Tùi东京出发ê时，是樱花大开，心情爽快ê季节，安子想讲春天ê海面一定是风平浪静。M̄-koh，南方ê风涌真大，而且出了支那东海，船koh去tú-tio̍h足大ê风台。Tī chit种情形之下，m̄-nā bē-tàng食物件，kan-taⁿ会呕吐haiⁿ-haiⁿ叫。船一下hián，kui身躯tio̍h kiōng-beh趋落去眠床脚，不得不tio̍h用和服ê腰带kā身躯缚tòa柱á，á是啥物ē-tàng缚ê所在，状况非常惨淡。头等舱mā kah三等舱仝款，kah-ná hông关tī乌牢ê囚犯，kan-taⁿ ē-tàng tī船倾斜ê时，tùi圆窗看tio̍h大风大涌冲向乌天暗地。船身一时chhèng-koân，马上koh siak落来，这hō͘ 人感觉siōng bē爽快；kah-ná沉落去海底地狱ê siōng内底层，实在真惊人。因为安子ê身体并m̄是真勇健，本来to̍h真惊狂风大浪，所以身体就án-ne挡bē-tiâu，倒落去；而且连勇壮ê陈清文mā倒tī床里，安子心内koh khah感觉不安。安子lóng无食物件，一开始是吐出胆汁，最后连血都吐出来。「听讲有娠病kiáⁿ会吐kah-ná眩船，若是chiah艰苦to̍h真惨loh！」安子起先tī痛苦中iáu án-ne teh讲笑话，后来就亲像真ê重病ê人mauh落去。
汽船虽然改变航道来逃避暴风雨，m̄-koh船顶警告讲：若有koh khah危险ê时，无的确tio̍h去上海附近避难。Chit-ê多难ê航程对安子来讲，是teh暗示今后kah陈清文婚姻生活ê pháiⁿ兆头，她感觉真无可奈何。
船足足延迟了一工，佳哉tī第四工ê半暝，船ê摇动忽然减轻。脱离暴风了后，感觉安心，soah一时koh khah疲劳起来。安子tī天phú光ê时就困重眠，hō͘ 清文叫醒ê时，日头已经tùi客舱ê窗á照入来。
「到à！终其尾到位à！免烦恼à！」
清文非常兴奋走入去船室，m̄-koh，kah-ná亲像枯焦ê花忽然照tio̍h日头bē-tàng随时挺直起来一样，安子mā无法度随时tòe-teh兴奋起来。清文身体勇壮，体重六十六、七公斤，却心内着急kah挡bē-tiâu。「Oeh，起来！出来去甲板行行leh！」伊用命令ê口气án-ne讲。因为剧烈ê眩船，她ê面苍白kah无血色，目神闪sih，精神振作起来ê面chhiuⁿ，看起来有一kóa受气ê款。伊用温柔体贴ê动作来回应hit-ê pháiⁿ面chhiuⁿ，àⁿ落去眠床kā安子幼mī-mī ê手牵leh，注目看她ê目chiu ，清文目屎满出伊ê目chiu墘。
船soah尾就tī基隆港靠岸，虽然讲是世界出名ê雨港，hit工却是真好天。青翠ê山仑tī蓝天下一大片连落去，亚热带ê日头、雨量kah土壤ê丰盛，是想像会到ê。Hit种色彩厚koh深ê景色，对安子来讲有小khóa沉重ê感觉，她身躯靠tī船舷，胸坎á cha̍t起来，目chiu 起乌暗眩。三百五十年前，葡萄牙人航海经过chia ê时，tùi海上看tio̍h chit-ê岛屿，叫讲：“Ilha，Formosa”，就是美丽岛ê意思。「你看，真súi ê所在ho͘ⁿh！」清文kah-ná gín-á án-ne骄傲讲。伊真想beh用koh khah好ê话来表达，m̄-koh因为一时ê感动，soah kan-taⁿ讲出平常ê话。其实伊chit-má心内充满喜乐，皮箱内有伊穿过三年ê学生服kah大学帽，hiah-ê物件kah毕业证书仝款收藏tī-.leh。清文也通过高等文官考试，职位也照伊所ǹg望ê，而且koh再锦上添花娶tio̍h美丽ê日本人做bó͘，chit-má当teh赶路beh tńg去台南ê故乡。
Beh坐落南ê火车tio̍h到暗时chiah有，in两人就先去下一站ê台北等一工。眩船kah普通ê病无仝款，上陆以后就好去；安子回复元气，tī台北街á游览。
台北是雄伟ê现代都市，城内规划kah真整齐，厝宅lóng是西洋式建筑。只是炎天á是落雨天lóng免gia̍h雨伞ê称做「亭á脚」ê人行道，以及建筑物ê红砖á等，iáu留落来台湾味。这mā是日本领台以后下决心ê都市改革，kā lâ-sâm kah阴暗清除，建造一个清爽ê城市。Tī新市内，除去人力车夫以外，真少看tio̍h台湾人，kan-taⁿ看会tio̍h官员ê白色官服tī大日头kha闪sih显目。高层ê建筑物中间，总督府确实雄伟壮观，亲像东京火车头hiah大ê红砖á建物顶koân，koh矗立高塔，ē-tàng眺望市区kah附近ê平野。
「外观气派，入去内底一看koh khah华丽堂皇。中学时代我bat入去参观，贵宾室kah总督办公室非常ê气派。我想讲无gōa久ē-tàng受派来chia上班，ǹg望早日成做伟大ê人物。」
清文仰望总督府ê高塔，án-ne对安子讲，伊ê声音充满骄傲、自信kah欣慕。
现此时，清文ê心内当teh描写未来tī chit-ê殖民地最高机关ê气派建筑物内ê局长室，坐tī摩洛哥皮椅顶办公ê款式。He m̄是恋爱中ê男人ê空想kah自夸；伊心内ê野心真正to̍h起来。
清文bē-sái无án-ne积极想beh出一口气，因为伊kah安子结合以前，in有经过种种ê曲折困难。陈清文是东京帝大法科ê学生；安子tī庄脚ê中学毕业了后，来东京in阿叔ê厝寄tòa，学习家政。两人tiāⁿ-tiāⁿ tī富士见町ê教会出入chiah来熟似。安子是因为青春年华ê感伤kah好奇心chiah来参加教会，á清文是少年时代开始就是虔诚ê基督徒。因为chit位少年大学生ê引chhōa，安子无加考虑，真紧就进入信仰。就án-ne，因为两人lóng iáu年轻，所以互相手牵手行入信仰ê路程，感觉tio̍h其中ê温情，挽路边ê花草，沉迷tī美丽ê爱情，这是真自然ê tāi-chì。
清文向安子求婚，这并无任何ê无自然á是无单纯。总是，安子ê双亲kah所有ê亲chiâⁿ，无一人赞成in ê婚姻。不管清文是一个秀才，是一个人格者，á是好额人ê kiáⁿ，因为伊是台湾人就khah无妥当，hō͘ 女方感觉真困扰。清文亲身去到安子父母ê面前热心求情，m̄-koh，固执ê田庄老父kan-taⁿ用薰斗头kòng火炉边，总是m̄肯tìm头来答应。
求婚ê结局事不如愿，清文chiah行出安子ê厝；he是正月尾落雪ê暗时。出世tī热带ê清文，m̄-bat体验过chit款寒冷ê风雪，伊感觉身躯、灵魂kah流出来ê目屎lóng坚冻起来。伊tùi积雪真深ê路行出来，决心无beh koh再tam chit款冷酷kah屈辱ê滋味。
过无gōa久，安子tùi东京beh tńg去故乡，清文参tī两三个亲chiâⁿ中间，来到上野车头kā她送别。两人认为彼此无缘结联，这是最后分离ê日子。火车tú beh起行ê时，清文亲像学生常常发出ê无意中大声hoah-hiu，忽然唱出「愿主保护咱后会有期」(译注：台语圣诗446首) ê赞美歌，hō͘ 边á ê人惊一tiô，感觉chit-ê人真奇怪，致使安子ê心情koh khah暗淡。
本来想讲万事已经结束à，m̄-koh，安子所坐hit班火车peh过板谷山岭就tú-tio̍h雪崩。冬季期间，往东北ê列车常常会tú-tio̍h chit款事故，听讲修复时间需要三十点钟左右。Tī雪积真深koh荒凉ê所在戆戆á等，啥人mā oh得忍受，何况对心灵tú受创伤ê安子来讲，这koh khah是忍受bē-tiâu ê寂寞。Chit时，她对chit-ê意外灾难，m̄是通知故乡，却是khà电报hō͘ 东京ê陈清文。 Chit-ê铁路事故hō͘ in两人koh再做伙。清文想讲两人ê结联是神ê旨意，感觉kah-ná死里逃生，大欢喜起来。就án-ne，两人开始同居。为tio̍h beh逃避安子亲人ê眼目，in tiāⁿ-tiāⁿ搬厝，不得不过tio̍h避人耳目ê生活。
「我tio̍h ài好好á努力出头天，chiah bē辜负你tòe我来台湾ê苦心。」
「Mài án-ne讲，我跟tòe你来台湾，是我一心一意相信你。」
「所以我一定tio̍h-ài出头天。」
「M̄-koh，你ê出头天kah我ê幸福是两回事。」
安子是讲老实话，m̄-koh，她ê话伤tio̍h清文ê心，伊恬恬无应。清文真诚恳讲出chiah-ê话，她ê回答siuⁿ过欠考虑是khah无好。因为过去发生ê tāi-chì在先，清文对bó͘ ê幸福有责任感，以及想beh对hiah-ê固执刻薄ê人出一口气，自然会有chit款ê愿望。安子虽然了解清文ê chit种心情，m̄-koh，她ê个性原本就朴素随和，有意beh cháⁿ清文ê冲动ê感情。 两人坐tī公园ê椅á顶，欣赏水池里热带莲花tī喷水中沐浴摇动，感觉小khóa pháiⁿ势，互相恬恬无话。安子莫名其妙感觉寂寞起来，因为清文看起来忽然soah变成粗俗ê pháiⁿ人。
来到台南车头，kan-taⁿ清文ê大汉小弟来kā in迎接。
「我是清文ê小弟景文，请多多指教！」
伊对兄嫂殷勤行见面礼，伊ê日语虽然无in兄哥hiah好，m̄-koh，安子无想讲伊日语讲kah hiah liú掠，家己soah惊kah gāng去。Kah清文高chhiâng大汉ê身躯比起来，景文体格矮tǹg，hō͘ 人看bē出讲是兄弟á；皮肤无金滑，乌ta乌ta，目chiu tńg无停，hō͘ 人感觉是一个聪明伶俐ê人。伊真敏捷tùi安子手中kā行李kōaⁿ过来，问她讲：「海里风涌kám会真大？一定真thiám ho͘ⁿh！」伊án-ne马上kah人亲近ê态度，表示处世圆满，有手腕。
清文用台语kah小弟讲话，显出kah-ná受气严肃ê面chhiuⁿ，加上讲话真重声，表现出兄哥ê威严。景文显出真为难ê款式，嘴唇小khóa翘翘，kah-ná beh辩解ê koân声回答。安子敏感知影是清文无欢喜家族无来车头kā伊迎接，因为伊siōng挂意ê是chit件事，所以特别敏感。伊想讲陈家ê人无来车头迎接，是m̄是因为无欢喜in两人ê婚姻。虽然安子有觉悟，她iáu是真惊惶。
双pêng栽凤凰木路树ê大路顶面，安子坐tī人力车顶，摇leh摇leh跟tòe tī清文后面，kah-ná无气力ê细只鸟á，目chiu开一下合一下。她teh想像陈家是啥物款ê家庭？家族是啥物款人？过啥物款ê生活？Koh过十分钟，不管愿意á是无愿意，lóng是tio̍h面对ê现实，chit-má她thiau工kā它想像好kah bái ê phah算，一直想来想去。
另外一方面，陈家每一个人mā是仝款ê心情。Chit工，长男beh娶日本bó͘ tńg来，透早开始就有kah平常无仝ê气氛，闹热滚滚。次男景文ê房间，大bó͘玉帘照镜teh挽额头下垂ê毛，抹粉，换耳钩，透早就开始化妆。她平常时òaⁿ起床ê习惯，所以景文感觉真奇怪。
「你是án怎？已经决定我一人beh去迎接，你免烦恼lah。」
「Siáng beh专工去车头接in！我是想讲in来到chia，kám讲无见面ē- sái得。」
「原来是án-ne，你chiah teh化妆。」
「清文大兄娶tńg来ê m̄知是啥物款ê人？Kám有súi？」
「M̄-bat看过ná会知？总是，兄哥bē专工娶一个bái cha-bó͘ tńg来chiah tio̍h。」
「Hit-ê cha-bó͘ kah我比起来，m̄知siáng khah súi ho͘ⁿh？」
「M̄知lah，iáu未看tio̍h leh。」
「Hngh！你已经无爱我，讨厌我à ho͘ⁿh！Iáu koh讲想beh娶三个细姨。」
「你又koh开始罗嗦ā。」
景文烦kah嘴舌cha̍k一下。Tī陈家ê大厝宅内，in bó͘玉帘ê美貌特别显目，大家lóng讲她是幸福ê人。总是，景文并无感觉án-ne。玉帘bē执癖任性，也bē食醋，koh再siōng关键ê一点，若无她ê浪费成性，其实美貌mā m̄是pháiⁿ tāi-chì ā。M̄-koh，景文ê金钱观，根本to̍h否定hit种ê消费，对in bó͘ ê奢华有敌意ê态度；伊感觉bái bó͘ 颠倒khah好leh。
两人ê冤家lóng是tùi chit点开始，而且，chit-má两人渐渐感觉in ê冤家，比一般夫妻因为钱财ê事来冤家koh khah严重。
「Án-ne好lah！我ài去车头ê时间到loh。」
「大家lóng teh讲hit-ê的确是美女，m̄-koh mā有人讲无定tio̍h m̄是气质jōa好ê女人，一定是厚面皮koh轻浮ê，若无，ná会肯飞来风俗习惯无仝ê所在。大家lóng teh hōe来hōe去，讲有可能是日本ê艺妲。你也tio̍h小心提防chiah好，hit-ê cha-bó͘有可能会引起陈家ê风波neh。」
Cha-po͘人出tī家族制度ê秩序上，无欢迎外来者；á cha-bó͘人是khah出tī本性tek ê反感。三男瑞文ê房间内，in bó͘春鸾mā是比平时khah早起来坐tī镜前，她温柔kah hō͘ 人感觉可怜ê程度。总是，可惜她ê容貌姿色kah性情无啥对同(tâng)。颠倒in翁却是ná亲像贵公子ê青年，时时爱súi koh gâu穿插；hit工特别kā头毛抹厚厚ê油，koh喷茉莉花phang水。
「你mā beh去ho͘ⁿh？」
看tio̍h丈夫打扮，春鸾án-ne问讲。两人ê容貌相差siuⁿ大，她soah khah自卑，tiāⁿ-tiāⁿ不安无自在。
「Beh去，á是án怎？」
瑞文thiâu故意pháiⁿ声soeh，连看in bó͘ ê面都无。
「我无beh去lah，因为阿母会罗嗦。M̄-koh，beh成做咱大嫂ê人，她tùi遥远ê所在来，kan-taⁿ一个景文兄去迎接，án-ne kám讲会得过。M̄知礼仪mā ài有程度。」
「你khah为日本人！」
「Án-ne有啥物m̄好？这kah你有啥物关系？」
瑞文真刻薄án-ne讲。伊二十二岁，in bó͘十八岁，应该是少年夫妻相对待，m̄-koh，瑞文却用亲像对待老bó͘ ê气口teh讲话。两人ê婚姻是双方父母决定ê，kah当事人ê意志lóng无关系。亲像bē hō͘ 讨厌ê马lim水siāng款，瑞文koh khah án怎都bē爱春鸾。春鸾大腹肚ê时，伊chiah对chit款糊涂ê婚姻起惊kah gāng去，非常受气。
「听讲今á日beh来ê人叫做安子，台湾话读做安子mā是真好听，kám m̄是？M̄知是啥物款ê人？希望是一个好人。」
瑞文对iáu未见面ê人án-ne tī心内teh爱慕；想tio̍h家己悲惨ê婚姻生活，koh khah想像大兄ê台日婚姻ê辉煌美丽。Chit-ê大家族中间，瑞文是唯一欢迎chit-ê新娘ê cha-po͘人。
老父陈阿山无特别kah意，mā无表示反对。阿山是宽大ê cha-po͘人，bē ài kah人冤家争执；he是伊siuⁿ过无关心ê性情所致使ê宽宏大量。大kiáⁿ写phoe tńg来讲beh kah日本人结婚ê时，阿山ê回phoe kan-taⁿ一首五言绝句，大意是án-ne：卷起珠帘来，百花盛开时；春情充满怀，头壳乱chhau-chhau。M̄-koh，这不过是一时ê意乱情迷，想讲珠帘垂落来，秋日to̍h到，梧桐叶就变黄。人生也仝款án-ne，佳人一老，就kah-ná秋扇hō͘ 人hiat-ka̍k。
这是暗示，teh警诫清文年轻ê短暂热情，m̄-koh，kiáⁿ儿决定beh娶佳人tńg来，伊无hiah-ni̍h小气，犹原欢喜去迎接。阿山已经定好in kiáⁿ kah新妇ê新娘房，眠床家具mā lóng准备好势，房间布置kah真清幽，随时ē-tàng入去tòa。
Kiáⁿ儿beh tńg到厝hit早起，阿山比平常khah早起床，去新房看有拚扫清气á无。一切lóng整理kah真清爽，阿山看了真安心满足，就坐去椅á顶歇困。桌顶ê花瓶有插伊交带ê黄栀(kîⁿ)á花，像án-ne斟酌细腻ê关怀，伊实在是真罕得有。对已经有几年无看tio̍h ê长男ê思念，乐thiòng ê阿山ê心mā非常兴奋tiô跳。伊siōng疼长男清文，taⁿ tùi日本帝国ê最高学府学成归国，做老父ê ná会bē感觉骄傲？虽然娶日本新妇tńg来，chit件tāi-chì有小khóa无妥当。总是，老母阿娇以下ê全家族并无必要变目色来闹事。M̄管如何，像伊头脑hiah好，koh有优秀ê学识ê人，大家族ê亲chiâⁿ中间chhōe无第二个ā lah。
厝外烧热ê日头早to̍h遍照大地，m̄-koh，厚砖á围teh ê厝内光线小khóa暗淡，kah-ná tī水底一般hiah-ni̍h凉爽。鼻tio̍h黄栀á花散发出来ê芳味，阿山大人kah-ná醉去，暂时无心一样坐tī hia。
铺砖á ê土脚发出缚脚khok-khok ê脚步声，in bó͘阿娇hō͘ cha-bó͘-kán-á一手扶teh行入来。
「透早坐tī chia teh chhòng啥物？你有时á早起床，就无啥物好事；高丽莺早起tī笼á内死去lah。」
阿娇不满ê款，án-ne chho̍p-chho̍p念。阿山一向lóng无在意，无beh chhap她。因为得bē-tio̍h回应，in bó͘阿娇常常会起神经。
「你神经大条kah真惊人，hō͘ 日本新妇入门，你想会án怎？这，kám m̄是一家会乱起来ê原因？我poa̍h-poe 几nā遍，每遍lóng是阴poe。」
「所以，高丽莺kám是án-ne死去？」
「M̄是鸟á ê tāi-chì，你lóng ài kā它当做sńg笑，lóng是你ê糊涂。 少年ê时无认真做seng-lí，读一kóa无值得三文钱ê册，koh食鸦片，lám-nōa过日子，若无我khiā在，陈家早to̍h mi-mi-mauh-mauh loh。阿花，kám m̄是án-ne？」
阿娇起番癫，老毛病发作，对in翁破口大骂，无惜情，一直tâu hō͘ 边á ê cha-bó͘人听，求in同意她ê讲法。
阿山是一个生来to̍h m̄知忧愁ê人，时时lóng感觉真满足，露出无挂无虑ê笑容，只有tī老毛病气喘发作，以及in bó͘阿娇对伊罗嗦ê时，伊chiah会小khóa忧头结面。Chit时，伊ná亲像赶讨厌ê胡蝇，poeh手遮in bó͘ ê pháiⁿ嘴杂念。
「讲了siuⁿ-chē ā lah，lín ná会án-ne吵人？若讲是娶生番，á是青目chiu ê外国人，我会反对；taⁿ清文ê新娘是端庄ê日本人，咱chit-má ，kám m̄是日本人？好à lah，请安心，一定是一个可爱温柔ê cha-bó͘ gín-á。」
Án-ne讲soah，阿山就tùi koh- khah激动起来ê阿娇身边溜走。Chit时，伊jōa-ni̍h-á感谢，佳哉是阿娇缚脚，行动无自由。
陈清文tńg到思念ê故乡，伊kā 旅行装thǹg落来，无闲东无闲西，án-ne一工就日落西山。
安子讲想beh洗身躯。旅行后想beh洗浴，对日本人来讲是当然ê tāi-chì，m̄-koh，陈家无日本式êhú-loh间。所有台湾人ê厝内，准讲是有钱人，mā无浴间ê设备。M̄-nā无日本式êhú-loh场，koh khah重要ê是连便所mā无，实在是真奇怪ê生活习惯。亲像公共便所ê设备，是tī厝埕角有一个所在，m̄-koh，he是男人专用ê，实在真粗俗koh无清气。
清文感觉真见笑，无法度，就命令当值ê cha-bó͘-kán-á搬来一个金属ê大脚桶，hō͘ 安子洗清十日来旅途ê尘埃。安子就tī遮屏后洗身躯，m̄-koh无法度享受深深浸tīhú-loh浴桶ê爽快滋味。Tī日本内地koh khah田庄ê所在，每一个家庭mā lóng有hú-loh浴间。Taⁿ无浴间无要紧，今后每工lóng tio̍h使用khǹg tī眠床脚ê红漆尿桶，安子对chit项tāi-chì腹肚内一把火。
Khǹg tī房间内角ê眠床向chit对夫妇招呼；眠床挂回教式ê蠓(báng)罩，花鸟刺绣ê蠓罩帘垂落来。房间一pêng有紫檀桌á，桌顶装饰古典ê桌钟kah洋灯。另外一pêng排设khǹg物件ê橱á，he就是准做日本式ê衫á橱，m̄-koh，lóng无日本式ê感觉。房间左右ê壁顶挂半切型(译注：kui张纸对裁)ê挂轴，一对是山水，另外一对全是书法字句。可能是文字tī台湾人ê生活中真重要，到处lóng ē-tàng看tio̍h字句；门柱、门楣、门扇等lóng贴红纸，顶面写吉祥ê字句。安子无意中看tio̍h眠床顶mā有贴红纸，he m̄是法院扣押ê封条。安子认出hit-ê「春」字红纸，是吉利ê字眼，ǹg望少年夫妻新春puh-íⁿ发芽，迎接新性命ê开始。
房间kah日本和式ê设计完全无仝，安子感觉真bē习惯。眠床kah房间内ê装饰lóng真有气派，m̄-koh lóng无日本和式ê风雅，mā无开放空间ê感觉。房间约有十块tha-tha-mih大，算是bē细，m̄-koh，四周围ê厚壁kan-taⁿ留一个二尺阔ê细窗á，koh án怎讲mā bē爽快。
「我会赶紧修改房间ê模样，koh无gōa久beh起一间新厝，为你设计一间日本和式房间，请你暂时忍耐一下。」
「M̄免lah！渐渐会习惯lah。」
「我本身mā真bē惯势neh。」
清文一直beh向安子辩解，m̄-koh，安子讲，án怎lóng无要紧，无论如何，紧kā她起一间便所to̍h好，就无需要koh再hō͘ in翁操烦。实际上，清文本身tī日本内地生活将近十年久，对家己出世生长ê chit间厝kah房间，颠倒有异国ê感觉，tòa起来无自在koh无自由。
「咱ài来改善chit-ê家庭ê生活，以后会tú-tio̍h一kóa奇怪kah bē爽快ê tāi-chì，请你心胸放khah开阔leh，希望你kā in牵教指导。」
「讲啥物牵教，我无法度做hit款伟大ê tāi-chì，m̄-koh，我有心理准备来kah厝里ê每一个人亲密和睦相处。」
「亲密当然重要，m̄-koh，mā tio̍h kah bái ê风俗习惯斗争；咱是新时代ê人，抱tio̍h理想求进步。」
「是lah！M̄-koh，每一个国家ê风俗习惯lóng是根深不动ê，若m̄是pháiⁿ风俗，kám有必要勉强kā它改？」
「当然，风俗习惯无绝对ê善恶，只是tio̍h ài tòe时代来改变。譬喻讲，lín阿公大概有留头鬃尾。总是，到孙á ê你已经是新时代有气质ê妇人ā。新皮囊tio̍h贮新酒，这是圣经ê话。咱bē-tàng无日日求新，tio̍h来创造khah好ê家庭kah社会。」
清文日常认真ài讲大篇道理，总是，tú-chiah到tè就讲出chiah-ni̍h严肃ê话，是一种遮khàm pháiⁿ势ê方法。Kā安子chhōa来衣食住完全无仝ê所在，实在有够可怜，清文家己感觉真pháiⁿ势。虽然伊知影安子表现出带有一点á寂寞ê神情是她ê本性，m̄-koh注意tio̍h她心情沉重ê款式，伊真正会担心起来。
「你无啥元气neh。你来到chit间厝，感觉失望是m̄是？」
「无lah！」安子发出踌躇暧昧ê声。她想讲án-ne m̄好，就koh提起精神来补充讲：「是我因为旅行了真thiám，m̄是灰心丧志lah！颠倒是lín tau真大koh真有气派，kah-ná宫殿，hō͘ 我惊一tiô。Koh再讲大家lóng是好人，实在是有够大ê家族neh。」
「非常大，确实有五十人以上neh。」
「Ah！Hiah-nih chē！Án-ne我头脑bái，无法度记hiah chē人，请你kā名kah年龄写tòa纸里hō͘ 我。」安子讲kah hiah认真，清文听kah soah感觉好笑。
「M̄免专工写笔记lah！以后khah无ài mā会记起来。」
「老父非常像(sêng)你，听讲伊ê名叫做阿山，m̄-koh，我m̄知tio̍h án怎称呼伊？老父ê台语án怎讲？」
「阿爸。」
「老母leh？」
「阿母，chiah-ê真紧to̍h记会tiâu，免烦恼lah。」清文án-ne讲，安子kah-ná想beh koh问其他tāi-chì ê款，m̄-koh，清文又koh插落去讲：「阮老父是一个好ta-koaⁿ neh。」就án-ne，tùi老父ê tāi-chì讲起。
「我kā你讲过，阮厝代代耕农，m̄-koh，老父阿山chit-ê人生来就ài做学问，少年时代参加学院考试，高中秀才。M̄-koh因为是长男，bē-tang去做官员á是学者。To̍h是án-ne ê风俗，伊本来对做seng-lí无趣味，lóng bē ài考虑财政问题，每工掀册读册，食chheⁿ-chhau，轻松过日子；总讲一句，就是自由自在teh过生活lah。」
清文kan-taⁿ讲起老父ê tāi-chì，就是讲kui暗也讲bē-tio̍h家族其他五十人ê；可能是因为伊siōng kah意in老父，mā有可能是因为无愿意讲起厝里其他ê人ê心态。
M̄-koh，安子mā无想讲其他ê家族是pháiⁿ人，因为今á日早起无来车头接in ê人，也有聚集tī正门kā in迎接。In无安子原来所担心对她有敌意ê款式，反tńg对她谦卑微笑，koh殷勤ǹg她招呼。清文一一绍介，这是父母，这是小弟景文ê bó͘，这是二弟kah伊ê bó͘，in ê kiáⁿ儿；然后是阿叔、阿姆(ḿ)，叔伯兄弟kah叔伯姊妹等等。因为人siuⁿ-chē，chit-má想起in ê面貌，mā对bē起来是啥人，头壳乱操操。印象中，kan-taⁿ会记得女性家族身材苗条，行路摇摇摆摆。Hit-ê尖尖小鞋内底ê脚，m̄知有jōa细？一定kan-taⁿ拳头母hiah大。In ê脚步ná亲像teh骑竹马hiah无在；尤其是老母阿娇行路，需要cha-bó͘-kán-á来扶tháⁿ。
Chiah-ê人中间，kan-taⁿ老父阿山hō͘ 她有清楚ê印象；伊ê身材比in kiáⁿ khah矮，身体khah肥。父á-kiáⁿ ê面貌真像(sêng)，m̄-koh，清文有几分神经质ê严谨，老父完全无；伊ê面常带笑容，下颏留羊á须，mài讲是威严，颠倒加添飘phiat ê感觉。
伊引chhōa安子去为in准备好势ê新娘房，用真幼稚ê日本话，而且kah-ná是cha-bó͘人teh用ê奇怪讲法。
「你tùi hiah远ê所在来，多谢。」然后真无客气chîn她ê面，讲：「你真súi，非常súi，kah-ná莲雾ê面色。日本内地真寒，台湾真热，án-ne有khah可怜neh。」
安子m̄知伊chit句「可怜」是指啥物意思，总是听起来感觉真趣味koh有人情味，就án-ne，对伊随时产生亲密ê感情。
夜深了后，因为tńg到家己ê厝有khah轻松ê款，清文发出畅快ê困声，安子却一直困bē去。Iáu未进入五月天，天气已经热kah需要用葵扇。黄栀á花强烈ê芳味，hō͘ 她koh khah感觉热。房间内夜深沉静，m̄-koh，时时有sah-sah ê声音，是大只ka-choa̍h四界teh爬四界飞。Iáu有siān虫á tī天篷(pông) kah壁顶teh爬，时断时续发出ki-ki ki-ki ê声，hiah-ê叫声可怜koh悲哀，引起安子一chūn一chūn ê乡愁。「听tio̍h siān虫á teh叫」(译注：日本俳句)，安子忽然tī心内念出来。虽然以前对俳句无趣味，mā m̄-bat写作过，hit句完全是偶然ê心内哀鸣，因此无达到艺术á是安慰ê境界，独独加深她ê孤独感。为tio̍h beh振作精神，安子就一再想tio̍h开朗好亲近ê阿山老人，无意中soah变做思慕她家己ê阿公。阿公kah阿山真相siâng，lóng是真好ê老大人。细汉ê时，lóng是阿公kā她抱teh困，老人身躯ê味小khóa怪怪，知影hit-ê怪味了后，她就无koh kah伊困，换做kā伊按摩肩胛头。以后无gōa久，阿公就往生去。Ná亲像溪水tùi源头流落来，此后ê每一个人，就是有血缘关系ê人、亲密ê朋友、村里ê山川等等，lóng一一想起来。Hiah-ê亲人kah怀念ê大自然，tang时chiah ē-tàng koh再会？想起to̍h伤心，chit款ê软弱心情是啥物？清文当teh困；kan-taⁿ讲伊teh困，á无感觉伊tī边á ê chit种不安ê心情，这到底是啥物neh？Kah伊之间ê关系，家己lóng是被动ê立场，一时soah有啥物不足ê感觉；是m̄是家己ê 挂虑kah不安是tùi hia来ê？。
Án-ne bē用得；清文对爱情kah信赖lóng无不安ê款式teh困，安子ná看hit种幸福ê困面，对家己ê热情不足ná有罪恶感。
「阮tī天里ê父，愿你ê名圣，你ê国临到，你ê旨意得成，tī地里亲像tī天里....。」
Ǹg望家己mā ē-tàng紧入眠，安子tī心内念十遍「主ê祈祷文」。
