《台语chit条路》

 | | | 转寄

《台语chit条路》--建立台语文ê文学批评―林央敏访问(二)

作者 谢瑞华 2008.10.26

教育非教育
林：差不多离chit-má十冬左右，台湾ê作家，不管老--e、少年--e、我bat--e、m̄ bat--e拢chiok惊--e，红色、白色、乌色ê恐怖拢iá留tiâu leh。hit chūn我心内真痛苦，理想、正义、良知、良心kap现实生存teh phún、teh挣扎。hit时chūn我对社会、对政治ê看法iá koh m̄敢反映tī作品内底，看着台湾人受压迫ê痛苦，koh m̄敢反映，所以家治太痛苦，只有tī痛苦ê情形下ta̍uh-ta̍uh仔写。起初写了m̄敢发表，尤其政治性--e khah m̄敢发表，m̄是政治性--e，譬如讲教育我着直接写，写评论，无想着连教育--e，国民党着叫人批评。我khah早iá teh读辅大ê时chūn，辅大办一ê杂志叫做《益世》杂志，bat做过教育专题，叫我写一篇，无外久杂志出来。 有一工校长chiok紧张，我看伊ê面色bōe输人beh掠iah是àn-nóa。本来若有话beh讲拢公开tú着tō讲，hit遍伊私下kā我叫去楼顶讲：『林老师，你有公开发表文章，、评论啥么hòe，公开批评教育？』我tō讲：『我顶个月tī一本杂志写一篇千外字ê文章，批评咱教育填鸭式lah！a讲着内面ê意识形态，批评教育ê错误，应该àn-nóa khah好。』阮校长讲：『可能就是那篇，有别的学校的校长被老师攻击。』hit-ê校长无言以对，煞投lah！像小学生投老师按呢，校长投对教育局去，教育局一查，写chit篇文章ê人本身àn-nóa是老师，查落去是桃园县--e，tō khah电话hō͘阮校长，叫我爱写一篇悔过书，hit chūn虽然真惊惶，但是伊叫我写悔过书我感觉che是chiok失人格ê代志。ná会使写悔过书？校长叫我尚无爱交一ê啥么hòe去，表示伊有处理，kiâu伊chit-ê校长无关系。既然校长夹tī中央，我tō写一篇短短仔，讲：『我写hit篇文章完全是凭着教育ê良心，照我所认为--e写，恁若认为错误欢迎公开，看是beh口头iá是beh文字公开辩论。』写一张che hō͘校长the̍h去教育局啥么单位报hō͘我知，he离chit- má十三年hit teh仔。

自chit件代志以后我发觉教育非教育，hit chūn tiāⁿ-tiāⁿ teh讲中共啥么政治干涉啥么，我想讲咱mā是按呢！


「蒋经国是大坏蛋」

林：因为发觉着台湾ê代志逐项拢hō͘政治干涉，尾--a对政治khah认识，chiah khah热心去参加人e政见发表会，尤其党外人士--e，印证家治思考--e、chia ê政治人物讲--e，iá是ùi中国册读着--e，印证愈chē对政治愈关心。譬如讲我chit本册{注：【睡地图的人】诗集};内底有一首khah政治性ê诗―自由，讲台湾人失去自由，自由去hō͘人压tiâu leh！因为hit chūn会惊惶，政治性ê诗iá am-am-khàm-khàm m̄敢chiok明显表现出国民党ê错误、伊ê压迫自由。尾--a因为个性kap hit种热情，ta̍uh-ta̍uh仔ná写ná che7na2明显，虽然m̄敢用文字公开写出来公开发表，但是我代先是用嘴落去讲。任何时间，不管tī厝里也好，生份人mā无要紧，tú着人tō讲政治，tō讲国民党压迫台湾、国民党非法，有当时仔上课mā讲，讲kahgin2仔写作文讲：『蒋经国是大坏蛋！』，我改作文ê时chūn mā chhoah一tiô。