《台语chit条路》

 | | | 转寄

《台语chit条路》--加学、加听，做肥底 ― 洪惟仁访问(二十三)

作者 杨允言 2008.10.05

言：顶kái看杨丽花ê广告，天狗热着是「登革热」chit-ê尚记会tiâu。

洪：这天狗，日本人叫做thian-kù，thian-kù tō thian-kù，是按怎一定爱写「登革热」？chit-ê名ùi台语来ê a！

我对大本字典khah无趣味，我对语言kap文化ê关系khah有趣味，我以前想beh编chiok chē chit款ê字典，结果礼俗字典编了tō无koh再编a，实在是无hiah ni chē精力。

像植物ê部分，日本时代tō出过三、四本，日本时代有一ê中央研究所，我讲日本人感心ê所在，tī台湾，政府出钱所做ê研究，全部hām台湾有关系，in留chiok chē好ê物件，无像中央研究院，做ê研究大部分kap台湾无关系，成立一ê台湾史研究所，kā你tēⁿ死死，讲归晡mā iá bōe成立，所以国民党实在比日本khah差。{注：最近已经通过beh成立台湾史研究所}

言：老师，你《台语文摘》做到chit-má，有啥么值得检讨ê物件bò͘？

洪：检讨toh一方面？尚重要ê对是检讨销路ê问题，革新号四期tō了瞌beh死，m̄ chiah会改做专刊，目的着是beh hō͘伊卖khah久ê。 言：khah无时间ê问题。

洪：he本来tō无时间性，你着致hō͘伊有时间性，有ê人tō无爱kā你买a。其实，《台语文摘》一期排出去chiah卖二、三百本娘niâ，订户to比这khah chē，拢是靠订户teh支持，这siáu-ê to beh做这，kā支持一下，有teh看ê可能mā无gōa chē，这是一ê检讨；另一ê是讲，《台语文摘》过去ê方式，会使讲全汉字lah，对读者来讲是khah好读，m̄-koh人beh tòe写有khah困难，所以咱后期mā会使采用汉罗。

言：我感觉《台文通讯》有一ê尚大ê特色，你mài讲印刷品质好iá是m̄好，人会感觉khah óa，khah敢投书iá是投稿。

洪：《台语文摘》着是人khah无法度参与lah，所以伊是kā你当做资料来kā你收，这mā会使讲是《台语文摘》ê缺点。

言：老师，你家己认为这是缺点iá是优点？

洪：就运动ê观点是缺点，但是若准讲用汉罗来讲，销路是无一定会增加，因为汉罗，排斥ê人khah chē mà，比全汉字ê排斥性khah厉害。

另外，《台语文摘》编辑ê人才mā少，你逐项拢beh做ê时，根本to无hia ê精力mā无hia ê钱。所以若准讲一期一期会冻kap别人合作，按呢khah好，若无别人拢无参与感，你讲你做了hiah好，人无爱tòe你mā是无路用，白做ê，按呢to真正替台语做墓牌，无意思a，会冻兼顾是尚好lah，mài siuⁿ过极端，chit-má讲beh用全汉字、全罗马字，无人买a，卖你自敬tō好a，你kā我买一百本我仝款了钱。

iá koh有一点，台湾ê本土语言教育若是实施了后，情形会khah好。

言：chit-má ê学生mā有beh舞母语教育ê问题。

洪：按怎舞？

言：这hō͘会长讲khah清楚。

卵：过去一冬，学生拢teh舞刊物{注：《台语学生》}，真正一寡问题出声ê机会真少。chit-má ê共识着是讲，刊物出khah少ê，以前是半年十八期，chit-má beh变两期，季刊tō着lah，顶遍是各校照轮，chit chūn是编辑逐家讨论一下；另外koh有一ê运动部，hō͘学生会冻出一寡声，譬如讲邀请立委办公听会…等等，像台大in无想beh编刊物，想beh舞运动；像最近县市长选举beh到a，阮beh设计一份问卷，kā候选人问，你对推行母语教育有啥么看法，到时会使做一ê调查结果，发hō͘报社，当然，一寡物仔家己爱讨论kah真清楚。

(讨论母语教育kap教育部可能ê态度)