《台语chit条路》

 | | | 转寄

《台语chit条路》--加学、加听，做肥底 ― 洪惟仁访问(十五)

作者 杨允言 2008.08.10

卵：chit-má学生想beh提出一e5khah清楚ê语言政策，一寡物件爱交代着，譬如讲，你干taⁿ做福佬话ê研究，che是学术性ê，che会使免chhap无要紧，但是讲着全面性ê语文运动，iá是思考koh khah大ê问题，che确实是冲着，咱beh按怎解除in心理ê结？in m̄是真正反对你。

洪：我ê做法是阶段性ê，我ê主张是本土语言教育，着是讲，ti7chit-ê所在大多数人讲ê话，除了北京语以外，譬如讲台北市，福佬人占大多数，你着爱学chia ê话，bōe晓讲mā爱学a。

顶kái有人讲，in若beh认同北京话着hō͘伊去认同，我讲你无资格认同，啥么原因leh？因为语言是一ê民族ê标志，你一ê福佬人，beh hông消灭去a，你讲甘愿去hông消灭，你kā kiáⁿ讲，无要紧a，你beh hông做kiáⁿ是你ê自由，哪有hia ê自由？我无赞成chit款ê自由。

人ê认同，无影讲是家治去决定ê，伊自细汉学北京语，kám自由去选择ê？he是政治ê结果mà？按呢有人讲『我是外省人、我是客人，我tòa台北市，kám一定爱讲福佬话？』我讲mā爱讲福佬话，因为你做一ê外地人，入梨chit块土地，你无去适应in ê文化生活kám会使？当然bōe使a，你去美国为啥么英语会讲甲siá-siá叫，甚至到尾a，你ê gín-á bōe晓讲母语，he是社会环境ê问题mà，是无法度ê代志。

所以外省人来chia，beh保存家治ê母语无法度，in不得已只好认同北京语，tō叫咱台湾人mā爱放弃，哪有he代志？我批评丁邦新着是teh批评chit点，你家治放弃mā是不得已ê，bōe使讲你不得已着爱叫别人tòe你牺牲。

凰：认贼做父。

洪：至少tī台北chit-ê所在是福佬人ê地区，来到chia着是爱学chia ê语言，你tī客人区，无管你是外省人iá是福佬人，你仝款爱学客话，你tī hia生活mà，若按呢，你客人beh教gín-á福佬话bò͘？he是你ê代志，假使你拢beh tòa客人区，感觉讲无需要福佬话，会使。

进：tú-chiah有讲着政策ê问题，伊若叫你讲北京语，我tō照常讲福佬话mà，我无要求你一定爱讲福佬话，是按怎你规定我爱讲北京语？

洪：che语言是竞争ê lah，你若kā尊重ê时chūn伊着hia-pai起来a，伊tō讲『咱着爱尊重少数，所以爱讲北京语』有bò͘？少数爱尊重，a多数m̄免尊重ò͘？

进：你若kap客人讲ê时chūn，伊福佬话真正听无，你tō无法度a，至少讲hit种伊听有ê语言，阮hia chhiâⁿ-chhiâⁿ有外国人来访问，咱kap伊做伙，是beh讲啥么话，像我beh kap你讲话，无beh kap伊讲，按呢咱beh讲啥么话。

洪：对待人客kap对待客人无仝款，像有三ê人，你、我kap一ê外国人，伊是人客，为着beh hō͘伊加入咱ê讨论，咱kā伊尊重，che无要紧。今仔日外省人kap客人m̄是人客ne，伊是kap咱tòa做伙ê人，若一ê外先省人iá是客人来tī chia，咱十几ê人着`爱变声？无理a！

其实咱teh推动台语，m̄是干taⁿ研究，研究是一ê基础，无啥么实际ê作用，实际作用是爱去讲、去写，将台语做咱生活ê一部分，若无，做古董teh耍哪有意义？我teh研究台湾话mā m̄是beh做古董、beh做墓牌。