《台语chit条路》

 | | | 转寄

发行人ê话..台语这条路－ùi一段历史讲起

作者 陈明仁 2007.11.04

这本册hō͘我ùi诗人、作家变做出版商。

为beh替这本册写一篇khah详细ê头尾，hō͘我想起一段罕得人知ê历史，若m̄是出版这本册，这段历史就永远无人koh提起--a。

这段历史是一群学生tiām-tiām替台湾台湾做代志，无hō͘社会注意着ê一段过去。Ti这段历史内面，我扮演ê是穿针牵线ê角色，所以着爱ùi我讲起。

1989下半年，为着蔡许案我去替周慧瑛助选，tī hia熟sāi hit-chūn iáu是大学生，后来嫁我ê陈丰惠。这chân代志tī我ê诗「熟sāi tī选战中」有记载。90年初，江盖世接「新青年」社长，chhōe人tàu编机关刊物「台湾青年」ê总编辑。仝时chūn陈婉真tī民进党台北市党部做副执行长，来「新青年」chhōe人tàu编机关刊物「民进新闻」，，我kap A-惠自an--nih tī hia上班，he是阮一生上无êng ê一段日子，阮三个人舞真chē运动，我上kài记得ê是「二二八资料展」kap「1990总统民选运动」 。

三月中，「新青年」开会员大会，有社员报告讲「一tīn台大大陆社ê学生tī臭头á-庙静坐，要球招开国是会议。」「新青年」ê成员大多数是台大ê学生iah是校友，大会临时动议决定暂停，大家先去现场了解状况。

阮到现场是暗头á差不多八点外，十外个学生坐tī臭头á庙大门口正手pêng围墙á,大家惊khah暗ê时会hō͘强制驱散，希望有koh-khah chē人来声援。Hit chūn我担任市党部文宣兼社运组长，随kap A-惠转去市党部chhoân一kóa布条á,koh khà电话kho͘人来声援，A-惠koh tī「市党部之声」ê电话新闻紧急放送这号消息（Hit chūn台湾iáu无地下民主电台）。

十点外就有几十个人来声援，大家做伙守过紧张ê一暝。尾--á真chē媒体开始报导这号新闻，演变成惊动社会ê学运事件。事件ê过程中，学生未着自主性ê考虑，无啥爱hō͘社运人士介入，我除了家己khai钱印宣传单kho͘人来声援以外，就tiām-tiām tī边--a关心niâ;A-惠iáu是学生，积极参与「小蜜蜂」ê播音宣传。这段运动kap本册无啥khah深ê关系，m̄-koh tī hit时有两个学生熟sāi,因为in两个，chiah有后来ê一段历史。

三月学运tī好笑ê「国是会议」中煞戏。三月底到四月初，我请公假去参加U.R.M ê训练。U.R.M是台湾基督长老教会举办ê城乡宣教草根组织者短期训练班，由林宗正牧师主持，真chē社运人士lóng去过。我自真早期就报名beh去，为着社运无êng lóng一直无 hoat-tō͘ thang去。Tī hit期ê U.R.M我熟sāi iáu tī台大哲学系ê张素华，chiah知伊 tiām-tiām kap一kóa同学去参与三月学运。素华kā我讲有一tīn学生真想beh替台湾做tām-po̍h-á代志，m̄-koh in 无想beh hō͘人当做学运领袖hit类ê。Hit个时代真chē本兔社运团体lóng有出刊物，阮决定beh组一个文宣编辑短期研训班，招有志学生来学习，了后会tàng去各团体作编辑义工。

转来台北了后，随进行这个khang-khóe,有十外个学生参加，除了A-惠kap简淑惠以外，chhun--ê lóng是素华 chhōe来ê,有ê是伊ê老朋友、同学，有ê是伊tī三月学运中熟sāi ê,卢诞春（外号Loonng)就是其中一个，cha-pau学生kan-taⁿ伊niâ。这个十外人ê小团体真紧就发生作用。

五月初二，国民党提名军头「郝柏村」做行政院长，学生「重返中正庙」这pái因为议题无仝，社运团体积极参与，组一个临时性ê运动组织「反军人干政联盟」，简称「反军盟」，我以代表民进党台北市党部ê身分参加决策小组，koh负责文宣ê khang-khòe。洪奇昌提议beh ùi五月二十五到五月底tī立法院门嘴静坐，邱义仁要求文宣爱有十个人轮流tī现场顾暝留守，我当场开十二个学生ê名单，就是文宣班ê同学，，in mā lóng有照起工相放伴。

Tī静坐ê过程中,有一工透早,警方强制驱散,tú-好轮着素华kap Loonng ê班,看警察beh冲过来,素华招Loonng坐leh警察kap群众中间，看警察会mài冲过来, khah bē伤害着民众。警察iáu是chàm过in ê身躯冲过,hō͘ in着伤,民众kā in扶起来了后,素华kā Loonng mā khám-khám koh 会冲转来,咱仝款继续坐leh chia好bô?』Loonng mā khám-khám答应。In两个koh hō͘警察ùi身躯顶chàm过一pái,着重伤,hō͘人送去台大病院,事后报纸有报一角á,m̄-koh无引起社会注意。

Tī「反军盟」运动中,有真chē党工hō͘警方掠去,赖in是暴民,民进党mā kap国民党同声出气讲in是「冲组ê」、「圣战士」、「社会边缘人」,台权会hit chūn tng leh为中国人「唐龙」ê死刑走chông,讲he是人权问题,对这tīn受难ê党工是m̄是「政治犯」讲iáu leh开会认定。这群学生真siūⁿ-气,自an--nih结合北区政治受难者积极做探监关怀ê khang-khòe。

这段时间Loonng kap我愈来愈熟,阮tàu-tīn研讨台湾前途ê问题,结论是ùi台湾语文khah文化性ê议题切入。Hit-chūn伊iáu tī交通大学leh读硕士班,决定beh转去创立台语社,请我做指导老师。我tī in开始ê两节课教in罗马字kap台语ê变调,了后开一份讲师名单hō͘ in,内面有许曹德kap洪惟仁先生,交大台语社自an--nih开始运作。

Tī chia 我需要koh介绍另外二个真重要 ê 学生－－谢明城、杨允言。明城担任过台大台语社社长，tī tú-chiah ê运动中，差不多lóng有参与。杨允言tī台大读册ê时就真拍拚leh研究台语，bat用杨剑星ê笔名tī「台湾新文化」写有关台语ê文章，我tī前卫出版社担任编辑企划ê时，伊tiāⁿ-tiāⁿ来，虽然讲比我khah chió岁，我一直kā当做台语前辈。伊做兵了考入去清华ê研究所，清华kap交大ê校园连做伙，两校ê台语社tàu-tīn办活动，tī大部分大学ê学运冷落ê时，两校ê台语社真有活气。

交大了后，我kap做过几ā间大学台语社团ê指导老师，熟sāi真chē对台语有趣味ê学生，我lóng尽量hō͘ in互相熟sāi,尾--a,台大、清华、交大、成大、实践、淡江……in chia ê学生决定成立跨校性ê组织「学生台湾语文促进会」，首任选杨允言做会长，出版「台语学生」杂志。Che就是这本册ê访问者－－一tīn无仝学校ê学生会做伙做khang-khòe ê由来。

「学生台湾语文促进会」ê第二任会长是Loonng――卢诞春。Tī头两任会长ê期间,in推sak一kóa工作计划,khah大ê两项工程是「县市长选举各候选人ê语言政策调查」kap「台语文工作者ê访问记录」。前项工作完成了后,有tī报纸顶详细刊出来，可惜是选后chiah刊ê,对选举无发生影响力。后项工作ê成果就是这本册。

本底这个台语工作者ê访问计划有分两阶段,这本册kan-taⁿ是头一阶段ê成果niâ。（参考后面ê附录）Tī头阶段ê访问中koh有四篇ê访问稿bē赴整理出来,就是访问郑良伟教授、台语册ê推广者林锦贤先生、风向双月刊发行人陈义仁牧师kap陈明仁、陈丰惠阮这对ang-á-bó͘ ê部份。Tī chia mā beh kā郑教授、锦贤兄kap陈牧师会失礼,看以后有机会kap第二阶段ê访问者做伙补起来bô。

这本册ê内容允言拍字了后,一直beh chhōe人出版,咱lóng知现此时台语册ê市场真e̍h,che koh是真严肃ê访谈,会买ê人真chió。四kè碰壁了后,我答应beh tàu设法hō͘出版。Tú-好庄柏林律师beh kā台笠出版社让我经营,张春凰小姐也为伊ê散文集「青春e路途」出版头疼,我想讲台语文beh有未来,一定着爱有真chē出版物,写台语册ê作家罕得有人肯出版in ê作品,无,我就kā接来做。An--nih,我ùi台语作家变出版商。

「青春e路途」是我接台笠ê第一本册,「台语这条路」是台笠第一本「台语研究」ê丛书。这两本册了后,阮beh koh出ê有叶国兴先生ê一本台语研究ê着作；我ê第二本诗、散文集「流浪记事」(第一本是前卫出版ê「走找流浪的台湾」)kap「台湾歌谣史研究」,后pái阮会继续chhōe台语着作出版,ǹg-望替台语文拍开一条生路。 为beh替这本册做一个发行ê话头soah牵一大拖,请读者原谅,mā诚恳请kā阮批评指教。

感谢你买这本有够冷门ê册。