《胡文池牧师kap布农族》

 | | | 转寄

难忘ê克难斗室-tī苑里教会

作者 胡文池 2009.02.22

苑里是我tī平地教会牧会四所ê第一站，mā是我受训为天国兵丁ê第一课。Tī-chia上帝hō͘我经验非常简单ê人生基本生活。

一、难忘ê大地震
一九三四年ê四月，我tú tùi神学院毕业，北部传道局派遣我到猫 盂教会牧会，开始传道生活。这猫盂教会就是苑里教会ê前身，是一个农村教会。信徒三十gōa户，分散tī苑里、猫盂、山脚。礼拜堂是以土块建造，建坪三十gōa坪，牧师馆mā是以土块盖成，却是二层楼房。楼脚是客厅kap灶脚，楼顶是卧室kap书房。当时我iáu未结婚。

我到任无几工，一个清早，天iáu未光，忽然发生大地动。我iáu teh享受安静、温暖ê春眠，忽然被房屋破裂ê响声kap大地ê摇动惊醒。发觉是大地动，马上冲出屋外，心脏怦怦大跳，佳哉无被lak落来ê瓦片击伤。耳边不时传来附近村民喧哗ê声音。Hit工下晡就听讲相距未到数里ê墩á脚村，房屋全部倒塌。死者超过三百gōa人。

二、难忘ê避难小屋
因牧师馆成做危险tòa屋，我变成无家可归ê人。了后十数天，只好寄居tī附近民家。地震了后无久，我就迎娶新娘来chia非新娘房ê小斗室，mā kap别人仝款享受了甜蜜ê新婚生活。

有一工马偕病院戴院长来到灾区视察，tī苑里现在礼拜堂建地为阮起了一个二坪大ê木板屋。虽然房屋无大，to̍h是像乞丐tòa土地公庙仝款感觉满意。麻雀虽小，五脏俱全，小厝内有卧床兼坐椅，灶脚兼浴室，餐桌兼册桌，简单ê基本生活iáu thang维持。唯一ê缺点就是无厕所感觉无方便，每工ài借用别人家ê厕所实在pháiⁿ势。到了五月梅雨连续无停，厝内潮湿，soah致使影响健康，不幸感染了疟疾，时常发烧卧病tī牀，长日服药chiah痊愈。传道局同情我ê处境，到了调动时期就转派我到头城教会。因此我只tī苑里牧会一年就离开了。

三、教会换新地
因大地动，猫盂礼拜堂半倒bōe-sái使用，经长执会议决，暂时借用苑里幼稚园礼拜，并决定迁建新教堂到苑里街。虽然礼拜堂因地动损坏，福音ê种子反tńg tī苑里萌芽生长；并新盖了koh-khah坚固ê砖造礼拜堂，直到现在iáu ē-tàng使用。塞翁失马，焉知非福，凡事有上帝好ê安排。

感谢主!o-ló主!

十年了后我进入山地传教，(山胞ê tòa屋虽然比苑里ê斗室宽大，内面ê家俱却是仝款ê简单)突然间我chiah恍然大悟以前种种刻苦ê生活是神ê安排，好叫我ē-tàng适应将来ê山地贫苦生活。