《胡文池牧师kap布农族》

 | | | 转寄

万军之主徵召兵(下)

作者 胡文池 2009.02.08

三、天国徵兵，上帝呼召我

●文池非文海
由母腹出生时，我ê身躯瘦长，一看就知影chit-ê gín-á m̄是强壮ê将才，mā m̄是肥胖ê经理型人物。Ē-sái讲是「天下父母心」lóng是仝款，无父母无希望in ê子女成器ê。 家父想：「án-ne瘦弱ê gín-á，不可能tī『武』ê方面有所成就，只好希望伊tī『文』ê方面有点á出息。」因此就将我命名为「文池」，m̄敢奢望我成做「文洋」或「学海」。 我究竟会成做什么款neh?当然上帝早有伊ê安排。

当我二岁时，患tio̍h肺部积脓症，生命十分危急。先父迫切祈祷，对主下愿讲：
「主阿!婴儿若得tio̍h祢ê医治，我愿将伊奉献hō͘祢，来偿还家己逃兵ê罪债，阿们!」
果然，我由死里逃生了。

●神学院ê异象
十二年了后，我teh要小学毕业。但时间冲淡了先父向主立誓ê记忆。实际上，当时家父因本业卖药以外，koh开采煤矿失败，家境十分困难，那内底有财力hō͘我读中学，koh再进神学院neh?! 小学六年ê同学，家境比较宽裕ê，大家lóng tī无闲升学补习。Á我neh?升学ê事，我想mā m̄敢去想伊!

「人是办未到ê，但tī上帝，万事lóng可能。」(马太福音十九：26)

十三岁时，我患tio̍h慢性大肠炎。六十年前，无抗生素、消炎剂等良药时代，我虽然去过台北市各大病院kap私设中西名医处求诊，却无收tio̍h效果。后来圣神指示我：ài到淡水身躯chiah会好。所以小学毕业三年了后，chiah以转地疗养兼升学ê理由要求家父hō͘我投考淡水中学。

伊因爱子心切，一嘴就答应了。我mā欢喜kah bē讲得，即时开始恶性补习，准备应考，等待考试ê大日子。

入学考试hit一工早起，tī往淡水中学ê红砖路上，无意中检到了一张台北神学校(现为台湾神学院)相片。这张相片是新建tī双连ê二层红砖建物，巍然宏大，上方两pêng印有偕睿理博士kap吴威廉牧师ê遗照。我看了十分欣羡，梦想tio̍h：「假使我以后ē-tàng进入chit间学校该有jōa好ah!」

了后来chiah明白，这是tùi天起来ê异象
这是上主为我安排，将来beh去ê学校。
(使徒行傅二十六：19)


●主为我开门
身躯已经康复了，一年ê功课mā读完了。Ē-sái讲是清寒ê家境无容允我继续学业，这是我家己siōng明白ê事。
但是我对读册真有兴趣，成绩mā bē-bái，因此无愿意半途á废。全校同学期考完了以了后，每个人lóng收拾家己ê行李，欢欢喜喜地赶tńg去家己ê家乡去了。只有我一个人，内心闷闷不乐，独自在校园慢步，或tī树荫下胡思乱想，无愿意kap大家同行，mā m̄知影如何是好?

忽然，圣经一句话，浮现在我脑海中。主耶稣m̄是明明白白对我讲过mah：
「lín祈求，就得tio̍h；
Chhōe，就chhōe-tio̍h；
敲门，就hō͘ lín开门。
因为凡祈求ê，就得tio̍h；
Chhōe ê，就chhōe-tio̍h；
敲门ê，门就开了。」(马太福音七：7-8)

我koh掀开圣经来看，一句lóng 无错。
我就马上向上主祈祷，热切ê祈求。鼓起内心全部ê勇气，身上一切ê胆量，快步直向偕睿廉校长ê厝，是我以前m̄-bat，mā m̄敢入去ê洋楼，照主ê话：
大胆地：却轻轻á，敲门!
Chit时，厝内外真惦静，颠倒是我ê心脏怦怦ê跳。我惊见校长，m̄是因为伊有英国绅士型ê严肃态度，却是初次面对高高在上ê校长讲话，难免产生「敬á远之」ê心理。Koh惊万一校长无tī-teh家，我就bōe-sái向伊讲苦、求援，那就惨loh。

经过几分了后，门内kah-ná有脚步声响起。门果然为我开了，出来ê m̄是佣人，却是校长本人。伊面容慈祥，声音温柔ê问我：「你有什么tāi-chì mah?」

「将来我想beh为主工作。您kám-ē-tàng hō͘我做工读生，hō͘我继续学业。因为我ê家庭经济实在困难：父母无法度koh再hō͘我钱读册。」我讲完了话，m̄知影什么原因，目屎一直流个无停。校长问我ê姓名kap年级了后，就tńg来到厝内，the̍h出一张一年级全部学生ê成绩表出来，tī门外chhōe出我ê名字来。

校长讲「你ê分数bē-bái，全班名列第二，真好。」停一下，伊koh再问：「你ê爸爸叫什么名字?」

我ê爸爸叫姚清溪，我回答。

校长感觉惊奇，就讲：「伊是m̄是真久chìn前bat来过淡水理学堂读神学?」

「无m̄-tio̍h。校长」我讲。三十年前ê事。校长iáu ē-tàng记得清清楚楚，伊ê记忆力实在惊人!

校长继续讲:「你ê爸爸是以前阮爸爸ê学生，我会记得，我会记得。请伊明á载来，我boeh看看伊。你也thang安心，我会设法，hō͘你继续读下 去。」

果然学校hō͘我一份工作，而且学费kap伙食费全免，直到我完成中学课程。就是án-ne。全能、信实ê主，听我ê祈福，hō͘一个贫童kap当 时富有ê子弟仝款ē-tàng读完中学。你讲奇妙不奇妙!

作者为最后一排中间无戴帽者，淡水中学毕业合影