《胡文池牧师kap布农族》

 | | | 转寄

万军之主徵召兵(上)

作者 胡文池 2009.02.01


先父bat是淡水理学堂大书院ê神学生，因为伊bat参加抗日战争，日本兵beh掠伊，tùi án-ne离校成做天国逃兵。了后伊感觉对主有所亏欠，chiah将我献hō͘主．代替伊做天国兵。

我自认是一个基督小兵卒。父亲mā是兵。父亲ê父亲仝款mā是兵。虽然兵种有别。役期无仝，职位却是仝款低。Tī象棋盘上，或tī战场实地，兵卒是khiā-tī siōng前线：m̄惊烧热、m̄惊冷、m̄惊任何生命危险，前进为天国交战。我就是án-ne一生tī siōng前线服役ê天国小卒，像tī百夫长管理之下ê兵，顺服命令，往各所在kap魔鬼交战。(马太福音八：9)我做兵这故事kap三代前ê祖先有什么关联neh?

一、阿公是勇敢ê抗日义勇兵
先阿公姓名胡丙丁，tòa板寮(现为中和市)。「丙丁」，听来像凡夫俗子ê名字：koh如丙等丁级，lóng无价值感，事实并m̄是án-ne。伊是一位可恭可敬、勇敢ê民族英雄，伊有一段感动人ê故事。 阿公tī板寮庄脚开设独一无二ê铁店，phah制农具(锄头、柴刀)，家庭用器(菜刀、剪刀)，以及武馆ê各种刀剑武器。因为这职业关系，阿公认bat士农工商各界人物，三教九流各层，加上雅量广交，伊mā有bē少结拜兄弟。

伊m̄-nā有举起铁锤phah铁ê力量，mā有为正义，为国家民族无惜生命ê胆量。当一八九四年，日本侵华ê甲午战争结束，满清政府割台湾hō͘日本。听tio̍h chit-ê消息，台湾各地出现了真chē爱国人士，组织抗日义勇军，抵抗日本军入侵。

当时阿公爱国热血澎湃，四界讲服乡民士绅，真紧to̍h招集一阵青年kap义兄弟，以及家己ê二个gín-á(其中一个就是先父)，带tio̍h自制ê刀剑kap少数枪枝，彻夜赶到澳底(现为福隆)，就是日军登陆地点，想beh击退敌人。

奈何这批义勇军是临时组成ê乌合之众，无经过正规战鬪训练，那有能力phah败战争专家而且有强烈军火ê敌人?对阵无久就死伤惨重，不得不抱恨败退了。不幸，阿公mā中弹倒地。二个gín-á看tio̍h chit款情形无好，冲到父亲身边，beh救其父。无想tio̍h，阿公却大声讲：「Lín快走!Mài管我，lín若行óa来，你爸就用枪phah死lín」。真正!伊举起小枪了。无thang奈何，二个gín-á只好流目屎啼哭无停，伤心地放弃亲爱ê父亲逃走了。

二、先父是天国逃兵
先父原名胡阿臀，因出生时身躯强壮，脚chhng特大á乎人án-ne命名。伊战败回乡了后无久就信主，板寮ê传道师看伊年青有为，就鼓励伊到淡水理学堂大书院进修，以备当传道师。

当时，日军占领台湾了后，到各所在搜捕抗日分子，先父认为故乡非安居之地，不如逃往淡水英国人办ê学校，可能khah安全，也thang成做传道师，这求之不得ê好机会，何乐á无为。因此伊就换改名姓为姚清溪，真紧成做牛津堂ê大学生了。因为当时ê人称chit间首创ê洋式学堂为「大学」。

但是好景不常，日军探知伊tī牛津堂，就来淡水学校捕掠伊。佳哉当时英国人有势力，偕睿理牧师出面说明：「chit个人是好人，名叫姚清溪，m̄是lín所beh掠ê胡阿臀。」日军无话thang答，只好放伊行。

先父感觉淡水mā是危险地带，即时离开学校，成做天国逃兵，无久了后tī新庄kap家母结婚，并靠tio̍h以前由偕牧师学习来ê医药常识，卖药挽嘴齿度生。

Tī新庄，因为伊是抗日分子，因此m̄敢tī街头店面公然开业，只ē-tàng tī隐密ê厝屋中为人看病，seng-lí清淡，生活不如意，但是日子一久，街上ê人lóng知影伊ē-tàng看病，称伊为「清溪仙」，tī无西医ê时代，mā有其地位。

我家后面有水沟，平时干涸，风台大水时chiah有水流。先父tī顶面起一大片石板，作为避难所。伊siōng早数年间时时提高警觉，准备一看tio̍h日本兵入来beh掠伊时thang逃入这避难所躲闪。但是实际上，伊从来m̄-bat用过chit-ê小避难所。