《胡文池牧师kap布农族》

 | | | 转寄

我所敬仰ê一位牧长―胡文池牧师

作者 卢俊义 2010.02.07

br> 原载一九九0年方向杂志 卢俊义

认bat胡文池牧师夫妇(牧师娘胡叶宝玉)，是一九七四年八月，我自台南神学院毕业受派赴台东县关山教会牧会时。七月三十日暗时九点，我tòe搬家公司ê货车来到教会，胡牧师夫妇真热心地帮助我卸下行李，hō͘我非常深刻ê印象。

Hit时，伊虽然已经退休，但是并无歇困，犹原tī原住民布农族间来回工作。当时tī关山崁顶山腰有一间孙雅各牧师娘所属芥菜种会开设ê「关山肺结核病诊疗中心」，胡牧师每工早起必定上山去为tòa tī hia ê病患(全部是原住民)传福音。风雨无阻，年节无停。伊讲得一嘴流利ê布农族语、日语、英语。许多年经病患第一pái听伊讲道，那会有kui面gōng-gia̍h ê表情睁tio̍h大目chiu看tio̍h伊，m̄敢想像有chiah-ni̍h好听ê布农话是出自平地人ê口。伊真正是有语文恩赐，一九四七年受派去山地向布农族传福音，一九四九年，伊就用十七个字母编出布农族语，并极力教授推广，五年了后就出版布农语圣歌集kap马太福音传。为帮助tī布农族参与宣教工作者ê需要，伊出版「布农话入门」一书。致使新旧众宣教师大得助力。

一副修长ê脚是胡牧师上山去传福音siōng大ê助力。Tùi关山沿tio̍h弯曲ê山路行到利稻koh再tńg来，每趟往往tio̍h花去一礼拜时间，这其间厝里全交由牧师娘叶宝玉长老肩挑起来。伊是关山镇两位助产士ê一位，非常能干。伊m̄-nā负担扶养、管教二男六女，iáu-beh帮助生产。这十年来ê无算， ē-tàng án-ne讲tī关山地区四十五岁以下，十岁以上ê人口中，有一半是tùi伊ê手中接生落来ê。。孙雅各牧师娘为帮助贫困原住民得tio̍h khah好ê医疗看护，bat tī关山镇内开办一间「玛利亚产院」，就是聘胡牧师娘负责。

胡牧师一九七一年争退休了后。犹原协助教会事工。尤其是弱小无牧ê教会伊从来m̄-bat推辞。Bat有一段时间伊kap牧师娘骑tio̍h一部轻小ê机车走台东鹿野教会，每pái关山缺少牧师时，伊lóng是兼负牧养ê职责。去关山牧会ê牧师lóng是会得tio̍h伊夫妇、kiáⁿ婿(林宝屏长老)全家大小无微不至ê关照。伊生活相当khiām，对少年一代之奢侈浪费ê生活态度有淡薄á无掠做当然。对人真有怜悯ê心是我一直学习bē得ê，特别tī-chia记述二事：

一、是发生tī一九六四年九月，伊负笈美国进修一个月了后，突然遭遇tio̍h花莲卓溪一位山地检查哨主管ê陷害，讲胡牧师将带原住民起革命，并且以tī原住民一位原住民长老家搜出手榴弹、枪械为证，引起警备总部一度惊慌，包抄卓溪布农族村落。Mā逮捕当时当teh台东军队中服预官役ê胡牧师长公子阿仁押到玉里警察分川询问，胡牧师家则被安全人员抄检。虽然有几位原住民长执被拷phah到半死状态，犹原查不出实证，最后警总发现确实是一件故意构陷，chiah澄清了误会。胡牧师次年六月自美国tńg来国内知影chit-ê tāi-chì，牧师娘尚且心犹余悸，牧师却无koh记恨，并且常tī祈祷中纪念国民党政府。

二、伊有kúi-nā年时间带关山肺结核病院ê病患每工早起礼拜，从来m̄-bat惊惶受感染，mā m̄-bat因病患贫困日时头偷溜出病院到外面工作，食饭kap暗时时间chiah tńg来m̄知歇困疗养ê案例á受气，伊真有耐心一再劝勉。并设法筹钱协助病患家庭生活所需。有一pái，胡牧师夫妇去美国四个月，托我代为上山去带病患礼拜。我每pái tùi病院tńg来，就赶紧将衫裤the̍h到厝顶上去凉风晒日认为消毒，chit种惊惶之心hō͘我每pái看tio̍h胡牧师、想tio̍h伊，我心中就会有一股惭愧见笑ê感觉，就愈加肯定tī献身传道ê精神毅力上。真正是这代iáu不如顶一代。别人不讲。起码我自已经是án-ne。

今年ê现在tú好是胡牧师八十岁生日，伊目前尚且健壮，我真ǹg望伊ē-tàng koh再拼口气协助翻译布农族语旧约圣经，果若án-ne，则是台湾教会之幸mā。