《胡文池牧师kap布农族》

 | | | 转寄

自愿食盐ê圣人 山地传道ê模范者－叶彼得牧师

作者 胡文池 2010.01.03

为tio̍h家己ê利益，仿冒(imitate)别人ê商标，是卑鄙ê行为。

为tio̍h仁爱ê缘故，效法(imitate)基督ê行为，是崇高ê人格。

前者比比lóng是，后者寥寥无几
后者ê中间，有一位洋人牧师，mā是有名ê大学教授，为tio̍h基督ê爱，自愿放弃高薪荣职，以及美好文明ê享受．来到偏僻未开发ê台东，kap贫困ê山胞，过了穷苦ê生活，m̄是为tio̍h什么，只是为tio̍h传好消息－福音。

Tī chit-ê世风日下，浮华奢侈、自私残忍ê现世，chit篇故事会启示咱什么?

神学院每工例行ê朝拜了后，校长带了一位生份人客入来，绍介hō͘大家讲：「chit位是加拿大圣公会牧师，名叫NarcissusPeterYetes，伊目前tī台东向山胞传道。

Chit位牧师对阮讲什么话，我lóng记不得了。不过伊ê风采到现在尚留tī我脑中。伊年纪已不轻，身材瘦长，气色mā无啥好。

伊ê服装虽然不时髦，to̍h是ē-tàng hō͘我感觉伊有英国老绅士崇高ê气质。伊为主肯受苦ê精神，hō͘我敬仰无停!

主后一八六二年，伊出生tī加拿大Freliglis burg。伊ê性情慈祥谦逊，饱学却寡言，bat tī加拿大蒙德利尔(Montreal)大学当过哲学教授。所以伊无论到世界任何地力，lóng有资格tī大学教册，过tio̍h真舒适ê生活。伊ê性格严肃、信仰非凡、言行不俗，kap一般人大无相仝，因此接近伊ê人lóng称伊为圣人。

后来伊自愿到日本传道，学会晓了流利ê日本话。Tī日本时，听tio̍h关于台湾高山族ê事，就感觉家己ê使命tī-chia。

一九三四年，伊决心离开日本，来到台湾。因当时日本政府不准任何人入山传道，所以伊就进驻在siōng偏僻ê台东，向附近一带ê彪马族kap阿美族人传道。

伊每工早起起床，就展读希腊原文新约圣经，然后默想、祈祷。

有一pái，tī外国教士家作客。早顿时chūn，有人提起晨报所登ê国际新闻时，叶牧师冷静地讲：「我从来不读晨报，惊会hō͘我分心，致使bōe-sái注意tio̍h koh-khah重要ê tāi-chì。」伊不注重无常暂时ê俗世tāi-chì，á专心追求永恒ê真理。

Tī台东tòa有一位日本人，是圣公会会员－仓满药师。叶牧师以其khiā家为传教基地。每礼拜日，召集附近村落ê原住民来chit所在集会、听道kap练唱圣歌。

以前ê原住民真sàn-chhiah，有时chūn甚至买盐ê钱lóng无。叶牧师mā kap in仝款过了真朴素ê生活。伊下乡传道平素步行不坐车。家己带tio̍h简单ê食品，如番薯、小米kap盐等，无愿意原住民开钱请伊。

但有一pái，tī人家极盛意之下，感觉却之不恭，就留落来做客。主人为tio̍h beh招待chit位贵宾，boeh出去买一瓶豆油做佐料。牧师知影chit项事时，随时阻止讲：「你用买豆油ê钱，若换买盐，就ē-tàng用上一个月ah!」

伊虽然自奉甚俭，对待别人却真慷慨。有一工，tī探访一位求道者时，听tio̍h有病人要求食苹果。当时ê苹果全由日本进口，价钱贵得惊人，sàn-chhiah ê病家那有这钱thang买。叶牧师忍痛，特别买了一个hō͘ chit位病人食，hō͘伊感激涕零。

一九三八年十一月十五日，tī台北马偕病院，伊终其尾完成劳苦ê工作，tńg来到慈爱天父ê怀抱，永远安息。其死因是－营养失调－。想tio̍h chit点，到现在我iáu会感觉心酸。伊如一条蜡烛，燃烧家己，照耀别人。

伊为主饮尽苦杯，这苦杯m̄-nā苦，又koh是咸ê。

伊ê末了mā kap主耶稣仝款，死无葬身之地，只有借地tī淡水外国人公墓。