《胡文池牧师kap布农族》

 | | | 转寄

悼念老同工 骆先春牧师

作者 胡文池 2010.01.10

伊kap我
伊ê大名是「先春」，我就以这「先」字先来拉关系。伊先我五年来到chit世界，是老前辈;伊先tī我入学就读淡水中学，koh先tī我入学台北神学校(to̍h是台湾神学院前身)，是老同学；伊先tī我被孙雅各牧师选召为山地开拓传道人，是老同工。

一九八二年六月十五日，伊先tī我一刻登上台湾神学院礼拜堂讲台，接受荣誉神学博士学位，是老同事;最后一pái ê「先」，就是伊先tī我走到天堂ê宝座前得奖，是老同道。

一九四七年十月，我先tī伊到东部关山，beh向布农族传道，伊因种种tāi-chì延迟到同年十二月chiah达到台东，beh为阿美族传道。

台湾光复了后ê十多年间，山地教会ê发展siōng快，tú亲像春落雨了后竹笋ê气势tī各村建立，其数多达四百所。但是圣经学校出身ê指导者却只有数十位而已，大多数ê教会lóng是由热心ê长老执事主持。因此伊kap我奉山宣委员长ê命令前往各族各地召开圣经讲习会。阮二人ná亲像厨师，教授in如án怎讲会圣经做材料，调理各色ê菜肴来滋养信徒。有数年之久，阮二人同心合力，同寝共食，到无公车ê山地行，tī无电火ê所在聚会，有时食山地野味，有时食小田蛙。

有一pái，一位美国牧师H．Anderson kap阮到大武乡ê邻村召开讲习会。暗时，美国人用家己带来ê太空被困，到早起发现到全身lóng生红疹á发痒，阮二人什么lóng无。阮就向伊讲sńg笑讲:「恩，大概台湾ê臭虫常食阮ê肉已经厌了，嗅到新口味ê白种肉，chiah全部集中到你身上lah!哈哈。」

伊是音乐大师
骆牧师有音乐天才，伊m̄-nā ē-tàng唱、会弹，mā会作曲。台湾话ê圣诗有伊ê页献，阿美族ê圣歌是伊翻译出来ê。伊ê低声歌喉特别好。淡江中学有音乐会时，伊有时chūn会出来演唱。会记得有一pái，伊kap另外一位演唱「Call John」，唱得太好了，观众拍手叫好久久不绝。

孙雅各牧师bat是台北扶轮社社长。伊特别邀讲骆牧师去献唱，得tio̍h全体听众大喝彩。伊若向歌厅发展，一定是大牌ê红歌星。伊ê子女数位是音乐家，ē-sái讲是遗传到父亲ê音乐细胞。

伊是一位学者
Tī「台湾基督长老教会百年史」内底，孙雅各牧师赞扬骆牧师是一位学者。因为伊tī台湾神学院ê成绩bē-bái，被保送到日木神学校留学，回国了后chiah请伊tī淡水中学教授圣经kap英语。

光复了后，孙雅各牧师选派伊到阿美族传教，mā是因为伊ê才干出众。果然不负众望，伊对阿美族教会m̄-nā phah好根基，建设真chē教会，甚至到附近ê彪马族，东部排湾族，以及离岛ê兰屿雅美族，伊mā m̄惊辛苦前往传道。伊ê传道精神真是可钦可佩，为现今青年传教者ê楷模。

伊ê牺牲精神
台湾光复当时，一般人认为中学教员ê待遇kap地位是比传教者为高，事实mā是án-ne。因为第二次大战时，一般人生活艰苦，教会不振兼会友疏散，奉献mā减少，光复数年间情况iáu未改善，因此真chē牧师经不起chit种贫困生活，只好转业或兼职，来增加收入贴补家用。

骆牧师甘愿牺牲淡江中学教员ê职位，放弃优厚ê待遇，接受山地传教ê呼召，chit种牺牲精神是何等可贵ah!离开了交通方便ê淡水，远行到偏僻ê东部，tī公务员看做放逐，伊却认为使命，勇往直前。伊ê一阵儿女，由东部送到西部受教育，不但beh支出高额ê食费、交通费，tī管理上、情感上¨种种因素，mā是一般人所无愿意做ê事，伊煞将万事交托hō͘耶和华，实在难得!

我有时chūn到台东访问伊，常常看tio̍h有山地人tī in-tau食饭。Tī平地教会牧会，会友常赠送物件hō͘牧师，但tī贫困ê山地，tāi-chì却完全相反。

我常常看tio̍h骆牧师厝里有一大罐ê豆腐乳，由此thang知in一家人ê生活mā是何等清苦。每一个月，骆牧师微薄ê薪俸，大部分lóng被tī北部念册ê子女the̍h去当学杂费，只有chhun落来一点chiah是伊台东厝内ê生活费。

饲养小鸟ê上主是人类ê父，伊从 m̄-bat饿死伊忠心ê仆人。

骆牧师ê牺牲奉献精神，神不致使伊营养不良á夭折，反tńg hō͘伊活到八十高龄chiah召伊归回天国。神mā特别祝福伊ê子女，hō͘每一位lóng有好ê成就，感谢主!o-ló主!

「传播福音ê人，in ê脚踪多美ah!」罗马册十章15节