《胡文池牧师kap布农族》

 | | | 转寄

回忆恩师－孙雅各牧师

作者 胡文池 2009.12.27

孙理莲女士tī「天使tī伊身旁」一书中谈起：「孙雅各牧师tī大学时代bat工读做家俱搬运seng-lí，伊作广告讲：「阮ē-tàng搬动任何物件」，chit种乐观处事ê方法永远无离弃伊。」

Chit句「任何物件」，无想tio̍h mā包括上帝国ê物件，因为伊来到台湾了后，搬运了基督ê福音kap礼拜堂到山地，mā搬运台北神学院tùi淡水街到炮台埔(一九三一年)，六年了后koh再搬到台北市内，光复了后koh一pái搬到阳明山顶，新建宏壮ê校舍。伊有健壮ê身躯、坚忍ê精神，ē-tàng负起任何重担。

孙雅各牧师是我ê校长、老师、mā是头家。

我tī淡水中学kap神学校在学时期数年间，bat做伊ê助手，每工下晡放学了后，就到伊ê办公室帮助种种事务。我m̄-bat看过伊有闲暇ê时间到野外散步，或者坐teh享受音乐。有一pái，伊对我讲伊所参与ê委员会共有四十八个(包含外教派ê)。所以由早起到半暝，伊每工无闲无停，若无ê话，就家己驾车到别处办事，参加会议。

一、伊是阮淡水中学校长
一九三0年，偕牧师例假回国，孙牧师代理伊为淡水中学校长。偕牧师具有英国绅士ê超然外表kap气质，孙牧师却有美国人ê民主风度。伊买了真chē花木到学校种植，美化环境。伊无校长ê架子，却常常穿起运动衫kap工人同齐工作，或教导学生phah篮球。听讲，伊是美国农场ê子弟，大学生时代是长走运动员。农场kap运动场锻炼伊，hō͘伊有健全身躯，为将来山地传道之用。虽然身上负有校长ê重职，伊ê心却无bōe记得传道ê使命。所以伊抽空到各地传道，每礼拜日暗时，家己驾驶小汽车到淡水海岸线ê老梅乡村开拓布道，每pái lóng带领数名学生(我mā包括在内)同行协助，伊mā藉此培养传道人员。

我tī淡水中学五年时，孙牧师特准一位阿美族青年到淡水中学读册，名叫阿伊布(Adop)。当时我是学生宿舍ê一个室长。孙牧师ài我照顾此山地青年，安排kap我同室，希望伊将来成做山地教会khah有教养ê指导者，可惜伊半途á废，被日人派到南洋当车夫战死。

二、伊是阮ê神学校长
一九三一年我入学于tī淡水炮台埔ê台北神学校。孙牧师是阮ê校长。伊将学校由淡水教会边á ê旧医馆移迁到炮台埔「牛津学堂」hō͘阮tī山水美丽、环境幽静ê场所读册。Chit时学生全部未到二十名。无久，孙牧师tùi东部呼召三名原住民来chia研究教理，为山地传道培植人才。Tùi chit时起台北神学校开始教授希腊文，á孙牧师亲自担任教授阮希腊文。伊m̄是一位终日坐tī象牙塔中研究着作ê神学家，to̍h是四界奔走传道、实践福音ê运动员。当时阮学生组织救灵队，每礼拜日夜间到附近街头布道，孙牧师援助阮费用。伊mā许可二名由佛教改信基督ê和尚入学听讲，kap阮tòa作伙宿舍。

三、伊是阮山地传教者ê总司令
第二pái世界大战结束了后，siōng先回台ê外国宣教师就是孙雅各牧师。一九四六年六月伊到花莲巡视山地教会，看tio̍h真chē太鲁阁kap阿美族人已经入信，到关山时，看见一位布农族头目带领一大群族人来欢迎伊。因伊ê长子tī战争中被日本军徵召从军，tī南洋被美军俘虏，受tio̍h美军爱护，战后回台时iáu送伊真chē物件。所以头目真感激美国人ê慈爱，就对孙牧师讲： 「lín若派人来传基督教，阮lóng tio̍h信。」

一九四七年热天，传教师总会tī淡水召开时，孙牧师叫我到伊ê厝，tī伊ê办公桌顶展开一大张台湾地图，讲出伊对台湾山地传教ê抱负。伊ài我负责向布农族开拓传教，前往东部ê关山。所以我kap家族就tùi大甲搬到东部关山，工作二十五年直到退休为止。依照孙牧师ê指示，我开始学习布农话、创作字母、翻译圣歌集kap圣经。

派我到布农工作ê派令册虽然是北部传道局发ê，但实际上我ê薪水是由孙牧师负责、并寄发。伊数次the̍h我ê相片寄往外国募捐。我一个人ê力量有限，boeh往五十处布农族部落布道是不可能，mā是功效无chē，所以我时常召开灵修会养成族人为传道人。原住民真贫困，灵修会ê食费ài阮负担。灵修会后我就选派优秀ê人物做嘱托宣道师，到各地开拓布道，或者驻在既有信徒ê村落牧养兼布道。对这数十名ê嘱托宣道师，阮tio̍h负担in ê旅费kap津贴。每月所beh ê传道费用，我向孙牧师要求时，孙牧师lóng是有求必应。虽然数年了后台湾教会有成立宣道会，孙牧师继续为会长真多年。Mā无人敢负起án-ne多额ê经费重担。

孙牧师虽然身为神学院长，心却bōe-sái bē记得山地传教。伊时常抽空到山地布道，koh请数位外国宣教师来台湾为山地工作，特别对各大族，各派一名为in翻译圣歌集kap圣经。孙牧师bat向我讲，以前宜兰有三六社平埔族lóng bat建设教会，但因无翻译圣经hō͘ in，soah致使多数bōe-sái继续。我学习布农话以了后，陆续为in翻译圣歌集，旧约圣经故事kap新约圣经，为tio̍h出版圣歌集，伊设立一笔基金借我循环活用。出版数次圣歌集kap旧约故事集。我认为这基金是山宣ê钱，到一九六六年九月，就是伊升天ê数个月前chiah知影这基金是伊向tī英国ê一位音乐家募捐来ê。因为孙牧师感觉有责任hō͘ chit位基金奉献者看tio̍h成果，由美国写phe叫我邮寄我所出版ê册本各一册hō͘ tī英国ê捐献者，并报告伊布农ê教势。由此可见，山地传教ê经费，真chē是孙牧师家己向世界各地筹募来ê。我现在尚保存这张伊hō͘我最后ê信。因为这信表示伊尽心爱主，念念无bōe记得山地传教ê工作。Tī信中后段讲：「我真关心你所遭遇ê一切问题kap困难，并祈祷你ê工作成功。你ê布农中会组织了mah?其他ê山地中会进行ê如何?」

伊带病工作
孙牧师往生ê数个月前，伊最后一pái来东部巡回传道。到关山时对我讲伊真疲劳，大概是感冒，台东ê主内医生hō͘伊siōng好ê感冒药。我请伊食晚饭，因为我知影伊爱食米粉，所以妇人人就炒一大盘米粉，结果伊只食一点点。不如以前ê饭量。

暗时阮请伊tī教会讲道。伊虽然身躯带病，mā不推辞。但是晚饭了后伊讲感觉一点thiám ài困，叫阮到礼拜时间chiah叫伊起来。时间到了，伊果然起来讲道。隔工，伊mā按照预定到别处继续工作。伊以前kap我到山地工作，无论行路多远mā无án-ne thiám，tio̍h歇困。了后chiah知影chit-pái并m̄是普通ê感冒，就是上主要召伊tńg来到天堂永远歇困ê信号。果然伊走尽应走ê路，荣归天家。

孙牧师tī火车内做见证
孙牧师常往东部传道，有一pái伊坐tī火车中，同车ê人lóng注目看伊。边á有一青年特别注视伊，了后就进前向伊发问讲：「lín英国人为何身躯án-ne高大，颜色án-ne红润、国家富强、文明、为何阮不会án-ne?」孙牧师就回答讲：「我想lín中国土地广，气候温和，历史mā久，人mā聪明，无论什么lóng m̄输阮，只有一点阮有，á lín无ê，就是阮真久就有基督教，á lín无。」hit位青年就默默无言，只tìm头。