《胡文池牧师kap布农族》

 | | | 转寄

传道生活回忆

作者 胡文池 2009.12.20

原载台湾教会公报一四五0期

我是退休ê牧师，自二十六岁起tī教会工作了二十七年，初期ê十二年tī平地，以后ê二十五年tī山地，这无算短ê时光，经历了传教者特有ê甜咸酸苦各种遭遇，tī-chia只举数项往事作为回忆。

一、讲章生产之苦
有人讲传教是siōng轻松ê职业，每礼拜只讲几pái道理而已，以外ê时间每日闲暇。这话对我是相反ê感受，试想放饲ê鸡母，伊一工到晚tio̍h到各所在chhōe觅食物，chiah有够额ê滋养制出卵来。传教者ê生产讲章甘不是án-ne?

我是一个平凡ê传教者，不善讲道，自开始牧会起。为每周二篇讲章，绞尽脑汁，每日劳苦。自礼拜一开始，就每日阅读各方面ê册，或名人ê讲道集，chhōe求合适ê经题kap材料，有时chūn到礼拜六iáu未chhōe出合宜ê讲章，内心ê焦虑紧张，真是bē-tàng用言语来表达。

一九二六年四月十六日，台湾教会由大陆聘请名布道家禾尚节博士，来台北举行为期一周ê奋兴大会。当时笔者由遥远ê中部庄脚专程前往参加，亲眼看tio̍h伊伟大ê工作，有力ê证通，会众听了流目屎悔改，跪地认罪m̄知凡几。宋博士ê讲道内容，好似「满汉全席」大餐，á我ê讲题犹如粗米饭配咸菜。

二、日本人ê压迫
笔者初次受派到教会工作时，当teh日本帝国发动大东亚侵略战初开。In siōng早强迫教会学校学生前往国家神社参拜，而且刑事时常到教会chhōe麻烦，调查信徒姓名。牧师kap信徒ài tī厝里设置大麻(to̍h是天照大神神牌)。主日礼拜前强迫信徒向东方遥拜日本皇宫。高等警察常常向阮牧师试问:「天皇kap耶稣nah一位大?」或「教育日语kap圣经nah种重要?」用类似ê难题来为难阮。日军tī kap美军交战、节节失利时，写落来众牧师ê乌名单，准备tī美军登陆台湾时全部杀死。感谢主!美军无来台湾，只以两颗原子弹，就hō͘日皇投降，á hō͘主ê仆人免去一场大浩劫。

一九四五年八月十五日，日本战败，传教mā自由了。

三、信徒爱心
第二次大战期间，各项民生物资奇缺，差不多样样lóng采限量配hō͘。Tī大甲教会时，有一位信徒借hō͘阮一块山坡地，所以阮夫妇带tio̍h二个gín-á上山种土豆，收成二包土豆仁，供两年食用。当时ê信徒生活mā真困苦，传教者薪水koh-khah是菲薄，但是爱主ê信徒，却时常致送额外ê金钱或食品，来补足阮ê欠缺。我向布农族开拓传道之初，关山黄应添医师mā帮助我tī伊ê病院内开设礼拜堂，hō͘山胞有场所做礼拜，并有免费午餐kap饼干、糖果。

Tī平地、山地传福音期间，信徒ê爱心是源源不断，诉讲bē尽，hō͘阮由衷感激，到taⁿ iáu念念无bē记得。

四、山地传教得意时期
台湾光复时政府对山胞传教协助真chē，thang申请一年期ê入山证，派出所并为阮召集山胞来派出所听道。常时我iáu年经，体瘦腿长，thang连行八小时ê路到深山传道，in以前siōng为惊鬼，我向in宣讲起帝创造人类ê祖先－亚常夏娃，koh创造各种食物、牛、羊、鸡、犬等，tùi án-ne in渐渐归属了上帝而且禁酒、禁烟。

依我四十多年传道ê感觉。汉人有故旧文化。心田是充满保守旧传统ê石地，福音种子无容易进入。山地人内心空虚，容易接受福音ê恩典。天国实在是in ê(马太福音五：3)。所以我tī山地工作ê初期十年间，经我ê手受洗礼ê山地人就超过五百名了。假使「一份工作一份收成」ê话tī于平地是真正， án-ne tī山地傅教thang讲一份工作百倍收成，真是好土地!

虽然山地传教tī肉体上有真chē痛苦，但眼见信徙日增而且虔诚，礼拜堂一座一座落成，tùi án-ne精神上受大安慰kap喜乐。 传教期间我bat为布农族编造十七个字母，印成字母小册、圣歌集、要理问答、奋兴短歌，最后开了十年功夫译成布农新约圣经。一位小姐自费专程自瑞士来chia，开了六个月为我phah出圣经原稿影印。

上帝赐hō͘每人ê恩赐本无仝款，我ê性格率直、内向，不善交际，比较无适合tī平地传教，mā可能tī母胎内，上帝早to̍h选定我为山地文字工作者，所以我被号名为「文池」，tio̍h用这池内之水来灌溉灵性贫瘠之山地。

过去ê数十年时间，已如梦中真紧to̍h消失了。苦战为老兵荣誉勋章，胜利是退伍者甜蜜ê回忆，为主效劳bē落空。