《胡文池牧师kap布农族》

 | | | 转寄

对主耶稣失敬

作者 胡文池 2009.12.13

回忆微仆一生数十年ê传道，初期十二年tī平地教会工作。Chit段时间，无论tī讲台顶，或是对外布道时lóng是讲「耶稣是神， tio̍h信耶稣，耶稣会救咱¨¨等等」。圣经án-ne记载，前辈án-ne讲，同工mā án-ne传，我照样讲，并无感觉有什么m̄-tio̍h。

日木人统治台湾五十年久长时间，极力推行同化政策，强制岛民使用日语。Chit-ê政策tī山地有淡薄á为成功。台湾光复时，山地同胞无论男女老幼lóng会讲日本话。我到山地开拓传道初期mā是使用日语传报福音。

日本人对别人讲话真有礼貌，对上级、老辈或敬重ê人lóng真细jī，对神mā是仝款。日本牧师讲道时称「神」为「Kamisama神样」，对「耶稣」圣名mā带敬称讲「Iesu sama」。Chit句「sama」ê话是对别人或对神共通ê敬语。如「中山样(Nakayama-sang)高桥样(Takahasi-sang)等等。我tī山地mā照样做。

我到山地传道以后chiah感觉到以前tī平地传道时对主耶稣不带敬称是不敬，这岂是神经过敏mah?中国是礼仪之邦，有久长ê文化。平时提起别人姓名，张三、李四，mā lóng敬称叫「张先生、李先生」。对老一辈就称「张a叔或李伯伯」。对神koh-khah m̄敢马虎，尊称三国武将关羽为「关帝爷，恩主公」，称湄州孝女林默为「妈祖婆」等等。In m̄敢讲「我家拜关羽，林默」。甚至对失去主人ê公共纳骨堂mā尊称做「有应公」。

假使有人讲，「tī福音书kám m̄是是án-ne不敬称耶稣mah?」伊bē记得福音书是一种历史册。历史是khiā-tī客观立场描写人物，自然不带敬称。但是若读保罗册信，你就会发觉到保罗bat用犹太人siōng敬仰ê「基督」冠tī主耶稣身上，讲「耶稣基督」，或「基督耶稣」，或者只尊称「基督」来代表主ê圣名。

Chit句「基督」是宗教上职称，tú亲像咱对于高官，显职只要称伊「李市长」、「林经理」就无koh加添别ê敬称仝款。

虽然án-ne，对于会外ê人看起来「基督」二字kah-ná是主耶稣ê字姓，如「司马，欧阳」等等。

「基督」chit句话是希腊语音译，是外华语，若无翻译就无人知影什么意思。为什么咱m̄用中国人bat ê字句来尊称「主耶稣」，或「救主耶稣，救世主耶稣」，hō͘ koh-khah chē ê人知影咱所传ê信息。