《胡文池牧师kap布农族》

 | | | 转寄

非凡ê牧师 一家人

作者 胡文池 2009.12.06

伊是我一生岁月中。所钦佩、敬仰ê同工，阮时常同齐工作，伊是我认bat siōng深ê牧师。Tī罗东小学时，伊bat tòe名画家蓝荫鼎先生学习画画。Tī淡水中学时，bat kap名钢琴家德姑娘(美国人)学习琴艺．所谓名师出高徒，伊若继续深造，必定成做相当成功ê艺术家。但是信主了后伊放弃一切世俗ê 欲望，专心跟tòe主－伊就是江天顺牧师。伊原是药师，却放弃人人求之不得ê职业，一心kap江牧师同工，兴起上帝ê教会－伊就是江金定师母。

二人结婚了后，bat向上帝许愿，将所有子女奉献为主所用，in ê誓愿果然实现了。三男二女全部进入神学院受造就，成做主ê精兵。

一、全家人lóng读神学院
江牧师是从来m̄-bat信主ê环境中被神选召出来ê，伊为tio̍h beh入神学院，chiah读淡水中学。毕业了后，往日本留学，tùi东京神学大学毕业，了后koh再到中国大陆，进入北京恩典院进修，后来koh再转到南京灵修神学院吸取属灵ê恩赐。

江师母tī淡水女学院时由宋尚节博士奋兴信主。伊本来想beh东京入神学院，m̄-koh父母反对，只好日时读药学，夜间chiah到神学大学夜间部受课。

长子荣彰，台大哲学系毕业，自愿进入神学院。
次子荣仁，毕业于高雄圣光神学院，伊ê太太是英国人司美玉教士(LEILA SMEE)。

三子荣义，台北浸信神学院，koh再到新加坡三一神学院进修，kap香港人卢树珠小姐结婚，伊tùi香港建新神学院毕业，koh再读中华福音神学院，而且到韩国亚洲神学研究院进修，in二人得tio̍h上帝特别ê呼召，作非洲乌人ê宣教师，现在英国受训练。

长女庆惠，台湾神学院教育系毕业了后，koh再读神学系，丈夫吴剑秋是外省人，读改革宗教神学院，koh再到台湾神学院修完B．D课程。

次女信惠，毕业于台湾浸信会神学院，丈夫是布农族松春成先生，就读于台湾神学院。

像án-ne，全家人奉献hō͘主ê家庭，tī台湾实真罕得，江牧师夫妇既将子女奉献hō͘神，所以对子女kap异族结婚ê事mā一切由神安排，m̄-bat提出任何反对歧视ê意见。伊ê家庭有外省人、台湾人、英国人、香港人、山地人，像是一个国际家庭，mā像小型天国，因为天国就是万国万民聚集ê所在。「我观看，见有真chē ê人，无人ē-tàng数过来，是tùi各国各族各民各方来ꨨ。」(启示录七：9)

二、热心为主工作
江牧师tī日本神学大学毕业了后tńg来台湾，志愿到偏僻ê所在传道，hit时，我tī大甲教会牧会，所以绍介伊到墩á脚庄脚教会传道，这教会原来ê牧师因薪水siuⁿ少无法度生活，就转业卖豚肉去了。江师母来大甲开发药局，扶饲一家族人，江牧师除tī墩á脚传道不领薪水外，iáu兼牧鲤鱼潭教会。

丈人丈ḿ iáu未信主，伊kā in接来屯子脚教会tòa作伙。丈ḿ是热心ê佛教徒，每日素食，每tú-tio̍h节日就tī教会ê宿舍内摆设祭品敬拜鬼神。Ná亲像来便利亚先知kap巴力伪先知斗法仝款，牧师kap拜偶像ê mā tī同一地力有信仰ê争战，结果是丈ḿ战败，归于主耶稣，最后连丈人mā成做基督徒了。

光复了后，第二年，我往东部ê关山向布农族传道，遇tio̍h伊tī玉里教会牧养平地人，而且每礼拜日下晡，聚集附近ê山胞到教会来。我到玉里附近山地布道时，伊mā时常kap我同工。

因伊ê热心，最后mā感动母亲信主接受洗礼。
一九六0年，江牧师到花莲美港开拓教会，现已成做一百五十位信徒ê大教会，tī「chē种多收」册中，美港教会hō͘编入为增长ê教会。

此外，伊bat开拓光滨布道所、国富里家庭教会、田埔布道所(现在成做怀恩教会。)民光家庭教会、卡来湾家庭教会(现在成长成(chiâⁿ)做美德教会)等等。

三、爱ê具体表现
江牧师为tio̍h beh读神学院chiah进入淡水中学。我读五年级时，伊读一年级，因伊是十分热心ê基督徒，所以阮真紧to̍h熟识。 学校附近tòa了一位真穷苦ê人，我常看见江天顺君带tio̍h学生所食剩ê饭菜hō͘伊食，chit种ê事，一时成做人人lóng知ê美谈。

伊ê班上有一位家境甚困彭姓ê学生，伊tī精神上、物质上常hō͘ in帮助。
Tī大甲开药局时，mā时常以药品援救贫困ê信徒。
Tī玉里传道时，mā常用药品帮助山地信徒。

Tī花莲时，有一位慕道ê老妇人，嘴齿已全部脱落，bōe-sái咀嚼，soah致使营养不良，身躯衰弱。奈因家贫如洗，那有数万元thang去补假牙?江师母以爱心kap信心the̍h出车费，千里迢迢带伊到淡水，chhōe当牙科医师ê小弟，江师母一路祈求全能ê上帝感动伊ê小弟，ē-tàng为这老妇人免费做假牙。这是极大ê冒险，万一小弟无愿意，岂无浪费车钱mah?而且牧师夫妇ê声誉mā会受影响。慈悲ê上帝果然垂听江师母ê祈祷，感动了小弟答应阿姊ê要求，免费为这可怜ê老妇人装置一嘴真美ê假牙，甚至hit段日子，二人ê膳宿lóng由弟妇招待ê。Chit-ê善举m̄-nā hō͘老妇人大为感激，mā hō͘近邻ê人听得流下目屎来。

朱阿生长老，是热心为主做工ê杰出人物，伊ê独生女tī豆蔻年华时过世。长老夫妇年老时无人óa靠，江牧师夫妇带动全教会ê会友，全力帮助in，安顿in tòa-tī美港教会附近ê国民住宅里，十多年ná亲像一日，大家出钱出力养护in。最后，朱长老ê后事，mā是美港教会全体会友办妥ê。

四、信心ê祈祷
江牧师凡事祈求上主ê帮助。任何人拜访伊，伊必定kap伊同心祈祷。
大战中，伊牧养tī墩á脚教会。有一工一位日本高等刑事到教会来问牧师一个难题：「耶稣kap天皇何者为大?」江牧师对伊讲：「我m̄-bat想过这问题，请你kap我同齐祈祷。」讲完，就开始一段真长，mā m̄知有jōa久时间ê祈祷，高等刑事受不了，就溜出去，等牧师祈祷完毕，睁开目睭时，伊已败退á行，不tī hia了。祈祷赢过日本人ê试探。