《胡文池牧师kap布农族》

 | | | 转寄

为主工作虽苦犹乐

作者 胡文池 2009.11.22

使徒保罗bat称呼一般俗世ê人为「随从今世ê风俗、顺服空中掌权者ê首领，就是现今tī悖逆之子心中运行ê邪灵。」(以弗所册二－2)。宣传救世ê福音就是beh向邪恶ê魔鬼挑战，因此，传教者一定beh经过真chē磨链kap苦战，chiah ē-tàng得tio̍h胜利。主耶稣本身tī开始传道ê时chūn，也bat tī旷野领受魔鬼ê试探。阮这老一代ê传道人，虽然无经过像使徒保罗hiah-ni̍h chē ê苦难，却mā难免遭遇真chē挫折、劳苦。主耶稣明白ê kā咱讲:「若有人beh tùi我，就当舍己，背起伊ê十字架，来跟tòe我。(马太福音十六：24)。所以，为tio̍h传福音á遭受艰难、痛苦，无算什么，将来tī天顶那永久ê荣耀chiah是siōng重要ê。以下是我传道生涯所经历ê甘苦，愿kap大家共勉。

一、食ê问题
本人tùi神学院毕业了后，就受派到一间小教会牧会。那已经是五十多年前ê事了。当时每月由传道局所领tio̍h ê报酬是卅二元五角，á我ê大兄tī镇公所办公每月领tio̍h四十五元。假使是新婚ê夫妇，án-ne这笔薪水iáu ē-tàng过bē-bái ê生活。如果gín-á续落来，问题就大了。有一位同工有七、八个gín-á，虽然领了子女津贴。但是gín-á有ê tī中学读册，the̍h去交学费了后，chhun落来ê钱就寥寥无几!因此，in每餐饭桌顶ê菜，总少不了一盘咸豆腐乳。

当时mā有人向外国差会反应，但是外国宣教师煞讲:「我每pái到各教会巡视时，传道师招待我ê有鱼有肉，可见in ê生活是真丰富ê。」伊不bat中国人是以礼待客，虽然家己每日刻苦俭食，但是招待人客一定会准备好ê菜来飨客。Á外国人就无仝款了，随便二、三道菜就ē-tàng宴客了。

因为传道人ê收入微薄，所以常时有一句俗语称呼in为「贫传道á」。有一位未婚ê传道师向一位心爱ê小姐求婚，伊ê父亲讲:「假使我有一头牛，我一定会kā伊绑tī青草多ê所在。」用chit句话来拒绝chit件婚事。

第二次大战末期，一切生活物资优先分配hō͘日军，因此民间食物koh-khah缺乏，lóng是用配给来限制人民ê生活用品。

二、衣ê问题
牧师、传道师tī社会上是「士、农、工、商」中属tī上流ê「师」级人士。虽然生活贫苦，但是，一旦khiā-tī讲台顶或交际上，服装就bōe-sái马虎，以免hō͘人看bōe起。

五十年前，寒天毛织男西装一套tio̍h卅元。我知影神学院毕业了后第一礼拜就beh上台讲道，所以预先向裁缝店订做一套乌色洋服。因身上无够额ê钱，所以kap主内店主商量，以每月偿iáu五元ê条件订做。皮鞋mā只有一双，礼拜日讲道或外出开会时chiah穿。

三、行ê问题
阮chit代尽程退休ê老牧者，是经过日本人统治台湾ê时代，tī in剥削、控制下，一般人生活穷苦，连买一台脚踏车ê能力mā无。阮每pái探访会友，或家庭礼拜，lóng是靠双脚行路。第二次大战末期，美国飞机ta̍k工轰炸台湾，因此火车只tī夜间行驶。夜间行路mā bōe-sái点灯，所以koh-khah不便。二次大战结束，台湾回归中国，原住民得tio̍h信仰ê自由。微仆入山传道，lóng是步行登山，siōng短ê行程也tio̍h行二小时，有时甚至行一工。虽然肉体厌倦，但看tio̍h信徒人数口增、信仰益坚，教会增长有淡薄á快，心中就感觉极大ê喜乐kap安慰。

四、结语
阮老一辈ê牧师虽然收入不丰，但因生活俭仆，量入为出，所以m̄-bat举债度日。凡事靠主，每日感谢、喜乐。现在老了，儿女mā长大了。In mā lóng tī教会中服事，并尽孝心来奉养父母。传教师奖慰会每月mā会寄来生活补肋费，阮心中充满温馨。同时koh-khah tio̍h感谢上帝无限ê爱kap主内兄姊对老仆人ê照顾kap关怀。