《胡文池牧师kap布农族》

 | | | 转寄

仙人乐园

作者 胡文池 2009.11.15

古时，中国大陆时常发生战乱或贼马抢劫，soah致使灾民离散，一kóa有识人士就逃往深山密林，半耕半读，享受安静清幽ê生活。Tī chiah-ê人中，有ê精通医术，采药炼丹，有tang时á落山行行，救济病苦，生活有淡薄á为惬意。后代ê小说家将in理想化，称in为「仙」或「仙人」，进一步竟将in戏剧化，描写in有仙术，ē-tàng腾云驾雾，并有hō͘人起死回生ê妙药「仙丹」。其实「仙」字就是「山」kap「人」 合并而成ê字，mā就是山地人ê意思。

台湾光复时，布农族人口有一万八千，khiā起tī玉山为中心ê四周森林地带。

六十年前，布农族干卓万支派头目乌兰(Ulan)iáu ē-tàng念出in前十代祖先ê名字。可见布农族tī台湾ê历史siōng少mā有一千年时间，当时人口稀少，平地广大，in ê祖先为什么选择高山地带定居，一定有相当ê理由。

听讲，in是因为洪水泛滥，chiah往高山逃避á定居。但是，一般族人lóng讲，tī山坡地掘土播种，m̄免弯腰过度soah致使腰酸背痛，所以欢喜khiā起山地，讲来的确mā有理。

原住民身强体强、勇猛无比，单纯、好酒，智识未开。虽然日本人bat tī各村设立教育所，可惜无正式教员，由警察兼任教导，教育khah马虎，效果不彰。

光复前，族人ê生活非常简单，全部óa靠上帝所造ê大自然免费供给。

居留ê土地是祖先传落来ê m̄免纳税。

衫裤是兽皮或女人所编织ê粗麻布，既耐穿koh m̄免常洗。

食品是家己种植ê番麦、小米、地瓜，除非久旱，土地thang充分供hō͘粮食。

肉类是上帝所饲养ê树林中ê野兽kap家畜。若猎到山鹿，m̄-nā有肉食，iáu thang高价出售鹿茸、鹿鞭。所得之款thang买乌布做裙kap其他杂品。

In无桌椅、衣柜等家具。枕头kap小椅是用木头造ê。餐具只须各人一支木刻ê汤匙，m̄免碗。食饭时，大家kho͘-á蹲tī大锅旁，每人用汤匙舀饭直接送入口。

睡床是自制ê大木板床。但因无棉被，寒天就蹲tī火堆周围取暖。

Chit种生活，样样lóng m̄免开钱，无像平地人，每工起床就beh为生活伤脑筋。In既无为职业烦恼，mā无为上班紧张，koh-khah m̄免辛苦地挤公车。生活悠哉快乐。

Tī山地无车祸，mā无空气污染，koh-khah无噪音干扰安眠。日据时代，in tio̍h用ê盐、煤油、少量粗布lóng是tī交换所以物易物交换á来ê。光复当时mā是the̍h蕃薯、鹿皮、薪木等山产来kap平地商人交换。

Tī in厝内，无金银财宝等价值贵重ê物品，自然就无chha̍t-á光顾，koh-khah无抢劫杀人ê事发生。因此原住民ê厝屋无装铁窗、铁门，外出时mā无锁门ê必要。

In无时钟或手表á，煞有众人lóng看得tio̍h ê自然大时钟－日头。「日出而作，日入á息」，时间永恒，何必án-ne小气kā一工分做二十四小时。只看日头ê位，kā时间分做日出时，日向上(上午九点)，日头siōng高上(中昼)，日向下(下晡三点)，日落山kap鸡鸣时，án-ne就够做出工作计划。

In mā无日thiap-á，只有看月娘算日子，看天气温度来做事。
In ê音乐真有特色，像大山稳固，以do、mi、so三音同时发声合唱，唱出ê kap音hō͘人沈重庄严ê感受。

日间有小鸟美妙ê歌唱，夜间有各种虫类ê旋律大合唱，加上溪水，风吹ê伴奏，已够hō͘原住民心旷神怡了。Chit种安祥并有情趣ê生活，是无闲、奢华宴乐ê城市人所bōe-sái享受tio̍h ê。 「一日无事小神仙」，何况每日、长年ē-tàng过得án-ne安宁平静，悠闲自在ê山胞koh-khah thang称做「仙人」了。

In视生活tī-chia乐园为siōng好享受，希望子孙万代久长tòa落去。但chit工人统治ê中期，为tio̍h管辖ê方便，强制将in移到靠近平地ê山脚地带来了。

搬徒以了后，因受疟病之害，病痛死失齐到，koh受平地人剥削生活穷困，加上酗酒，无知一般ê生活koh-khah悲惨了。