《胡文池牧师kap布农族》

 | | | 转寄

Ùi「 山胞 」 ê名称讲起

作者 胡文池 2009.11.08

年岁超过古稀ê老仆人，bat tī山地传教三十多年ê我，对山地同胞有深切ê关怀kap肤浅ê理解。因此我现在以基督徒ê良心，而且以平地人眼光来表示对山地人名称ê看法。

一、「山地同胞」名称ê由来
Hia-pai ê大汉民族，以中原为世界ê中心，自古以来歧视全部ê异族，泛称in为「夷狄」，to̍h是蕃ê意思mā。自十七世纪开始，汉人渐多tùi中国大陆移民到地广人稀ê台湾美丽岛来。但是tī-chia以前己有bē少ê「马来民族」tī-chia khiā起。In是tùi南洋一带飘流来ê。其中分布tī平地ê称平埔族，分布tī山地kap山麓地带ê则称高山族。当汉人达到台湾，看见真chē ê原住民时，照样叫in为「蕃á」。

日本人占领台湾五十年期间，全部ê平埔族已被多数而且优势ê汉人文化所同化，失去in家己ê语言及生活方式，分散tī台湾人中间。唯独远离平地ê高山族，因无容易同化iáu-koh保持in ê种语言及特殊ê生活。因为in勇猛不驯服，所以被日本人限制khiā起地，禁止自由来往，以特别ê「理蕃政策」管辖in，任其自生自灭。

国父孙中山先生是开明ê基督徒。伊根据圣经教示，提倡各民族平等，尊严ê民族主义。建设中华民国。主后一九四九年台湾光复了后就废止歧视山胞ê不雅名称，改称in为「山地同胞」。了后来一般人简称in为山胞或山地人。多年来in对chiah-ê名称感觉满意，无人提出异议。

二、「原住民」名称ê由来
近年来由于教育普及，真chē山地青年接受高等教育，甚至留学国外。Chiah-ê知识青年tī平地看tio̍h同族受tio̍h歧视、欺骗、剥削或者伤害á感觉不平。因此勇敢出来主张in ê祖先就是昔日台湾ê主人，应该受tio̍h尊重，享有应得ê人权。自此以来咱就常tī报纸上看见「原住民」ê文字出现。

最近山地少女有kóa被骗或者被其父母出卖tī色情场所受摧残，青年劳工被压迫，山胞祖坟被乡公所挖掘曝尸等不人道行为koh-khah激起山胞ê愤怒。因此in向政府抗议，并要求kā「山地人」chit-ê名称更改为「原住民」，以hō͘汉人记tiâu in是原来台湾ê主人，来达到提高人权ê目的。

三、siōng重要ê问题
我想，名称改kap不改并m̄是重要ê问题。因为山地kap平地只不过是地势ê高、低，是空间ê差别，只是地理上ê问题而已。原住民kap现tòa人mā不过是时间上ê前、后差别，是历史上ê问题而已。想争取人权。这是政治问题。政治是由人操作，好人办好政治，pháiⁿ人施暴政。人民有权选出好ê公务员，罢免不正ê官员。

依照圣经ê教示，人性是软弱、自私、有罪。世上「无义人，连一个mā无。」(罗马册三章10节)所以tī民主国家有政党监督政府，提出好ê政策hō͘政府去做。因此咱tio̍h选出有能力，有正义感ê议员代表咱争取人权。

上帝是圣，绝对公义，爱ê主宰。伊ê kiáⁿ儿耶稣基督降临世界上，是beh拯救罪人。施行公义，照光tī乌暗ê人心。教会是基督ê身躯。社会ê良心。因此教会不但beh报传救世福音hō͘罪人悔改去邪归正，mā时常关怀困苦、受屈ê人。光复以来长老教会tī山地各村建设教会，救济病苦，协助山胞解决真chē问题。可惜教会只像施洗约翰旷野之声而已，无政冶实权。

原住民绝多数已经信主。但是kap三十年前初代ê信徒比较，理tī in ê信仰热诚却衰退真chē。所以我boeh奉劝每一个原住民:希望lín会koh-khah热心事主，追求真理，奋发自强来享受属灵喜乐。mài贪恋物质ê享乐，运背上主ê命令，像亚当夏娃仝款被逐出乐园。tio̍h团结为一体，看守上主所赐宝贵ê山地kap儿女。土地是食不完ê母乳，外出ê青年应该tio̍h回乡开发山地来牧赶牛羊，种植果菜，或者发展工业等等，因为台湾将来ê土地是寸土寸金。Tī家己ê迦南地食土产赢过tī埃及平地受压迫。

Cha-bó͘-kiáⁿ是将来民族ê母亲。Mā是上帝所爱ê宝贝，bē-tàng贪图目chiu前之物欲将in卖出换取房屋或家庭电器用品á获罪tī天。若án-ne落去，将来谁来替lín传宗接代。这是全族人ê问题， bōe-sái hō͘个人去出卖民族ê宝贝。Lín tio̍h全族出来想办法阻止罪恶ê发生。

酒会hō͘人败坏肉体kap品性、智能，mā是山地人生存上ê毒品，应该tio̍h靠祈祷ê力量来禁绝，kā用于饮酒ê金钱kap时间来追求智识kap技能，保证lín会koh-khah进步、幸福。