《胡文池牧师kap布农族》

 | | | 转寄

伟大ê山地人－亚伯兰

作者 胡文池 2009.11.01

讲tī一九八六年玉山神学院毕业典礼
创世记十二章１－9节
今á日早起ê题目就是「伟大ê山地人亚伯兰。」亚伯兰是离开咱现在大约有两千多年时代ê人物，但是上帝特别爱伊，因为伊是一个非常有信仰并且真善良ê人。所以上帝就有了藉tio̍h伊beh来拯救全世界人ê计画，因此上帝就kā伊ê姓名tùi亚伯兰改为亚伯拉罕。亚伯兰chit-ê姓名原来ê意思是「高大」，但是亚伯拉罕chit-ê姓名ê意思就是「万民之父」;上帝beh将伊以前hit种高大、高傲ê心情除去，hō͘伊成做万民之父。不管是tùi回教、犹太教或基督教ê观点来看，每一个宗教lóng称亚伯拉罕为in ê信仰之父，伊mā是以色列人ê父。以色列民族被全世界ê人尊敬为非常富有，并且是siōng有知识ê一个民族。伊是一个非常伟大ê人。但是伊虽然chiah-ni̍h伟大，真chē ê人lóng m̄-bat伊为一位山地人，因为伊离开自已ê故乡哈兰到所khiā起ê地－山地并tī he个地方khiā起一百年之久。人家虽然自称家己为山地人，但是我相信无一个人tī山地tòa过一百年pah!但是亚伯拉罕tòa-tī山地超过一百年，所以伊比大家koh-khah山地人。

到底伊ê伟大tī叨?
第一，伊相信上帝ê话。亚伯拉罕本来tòa-tī迦勒底ê吾珥，chit-ê所在tī古代是贸易ê中心点。Tùi医学、艺术、商业来讲lóng比其他地方iáu-beh发达，所以tòa-tī chit-ê地区ê人，lóng充满了一种欢乐kap高度物质享受ê生活。但是非常可惜ê就是chit-ê地区mā就是偶像崇拜ê中心地。上帝为tio̍h beh赐hō͘亚伯拉罕重大ê使命，所以就托付了一个艰巨ê工作，伊kā亚伯拉罕讲:「你tio̍h离开你ê本地」。对tī一个人来讲，tio̍h离开本地是一件非常痛苦ê tāi-chì，咱tòa惯了ê所在就是siōng好ê所在。Ē-tàng kap家己ê亲戚众朋友tòa作伙是siōng自然siōng快乐ê事。要离开家己ê本地本乡，离开chiah-ê人tio̍h往伊所m̄-bat ê所在去，是一件非常艰苦ê tāi-chì。这是一件牺牲，mā是冒险。但是亚伯拉罕突破了chiah-ê困难，伊前往上帝所指定ê所在，这是伊伟大ê信心。M̄-koh无论伊到什么地方去，甚至进入来了迦南之地ê山区，伊绝无bē记得建立祭坛来敬拜上帝，并且mā献上伊十分之一hō͘上帝。

第二、咱来看亚伯拉罕ê爱心。咱知影伊带tio̍h伊家己ê侄儿罗得kap伊同行，罗得是已经失去了父亲ê孤儿，所以亚伯拉罕疼爱罗得kah-ná家己ê gín-á一般。In两个lóng是牧人。

为tio̍h beh争取喂羊ê草地，in ê仆人bat起争论，亚伯拉罕无因为伊是一位长者，所以认为有权利先选择好ê七地。伊反tńg hō͘家己ê侄儿罗得优先去选择好ê土地，却宁愿家己选择比较无好ê山区。但是亚伯拉罕无因此á怨恨家己ê侄儿。

咱知影有一pái敌人来攻phah平地罗得所khiā起ê所在，攻占了所多玛城并且kā罗得kap in所有ê人俘掳了。亚伯拉罕无记恨以前所发生ê hit件事情，煞带了一二百十八位属tī伊家己ê人来解救罗得。咱mā知影亚伯拉罕是一位真会善待人客ê人，所以咱看tio̍h伊bat接待过大使。当亚伯拉罕知影上帝boeh毁灭所多玛kap俄摩拉城ê时chūn，伊bat为chit-ê城祈祷六次。

第三、咱知影亚伯拉罕疼爱上帝所赐hō͘伊ê山地。当伊进入来迦南ê时chūn，tāi先入去ê所在就是示剑，其次就是伯特利，最后chiah到希伯仑。伊一面到死lóng tòa-tī希伯仑chit-ê所在。Chiah-ê地区lóng是属tī山地，m̄-nā是伊自已，连伊自已ê kiáⁿ儿、孙á mā lóng tòa-tī chit-ê地方。

为什么讲山地真好neh?有真chē人看bē起山地，但是真聪明ê诗人bat讲过chit种ê话，「上帝创造了山，魔鬼却创造了都市。」我相信chit句话是对ê。tāi先tī山地内面咱看tio̍h真chē美好ê事，但tī平地里却充满了真chē ê罪恶。咱知影圣经里面，咱所看tio̍h ê第一个都市是「巴别」，in lóng是高傲ê人民，现在tòa-tī都市ê人lóng是属tī chit种类ê人。

咱山地ê交通无啥好，所以大家lóng认为山地跟不上平地文明ê流行。In lóng认为山地人lóng无学问，但是我认为人无论到什么地方去，只要有上帝ê恩惠，伊就是好人，巴别chit-ê地方ê人有技术、有知识，所以in ē-tàng建筑真高ê塔。我相信巴别塔无论起ê多高，mā不比现在纽约ê摩天楼koh-khah高。但是如果纽约ê摩天楼boeh kap上帝所创造ê喜玛拉雅山脉比较，根本就比bē起。大自然tùi án-ne是上帝所创造ê伟大ê杰作，咱一到山地就ē-tàng看tio̍h。咱若到都市去，所看tio̍h ê椅子mā好、桌á mā好或是水泥房lóng是人所造ê。看起来mā可能真súi。但是上帝所创造ê山、野地ê花，lóng tio̍h比人所造ê物件iáu卡好。人造花虽然是非常好、非常贵， 但是比bē起hiah-ê自然ê花。Hiah-ê敬畏上帝ê人，会tùi上帝得tio̍h知识(箴言一：7)。现在ê以色列人boeh比世界其他ê人有koh-khah高ê知识，tùi亚伯拉罕崇拜耶和华上帝以来，这是上帝所赐hō͘ in ê。

其次咱看tio̍h都市是真chē人聚集ê所在，因此都市ê生存竞争非常利害，为tio̍h生活、为tio̍h生存会发生真chē无好ê事。当chhōe们看tio̍h所多玛、俄摩拉ê记事时，咱就会知影chiah-ê罪恶。我相信上帝将亚伯拉罕tùi平地移居到山地ê一个目的，就是beh hō͘伊离开平地ê罪恶，á不被平地ê罪恶所污染。所认为了宗教kap道德上ê理由，上帝hō͘亚伯拉罕tùi平地移居到山地。Tī加拉太册三：7有chit种ê一句话:「有了信ê人就亚伯拉罕ê真子孙」。所以，咱每一个人lóng ē-tàng kā伊称做亚伯拉罕ê真子孙。因此咱lóng tio̍h向chit一位伟大ê信仰前辈学习，学习伊非常热心敬拜上帝ê信仰。只有有信仰ê人才ē-tàng蒙上帝ê祝福。

今á日台湾ê原住民到底tùi什么地方来到台湾，iáu有真chē无仝ê学说。M̄-koh tī使徒行传十七章26节讲:「上帝创造人并且hō͘ in散居tī kui-ê地球上。」因此咱ē-tàng讲所有ê历史lóng tī上帝ê手中。我相信上帝是为tio̍h beh祝福真chē ê人，所以boeh hō͘各位tòa-tī山地，然后boeh藉tio̍h lín来祝福别人。Lín iáu无信基督教chìn前，lín ê祖先lóng知影上帝。Lín tī食饭前iáu是会谢饭ê，虽然lín m̄知影耶和华上帝ê名称，但是tī lín ê心内面lóng知影有一位上帝，上帝赏赐chiah-ê美好ê食物hō͘咱。

我mā看tio̍h tī山地里面tī信仰上有真chē美好ê事迹。我发现在山地内底无poa̍h-kiáu chit-ê现象是siōng大ê特色，tī道德上是一个非常优良ê所在。如果咱tī平地和平地人tòa作伙，mā可能咱mā学会晓poa̍h-kiáu、杀人等属tī都市里面ê罪恶。

当然tī山地mā有真chē ê问题，有ê人讲山地真sàn-chhiah，ē-sái讲是三十几年前我tī山地传道ê时chūn，无一个人对我讲in是sàn-chhiah ê，因为in lóng过tio̍h仝款ê生活。In tī仝款ê田地里工作，in食仝款ê小米或玉蜀黍。所以我无听过in讲，阮是sàn-chhiah ê。In bat对hiah-ê比较有财富ê人讲:「lín真富有，因为lín ê小米真chē。」

虽然现在真chē人讲山地sàn-chhiah，但是现在山地人ê生活比以前ê生活boeh好十倍。尽管咱已经比以前富有了，但是tī心理上咱煞认为家己是sàn-chhiah ê，这是因为互相比较chiah会有chit种ê心理。因为咱kap平地人比较，咱认为咱比in无钱，所以造成自卑ê心理。平地人盖了水泥房，咱就感觉山地ê茅屋无好。但是你听听hiah-ê tòa-tī台北水泥房里面ê人讲:「Ah!chit-ê水泥房无好，太烧热了！ 」因此in m̄-nā是用电扇，iáu用冷气机iáu感觉无够凉爽neh!如果咱boeh学习平地chit种ê生活，咱就需要koh-khah chē ê金钱。

但山地有真chē ê树木，所以气候真凉快。为什么咱又ài特别去盖hit种水泥房neh？这是m̄是为tio̍h咱家己ê面子á盖án-ne好ê厝?咱看tio̍h边á ê人己经盖了水泥房，á咱iáu无水泥房，所以就卖cha-bó͘-kiáⁿ来盖水泥房。因此tī山地内底咱看tio̍h有真chē美丽ê厝，但是hit-ê代价是一个koh一个美丽ê小姐流落到都市里面去。我常常感觉山地ê小姐boeh比平地ê小姐美丽多了，m̄-nā小姐，连男人也tio̍h比平地ê男人iân-tâu。Siōng大ê特点就是tī lín ê鼻á，鼻á高ê，tī日本人ê观点是非常优秀ê，伊m̄-nā是美丽，mā表示聪明。

为什么有人会认为山地tio̍h比平地落伍neh?因为山地人tùi古就一直teh lim酒，lim了以后就倒tī路边。咱从来无好好á用过咱ê头脑，若咱一直m̄用咱ê头脑，chit-ê头脑就会一直退化落去。我tī中学时代常常欢喜phah网球，因此我ê正手boeh比倒手ióng，当你使用伊ê时chūn就会生khah ióng。Lim酒hō͘山地人ê头脑成做愚笨ê头脑，为tio̍h lim酒mā用了真chē ê金钱，因此无钱koh再hō͘ in ê众细kiáⁿ教育。In一有钱就买酒来lim，一lim酒就颠颠倒倒。伊mā m̄知影字是怎样写ê，写什么款ê内容，就随便the̍h家己ê印á盖了，结果连伊家己ê gín-á、厝lóng卖出去了。因此就发生了真chē ê问题。

但是我相信，咱ē-tàng藉tio̍h信仰来解决chiah-ê问题。咱如果像亚伯拉罕仝款完全服从上帝，来遵守上帝ê命令，有chit种信心，咱ê生活就得tio̍h上帝ê祝福，mā得tio̍h改善。但如果boeh以现在ê潮流大家kā家己ê cha-bó͘-kiáⁿ卖出去ê话，山地ê男青年就chhōe bē-tio̍h家己ê太太，将来山地mā bōe koh再有子孙留tī山地，án-ne山地就会消失了。听讲现在约有八万名ê山地同胞tī都市内底，虽然chiah-ê人是为tio̍h beh thàn钱chiah到都市，但是我知影in所过ê生活lóng非常辛苦。真chē人成立一个团体到都市包工从事建筑，in做完了工，老板煞已经走了。像chit种ê情形发生真chē。

我相信上帝hō͘ lín ê山地，就是上帝赐hō͘ lín ê迦南地。Lín必须tio̍h真重视，好好á ê爱惜上帝所hō͘ lín ê山地。tio̍h知影tòa-tī台北ê人只有hiah-ê真有钱ê人才ē-tàng kā in ê厝建tī山顶。有真chē ê人无钱ē-tàng买厝，所以只ē-tàng sòe厝，每一个月付房租只为tio̍h boeh tòa-tī台北。但是lín每一个人lóng有家己ê厝，如果咱好好á发展上帝所hō͘咱ê知识， án-ne咱ē-tàng改进山地，以后有真chē ê人ē-tàng tòa-tī山地。

比如来讲，以前ê人in无知识使用肥料来务农，因chit-ê田地ê收成boeh比一般人差一半。Tī chia ê学生除了研究神学以外，mā学会晓了农业知识。如果咱ē-tàng kā tī chia所学习ê知识运用到山地，我相信必定ē-tàng提高山地内底ê生活。咱知影梨山出产真chē好ê果子，我相信tī台湾ê山地有真chē所在ē-tàng种án-ne好ê果子。我mā知影南投信义乡有真chē山地种高山菜蔬，然了后卖到台北市。有人tī山地饲养山羊，in卖山羊ê奶，来改进健康。我iáu知影台东利稻hit-ê地区种了bē少高山菜蔬。总来讲之，咱必须善用上帝所赐hō͘咱ê山地。咱mā beh为ē-tàng tòa-tī山地á感谢上帝!

愿上帝koh-khah赐福每一位毕业生，好好á学习伟大ê山地人亚伯拉罕，有信心、有爱心ê为山地ê一切献上心力!