《胡文池牧师kap布农族》

 | | | 转寄

进化论ê鼻祖

作者 胡文池 2009.10.04

英国科学家达尔文(Charles Darwin 1809-1882)bat发表进化论讲人类是tùi低等ê猿猴类进化á来，á猿猴又koh是tùi koh-khah低等ê动物进化而成¨¨。Án-ne讲落去，所有生命是tùi siōng下等ê变形虫(Ameba)进化á来，chit种学说，虽然以后受tio̍h bē少学者反对，但是当时确实bat惊动了学术界kap宗教家。

对tī tòa-tī高山一带ê布农族来讲，chit种「虫变成人」ê论讲并无希罕．因为比达尔文koh-khah早数百年、或数千年前，布农族ê远祖已经有chit种ê想法了。M̄-nā进化论，iáu有「退化论」ê奇异怪讲neh!

每一个民族lóng有in独有特殊ê传说。传说表达了in民族固有ê思想kap文化，甚至宗教。

布农族ê传说真chē，chiah-ê传说到底是谁创始，koh tī什么时代发生，谁mā m̄知影，不过来路一定真chē。因为in无家己ê文字，是由口传，tùi chit代传到下一代。因此，传说jōa-chē会跟tòe时间kap地点á产生变化。我现在boeh讲ê是五十年前所得tio̍h ê资料。

一、虫变为人ê故事
太古时代，有一种名叫「古拉特Clat」ê虫。伊是面朝地慢慢爬行ê。伊家己感觉án-ne太无方便，心想，若ē-tàng khiā起来行路有jōa好ah!ē-sái讲是如何chiah ē-tàng khiā立neh?想mā想bē出有什么好办法。

Tú好，当时有一只蚊á飞来，用力叮伊ê腹部，致使伊因痛á跳起来khiā立。Tùi chit时chūn开始，伊真欢喜ē-tàng用两脚khiā起来行路。

了后伊生二个gín-á。长子长大了，行tī沙连堡kap社寮村一带，最后来到峦大山，伊看看chit所在真好，就定居落来。这就是布农族峦支派(Takebanoad)ê始祖。(根据竹内友治大正二年调查述者为Tamadoan社ê Ulavtasikapan。

二、人变为猿ê故事
太古时代，有一阵年青人tī山畑耕作。In因腹肚饿，其中有一个人提议讲：「大家来煑蕃薯食pah!」伊就叫一个人去煮。

受托ê人在地上立起三个石头做窑，顶面放一个大锅。收集树枝起火，就开始煮地瓜。其中有一个忍不住饥饿，看tio̍h水一开，不管地瓜熟不熟，就用手the̍h一个、koh再一个食了。煮ê人看bē顺眼，大怒如火，the̍h起锄头柄boeh phah hit-ê贪食ê人。

被phah ê人抢去锄头柄，用力折断。Koh再the̍h折断ê一半，真得意假装phah家己ê脚chhng并哈哈大笑，不料chit-ê半ê锄头柄误插入肛门，伊koh痛koh惊，但是拔mā拔bē出来。而且奇怪地，锄头柄竟忽然变成尾溜。众青年行óa来，ài-beh看发生了什么tāi-chì。Chit-ê有尾ê怪人，因感觉见笑，就逃到山中变成猿了。

三、兄妹变为犬ê故事
Tī太古时代并无犬。

一个家庭，有一工全部动员到耕地工作。其中有兄妹二人对其他ê家人讲beh先tńg去煮饭，就急速走tńg去。

日头落山，大家快步tńg去厝里boeh食饭。一入门，煞看无炉上有饭thang食，甚至连兄妹两人ê人影mā看bē-tio̍h。

当in koh再推开睡房查看时，谁mā料想未到，竟然看tio̍h那兄妹两人正相揽teh做床中戏。大家愤怒如焰火，the̍h起木棍phah chit两个可恶ê男女，结果这二人突然变成二只犬了。(Takebaka支派传说)

四、女人变为老鼠ê故事
太古时chūn，有一个查某gín-á名叫打卡砂卡尔。有一工，全家人动员出去工作，只留落来一个查某gín-á tī厝做家事。日头beh落山时，大家做完了一工ê工作，同齐tńg去厝里来。

Ē-sái讲是留tī厝ê查某gín-á是一个pîn-tōaⁿ虫，tùi早起一直睡到暗时，连早顿用过ê碗盘lóng m̄洗，杂乱一堆。父母看了chit种景况，虽然心中受气，却认为这hit年青人常有ê事，mā不责骂伊，只上前摇摇伊，叫伊起床。

女gín-á起床来感觉pháiⁿ势，马上the̍h来未桩ê小米，连tio̍h外壳就放入去锅á煮了。大家行近鼎á boeh食饭，煞无人食得下。

看此情况，父母禁bē-tiâu大骂了伊一下。女孩自觉无面见人，暗暗á逃入壁孔，家己食所煮带壳ê小米，就án-ne变成老鼠了。 (达hō͘巴卡社傅讲)

五、只有福音ē-tàng hō͘「动物」变成上帝ê儿女
山地民族iáu有真chē真chē像chit种「人变为动物」或「动物变为人」ê传说。

五十年前，福音iáu未传入山地时，in lóng相信chiah-ê传说。布农ê语言中，无「人」或「人类」chit句话。一切ê动物，包括人类lóng称做「活物」(Minihomis)。Tī in看起来，动物kap人ê间，并无本质ê差异，这并无ē-tàng表示in ê脑筋幼稚。自称做文明ê中国人，mā不是án-ne mah?

原子时代ê现今，iáu有真chē人相信白蛇传ê故事，白蛇变为美丽ê女人，kap许先生结婚，甚至生kiáⁿ、做官。Iáu有梁山伯kap祝英台ê故事，in最后iáu双双对对变成ia̍h-á neh!

真chē人讲「人是感情ê动物，人kap动物ê差异只tī「感情」方面而已。」这是天大ê têng-tâⁿ。In m̄知影，动物mā仝款有感情。

饲养犬ê人lóng知影犬是有情感ê动物。有真chē故事指出犬是会知恩报本ê。人lóng叫这为「义犬」。鸽子绝对是一雄配一雌。蚂蚁行路相tú时，mā交头接耳，你讲，in无感情mah?怎样ē-tàng讲只有人才是感情ê动物?

若有人骂你「衣冠禽兽」时，你会欣然接受，á不怒发三尺mah? 不管古代原住民或现代进化论者怎样讲，咱基督徒相信tī本质上，人kap动物是完全ê无仝。圣经mā指示了chit项事。

Tī创世记一章26节，上帝讲「阮来创造人类，in tio̍h kap阮类似、kap阮相像。Hō͘ in管理鱼类、鸟类kap一切牲畜、野兽、爬虫等各种动物。」

原住民信主了后，就无koh相信古时ê传说，á相信，in是上帝宝贵ê儿女。