《胡文池牧师kap布农族》

 | | | 转寄

竞争入天国

作者 胡文池 2009.07.19

「律法kap先知到约翰为止，tùi-án-ni上帝国ê福音传开了，人人努力boeh入去。」(路加福音十六:16)犹太ê民族主义将上帝国限定于律法下ê以色列人，但是上帝爱全世界ê人，将主耶稣赐hō͘全人类，hō͘一切信伊ê人ē-tàng得tio̍h上帝ê恩典。不过chit种福气只有「虚心ê人」chiah ē-tàng得tio̍h。

一、信义乡民热心求道
一九五0年我奉救主ê命令派造二位布农族人，张旺、田光明到中部布农村落传道。In并无经过正式神学教育，只是由东部ê信徒中选拔出来ê优秀青年，为嘱托宣道师。九月六日，in携带二幅彩色新旧约圣经挂图，一张布农罗马字母，kap一点粮食，经由中央山脉羊肠小路步行三天才达到西部。In被圣灵充满，心中喜乐，所以一丝á to无感觉厌倦。

In tī信义乡东埔开始布道大会。In身上带有传道证明册，所以警察m̄敢阻挡，村长mā协助，召集大约三百名村民前来听道。根据旧约大幅挂图，in开始讲论上帝如何创造万物kap始祖亚当、夏娃ê故事。布农话内底，图画kap相片是同一句话(aningo)。这幅外国印制ê挂图，彩色非常美丽逼真，映tī in目睭内底，像看实物仝款ê真。

自黄昏时chūn开始集合，in唱布农奋兴短歌，看图、听道并学习罗马字。Tī chia所听，所看ê lóng是族人自古以来m̄-bat听过。Mā是新奇、美好、切真正知识，soah致使全村民一时lóng如被新酒迷醉。的确，in是被圣灵充满，犹如旧时门徒tī五旬节时被圣灵充满仝款ê兴奋。

In m̄知时间过得这快，听tio̍h鸡啼时chiah知影天将亮。Chit时讲道ê田光明讲：
「该歇困了，恐惊明á载lín ê工作会受影响。 」 「boài，boài，koh再教阮。明á载ê事不要紧。」村民lóng m̄愿散会，一直大声án-ne讲。
「我iáu有一工tī chia，等明á载koh再讲pah!」田光明讲。
「明á载siuⁿ久了。」有几个人大声án-ne讲。
田光明讲：「请原谅阮，阮行三工路到chia来，实在真thiám loh，hō͘阮歇困歇困，明á载koh再讲pah。」大家chiah无可奈何，依依不舍地散会了。

翌日清早，天tú亮，bē少ê人koh来了。连续两工，in lóng是án-ne热心求道。

二、爱大，赦免mā大
Tī村中有一位女人，年龄大约半百，名叫乌利。伊会讲一嘴流利ê台湾话，原因是伊少年貌美ê时chūn，时常出入平地做不正经ê事。伊听tio̍h人lóng有罪，上帝独生kiáⁿ耶稣降世为人死tī十字架，boeh除去信徒ê罪过等等道理时非常感激，家己知影罪重决心信靠救主，所以比其他村民koh-khah热心听道，并且诚恳地招待二位讲道人到伊ê厝khiā起，并奉待in如天使仝款。

三、决心烧公妈牌
Kap东埔村相离三小时路程ê望乡村，有一位开明ê村长名叫全日升(Lobis)。Tī山地虽然无报纸thang看，但是来往ê人真紧将tī东埔村发生ê新事报告chit位村长。于是伊就即时派人到东埔迎接二位传道人。

Beh暗á时村长就phah钟召集村民来听道，大约有二百gōa人tùi开会就感觉传道人所讲ê句句有理而且新奇，大有趣味，时间过得真紧，听tio̍h鸡啼时两人想beh闭会歇困，大家却无肯tńg去。不得已之情况下二人继续讲道，直到天亮。

次日，村长对传道人讲:「昨夜听lín ê讲话，chiah知影不拜上帝，á拜公妈板是m̄-tio̍h。你看，公妈ê板子tī chia，请lín为我the̍h掉。」因此张旺就为伊除掉公妈牌。Tī边á观看ê一位老人讲：「án-ne放肆，chit位先生ê腹肚一定会痛。」但是等了真久mā无发生腹肚痛ê tāi-chì，最后in就讲：「chit位先生身上，一定有真神保护chiah会平安无事。」因此tī工作三工了后就有真chē人决心信，当然村长mā是其中之一。M̄-nā án-ne，以后村长本人继续领导村民信主，聚会，最后变成一位牧师，工作到老年。

四、竞争入天国
久美村ê人听了这消息，就派人去迎接上帝ê仆人。奈因望乡村人m̄肯hō͘二位先生行，koh藏in ê行李，án-ne延宕多日。了后来in传道人所到ê所在，无m̄是án-ne。In到久美、罗娜、新乡、丰丘、新开、人伦、双龙、青云、潭南等地广传主ê福音。每夜未到天光bōe-sái歇困，而且被各地ê人欢迎尊敬，犹如天使仝款。

有一pái tī丰丘讲完福音了后，一位布农族ê警察khiā起来讲：「阮ê祖先讲，阮是由微小ê ka蚤变成ê，lín却讲是上帝所创造，是上帝ê子女，hō͘阮ê心充满自豪kap喜乐。但是lín所讲ê，究竟是家己想出来ê neh?或是根据册本历史ê记载?」hit时宣道师就the̍h出旧约圣经，hō͘伊看创世记ê记事。伊就真欢喜，笃信二位所讲ê全部信息。

是夜，in iáu注意听道理，直到天亮。散会时村长讲：「tùi-án-ni咱决定服事上帝，明á载开始建造礼拜堂。」果然in就开工，兴建了木造礼拜堂，成做中部布农族头一个教堂。

因为二十gōa天来不眠不休ê传道工作，到了新开村ê时chūn田光明终其尾病倒，遍身疼痛，头烧手热。族人走去请医生，恰巧医生无tī-teh，tio̍h四、五天才ē-tàng tńg来。In想beh请巫师来念咒，被田光明拒绝，讲：「我boeh祈祷真神上帝。」讲完就大声祈祷。祈祷了后就koh再躺下困，到黄昏时chūn，烧果然退了。暗时伊koh khiā-tī会众面前讲道，众人惊奇á讲：「真有神来帮助伊!」

由罗娜村tòe in来ê一位女信徒名叫(Ovao)看tio̍h这神迹，就走tńg去到各村报告chit项事，hō͘各地信徒ê信心愈为坚强。