《胡文池牧师kap布农族》

 | | | 转寄

Ka蚤、臭虫kap苍蝇

作者 胡文池 2009.07.05

我对布农族人传道ê三十gōa年中，感觉真深刻ê是，族人性情良善，思想单纯，好交朋友，善待人客。M̄-koh当地ê ka蚤、臭虫kap苍蝇却是非常愚笨，in m̄-nā不体谅主人善待上帝仆人ê雅意，反tńg常常不细jī地虐待我，结伙攻击我，ài我离开山地。Kám讲in是魔鬼ê使者，来阻挡上帝kap人类ê交往?

一、ka蚤
平地人惊惶夜间被蚊á侵袭，所以ài开钱买蚊香或杀虫剂来消灭伊。但是三十年前，我到高山传道时，夜间m̄-bat受tio̍h蚊á ê空袭。

台湾光复当时，政府看tio̍h原住民无蚊罩，为tio̍h爱护in，bat配hō͘蚊罩hō͘ in，但lóng被in改做衫裤，因为in认为无此需要。

当时tī山地无蚊á ê主要原因，大概是因为in煮饭无瓦斯炉，mā无古式有烟囱ê炉肚，in tī厝内地上鼎立三个石头，然了后就thang起火、煮饭，所以每餐乌烟布满全屋，其威力赢过蚊香几百倍。驱行了厝内全部ê蚊á，mā可能是这原因pah!

我tī山地工作siōng感痛苦ê，m̄是爬山jú岭，远行羊肠小径，或奔波崎岖oh行山路ê疲劳，却是hō͘人类看bē起、掠bē-tio̍h ê小虫类所攻击。因为行路ê疲劳经过一夜ê困就会恢复，小虫ê侵扰却须经过久长ê日子chiah会消失。

一九四八年二月，我就开始入山传道。

Tāi先我达到中野村传道，生平第一pái进入原住民ê厝屋，这是延平乡乡长ê厝。布农族男人ê职务主要是phah猎，家家户户lóng养有数只猎犬或土犬。Chit间mā不例外地饲养了几只土犬。

大约上午九点gōa，当我kap木下先生达到chit间时，乡长真友善地欢迎阮，kap阮欢喜开讲。犬兄弟mā会晓主人ê善意，摇摇尾溜表示欢迎。

但是无久，我就感觉到衫裤内面有小物件跳动，á hō͘我全身发痒。一工m̄知几十次lóng是án-ne痒，hō͘我无停地掠痒。木下先生讲，这是ka蚤tī作祟。原来犬毛是ka蚤ê好khiā家。Ka蚤是跳远ê大选手，ē-tàng跳到身长数百倍ê远处。

暗时，困时，ka蚤ê活动koh-khah厉害，hō͘我整夜bōe-sái好好á安眠。

翌日tńg去厝里时，ka蚤竟然偷偷á tòe我免费乘车到关山，偷渡移民到我家，无冤无仇地苦害我一家大小。

别人出外tńg去厝里时，通常是带tńg来一kóa甜点hō͘众细kiáⁿ欢喜，惟独我每pái由山地tńg去厝里，m̄-nā无点心糖果当礼物，相反地，却带tńg来一kóa讨厌ê山地土产，ka蚤kap臭虫，hō͘一家人无闲掠痒，hō͘妇人人无闲洗衫裤。

虽然án-ne，为tio̍h福音ê缘故，in食了一点皮肉之苦，mā lóng无怨言。

二、臭虫
既完成台东县延平乡六个村庄ê巡回传道了后，我就向海端乡进军。

一九四九年二月，我kap木下先生到新武、下马、雾鹿、利稻等各村社传福音。每夜lóng由派出所phah钟召集村民到学校或派出所办公厅听道。Tòa ê所在mā lóng是派出所ê警员宿舍，所以无ka蚤ê进攻。

感谢主，tī新武事先得tio̍h四家信主，雾鹿mā有一家人入信。新武ê信徒每tú-tio̍h礼拜日tio̍h行来回八小时ê路，雾鹿ê信徒tio̍h行十二小时ê路程到关山来参加礼拜，当时交通非常不便，道路koh oh行，in ê精神，实在hō͘阮感动kap敬佩。

同年六月，阮由伊上行路二小时到龙泉村传道。当地村长王忠义是一个真开明而且笃实ê人。伊真细jī地请阮食饭，晚间召集村民到in-tau听道。听众约有三十五人ê多。

是夜，讲道完了以了后，王村长请阮tòa-tī伊ê客房。这客房看起来真清气，并铺设四块日本警员回日本时赠送hō͘伊ê榻榻米。阮真感激伊ê热诚招待。

睡到半暝ê时chūn，我突然感觉全身痒得难受就醒过来。当时tī山地无电火。我家己李袋摸索出tòe身携带ê手电筒来看个究竟。我吓了一大跳，，原来有数百只ê臭虫kā我团团围tio̍h，in潜伏tī我所睡ê榻榻米上服侍时机m̄知已jōa久了!难得来了一位「贵宾，群体iau饿难忍，tùi án-ne一屑á to无细jī地向我进攻。我ê身躯成做chiah-ni̍h-chē臭虫ê食品，莫怪我感觉痒得难受。

我mā m̄甘示弱，马上由行李袋the̍h出杀虫粉将in一尽消灭，但是身上ê痒并无ē-tàng即时消失，一夜无停地掠痒。

虽然án-ne，我看tio̍h村长一家人决心信主，了后in每主日mā lóng行了真远ê路来到关山礼拜，hō͘我感觉无限ê欣慰。一夜受臭虫攻击ê痛苦已消失，换来一生难忘久长ê喜乐， ē-tàng讲是一本万利ê好seng-lí。

一年了后，chit-ê村庄已经有四十gōa人热心求道，并建立一个简单竹造ê礼拜堂。这是台东县头一座布农族礼拜堂－龙泉礼拜堂。

三、苍蝇
真早以前，tī山地，除了派出所及学校以外，真少人有厕所。In tī厝远处或tī耕地，随意方便，做一时ê厕所。

布农话「往厕所」叫做「到外面去」(konata)。致使苍蝇将大肠病菌自由带来厝内，散播tī饭菜中，hō͘真chē山胞患腹痛或肠炎。光复了后，我到各山地传道时mā不时饱tam chit种痛苦。

Tī山地，无人开饮食店，但是您bē挨饿，因为山胞lóng真慷慨，只要您kap一位in所认bat ê人同去，你就m̄免惊无饭食，而且是免费招待。我所带ê木下先生是布农族人，所以所去ê任何地力lóng是tī山胞厝内免费食饭、tòa宿。我内心实在真感谢，但是当我看tio̍h满桌ê苍蝇kap阮共餐时，我koh难免感觉不安。

Tī记忆中，我有数次，tī半暝内底忽然感觉腹部绞痛，而且有便意，就tī别人困眠中，偷偷á开门溜到外面方便。Chit时chūn，犬会乱叫，冷风刺骨，koh惊踏到毒蛇，chit种滋味实在无好受。

光复了后ê siōng早十年间。山地教会成长siōng快，由零发展到三百gōa间。但是受tio̍h正式神学教育ê山地传教者无chē，大部份ê教会只好由长执或热心ê信徒做传教ê工作。因此我kap骆先春牧师奉命到台湾山地各族中，召集圣经讲习会十gōa pái。

Tī记忆中，siōng深刻ê经验是tī大南澳附近，泰雅尔族ê讲习会，in ê聚会情形m̄-nā热心，对讲师ê招待mā真周到，hō͘阮大受感激。尤其最后ê一pái晚餐，in准备了真chē各式各样ê菜请阮食。

翌日清早，天色尚暗，阮二人就tī大雨中离开in，tio̍h行一个点钟ê路，来jiok-tio̍h六点开ê公共汽车。

半途中，我突然感觉下腹大痛，并且便意真急，不得已就tī路边，一手the̍h雨伞，khū落去方便。骆牧师mā pháiⁿ势看我，一直前进。佳哉二人lóng jiok-tio̍h六点ê巴士，前往苏澳。Tī一个钟头ê巴士上，途中虽然下腹部犹原感觉不爽快，却未发生忍不住ê事。Tī换乘苏澳开出ê火车无久，我koh一pái腹肚大痛，就急往火车内ê厕所，看tio̍h所出ê是血便，chiah知影我竟然染上阿米巴赤痢了。

Chit时，我虔诚ê感谢主!假使chit项事发生tī公共汽车内，后果就不堪设想了。因为tī当时台湾ê公共汽车iáu无厕所ê设备。

达到台北，我马上tī药店买了几粒抗生素，当时ê人叫做「美国仙丹」来食，结果真紧to̍h痊愈了。Án-ne chiah ē-tàng koh再往中部，继续开办圣经讲习会。感谢主!伊及时ê帮助。