《胡文池牧师kap布农族》

 | | | 转寄

建堂感动人ê故事

作者 胡文池 2009.06.28

兴建圣殿事奉主是每位基督徒真乐意做ê事。一间美观、宏伟ê圣殿，m̄-nā必须花费真chē ê金钱，而且tio̍h保持热烈ê信心chiah ē-tàng完成。富裕ê平地信徒感觉食力，sàn-chhiah ê山地同胞遭受tio̍h ê困难koh-khah chē，但是in愿意付出任何代价来完成每一间礼拜堂。任何布农村庄siōng宏大，美丽ê建筑物就是礼拜堂。

一、奉献金钱
一九四七年底，我开始tī东部关山，借用神应病院ê病房向布农族人传布福音。到一九五三年八月就移转到关山教会，借用平地人聚会ê地点来做礼拜。

每礼拜日lóng有三十gōa位族人由附近各地来做礼拜。Siōng远ê是由利稻村来，in tio̍h步行来回十二小时ê路途。了后来各村信徒渐渐增多，就分别tī家己ê村庄兴建礼拜堂。

靠近关山ê里壠山布农族人mā因信徒增加，决定tī家己村中兴建一座十八坪木造礼拜堂。当时ê估价tio̍h二万元新台币。常时ê族人知识未开，无人才thang当会计，所以in ê献金lóng the̍h来交付妇人人保管。

有一工，一位热心ê信徒叫丫ㄋㄙ－兀（Ansing）the̍h二千元来我家boeh奉献为建堂之用。

伊讲：「上帝知影咱boeh兴建礼拜堂，特别帮助我，hō͘我今年ê土豆收成特别好。往年，一夹土豆只有二粒仁，今年大部分lóng结三粒仁，所得土豆全部卖光，得tio̍h二千元，因此我kā这钱全部奉献为建堂之用。」

妇人人看伊the̍h出chiah-ni̍h-chē钱来奉献，感动得流下目屎来。伊所穿ê是破旧ê衫裤，伊ê太太因缺乏营养á患肺病，in却无为家己设想，为tio̍h建堂，无顾一切，奉献了全部ê收入。

二、出卖爱妻ê人
一九五六年八月十三日是里珑山教会献堂ê日子，因为天气清朗，而且教会是建设tī靠近山地ê半地交界，所以除了山胞外，iáu有真chē平地信徒mā赶来参加献堂典礼。人数大约三百人。

有了新ê礼拜堂，又koh是in出钱出力ê第一座礼拜堂，里珑山山地信徒非常欢喜，前一日就开始准备ài杀二只大猪请客，mā请一位厨师来煑大宴。

献堂典礼早起十点开始，十一点结束，充满感恩欢乐气氛，并欢喜地坐席等待宴餐开菜。To̍h是tī chit时。非常扫兴ê消息传来讲，二只大猪虽然天未光已杀了，但正beh开始调理时，警察忽然来临，将猪肉全部没收去了。

原因是án-ne：有一位山地女信徒ê丈夫是外省人，地虽然知影山地人杀猪是免税。但是，boeh宴请平地人，规定中却无被许可。伊想得tio̍h高额奖金，就到派出所密告。

里珑山信徒非常tio̍h急，莫名其妙为何警察没收in ê猪肉，最后查出原因，去缴纳六百多元ê屠宰税chiah the̍h回猪肉调理。此餐宴延迟到下晡二点半chiah开席。但是大家得悉事tùi-án-ne，出tī不得已，tī啼笑lóng非ê心情下，mā高欢喜兴地享受了一顿好菜。

三、兴建教堂受罚
南投县望乡教会ê指导者是村长全日升。伊鼓励信徒tio̍h兴建礼拜堂来敬拜上帝，大家开了真chē时间上山砍木、制材，运回建造礼拜堂。

不料chit-ê tāi-chì为警察探知，村长被带到警察分局关进囚牢里一个月chiah释放出来。In单纯ê头脑百思bē了解，兴建圣殿来传报上帝ê福音拯救罪人是好事，为什么会hō͘警察处罚?土地是in ê祖先传落来ê，树木是天顶ê父神所种植ê，in认为有权来the̍h取树木。但in m̄知影政府设有森林法，非经许可是bōe-sái随便砍伐木材ê。

光复了后因兴建教会由山顶the̍h取木材á被处罚ê事，时常发生tī山地教会。

四、无闲顾kap自家
一九五九年七月，有一工早起，我到东部太平村主持献堂典礼，平地、山地基督徒约有一百gōa人参加。中昼，大家欢喜ê坐tī信徒厝内享受餐宴。

不料，宴席开始无久就下大雨了，同时茅草厝顶mā开始漏雨，滴下污水。阮只好将餐桌移动数次来逃避滴落来ê污水，但是四界lóng仝款，最后搬到siōng安全，新盖ê教堂内chiah享受得tio̍h最后一道菜。

食饱了后，我劝勉家主讲：「lín平时tio̍h多注意家己khiā起ê房屋，若漏水，tio̍h多盖几层茅草chiah好，基督徒tio̍h勤劳工作，bē-tàng pîn-tōaⁿ。」

伊讲：「牧师，你m̄知影，chit一年来，阮三十gōa位会友，不分男女老幼，除了农忙时期，lóng同心合意，为tio̍h兴建这座礼拜堂劳力工作，哪有时间修理家己ê厝。」我听tio̍h chit句话，大受感动。

五、献力献命
布农族大部分khiā起tī高山地带，所以礼拜堂lóng是建设tī山顶，以前建堂所用ê材料全部是人工搬运，无像tī平地thang用卡车载运般方便。

以前ê木造礼拜堂经过十多年来ê风吹雨phah日晒，大部分lóng破旧成做危险ê建筑物。并且经济繁荣，hō͘大部份山地人mā跟tòe时风，改建为钢筋水泥教堂。

水泥须要工人，一人一包ê背运，一步一步，步行二、三小时chiah ē-tàng达到。砂石mā是笨重ê物件，ài tī数百尺深ê溪底用人工运起来。Tī都市里五层以上ê楼房，人lóng tio̍h用电梯顶下，tī山顶兴建礼拜堂，若m̄是圣灵ê工作，谁ē-tàng自愿、m̄惊劳苦，辛勤作此工作。

为兴建教会，m̄知有jōa-chē ê信徒献上了in宝贵ê生命来完成这神圣ê工作。

六、追念马来木宣道师
布农族马来木宣道师惜于一九六五年九月三十日蒙主召回别世，永息其劳。次日上午九点由我主理告别式了后，安葬于故乡马远村墓地，享年纪kan-taⁿ三十。若以寿命长短来衡量人生成败。则伊一生to̍h是算为失败，án-ne为神国牺牲ê年青勇士，全部是失败者mah？贪生惊死ê匹夫则是成功者？

马先生于民国五十一年由玉山神学书院毕业了后受派到偏僻ê下马教会。伊m̄惊辛苦，踊跃赴任。由此为福音日夜奔走，劳心牧养微弱羊群。当时下马礼拜堂为一小小茅屋，伊to̍h是鼓舞信徒信心kap奉献，策划新拜堂，并亲自示范，掘土整地，带领信徒由深谷运砂上山，或者由平地背负水泥，步行三小时山路tńg来到下马。由此献身ê工作，hō͘下马教会完成建设壮丽堂皇ê礼拜堂。但却因此积劳成疾，身躯开始无爽快。

民国五十三年调任到延平教会了后，伊m̄-nā不休养，肝iáu-kú工作，无惜气力，传扬真理，致使肝病恶化。虽然倒tī病床，心煞专tī教会，到礼拜日，时常忍痛tńg来到教会讲道，致使病状jú来jú bái，终于bōe-sái koh再起，灵魂荣归上天，肉体长眠安息!ah，伊是天国ê勇士!视死如归。

马先生别世消息传出了后，同工kap信徒无m̄是心酸吐大气，当此工人缺欠时际，少年ê马先生竟然归天，为布农教会一大损失，特别伊所牧养ê延平教会各信徒lóng表惋惜，哀悼。为酬谢其功劳，葬式由延平教会负责，以教会葬名仪，礼待此上帝尽忠ê仆人。

安息pah! 马先生 您太thiám loh!

「我听见tùi天顶有声音讲，你boeh写下，tùi今以后tī主内面á死ê人有福了。圣灵讲，无m̄-tio̍h，in息了家己ê劳苦，作工ê果效mā跟tòe in。」(启示录十四：13)