《胡文池牧师kap布农族》

 | | | 转寄

酒鬼变牧师

作者 胡文池 2009.06.21

刘传牧师是布农族siōng早ê传道人，第一位布农族教会ê创设者，mā是第一间礼拜堂ê建设者。虽然伊ê传道生涯只是十四年无算长，但是伊所留落来ê影响kap美好ê脚踪却hō͘真chē族人到taⁿ iáu念念无bōe记得。

刘传牧师ê祖先原来tòa-tī中央山脉ê深山内底。日本人统治台湾无久就因政治上ê需要，强迫in迁往山下。那时chūn in父亲家族总共有三十gōa个人，但一到平地来只chhun三个人。Hit时刘传只是三个月ê婴孩，而且未到一年伊ê母亲就往生，因此伊被一位瞎眼ê阿姊用番薯养大。

伊生落来身躯矮小、衰弱，就被命名「Ta li bang」意思是晚熟过时ê果子，mā因只食地瓜营养不良，常患病倒床，家人kap村民lóng轻视冷待伊。

伊无享受过父母ê慈爱、家庭ê温暖，只tī衰败ê家庭中过tio̍h贫困、悲惨、冷落ê日子，soah致使自小就鄙视家己ê运命，成长以了后对每一个人lóng起反感、怨恨。因此，自暴自弃，目中无人，mā m̄惊死，常常kap人相phah，连人人惊惶ê日本警察伊mā敢骂in。Tī伊记忆中伊三pái the̍h起蕃刀boeh杀人，koh一pái其堂兄hō͘人杀死，tī其心内激起了怨恨，报仇之火。

到了青年时期，身躯转弱为强。伊聪明、勇敢、雄辩，伊ê能力被日本人重视，á被提拔为青年团长。得tio̍h权力了后，藉故任意phah别人，以泄其对人类ê恨气。虽然án-ne，光复了后被选做第一任古风村长。但是生活目的只为酒色，每工酒醉倒地，soah致使家贫如洗，一无所有。Ē-sái讲是一位标准pháiⁿ人。

伊bat kap三位女人结过婚，非正式ê结婚有外chē次谁mā m̄知影。第一任太太因受其虐待，soah致使厌世自杀。第二任太太为伊生了一个cha-bó͘-kiáⁿ。伊tī外醉酒tńg来时，常常phah骂太太，所以伊惊惶幼儿受灾，常常看伊tńg去厝里醉酒时就带幼儿走到山顶过夜，tī树林内困。山顶蚊á多koh凶，母子所受ê痛苦thang想á知。Siōng可怜ê是，chit位母亲，因长期受tio̍h身心ê折磨了后忽然病倒，m̄知影流了jōa-chē目屎了后饮恨离开心爱ê cha-bó͘-kiáⁿ死去了。

一、酒鬼伤害cha-bó͘-kiáⁿ
有一工下晡，刘传kap酒伴饮酒，大醉了后摇摇摆摆地tńg来到自家寝室困。无jōa久以后，四岁ê cha-bó͘-kiáⁿ由外面tńg来，看tio̍h亲爱ê爸爸困，beh向伊sai-nai，大声叫tio̍h「爸爸!爸爸!」并用手摇醒伊。Chit时，正享甜眠ê chit位酪酊酒汉，一时失去理智，震怒如雷，竟然the̍h起一支木棍，对准cha-bó͘-kiáⁿ ê背部大phah几下讲：「可恶，你敢吵我。」马上koh困去。可怜ê cha-bó͘-kiáⁿ大叫一声「Aih哟」了后即时倒地。佳哉，伊ê cha-bó͘-kiáⁿ命大无死，ē-sái讲是mā倒床一年了后chiah ē-tàng起来行，但已变成ún痀。

虽然以了后经过kúi-nā pái治疗mā无复原，年岁增加mā无大汉，身高一直teh四尺以下。

二、向cha-bó͘-kiáⁿ谢罪
一九四九年，刘传信主以后对kā cha-bó͘-kiáⁿ phah成废人ê事深感痛悔。有一pái看tio̍h附近一位小姐，kap伊ê cha-bó͘-kiáⁿ「春花」仝款年纪却生做亭亭玉立boeh出嫁，一时感概万千真激动地对家己ê cha-bó͘-kiáⁿ讲：「春花，爸爸真失礼你，kā你phah成这副可怜ê款。假使我早就信主，你就不致án-ne了。」话iáu未讲完，伊因伤心，目屎chho̍p-chho̍p滴，大声啼哭无停。

一旁ê人，见此情景，无m̄是流出同情ê目屎!

三、向村民热心传道
一九四九年一月，阮为玉里附近布农族，开了一个讲习会tī玉里教会。目的为教授布农白话字kap教理。乡长赞成阮ê建议，叫各村派人来参加。刘传认为布农人应该学习布农ê字，所以亲自来参加。

对人间ê恩爱饥渴ê刘传，一听tio̍h神ê慈爱，欢喜kah bē讲得，犹如久旱tú-tio̍h甘霖，即时接受了。Bē-sái等到五日间开会完毕，到第三工ê暗时，赶tńg去古风村，传报福音hō͘村民听了。闭会了后to̍h是chhōa我到清水、古风、仑天布道。到礼拜日mā一定到富里台湾人教会参加礼拜。

伊入信以了后不断向村民见证，无久就有三十个人入信，到同年十月kap信徒盖一个木造教堂开始集会。这是布农第一个教堂。

四、四界传道
刘传，不负其名「传」，m̄-nā tī本地传，mā时常到各地传福音。有一pái到延平乡传道时被警察扣留。因为当时ê县长chit工本佛教大学出身ê佛教徒，听见有人入山传道，就下令押送伊去台东警察局拘留十工。但是伊被释放了后，日时头继续tī田园向工作ê人传福音，夜间聚集慕道友到甘蔗园内底研究圣经，讲道，伊ê热情感动了真chē人。

伊讲道真有力量，因为信主以了后伊本人彻底禁酒、禁烟、禁偷、禁淫，并且kap伊ê仇人和解，因此无koh怨恨别人。听道ê人mā lóng相信伊ê话确实ē-tàng救人。

伊益发热心传道，了后iáu召集了几个青年到高雄县，南投县两地同族中布道，鼓励各地初信ê信徒koh-khah热心事主。

伊虽然只受过日人四年蕃章传习所ê教育，但是天资高，竟ē-tàng理解日语文言文ê圣经，koh热心布道，因此我就推荐伊到玉山神学书院受造就二年，以了后参加教师训练班，tī一九五八年二月，应家己培植ê古风教会之聘为牧师。

可惜chit一位上主之忠仆，有布农族保罗之美称ê刘传tī一九六三年五月廿五日早起tī牧师馆读经中，tī八点左右因心脏麻痹á瞌然急逝，享寿kan-ta四十八岁而已。

五月廿六日礼拜日下晡二时，tī古风教会为伊举行隆重严肃ê布农区会葬，列席者有平、山地牧师、长老执事、信徒总共三百gōa人，tī偏僻山村，交通连络lóng不便中竟有chiah-ni̍h-chē人参加丧礼，thang知思念伊ê人实在bē少。

伊tī家人ê心目中为晚熟无像样ê果子，却tī神ê恩典下，成做布农族初熟美好ê果子，为人所喜乐，神所重用ê仆人。