《胡文池牧师kap布农族》

 | | | 转寄

王家动人ê故事

作者 胡文池 2009.06.14

这「王家」并m̄是指深居王宫，过tio̍h富贵奢侈生活ê王室，却是指khiā起tī偏僻山地ê王姓兄弟。但是in tī sàn-chhiah中所显出ê虔诚、恩爱ê亲情，比皇族koh-khah高贵，koh-khah hō͘人敬佩。 王清好虽然是山地青年，伊ê情义不输任何人。伊听道了后，为tio̍h感谢上帝ê恩爱，就向本村ê人传扬福音，建设教会。 伊对双亲ê慈爱念念不忘。十四岁前，父母相继亡故，伊负起了养育弟妹ê重任。二弟王上春长大了后成做国小教员，为报答兄哥之大爱，牺牲家己ê青春，金钱kap健康，培育兄哥ê儿女。传为族人o-ló ê美谈。

一、初次入山传道
我到关山，siōng早tī神应病院内每周ê聚会讲道外，自一九四八年二月起，我就带木下先生入山传播福音，tī人地两疏，加上语言无通ê山地，耍开拓传道，谈何容易!感谢主，bat当过警员ê木下确实帮助我真chē，伊m̄-nā thang为我翻译，也thang为我带路。难能可贵ê，因伊bat做警员，m̄-nā无受各地派出所ê为难，相反地，为各地原住民所尊敬，所以所到ê所在，无无顺利。

Siōng早阮到延平乡中野村。第一夜，中野派出所ê警员真细jī地接待阮，并敲钟召集民众来派出所办公室听道。Tī二十gōa名听众中，有一位青年真认真专心ê听讲。伊就是王清好，年约二十，身材矮小结实，目光焕发，有真聪明ê容貌。

第二工阮转移阵地，到靠近村社ê乡长家聚会，暗时有三十gōa名前来听道。王清好mā来参加。

听众虽然欢喜听讲道、唱短歌，koh-khah欢喜看彩色ê圣经挂图。Tī布农语内底，图画kap相片是同一句话(Haningo)，因为tī in单纯ê眼光中，两者lóng是真实事物ê写照。

虽然in真有兴趣ê来聚会，但对信仰ê决志却保持距离，采取观望态度。惟独王清好表示决心信主，因伊父母双亡，家境穷困，忽然发现了慈爱ê上帝á心怀宽慰。了后，每主日，伊独自到鹿野参加阿美族ê礼拜。后来伊禁不住内心ê喜乐，热心向村民传道，建设礼拜堂，成做延平乡第一位传道人。

二、手足情深
当双亲相继往生时，王清好ê年龄chiah十四岁。Tī悲伤、孤单、穷困ê原住民家庭，面对tio̍h父母留落来ê五岁小妹(上妹)，二岁ê大弟，(上春)，以及tú tú出生二个月ê二弟(上弟)，生活实在是一个大问题。

Tī-chia危机中，亲友纷纷表示同情，要求收养三个幼小弟妹，但是年轻ê清好无愿意koh再尝到亲情ê分离，谢绝了人家ê同情，并讲：「自家ê事thang自理」。In一间四人以了后ê悲惨生活thang想á知。

十四岁就beh代理父职负起生活上ê重担耕种劳动外，iáu-beh兼任母职，照料幼小ê三弟妹，尤其iáu tī襁褓中ê二弟，其身心ê辛苦实在oh得用语言来表达。

经过漫长穷困kap难熬ê岁月，tī王清好ê毅力kap耐心，爱心kap亲情之下，皇天不负苦心人，in终其尾突破一切艰难，弟妹lóng长大了。大妹已出嫁。上春由师专毕业了后任教员，上弟mā成家立业了。因此王清好一间ê奋斗事迹传扬tī全布农族之间。

三。弟报兄恩感动天
大弟王上春自细汉就是一个优秀乖巧ê gín-á。自任国小教员以了后就想beh回报大兄养育之大恩。因为伊二岁就失去双亲，对双亲ê恩情一点lóng m̄知，反tńg对大兄ê慈爱、辛苦铭刻tī幼小ê心灵。所以当大兄为传道献身心，生活十分清苦ê时，伊就kā大兄ê三个gín-á，接tio̍h身边做家己ê gín-á来养育。

国小教员ê工作mā不轻松，伊又koh是一位负责ê老师，日时头教册，暗时准备教材kap批改学生作业簿。伊mā是一个美术家，有空就练习绘画，伊ê作品bat入选tī全国美术展。加上尽心照顾教导大兄ê gín-á，soah致使疲劳过度á病倒，tòa入去了病院三个月。

想tio̍h gín-á ê生活，心烦意乱，伊待未到痊愈，竟抱病回校教册。勉强教了半年，病情恶化koh tòa院了。无tòa一个月，医生宣布救治乏术，命令退院。Tī病院昏迷多日，大兄chiah赶到病院领tńg去厝里。

「人ê绝望就是神ê开始」

大兄王清好为小弟ê病迫切祈求全能ê主医治。中野教会众信徒mā同心为tio̍h这事代祷哀求主。王清好听讲彪马族中有一位信徒有祈祷、医病ê恩赐，就专程敦请伊来为小弟祈祷。

山胞心灵单纯，相信上帝ê话讲：「坦然无惊惶ê来到施恩ê宝座前，为tio̍h beh得怜恤，蒙恩惠作随时ê帮助。」(希伯来书四：16)

过了几工，病况果然好转，经过休养，虽然iáu未根治，无久就ē-tàng回校教册，照顾gín-á。

王老师所患ê是惊人难治ê腰子病，因生活上、物质上ê需要，kap扶养大兄三个gín-á，不得不抱病koh再教册，所以病况时好时坏，án-ne继续十年之久，伊求治全省十一间大病院，最后到荣民总病院chiah得tio̍h痊愈根治。

此间我数次tī路上遇tio̍h伊，伊ê面色，包括全身皮肤lóng是像非洲人ê乌色，身躯mā衰弱不堪。王老师讲：「据我所知，凡是患过像我chit种腰子病ê人lóng 无 tī了。尤其家境困难ê病患，往往维持不了二、三年就结束loh生命。」我mā为伊真担心，只祈望有神迹tī伊身上出现。

不料，三年前，我koh一pái tī关山看tio̍h伊时，伊ê面色kap行动已经kap以前大无相仝，变成健康神采奕奕ê青年了。伊真欢喜地对我讲：「感谢上帝tùi病魔中kā我救出来。以前凡是我tòa过ê病院，医生看我ê病情无m̄是摇头。现在，有kóa医生iáu m̄相信患过绝症ê我iáu teh人间neh!，人人听了，lóng讲这是一件奇迹。」

王上春老师m̄-nā战胜了病魔，koh-khah欢喜ê是伊ē-tàng完成了报答大兄恩情ê愿望。

现在大兄ê三个儿女lóng有所成就，侄女已嫁师大毕业ê优秀青年，长侄子已成家立业，次侄子mā进入了大学ê窄门。 自从进入小学教册就开始培育三个侄子，koh疾病缠身，精神财力一扫á空，因此王老师ê终身大事一直拖到旧年，伊四十七岁时chiah结婚成家。

伊讲:「我虽然牺牲了宝贵ê青春，但ná准球赛中ê队员，为hō͘人进分，不得不做牺牲phah mā为tio̍h这á感欣慰。我boeh对认bat我ê人讲:「这完全是上帝所做ê奇迹」。