《胡文池牧师kap布农族》

 | | | 转寄

免费ê中昼顿

作者 胡文池 2009.06.07

日据时代，东部地区ê正牌医生无chē，tī庄脚koh-khah是罕见。像台东县关山镇这偏僻ê小地方，具有开刀房、检验室kap二十gōa床病室ê chit种大规模私人病院是绝无仅有。所以直到光复当时，关山chit间「神应病院」，黄应添医生ê鼎鼎大名，thang讲tī东部是无人m̄知、无人不晓ê。

黄医生是基督徒。台湾光复，我初到关山，向布农族开拓传道事工时，伊协助我siōng chē。伊tī病院内腾出一个病房为礼拜堂。伊m̄-nā ē-tàng讲道，甚至对来礼拜ê原住民免费供应中昼顿，对主日学众细kiáⁿ赠送糖果、饼干。当时ê原住民食量惊人，有ê人一餐竟食下七、八碗，信m̄信由你!黄医生对所有ê传道人kap家属，mā lóng免费为in诊断治疗。

一、病房变成教堂
当我达到关山了后，听讲黄应添先生是基督徒时，tī一个下晡，我到病院宿舍访问伊。伊身材高大肥胖，腹肚特别突出，谈话真幽默。

伊对我真细jī，表示欢迎我到关山传道。谈话中，我请教伊是m̄是thang协助我向山胞传道。伊随时真慷慨地提出几件thang帮助我ê事项，来救治山胞灵性病症ê处方，伊讲：

第一，我ê护士中有布农族小姐，伊thang教你布农话。早起病人比较多，下晡伊有闲暇，你ē-tàng随时来。

第二，每工有真chē布农族病人来求诊，我会对in讲，若tī礼拜日早起十点半以前来求诊，thang优待减半医药费。十点半参加礼拜ê人，我会免费请in食中昼顿。

第三，我thang开放一个病房当做礼拜堂，并且叫木工做十条长椅kap一个讲台。

第四，早起九点钟thang召集布农族儿童开主日学。来参加ê gín-á每人thang得tio̍h糖果。

除了以上这几项，你想iáu需要什么?我lóng愿意帮助你。」 我听了深受感动，一再地致谢讲：「多谢你，我想án-ne已经有够。」

「耶和华以勒」(创世记廿二：14)

上帝已经为我大开传道之门，若无如何在人生地不熟ê所在开始传道neh?

长椅、讲台完工了后，医生果然开放一间大约十坪大ê病房为礼拜堂。我就开始tī-chia病院内礼拜堂传讲主ê福音了。

第一个主日，上午九点正，果然来了十gōa个gín-á tī病院教堂内thèng候上主日学。牧师娘tī乌板上写一首「来信耶稣」ê短歌，开始教in唱。我用大幅挂图讲出创世记ê故事。

教堂内mā有一台小型风琴thang奏，虽然外观是病室，里面ê设备件件齐全，不愧为教堂。

主日学结束时，众细kiáⁿ个个得tio̍h糖果，欢喜ê tńg去了。

二、医生趣味ê讲道
十点半，医生带了一阵布农族人进入教堂，大约有二十五、六位，个个身躯、衫裤lah-sap不堪，赤脚不穿鞋。但是初次就有chiah-ni̍h-chē人肯来听福音，阮感觉非常欢喜。

教导in唱o-ló诗、祈祷了后，我tī乌板上挂了一幅上帝创造万物图画，我用日本话说明上帝如何爱护人类，创造万物ê故事，布农护士小姐用布农话翻译hō͘ in听。

我讲完了以了后，就礼貌地请医生讲几句话，伊随时khiā起来，不料却讲了一大篇。因伊所讲ê，句句lóng真幽默，hō͘族人听了哈哈大笑。

伊读箴言第一章7节，以「敬畏耶和华是知识ê开端」为题，讲起以下ê故事。

三、枝á冰新出卖时ê故事
黄医生讲：「上帝ē-tàng hō͘软软ê水变成硬硬ê冰块。因为上帝赐智慧hō͘信仰伊ê外国人，hō͘ in发明机器，制造冰块。

Lín m̄信上帝，有ê人甚至m̄知影枝á冰是什么物件。

有一pái，一位由深山出来ê布农族人到街市上游览。伊看见真chē人食枝á冰，就买一支来食。

「嗯!果然好食!」伊就想起厝里ê人iáu未食过chit种新食品，做一困买了十支boeh带tńg来厝，hō͘家人大大享受文明ê成果。冰店就将伊所买ê枝á冰用纸包好交hō͘伊，khǹg tī网袋内底。

伊真欢喜，加速脚步，行了三个钟头tńg到厝了。马上解开网袋ài-the̍h出永棒，突然大惊一tiô，竟然看bē-tio̍h枝á冰，只是一包旧报纸。

『奇怪!为什么无枝á冰?准是平地人骗我，不将枝á冰包入去。好!我明á载koh再落山，chhōe in算帐。』

Hit工暗时，伊因愤怒koh失望，整夜困bē去。翌日，天未明亮，伊就koh再落山，到昨hng卖冰ê小店理论。经冰店说明兵会溶化ê原理，chiah知影是由家己ê无知á致，感觉理亏，失意地tńg去厝里了。」

礼拜完毕，已经中昼了。医生娘叫煮饭ê人，the̍h来二大铝桶ê咸稀饭，hō͘ in自由the̍h来食。因内面配料中有二斤猪肉，koh煮得香kòng-kòng，竟有人食下七、八碗。

四、为什么灯泡不亮
第二个主日，来参加礼拜ê人数增多了十几个。我讲完了道，chiah-koh请医生讲几句，伊真自然tek koh再到讲台顶，kap上礼拜仝款，读箴言一章7节「敬畏耶和华是智识ê开端」。

伊讲：「以前关山无电火设施，无久chìn前tú有火力发电。每晚六点chiah开始送电。

有一pái一位原住民来关山，预定坐夜车到玉里。Beh暗á时，头一pái看tio̍h电火亮，感觉真稀奇。伊问电气行讲：「这灯甘ài用番á火点?」

「免，每晚六点自然会亮。」

伊想，若买一个tńg去厝里使用，那该有jōa好!m̄-nā方便，光亮，koh m̄惊风吹。

翌日，伊beh tńg去家时，到电气行，指灯泡，用生硬不熟ê日语讲：「将chit-ê灯kap顶面ê线全部卖hō͘我。」

电气行知影伊ê意思，照伊所讲ê，将电火泡、灯头、电线lóng装好，卖hō͘伊了。

伊真欢喜地tńg去厝里，kā电线吊tī屋梁上，对家人讲：「我今á日买来一件真奇怪ê物件，tùi-án-ni了后，到beh暗á，chit-ê圆圆ê物件自然会亮，m̄免番á火，m̄免煤油，lín讲奇无奇怪!只要等到日头落山，天乌时，伊就会亮了。」

这消息传开了，一家人kap厝边，一大群半信半疑ê人围tī灯泡下，ài-beh看看这自然会亮ê物件。时间一分一分地过去，天乌了，月娘升起来了…….。一直等到半暝，灯泡mā无亮。大家骂伊骗人，就不欢á散。

翌日，伊不等到天亮，就the̍h灯泡连线，前往关山，kap电器行头家理论，骂伊是坏ê卖hō͘伊。

电气行说明一大堆电气ê道理hō͘伊听，伊mā听m̄-bat，mā m̄相信。只好请伊等到beh暗á，电送来时，hō͘伊用指头摸电气，chiah知影什么是电气。」

五、一支水龙头ê故事
第三个礼拜日，聚会ê人数koh增加了。照常，妇人人教唱圣歌，我读圣经讲道，了后，koh请黄医生讲道。伊不犹豫ê khiā起来，kap前礼拜仝款ê读箴言第一章7节「敬畏耶和华是知识ê开端。」

伊讲；「真久以前，有一位原住民叫阿参到关山来买物件。Tī路边看tio̍h一支公共自来水，真chē人排队the̍h水桶tī hit-pêng取水。伊想：『平地人真聪明，ē-tàng制造chit种方便ê机器供水，我若买一个tńg去厝里，以后太太就免 hiah-ni̍h辛苦，落到深远ê溪底phah水lah。』

伊用手指水龙头问in讲：「chit-ê物件boeh tī 叨 thang买tio̍h?」in回答讲：「tī街上卖菜刀、铝桶ê店就thang买tio̍h。你就kā-in讲boeh买水桶就ē-tàng了。」

伊果然chhōe-tio̍h了五金行，买了一个水龙头kap一条铁管，就高欢喜兴地半行半走地tńg去厝里。到了家，伊就tī猪舍角柱挖一个洞，kā铁管插入，kā水龙头装上，认为án-ne水就会自然流出来。

工作完了，伊到厝边乡亲四界宣传伊tī关山买tio̍h自来水头ê新闻，并叫in带水桶来装水。

随时，聚集了真chē水桶kap好奇ê人，大家用奇异ê目睭看这奇怪ê新产品。伊大声讲：「大家注意，现在水beh来了!」伊将水龙头tńg来转去，奇怪，水为什么不流出来?

大家真受气地对阿参讲：「你为什么boeh骗阮!」阿参急得kui身躯汗chho̍p-chho̍p流，辩白讲：「我tī关山的确亲目chiu金金看见这水龙头流出水来，大概商人无良心，kā无好ê卖hō͘我，我明á载一定换一个好ê tńg来。」

伊翌日koh再行三个小时ê路程，tńg来到关山，chhōe-tio̍h五金店，大骂主人一顿。经主人查问详情，并说明水龙头必须接tī有水源ê铁管chiah会有水流出来。阿参听了chiah晓悟因为家己ê无知chiah闹了án-ne一个笑话。

佳哉，店主同情伊ê无知，kā水龙头kap铁管the̍h回，将价款退iáu伊。」

黄医生讲:「进步神速ê现时代，知识爆炸，咱应该多多吸收知识，充实家己，chiah bē做出类似chit种不智ê举动。」

六、传道白得二甲良田
Tī神应病院传道二、三礼拜了后，我发现来听道ê布农族人，有几位少年人，in听bat华语，但大部份lóng是中年以上ê人，in会讲几句简单ê日本话外，华语煞全然不bat。所以唱日语或华语圣歌，lóng 无可能表达in对上帝ê感情kap心意。因此我就请布农护士小姐为阮翻译浅易ê圣歌为布农语。第一手被翻译ê歌是台语圣诗第63首真主上帝造天地」。

「真主上帝造天地，ē光ē暗无人ē，
冥转为日日转冥，生成万物功劳圆。」
Chit首诗歌适合初信主ê人，歌曲是平埔调，优美动人，接近原住民口味。护士小姐翻译 为：
「Manantuk, kai-oni mas dihanin,
Hanian, uka duma mahtu ka-uni」

Tùi-án-ni，我就开始用这布农歌词教in唱，因为是家己ê语言，in马上就会唱了，并且大声、热情ê唱出来，唱得真起劲。

礼拜日我tī病院主持礼拜外，无久mā开始入山布道。无论tī何处布道，我lóng是用chit首唯一ê布农圣歌教导in o-ló上帝。

二个月了后，我ê布农话进步了，我突然发现chit首歌被翻译得有问题。因为布农族ê宗教只是属tī原始民族ê精灵教，只相信世上无数ê恶灵，in从来无拜过神，所以mā无「神」chit位词。In叫平地人所拜ê偶像为「Akia」。Án-ne护士小姐所翻译「Manantuk Akia」ê意思mā就是「偶像是真正」。

真是糟糕!我违反了摩西十诫ê第一条诫命。上帝讲：「除了我以外，你bē-tàng有别ê神。」á我所教ê歌 ，m̄-nā无将原来o-ló上帝ê歌意表达出来，反tńg ài in高唱「偶像是真正」。

我发现这天大ê têng-tâⁿ以后，马上就将「偶像」chit句话换掉。采用日本话ê「Kamisama 」(神)来代替。

Chit件事了后，我koh一pái chhōe黄医生商讨，看看有无koh-khah聪明、智识高ê人thang做翻译。伊想来想beh去，最后想tio̍h一个人，就是当警员ê「木下」先生。

四十年前，布农族人ē-tàng当警员ê无chē。木下先生是当地siōng优秀、学识siōng高ê布农族人，不时为日本人做翻译ê工作。医生就马上请「木下」先生礼拜日来做翻译。果然名不虚传，伊ê翻译大受会众ê欢迎。

黄医生进一步向我建议，讲：「咱ē-tàng请木下先生辞去警察ê职业，专门做传道ê工，带你入山，为你翻译。」

「但是警察ê薪俸多，咱负担不起ah!」我讲。

「无关系!我有办法。我thang补偿伊，赠送水田二甲hō͘伊，án-ne，伊大概会满足，会答应chiah是」黄医生chiah-ni̍h慷慨地表示了伊ê意见。

阮kap木下先商量结果，果然伊答应了。

无久，木下先生辞去了警员ê职位，全时间帮助我做传道事工。

黄医师一生慷慨事主，虽然伊已回天家，但对原住民ê贡献，煞永远留存。伊ê长子就是黄得福牧师，tùi台南神学院毕业，现在美国牧会。