《胡文池牧师kap布农族》

 | | | 转寄

魔鬼三pái试探我

作者 胡文池 2009.05.10

主耶稣tī旷野四十昼夜，iau饿时bat三pái被魔鬼试探。魔鬼无一定会以丑怪惊人ê面孔出现来试探人，反tńg常常通过亲爱ê人，以面包、地位、权力来引诱你离开上帝或上帝所支托ê使命。

微小ê我，也bat tī生涯中tú-tio̍h三pái重大ê诱惑。第一pái是beh进人神学院时，第二pái是tú tú踏入传道生涯时，第三pái是beh登上高山传道时。

一九三一年三月中旬，tú放落五年沉重ê中学课业，身心随轻松落来，并享受tī温和春暖ê气息中，当时ê我感觉非常舒畅愉快。

中学毕业典礼次日，我马上到神学院办理入学手续。当时志愿读神学ê人无chē，所以m̄免入学考试，m̄免缴报名费，mā m̄免缴学费kap宿舍费。颠倒转，每月iáu thang领tio̍h八元ê伙食补助金。虽然án-ne优待，报名ê人并无chē，阮hit届只有三个人报名，全部入选。

一、第一pái试探
神学院入学时间是tī四月，利用这二礼拜闲闲，我就tńg到厝乡新庄，探访家人。当时大兄tī役场(镇公所)当会计，在地方上thang算是有地位ê人物。伊对我讲：「你已中学毕业，thang入来街役场做事，我已经为你ê工作安排好了。Tī这役场中，中学毕业生无几个，所以你ê前途必然光明无量。」

伊这一下好意kap所讲ê话mā有道理，但是我已经m̄是自由ê人。五年前，tī前途乌暗时，向上帝所做ê祈祷，tī马偕校长面前所讲出ê诺言，哪ē-tàng未记tit。我bōe-sái违背良心，koh-khah bōe-sái为tio̍h面包出卖灵魂hō͘魔鬼ah!

我将实情完全讲出来hō͘伊听，要求伊原谅时，伊真受气地讲：「你已长大成人，kám讲永远beh将扶养父母ê责任khǹg tī我身上mah?」

我像哑巴食黄莲，有口难言，只有流目屎满面，甘苦tī心中。
Tú亲像主耶稣所讲：「人ê仇敌，就是家己厝里ê人。」(马太福音十：36)

佳哉，父亲是信主ê人，伊m̄-nā鼓励我boeh进入神学院为主作工，iáu讲：「人是bōe-sái忘恩背义ê」并叫我母亲慢慢á讲服大兄，hō͘我顺利通过难关。

神学院第一年ê暑假，我被派到树林教会实习传道工作，父亲hiông-hiông因为中风病倒tī眠床。我时常tńg去厝里探视，伊无愿意我多tòa几工陪伴伊，反tńg敦促我紧回工地，多作主ê工。上主恩待伊，不hō͘伊久长被病魔折腾，无久就召伊tńg来到天家安息。

二、第二pái试探
神学院毕业，我被派往苑里教会，传道无久，小妹文里就结婚了。新郎tī台北有名ê大布商松本商行做事。老板松本先生真器重伊，所以结婚hit工，陪tio̍h新郎来我家娶亲。我以主人身份接待伊，kap伊聊了真久。

松本先生不失大商行老板ê资格，风度斯文有礼，谈话mā文雅不凡。伊问我什么学校毕业，什么职业，以了后就讲：「你kám-ē-tàng来我ê商行做事?我正需要一位像你án-ne，受过高等教育、bat英文ê人。」

伊chit句话，如tân雷公一般，震撼我ê心，hō͘我惊喜万分，将家己迷失tī大商人ê梦想中。但是chit种欲念，真紧hō͘我ê良知phah消，koh清醒过来。

「to̍h bē-sái得，我m̄是自由ê人。我是主ê仆人。」

想起以前，主耶稣mā被魔鬼带上了一座siōng高ê山，魔鬼以世上ê万国kap万国ê荣华富贵来引诱伊，to̍h是hō͘伊拒绝了。(马太福音四：8－10)

我m̄敢违背上帝ê旨意，只好多谢松本先生ê好意，谢绝了伊boeh hō͘我ê高薪重要职务。

我ê妹婿林进来，虽然只是小学毕业，因多年忠实服务tī松本商行。台湾光复了后，日本人归国，伊继承主人ê事业，成做大贸易商，家财上亿。讲到详细数目，我就m̄知了。

三、第三pái试探
第二pái世界大战了后，台湾ê经济陷入空前ê困境。青年人大部份从军去，欠缺工人之下soah致使减产。战了后tńg去厝里时无闲整修家屋、重整事业，soah致使货币贬值。教会mā全部遭遇tio̍h经济困难影响，传教者ê生活陷入困顿ê中间。

战争时期，食品lóng以低价配kip，我tùi教会领tio̍h ê三百元薪金，加上会友额外ê赠送，生活iáu ē-tàng维持。但是战后，物价自由飞涨，人人自身难保，我mā差不多无法度渡过难关。

真tú好当时ê大甲家政女学校kap农业学校ê英语教师缺员，我to̍h受聘到两校兼任教员，the̍h所得ê薪俸来补贴家用。每工早起到学校教课，虽然增加了一点精神上ê负担，但教会ê任何事工，lóng m̄敢疏忽，bē致使kah停顿落来。感谢主为我安排了教会和家庭lóng ē-tàng兼顾ê工作。

无久以了后，学校因学生人数增加，而且学校本身制度mā将改为初级中学。依照政府规定，英文课数tio̍h增加。所以学校当局ài我辞去教会工作，成做hit间学校ê英文专任教员。并且将分配一幢日式宿舍hō͘我，hō͘我khiā起to̍h bē ū问题。

Chit项交涉对我来讲，真是天大ê问题。我既然受上帝选召，成做天国兵丁，岂thang半途逃行，成做逃兵?但是生活mā是现实ê问题。何况一家七口，每日食量mā bē少，这切实ê问题，教会并无hō͘我保障，该怎样办?

阮夫妻遭受tio̍h m̄-bat有过ê困扰，日夜烦心，m̄知该作何决定，只好无停ê祈祷，恳求上主指示。

「mài忧虑讲：『咱boeh食什么?lim什么?穿什么?』lín ê天父原知影lín需要这一切，lín tio̍h先求伊ê国kap伊ê义，这一切lóng必加hō͘ lín。」(马太福音六：31－33)

经过数天kap恶魔ê战争了后，我决心顺服上天ê旨意，继续为主工作。

战了后无久，外国母会ê援助koh一pái来到台湾，教会当局要求全部牧师lóng tio̍h辞去兼职事务，我mā就顺服命令，完全离开教育职务。专心致力tī传道事工。