《胡文池牧师kap布农族》

 | | | 转寄

天火大烧日本神

作者 胡文池 2009.05.03

第二pái世界大战末期，日本政府tī台北圆山兴建规模宏大ê大神宫，并恭请天照天神(to̍h是日头神)来坐镇助战。谁mā料想未到，当神宫开张大吉前一日，忽然天降大火，烧毁大神kap宫殿，无久日本就战败了。

Chit件事虽然是过时ê新闻，但却是各时代基督徒所乐道ê大故事。日本人自一八九五年入侵台湾以来，虽然m̄敢禁止台湾人ê宗教信仰，煞限制十五万山地同胞ê宗教自由，除了信仰日本神道之外，不准in信仰其他任何ê宗教，特别是基督教。

主耶稣最后ê命令讲：「lín tio̍h往世界各地去，hō͘所有ê人lóng做我ê门徒，奉父、子、圣灵ê名hō͘ in施洗，并且教导in遵守我所hō͘ lín ê一切命令。」(马太福音二十八：19－２０)chit句话内底ê「所有ê人」当然包括了chiah-ê山地民族。

台湾初代宣教师对chit-ê tāi-chì mā有负担，但bē-tàng其门á入。到一九一二年十月，tī彰化召开ê首届台湾基督长老教会大会bat热切提议，负起山地传道责任，日本政府认为新宗教将妨害山胞ê原始信仰á严禁。当时有一位日人基督徒井上伊之助愿实践「爱ê宗教」来感化杀死in父亲ê山胞，但是mā无被许可。几年了后有一位加拿大圣公会宣教师叶资牧师(Rev.N.Ya-tes)bat独自在台东卑南暗暗ê向彪马族(Pyuma)传道数年，但其效果并无彰显。

Tī第二pái世界大战时，日本人极力推行「皇民化运动」，鼓励台湾人讲日本话，推行「华语家庭」(to̍h是日语家庭)并将中国姓名改为日本名。最后命令台湾每一个家庭设置日本小神社(kamitana)，买日本神、天照大神ê神主牌来做敬拜。自此对教会ê压迫koh-khah厉害，命令每主日礼拜时，敬拜上帝chìn前tio̍h先向东方「遥拜皇太神宫」to̍h是敬拜天照大神为siōng重要。这天照大神就是日头ê神格化，亦就是崇拜日头。

战争中，日本有南进计划，以建设「大东亚共荣圈」ê美名来侵占东南亚一带，为tio̍h beh借重日本神ê力量，因此tī台北圆山，bat花费数年时间，全部采用高级ê香桧木来建造规模庞大ê「天照大神」大神宫，并恭请日皇ê大祖神来援助其侵略大业成功。
大神宫完工了后，就择定吉日良辰举行落成大典。典礼两工前，bat派一位大官员坐专机由日本天照大神ê祖家皇太神宫，恭迎大神分身来台坐镇。大神tī台北过了安静ê一夜，次日就beh迎接to̍h是 热闹koh光荣ê大日子了。

不料，当日中昼，有一架日本飞机，专程满载由中国大陆等各地抢来ê金银财宝飞来台北。讲来真奇怪，台湾这幅广大ê土地，各所在lóng boài，偏偏选中teh-beh开幕ê大神宫，这架飞机突然tī神宫上空大爆炸，对准神宫坠落，m̄惊犯了不敬之罪，立时引来大火kā天照大神kap宏伟ê神宅烧得寸草不留。这甘m̄是上帝ê安排mah?

Chit件大新闻，tī当时ê报纸煞无刊出，讲实在， bōe-sái mā m̄敢刊登出来，因为chit-ê不吉利ê消息，会影响人民ê心情，打击战场上士兵ê士气。

但是当日亲眼看tio̍h大火烧毁神宫ê日本人，个个lóng摇头叹气，内心有数，但m̄敢言出。反之，有智识ê台湾人无m̄是暗中交头接耳，议论纷纷，猜测日军之末日已到，感觉无限安慰。

古时，上帝kám m̄是是tùi天顶降下大火烧毁所多马kap俄摩拉mah?(创世记十九：24 )

「án-ne，lín就kā第五十年分别出来，向全体居民宣布chit一年为自由年，为五十年节。Tī chit一年，所有卖去ê产业tio̍h还hō͘原主或原主ê后代，以前被贩卖为奴ê得tio̍h释放，tńg来到家己ê厝。」(利未记二十五：10 )

无m̄-tio̍h，神ê话必然应验，日本管辖台湾整整五十年了，台湾tio̍h归回祖国，原住民tio̍h归到上帝国。

果然，chit件事发生以了后无久，日本战败，台湾光复，岛民得tio̍h自由。

宗教自由chiah有山地传教，所谓二十世纪ê神迹chiah迅速发展。

听讲，大火ê次日，日本政府bat动员tī台北ê女中学生到全乌ê灰尘中，boeh捡回金银财宝，到尾所得tio̍h是jōa-chē就m̄知了