《胡文池牧师kap布农族》

 | | | 转寄

日皇kap基督争光

作者 胡文池 2009.04.26

昔时，日本皇家ê御用学者，bat创写一本神话「古事记」，描写太古时代，皇帝ê祖神创造日本国土。当然伊ê后裔，代代皇帝mā是神，称做「现人神」(Alahitokami)，万世一系thang继承帝位，永远无变。所以日本政治是政教一体，以「神道」ê宗教力量来坚固政体。人民有宗教情操，因此以「为皇帝牺牲」为光荣。

台湾ê土地并m̄是日本神所创造，人民属中华民族。自从日本侵占台湾以了后，日本政府就极力推销日本神道beh来同化岛民。第二pái世界大战时，为加强战力，积极推行「皇民化运动」来控制岛民ê思想kap宗教。因此(一)tī生活上强制岛民讲日本话，禁止发行汉字报纸。(二)tī宗教上要求家庭kap各项集会崇拜天照大神，遥拜日本皇室。并且烧毁真chē寺庙ê偶像。

对崇拜偶像ê一般人民来讲，多拜日本神无什么问题，但是对于敬拜独一真神ê基督徒来讲，to̍h是bōe-sái妥协ê。所以日本政府就宣言，对神社kap皇室遥拜是国民应尽ê「仪礼」，并m̄是宗教仪式。Án-ne曲解是非来欺骗国民，无视宪法所保障ê宗教自由。外国差会因此「神社问题」，无愿意hō͘学生去拜假神，tùi án-ne断然放弃所创办ê几所中学。

第二次大战末期，有一工一位管理人民思想ê「高等刑事」光临大甲教会，向我提出三个问题，故意设计陷阱，想beh整我。
伊讲：「天皇陛下kap基督何者为大?」
「天照大神kap上帝何者为大?」
「教育敕语kap圣经何者重要?」

这lóng是十分为难ê问题。我若无依信仰回答就是犯了不敬之罪。但是伊问我，我bōe-sái无回答。Beh安怎neh?

主耶稣bat讲：「lín ài灵巧像蛇，驯良像鸽子。」(马太福音十：16)

我回答：「您所提出ê问题属无仝范畴，我bē-tàng解答。这是属肉体kap灵魂，物质kap精神ê问题。物质kap精神怎样ē-tàng相比neh?ná准讲：「父母之恩比山koh-khah高，比海koh-khah深」。án-ne到底比山高几丈?比海深几尺?您讲得出来mah?

Tī圣经里耶稣讲：「我ê国不属chit世界」约翰福音(十八：36)基督教属灵魂，或谓精神世界，怎样ē-tàng kap物质世界相比?(注)。Tī日本帝国：天皇陛下siōng伟大，这是无人敢否定ê。但是我提醒您，宪法第一条讲：『天皇是神圣bē-tàng侵犯』。所以咱无应该该随便提伊ê事来讲，若无会犯不敬之罪阿」

伊听完chiah-ê话哑口无言，无言thang对。过一下á，伊起身讲：「失礼! 搅扰你了。再见!」像丧家之犬失意ê离去。Tùi hit-pái了后m̄-bat koh来chhōe我麻烦。「感谢主!」禁bē-tiâu大大ê松了口气。


注：作者将天皇kap基督以「属体kap属灵」来比喻，是为tio̍h巧妙应对á用。