《胡文池牧师kap布农族》

 | | | 转寄

信徒开赌场

作者 胡文池 2009.04.19

1947年，风和日丽ê春天，大约下晡二点钟ê时chūn我到大甲街外探访信徒tńg来时，发生了一件惊天动地ê事-

信徒房屋瓦斯桶大爆炸，楼房倒塌，死伤十gōa人。当时大楼顶聚赌ê五名赌徒mā变成乌面死尸坠下¨¨无一侥幸。

靠近礼拜堂ê路边，有一间脚踏车店，是信徒开设ê。

第二pái世界大战了后，人民生活困难，工业iáu未发达，所以真少有人骑o-to-bái，连新ê脚踏车mā看bē-tio̍h。Tī大马路上驶ê大部分是破旧ê铁马(脚踏车)，因此脚踏车ê seng-lí鼎盛，修车、补胎、充气¨¨，店主一工无闲到晚，因此真少来礼拜，lóng是chhōe藉口讲：
「seng-lí太无闲!工作bōe-sái无做。」
「太太去做礼拜mā是仝款!」
「我mā有叫gín-á去上主日学ah! 」
「横直我mā出了年捐、奉献钱了ah!」
藉口一大堆，m̄来聚会就有理由。

有一工下晡二点gōa，我出去探访会友，回程ê时chūn，经过这一间信徒开设ê脚踏车店，看tio̍h有七、八位农业学校ê学生tī店内，the̍h-tio̍h自来水铁管boeh hō͘店主熔接。Chiah-ê学生是我ê学生，我因此真熟。

我是牧师，kap学校有什么关系?

因为战后大家生活lóng真艰苦，信徒奉献金额mā无chē，牧师ê薪水微薄。佳哉，农业学校日人老师tńg来到日本，请bē-tio̍h英语教师，因此chit份职务真自然tek落tī我身上，我感觉这是一项难得ê机会，m̄-nā thang帮助家计，而且thang接触学生，传福音ê机会就koh-khah chē了。一举两得，非常欢喜!

我进入店内，问in来chia做什么，吩咐in tāi-chì办完了后， mài koh去街á游荡， tio̍h快快tńg去¨¨等二三句话。讲完我就离开，tńg来到教会去了。

未到一分钟，我tú tńg来到教会门口，忽然，辙隆大声一响，像二年前美军飞机空袭时投下ê大炸弹爆炸巨声!

奇怪!这是什么声音，转身行到大马路上，我看tio̍h tú-chiah离开ê脚踏车店楼房已经全部倒塌，尘土烟雾蒙蒙。我快步行过去，有真chē人óa过来，警员mā来了。

顿时人群聚集，有人搬开落落来ê木块，有人挖开瓦片¨¨现场一片零乱。尸体一个一个úi厝内搬出来，排tī马路上。有ê脚手支离、血肉雾雾无清，有ê头脑开花、杂乱一堆¨¨惨状hō͘人不忍目睹。无一下á，排tī大马路上ê血尸已经有七、八个了。重伤iáu未死ê mā有七、八位，lóng随时送到大甲唯一ê「上野外科」了。

现场四周，人山人海，围满了旁观者，议论纷纷。

了后，死里逃生ê学生讲：「因为店主要熔接铁管时，瓦斯放bē出来，伊the̍h烛火来检查电石桶，不慎引火爆炸，当然头一个死者是店主。死者大多数是农业学校ê学生。Iáu有一阵，大约五六位当teh楼顶聚赌ê人。Chiah-ê赌徒，日时不务正业，不时聚赌。Tī这楼顶，警察虽然看bē-tio̍h，thang算安全地带，in偷偷做不法ê tāi-chì，想未到竟遭遇tio̍h比监牢koh-khah惨ê死刑。

想tio̍h我本身，若m̄是主ê带领，真紧离开该车店，后果就不堪设想了!人ê生死常常发生tī一分钟之差。因我iáu有主ê工作，所以主就保留我ê生命。感谢主，o-ló主!