《胡文池牧师kap布农族》

 | | | 转寄

一双运动鞋

作者 胡文池 2009.04.12

伊-m̄是犹大，贪财自私，伊是大猷；伊-对家己khiām koh朴实，对上帝慷慨大方。

我tī大甲牧会期间，王大猷长老每tú-tio̍h礼拜日，真早就来到礼拜堂。伊虽穿插不值钱ê乌色粗布衫裤，却整齐清洁，看会出来是一位朴实、敬虔ê老信徒。伊ê脚上穿插运动鞋，煞无穿袜á。这双运动鞋kap ta̍k-ê无仝，并m̄是因为伊是当时ê名牌「华盛顿鞋」，有美国总统ê大名，却是这双鞋深藏tio̍h王长老伟大ê信仰kap i克己ê作为kap动人ê故事。

七十年前，工业iáu未发达，人人lóng是kui工赤脚不穿鞋。只有极少数富人、孔门弟子、书房老师chiah穿ē起一双布鞋。以前ê布鞋，顶面使用好看ê布料，男人用乌色，女人用彩色ê绸缎。鞋底是用数十层粗布，用人工一针一针、密密地缝成一块硬硬、厚厚ê鞋底。Chit种开了真长ê人工时间制成ê鞋，m̄-nā价钱贵得惊人，而且无实用，雨天bōe-sái穿，紧lah-sap koh紧破。

跋涉远路ê商人，因为伊经不起冬夏ê冷烧热，以及脚底磨损ê痛苦，只好买一双sio̍k ê稻草鞋来穿。

大猷长总是大甲地方有名ê大地主，mā是自耕农，伊虽然好额，to̍h是一位性情温和、勤劳、khiām ê人。伊常讲：「大富由天，小富由勤俭。」以伊ê经济富有来讲，m̄-nā一双、十双、甚至百双千双鞋，伊mā买得起，奈因伊khiām，谦卑ê天性，加上伊是一般人看做下等ê农人，非士绅显官，那有胆量，mā m̄敢向老祖宗借胆，tī平时mā穿起布鞋来。

工业发达以了后，橡皮制品纷纷出现，橡皮(台湾人叫伊树乳)做ê运动鞋mā应运á生，而且借用美国总统华盛顿ê大名为商标。Chit种鞋是鞋类ê大改革，m̄-nā价钱sio̍k，而且美观大方，十分受欢迎，一般人叫伊「华盛顿鞋」。

一、华盛顿佳ê美谈
一向khiām ê王长老，经不起家人ê怂恿，下定决心，mā顺tio̍h流行买来一双华盛顿鞋，感觉无比欣喜。谁mā m̄-bat想tio̍h，伊买这双鞋，并m̄是为tio̍h享受，或者提高身份，却是为tio̍h敬拜上帝之用。所以除非礼拜日m̄敢穿伊。而且由甲南农舍步行到大甲，伊ma7m7-kam坐火车，行路大约一小时ê路，途中必须行经新开垦ê溪底石头路，伊lóng是赤脚，beh到街市时chiah洗脚穿起运动鞋。妇人人笑笑á对伊讲：「王长老ah!你ê运动鞋为什么手theh8m7-kam穿neh?」王长老讲：「牧师娘，chit-ê您就m̄知影，溪底石头凹凸不平，鞋子容易坏，自我出生，造物主就赐hō͘我这双siōng自然、siōng真实ê『皮鞋』，永远穿不坏，运动鞋穿破总是ài开钱ah! 」

1934年，大甲实施市区计划，旧礼拜堂必须拆除。有一工牧师探访王长老谈起chit件事，王长老十分了解会友lóng是贫困者，无力负担重建新堂ê经费，就答应独自奉献一间新礼拜堂。因此出售良田一甲多，全数奉献为建堂之用，并且ta̍k工带伊ê次子王守信到工地监工。第二年，完成了一座全岛独一无二ê五层钟塔礼拜堂，伊kā这座神圣独有特殊ê新堂献hō͘了伊所崇敬ê神。

1935年4月，离大甲无远ê墩á脚发生惊天动地ê大地震，墩á脚礼拜堂全毁，附近ê教会mā lóng严重ê损坏，其他ê民房损失koh-khah惨重，惟独大甲礼拜堂保全完整，一时被称做奇迹，大家异口同声o-ló主!

二、菜脯就是伊ê高丽参
王大猷长老性情温柔，身躯强壮，忠厚寡言，但有时chūn mā真幽默。有一pái，我问伊：
「王长老身躯án-ne好，虽然年纪mā bē少，iáu ē-tàng tī田地工作，m̄知有食高丽参?或者食什么补药来补身躯无?」
「heh heh!什么补!」伊笑笑á讲「只有家己做ê菜脯lah!什么补!」

王长老每礼拜比其他会友早到教会，中顿未到饭店食饭菜，lóng是家己带饭包来食。伊每pái lóng躲到无人ê所在，独自享受午餐，无欢喜人家看伊食饭。有一pái某会友经过伊身边，顺续偷看伊所食ê饭，chiah发现伊果然只是食白饭配菜脯(to̍h是萝葡干)。

王长老tī厝mā爱食菜脯，有一pái伊ê媳妇mā证实讲：「家人tī桌顶享受鱼肉，伊却独自在墙边食菜脯，伊就是án-ne khiām ê人。」

虽然王长老不注重家己ê衣食，上帝iáu是特别祝福伊，赐伊长寿，享受伊一生快乐ê信仰生活八十七年：á善终归回天堂。上帝mā祝福王长老子孙，伊ê二个kiáⁿ儿就是王守勇kap王守信。王守勇是众人lóng知有名ê牧师，tùi日本同志社神学院kap同志社大学毕业，是当时牧师中siōng高学业、siōng有名气ê牧师。

顺续一提---一件siōng奇怪ê事，就是王牧师一连生了八位千金了后chiah得一公子。相反地，守信一连生了八位公子了后chiah得一cha-bó͘-kiáⁿ。

上帝ah!「你ê作为奇妙非凡。」(诗篇一三九：14)

三、另外ê美谈
王大猷长老自幼研习汉文，初tī马鸣埔经商，到壮年时chiah转业为农，所以伊虽是农民，无像当时一般农民是一个文盲。伊因老实、宽大；待人接物不kap别人斤斤计较，致使外人认为伊好欺负，传有口头语讲，「咱去食豆油膏」(音通大猷哥)。

伊做事谨慎不马虎。初次到礼拜堂听道时，数个月m̄敢饮用教会ê茶水。因为听信谣言。认为教会ê茶水是由信徒ê「心肝粉」泡成，会迷惑人。了后来渐渐悟道chiah决心信主，终身当长老。伊bat开设实费病院，救济贫苦患者，发扬基督博爱精神。