《胡文池牧师kap布农族》

 | | | 转寄

现代ê mah nah-我tī大甲教会时

作者 胡文池 2009.04.05

战时各项物资缺乏，尤其食物是由政府配给，实在无够用。人人lóng tio̍h买乌市米或地瓜来补贴。上帝却赐我够额食品，渡过难关。

主后1941年5月，我到大甲教会牧会，chit时因第二pái世界大战tú开始，物质渐渐缺乏，后来政府不得不改为配给制度。

布料mā lóng是按人数配给，是木质纤维制成(Fiber)，chit句英文念起来ná亲像中文ê「快破」，真正，洗不了几pái就破了。但是因我妹婿服务tī大布商行，阮一家人m̄-nā无穿过破烂ê衫裤，反tńg穿插真好ê布料。

战时ê食品特别缺乏，配给 ê米不jōa久就食完了，所以人人lóng买乌市米或地瓜来补贴。有ê人为tio̍h beh到南部买蕃薯签，竟被飞机炸死，实在可怜。阮kā小妹the̍h来ê高级丝缎来kap农民交换米，一套女装料thang换三斗米。大甲ê会友真chē是农民，in mā会送阮种种食物。有一户会友是做豆腐干ê，当时豆腐干mā是配给，这会友就时常the̍h破碎ê豆腐干来送hō͘阮食，虽然是破碎ê，营养煞仝款，横直煮ê时chūn，mā ài kā完整ê切细，食ê时chūn koh-khah tio̍h嚼碎，所以虽然是破碎ê豆腐千，阮iáu是以十二万分ê感谢心来接受伊。

大甲附近有一片真大ê山坡地，为教会会友所有，伊向我建议，boeh免费将土地借我种土豆。Hō͘阮感谢不尽，我、妇人人kap四个gín-á马上动员，每工上山种土豆。到收冬时，总共收了三大麻袋ê土豆(大约二百台斤)。阮每顿不致缺乏佐餐，有时食煮土豆、有时食炒土豆，人人爱食，土豆内充满脂肪kap卵清质，hō͘阮bōe营养不良á破病。

当时战争连绵不断，飞机时常来轰炸，所以政府命令台北市民疏散去田庄所在。因此大兄mā避难到大甲街外khiā起，伊看tio̍h我收成三大包土豆，就借用我所种土豆ê土地，mā开始种土豆，仝款ê劳力，同量ê土豆种子，播种tī同一面积ê土地上，结果所收成ê，煞只有我ê十分之一，hō͘伊大失所望。

原因何在?所无仝ê，是我信靠上帝，á伊煞信靠家己。

「tī beh暗á，in有肉食，tī清早，in有够额ê饼食。Án-ne，in就知影我是上主，是in ê上帝。」(出埃及记十六：12)